• Home
  • Agama
  • Jamita Minggu Evangelium 16 Juni 2019, TRINITATIS, HASITOLUSADAON NI DEBATA: Haporseaon na Manghorhon Paluahon (1 Musa 22:1-19)
KSP Makmur Mandiri
Minggu, 16 Juni 2019 08:53:00

Jamita Minggu Evangelium 16 Juni 2019, TRINITATIS, HASITOLUSADAON NI DEBATA: Haporseaon na Manghorhon Paluahon (1 Musa 22:1-19)

BAGIKAN:
Edward Tigor Siahaan
Pdt Dr Robinson Butarbutar
Oleh: Pdt Dr Robinson Butarbutar, Ketua Rapat Pandita HKBP

Hamu angka Dongan sahaporseaon,
Di Minggu tanggal 26 Juni 2019 na salpu, di Minggu Rogate, sude do hita ruas ni Huria Kristen Batak Protestan manangihon hatani Debata sian Lukas 11: 1-13, i ma Tangiang Niajarhon ni Tuhanta Jesus Kristus tu hita, Tangiang Ale Amanami. Sada sian bagian ni tangiang i, i ma "Unang hami togihon tu pangunjunan" (Lukas 11:4; patudos Mateus 6: 13a).  Tingki i, siala ni jempek ni tingki jala siala ni hurang ni parsitutuon ni pamerengon di jamita ndang apala nilehon tingki na umbuk tu isi ni bagian nin Tangiang Niajarhon ni Tuhanta i. Alai nuaeng, di Minggu Trinitatis tgl 16 Juni 2019 sadarion apala dibona ni Turpuk 1 Musa 22: 1-12 on, migor nalnal do di simalolongta jala tangkas manghuling tu sipareonta ayat sada i na mandok songon on: "Jadi dung salpu angka jamita ondeng, diunjuni Debata ma  si Abraham."
 
Mansai nalnal ayat 1 on. Boasa ma di bagasan minggunta minggu Trinitatis on migor manghuling ayat 1 on tu hita: Diunjuni Debata si Abraham?

Parpudi on di tongatonga ni Hakristenon di portibion masa do sada perdebatan na mansai mohop siala diusulhon Paus ni Huria Katolik, Fransis, tu Konperesni ni Bishop Katolik di Italia dohot di Prancis taon 2017 na salpu jala gabe diputushon muse di tgl 6 Juni 2019 na salpu. Dia ma na diusulhon Paus Fransis i jala diputushon gabe ajaran ni Katolik? I ma na mangihut on: Manguba hat ani tangiang niajarhon ni Jesus i naung dua abad ne ma dihangoluhon angka siihuthon Jesus di portibion, manguba sian na mangihut on: "Unang hami togihon tu pangunjunan", gabe "Unang loas hami madabu tu bagasan pangunjunan." Boasa? Ala didok roha ni Paus Fransis na ndang Debata mangunjuni na porsea i, alai Sibolis i do.  Angka na so sapandapot dohot Paus Fransis mandok dao do terjemahan ni Paus i sian hata asli, hata Gorik ni tangiang niajarhon ni Jesus i. Holan pasauthon nidok ni roha ni Paus i do i, ndang unduk tu terjemahan na jumonok ni hata asli ni Gorik i. 

Sada sian ahli na manulak terjemahan ni Paus Fransis i i ma Damee Mary Beard, Professos Regius ni Universitas Cambridge, Inggris. Molo taida tu Jakobus 1: 13, "Unang ma didok manang ise, jumpa tarunjun ibana: Na tarunjun do ahu sian Debata! Ai ndang masa di Debata pangunjunan tu hajahaton; ndang diunjuni Ibana manang ise", boi antusan do sibonsiri ni pingkiran ni Paus Fransis i, i ma pasidingkon parsalisian pangajarion taringot tusi di Bibelta i. I ma na ginoaranna laho patupa harmonisasi ni angka ajaran haporseaon di Bibel i. Dos do i na binahen ni angka na mengharmonisasihon pangajaran ni apostel Paulus taringot tu hatigoranta di jolo ni Debata marhite haporseaon, dohot pangajarion ni panurat Jakobus na mandok haporseaon na so marpangulaon na mate do. Molo tong terlibat do Debata di hamamasa ni pangunjunan di diri ni sasahalak, songon na masa tu si Job, manang di diri ni torop halak di portibion, songon, ba na diloas Debata do sibolis i mangunjuni. Ndang apala Debata i sandiri na mangunjunisa. I do umbahen na nang na niadopan ni Jesus uju di Palestina, Sibolis i do na mangunjuni Jesus, ndang Debata.  

Alai na so boi soadahononta di pengalaman ni Jesus di hamamasa ni pangunjunan binahen ni Sibolis niadopanna i i ma hasintongan on: "Tondi ni Debata do na manogihon Jesus tu halongonan. Disi ma diunjuni Sibolis i Jesus" (Ida Mateus 4: 1-2, Markus 1: 12-13, dohot Lukas 4: 1-2). Songon i do tong molo taida di Padan Narobi, isara na masa tu si Saul, dung ditadingkon Tondi ni Tuhan i ibana, ro ma tondi na jahat na sian Debata mangingani ibana dohot mangugaisa (1 Samuel 16: 14-16). 

Asa, sintong do terjemahan na sai laon di tangiang niajarhon ni Jesus i: "Unang hami togihon tu pangunjunan," ala ni dokdok ni pangunjunan i. Ndang Debata na mangunjuni ia di Evangelium Mateus dohot Lukas, songon i ndang di Jakobus i. Sibolis i do na mangunjuni Jesus.

Alai paima jo. Ndang marlapatan na taparsiajari sian evangelium Mateus, Markus, Lukas nang surat Jakobus i na so adong di Bibel i hamamasa na Debata sandiri na mangunjuni naporsea i. Ibana do di pengalaman ni si Abraham na mangunjuni naporsea di Ibana i.  Alai, songon na taboto di pengalaman ni si Abraham i, molo Debata na mangunjuni, impolana laho umboto haunduhon tu Debata do, jala laho umboto manang na humolongan do, umbahiaran do hita tu Ibana manang ndang. Humolongan do hita tu Ibana manang tu angka pasupasu na pinalumehonNa tu hita. Ai, songon na taida di rumang ni pamanghulingon ni Debata tu si Abraham, tangkas do ndang marsangkap na buruk Debata di pangunjunan pinamasaNa tu si Abraham i. Dijou Debata goarna dua hali: "Abraham, Abraham."  Di tradisi Israel dohot angka rabbi ni Israel, molo dijou goar ni sasahalak pola dua hali ia joujou sisongon i ndang sihabiaran, alai joujou holong do i, jala joujou laho patoguhon do i. Songon i do joujouNa nang tu si Jakob, Musa dohot si Samuel (Kej 46: 2, Kel 3:4, 1 Sam 3: 10). 

Jala songon na taida di ujung ni turpuk 1 Musa 22: 1-12 i, ndang diloas Debata si Abraham maneat anakna si Ishak i. Jala molo taida di udut ni ayat 12 i (i ma ayat 13-19 i), siala na naung dijumpangi Debata hadirion ni si Abraham nasongon i, diulakhon Debata ma manguarihon uarina tu si Abraham: "Sai pasupasuonku ma ho, jala patoroponku situtu pinomparmu, sobokkon bintang angka na di langit, jala sobokkon rihit angka na di topi ni laut, jala teanon ni pinormarmu sohot hut ani angka musuna."

Ala ni i, molo masa songon niadopan ni si Abraham di ngolunta, i ma diunjuni Debata hita laho umboto jala laho lam patoguhon pangoloionta tu Ibana, i ma di pardalanan ni ngolunta, boi ma tatiru na binahen ni si Abraham i. Dia ma i?
Borat do rumang ni pangunjunan sian Debata na marsangkap na denggan i:
"Buat ma anakmu na sasada i, haholongan ni roham, si Isak i, jala togihon ibana tu tano Moria, jala pelehon ibana disi bahen pelean situtuongon tu sada dolok, sipaboanku disi").
(Hita halak Batak na marfalsafah hagabeon, nunga boi taantusi tangkas ni hinadokdok ni mangoloi pangidoan ni Debata on.) 

Dung diida Debata na  dihabiari si Abraham do Debata marhite na so diolani ibana anakna na sasada i maradophon Debata, lapatanna diprioritashon si Abraham do haunduhon tu soar ani Debata sian mangolani anakna i, marhite suruanNa dijou Debata ma muse goarna padua halihon sian banua ginjang mandok songon on: 
"Unang laho tanganmu tu dakdanak i, jala unang bahen manang aha tu ibana" (ayat 12).
Tangkas  do tutu na dihabiari  si Abraham Debata, i ma songon na digurithon di ayat 3-10, i ma: marsitutu mangulahon pangidoan ni Debata sadenggandengganna. Tarida do i marhite angka on:

Parjolo, dipasogot si Abraham ma hehe manogotna i laho patupahon pinangigo ni Debata i (ayat 3): "Dipalanoi halodena, diarahon dua halak napposona rap dohot si Isak anakna I, ditabai soban manutungi pelean I, dung I borhat ma ibana tu dolok nidok ni Debata tu ibana."

Paduahon, holan ibana dohot si Ishak do tu dolok, ndang dohot dua naposona i. Ibana  sandiri do maniop api dohot raut sada, si Ishak ma manghunti soban i (ayat 5)

Patoluhon, di na ro sungkunsungkun sian si Ishak anakna i na manungkunhon tu ibana dia do pelean situtungon i denggan do dialusi si Abraham mandok pilliton ni Debata do sada birubiru (ayat 7-8). Didok ibana on atik pe ndang adong didok Debata tu ibana na songon i ma bahenon ni Debata. Alus na marbisuk.

Paopathon, ditali ibana si Ishak, diampehon tu langgatan pelean i, dipatoltol tanganna mambuat raut laho maneat anakna I (ayat 10).

Sirimangrimangonta:
Ala ni i denggan do di hita angka na porsea di Debata Sitolusada i pamanathon di ngolunta siganup ari, manangiangkon na dua on:
Tangiang niajarhon ni Tuhanta Jesus Kristus, unang hami togihon tu pangunjunan pinamasa ni pangago i.

Tangiang asa di na diunjuni Debata hita, asa satia hita tu Ibana, unang baliksa naung pinalumehonNa i tu hita gabe mambuat inganan ni Debata. Di partingkianta sinuaeng nunga tung balga situtu pengaruh ni pasupasu na pinalumehon ni Debata tu hita i manait hita tu pangoloion tu pangidoan ni Debata tu hita. Ala taloas songon i, ba ndang tadai di ngolunta songon nidai ni si Abraham i: 
"Sai pasupasuonku ma ho, jala patoroponku situtu pinomparmu, sobokkon bintang angka na di langit, jala sobokkon rihit angka na di topi ni laut, jala teanon ni pinormarmu sohot hut ani angka musuna."

Sai dipasupasu Tuhanta ma hita mangarimangrimangi sada habisuhon partondion na tadapot sian 1 Musa 22: 1-22 i: Diunjuni Debata si Abraham umboto na prioritas do di Debata lomo ni roha ni Debata, ndang lomo ni rohanta. Siala ni i gabe tarpasupasu ibana.  Songon i do tong ngolunta molo tatiru na binahen ni Abraham uju diunjuni Debata na so manogihon ibana tu hasusaan ni ngolu, alai laho manogihon ibana tu ngolu na gok pasupasu. Syaratna: Umoloan hita maradophon Debata sian maradophon angka na tajalo sian Ibana, angka pasupasu na adong di portibion. Amen.(**)

  BeritaTerkait
  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    tahun lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  • Jamita Evangelium Minggu Exaudi, 2 Juni 2019 "Pandonganion ni Jahowa di Ngolu ni Angka na Satia" (Daniel 3: 21-29)

    2 bulan lalu

    Oleh: Pdt Dr Robinson Butarbutar, Sian Parsameanta, STT-HKBP Pematangsiantar. WA/HP: 0812-62472015Hamu angka dongan sahaporseaon, nantoari, tanggal 1 Juni 2019, 74 taon ma dung tubu Pancasila di tangg

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    2 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium, Minggu Misericordias Domini 15 April 2018: "Mangolu di bagasan Asi ni roha ni Debata"(Mika 7: 14-20)

    tahun lalu

    Oleh: Pdt. Dr. Robinson Butarbutar, sian Parsameanta, STT-HKBP Pematangsiantar.1.Dung songon i tangkas jala bagas di ari Minggu na salpu di panghulingi hata ni Tuhan Jesus Kristus ganup siseanNa mamun

  • Minggu IX Dung Trinitatis, 29 Juli 2018: Evangelium, Mateus 16: 24-28 "Gabe Sisean Namarsihohot Mangihuthon Jesus"

    12 bulan lalu

    Oleh: Pdt Dr. Robinson Butarbutar, Parsameanta, STT-HKBP1.Sian tingki tu tingki, mamungka di tingki mangula di Palestina dope Tuhanta Jesus Kristus nidonganan ni angka siseanna na sampulu dua i s

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb