• Home
  • Agama
  • Jamita Evangelium di Ari Jumat, 30 Maret 2018 Parningotan Ari Hamamate ni Tuhan Jesus, EvangeliumJohannes 19: 28-37 "Panotnoti Jala Haposi Na Tarsilang i"
KSP Makmur Mandiri
Jumat, 30 Maret 2018 05:18:00

Jamita Evangelium di Ari Jumat, 30 Maret 2018 Parningotan Ari Hamamate ni Tuhan Jesus, EvangeliumJohannes 19: 28-37 "Panotnoti Jala Haposi Na Tarsilang i"

BAGIKAN:
Ist
Pdt Dr Robinson Butarbutar
Oleh: Pdt. Dr. Robinson Butarbutar, Parsameanta, STT-HKBP Pematangsiantar


Patujolo
Di taon 2018 on, di tonga-tonga ni Parningotanta di Ari Hamamate ni Tuhan Jesus di hau pinorsilang i hira-hira 2015 taon na salpu, dienet jamita sian sada evangelium na parpudi disurathon sian evangelium na opat i, i ma sian Johannes 19: 28-37, i ma evangelium na disurathon dung jolo disurathon jala dipangke angka huria na parjolo i angka evangelium natolu nari, i ma Markus na disurat taon 69/70, Lukas di taon 80-an, dohot Mateus di taon 85 dung Kristus. Gumodangan do satolop angka peneliti mandok evangelium Markus do na tumua sian na tolu i, jala panurat ni evangelium Lukas dohot Mateus mamangke evangelium Markus songon sumberna. 

Molo tapamanat barita taringot tu hamamate ni Jesus di hau pinorsilang sinurathon ni tolunsa evangelium asing ni evangelium Johannes i boi do dohononta na  niondolhon ni nasida natolu i, i ma barita hamamate ni Jesus na tung parir jala dangol situtu do. Di hata Indonesia boi dohononta na ia hamamateNa sangat tragis. Tragis do hamamate ni Anak ni Debata i. Natigor diuhum dohot dalan na mansai jorbut, diparsilangkon! Jala Debata na marsuru Ibana hohom. Portibion mangholom. Ndang adong na manjaha barita i na so tariluilu. Isara soara na ruar sian simangkudap ni Jesus na mangihut on di hau pinorsilang i dohot soara na balga situtu (Gorik: phone megale), sada soara na tong dipangke parPsalmen na marsoara na gogo tu Debata siala dihilala Ibana na ditadingkon Debata Ibana di parungkilonna, soara na mansai gogo, sampe pola nang hirehire na di bagas joro di Jerusalem i maribak umbegesa.

"Ale Debatangku, Debatangku, boasa tadingkononmu Ahu" (Markus 15:34), 
jala dung i marsoara na gogo (Gorik: phone megale) ma tong Ibana laos tos ma hosanna (Markus 15: 37). 

Songon i ma panaonon ni Jesus manghophop pardosa i di hau pinorsilang i.  
Alai marasing sian pangondolon na songon i, atik pe adong do tong pangidoan ni Jesus na maus asa dilehon aek inumonna, ia panurat ni evangelium Johannes on marnida hamamasa ni hamamate ni Jesus di hau pinorsilang i tardao do sian persitiwa tragis songon na ginurithon ni evangelium na tolu i. Sabalikna digombarhon do na ia hamamate ni Jesus di hau pinorsilang i sada peristiwa klimaks di pardungdung ni sangkapNa ro tu portibion. Lapatanna, di hau pinorsilang i do didungdung ibana singkop misi haroroNa tu portibion, asa ganup na porsea di Ibana dapotan hangoluan na manongtong. I do umbahen na ia hata na ruar sian simangkudapNa di hau pinorsilang i ndang songon na jinouhon ni parPsalmen i (Psalmen 22: 2), alai imbaru, i ma: "Nunga tardungdung na tinuju" (Gorik: tetelestai = Indonesia: tujuan tercapai. Terjemahan hata Batak: 'Nunga marujung'. Terjemahan Indonesia: 'Sudah selesai'. Di terjemahan Bibel Batak dohot Alkitab Indonesia i adong dope panjahaan na ber- nuansa, na mararti na tragis. Alai hata aslina ndang adong be, tetelestai). Saurdot do i tu pangondolan ni evangelium Johannes na mandok na ndang adong na boi mambuat hosa ni Jesus sian ibana.

Dipasangap do Jesus di hamamateNa i. Sian lomoNa do i dilehon (Joh 10:18). Domu tusi do umbahen na secara sadar do Tuhanta Jesus pasahathon tondiNa dung dipaunduk simajujungna (19: 30).

Siala ni i do, molo tapamanat di ayat 28-37 i tangkas do dilapati panurat na ia angka na masa di hau pinorsilang i ndang masa boti, ndang kebetulan, ndang di duru ni sangkap ni Debata, alai nunga tibu disangkapi Debata marhite angka panurirangNa na manurirangkon di tingki na robi dia na ingkon adopon ni Jesus di hau pinorsilang i, i ma songon na tarsurat i do i sude masa. In God's Plan. Lapatanna, hira na mamutar film naung dibahen di tingki na salpu do angka na niadopan ni Jesus i, alai nuaeng masa. Di tingki na salpu do disangkapi Debata na diadopi Jesus i. Di silang i do digohi, didungdung naung  sangkapan ni Debata. Jesus do na manggohisa, mandungdungsa.

Lapatanna, molo ditait panurat evangelium Johannes on hita ruar sian sada pangantusion di hamamate ni Jesus na dangol jala parir situtu, alai ditogu hita tu sada pangantusion na marasing sian i - i ma na mandok di hamamate ni Jesus di hau pinorsilang i do didungdung Jesus sangkap haroroNa - ba nunga ingkon ndang adong be loasonta manang  aha laho mangorui pos ni rohanta sian Jesus. I do umbahen na dipillit tema ni jamitanta na mangihut on: "Panotnoti jala haposi na tarsilang" i, ai disi do mission impossible gabe possible, misiNa na so mungkin i nian di roha ni jolma dohot portibion gabe mungkin, i ma paluahon pardosa sian dosana be. Siala ni i do umbahen na diondolhon evangelium Johanes na ia hamamate ni Jesus di hau pinorsilang i hamuliaonNa do i.  
Boasa mansai porlu tona barita na uli di ari parningotan hamamate ni Jesus nuaeng di hita jolma nang na porsea na bosur di angka peristiwa ngolu ni jolma na tigor diuhum, na so mardosa mate boti ala ni porang isara di Syria, ringkot do sulingkitonta.

Digohi, didungdung Jesus do misina di hau pinorsilang i.
Parjolo, silang i manggohi manang mandungdung sangkap ni Jesus do (ayat 28). Di ayat on tung tangkas do dipabotohon panurat evangelium Johannes isi ni roha ni Jesus. Disurathon songon on: "Jadi dung diboto Jesus, naung tardungdung sude (Gorik: panta tetelestai) dipatupa Jesus ma tolu na mansai ringkot. Disoarahon panurat na hinaporseanna nang na hinaporseaon ni huria di Kristus i: 
Naparjolo mambahen pangaradeion parpudi, i ma mangido minum marhite na mandok 'maus ahu.'
Napaduahon, dung dilehon tu pamanganna tuak na asom na naung digohi limut (ayat 29), jala dung dijalo ibana dengan sadar, ndang dipaksahon, disoarahon ibana ma pernyataan kemenangan tu pinggol ni naung mamparsilangkon ibana: panta tetelestai, saluhut nunga tardungdung. Sude na sinangkapanNa nunga saut, marujung denggan tardungdung. I do lapatan ni tetelestai. Mangalo silang na naeng paujunghon Ibana, didok tu na mamparsilangkon, "apala marhite na disilangkon hamu ahu, hudungdung do misi-ku."

Napatoluhon, paundukhon simajujungna, dung i pasahathon tondina (ayat 30). Ndang adong soara na gogo na joujou. Alai tenang do Jesus ala nunga tardungdung sude sinangkapan ni Debata marhite haroroNa marhite panaononNa di hau pinorsilang i. 

Asa dung tardungdung pe impola ni na sinangkapan ni Debata, asa dipatupa Jesus pangaradeion tu hamamateNa di hau pinorsilang i. Apala di panaononNa di hau pinorsilang i do didungdung Debata sangkap haroro ni Jesus tu portibion: Manobus dosa ni portibion. Gabe taingot ma soara panindangion ni si Johannes Pandidi taringot tu Jesus: "On do birubiru ni Debata na mamorsan dosa ni portibion" (Joh 1:29).

Paduahon, saurdot tu panindangion ni na tarsurat i dohot na marnidasa do na masa dung marujung ngolu Jesus (ayat 31-37). Molo di ayat 28-30 diondolhon panurat misi ni Jesus naung tardungdung di hau pinorsilang i, di ayat 31-37 taida dipatuduhon panurat na saurdot  tu na tarsurat di buku na badia na masa tu Jesus, jala saurdot tu panindangion ni na marnida na masa i do i na sinurat ni evangelium Johannes on. Dia na masa i? Jala dia na sintong mangihuthon na marnida na masa i?

Ndang songon na dipamasa tu duansa dongan ni Jesus na tarsilang i, ndang dirosak be haehae ni Jesus naung mate i, ai dung ditullanghon sada sian soldadu mundimundi tu abarana migor ruar mudar mardongan aek, i ma tanda ni naung mate Jesus. 

Songon naung disurirangkon di padan na robi do naung pinatupa ni soldadu i: "Ndang jadi ponggolon holiholida" (2 Musa 12: 46) dohot "Berengonnasida do na tinullangnasida i" (Sakaria 12: 12).

Boasa porlu di panurat dua panindangion taringot na naung tangkas mate Jesus di hau pinorsilang i, jala siala ni i ndang porlu be ingkon dirosak be haehaena di partingkian ni Jesus dohot di partingkian ni panurat evangelium Johannes?

Di partingkian ni Jesus, ndang diloas ugamo Jahudi adong pamatang ni na monding di ginjang ni tano dung pukul 18.00. Ingkon ditanom do na monding i. 
Di partingkion ni panurat dohot di partingkianta nuaeng mansai ringkot do i. Boasa? Di partingkian ni si Johannes sada bukti na togu do i na sintong naung mate Jesus. Ndang berpurapura mate Jesus.  Sintong do jolma Jesus. Sintong mate. Ndang songon nidok ni parfilsafat Gnosticisme na mandok ndang 100 persen jolma jala 100 porsen Debata Jesus.

Di partingkianta nuaeng, mansai porlu do on ala adong do peneliti na mandok na so adong haheheon ala ndang dung Jesus ditanom. Mangihuthon ibana ia uhum ni Romawi mandok apala ingkon dipasombo do naung tarsilang i di hau pinorsilang asa dipangan angka pidong na martongatonga langit, ndang adong tadingtadingna asing ni holiholina. I do dalan ni Kaisar pabiarbiarhon halak untuk mangalo pamarenta. Alai laho mandok pandapotna i ditutup peneliti i do simalolongna tu hasomalan ni ugamo Jahudi na diargahon uhum Romawi, i ma na so jadi pamatang ni na monding di ginjang ni tano dung pukul 18 di ari Sabat i.

Panulingkiton na umbagas di jamita: Panotnoti jala haposi ma na tarsilang i.

Parjolo, di partingkianta nuaeng, era revolusi digital na paopathon nuaeng, mansai ringkot do hita togu manotnoti  jala manghaposi na tarsilang i, na mandok na ia di silang i nunga didungdung Ibana sude na sinangkapanna ro tu portibion, i ma paluahon sude pardosa di portibion sian dosa dohot sian hamatean.

Dia huroha dihaporseai jolma i nuaeng di era revolusi digital i, na dipatogu parbinotoan teknologis naung didungdung jolma i, isara teknoloi medis, teknologi bio, teknologi nano, teknologi robot. Sude angka teknologi i nuaeng mandok sude nama na pinarungkilhon ni jolma i boi aluson ni jolma i marhite angka teknologi i. Ndang diharingkothon jolma i be pangantoion dohot pangurupion ni Debata tu jolma i laho mangadopi angka parungkilon hajolmaon. Ai angka masin i pe nuaeng nunga boi mangalehon alus na denggan tu parungkilon ni jolma i, so marimbr nang parungkilon roha, tondi. Nunga ummalo masin i sian jolma na mambahen ibana mangantusi dia parungkilon ni pamatang nang parungkilon ni roha dohot tondi ni jolma i. 

Di partingkian sisongon i, ro nuaeng tona sian jamita i asa hot ma hita manatap dohot manghaposi Jesus na tarsilang i di na mangadopi parungkilon dosa na lohot tu hajolmaon i. Panontoti ma na tarsilang i, ai di silang i do didungdung Debata sangkapna marhite hamamate ni Jesus, i ma mamorsan dosa ni portibion. Di silang i do Jesus dipasangap. Tahaposi ma na pinatupa ni Jesus disi: Mamorsan dosanta be, gariada dosa ni portibi on.

Napaduahon, alai laos dohot do tong keteladanan ni Jesus na tenang mangadopi hamamatena i, na mandok apala di hau pinorsilang i do tardungdung Ibana sude na sinangkapanNa tu portibion dohot na denggan pasahathon hosana tu Debata Amana siala nunga singkop tardundung sintasintaNa sitiruonta di ngolunta nuaeng di portibion. Apala di panaonon niadopanNa tuk Jesus mamereng na uli, i ma naung tardungdung sude sangkapna. 

Boi do hita ruas ni HKBP marsiajar sian Jesus na songon i, tarlumobi uju taida na parir situtu masa di ngolunta?  
Tuk do hita mandok tu dirinta nang tu na humaliangta na apala di na taadopi sada pangalaho siala na satia hita i do tardundung sangkap ni Debata di ngolunta? 
Boi do hita marnida saut sangkap ni Debata di ngolunta jala tardungdung hita sintasintaNa di dohot marhite ngolunta apala di na taida hira na talu hita? 
Mansai ringkot do angka siihuthon Jesus mangihuthon songon dia Jesus marnida hamateanNa di hau pinorsilang i uju taida hira na gagal hita. On ma na ginoaranNa tetap tegar, malah boi marhida na tumimbo, na umbolon jala na mansai ringkot apala uju taadopi na maol songon niadopan ni Jesus. Mansai porlu do on nuaeng on tarlumobi ala nunga masuk tondi na so haru saurdot tu panindangion ni Jesus, i ma na ginoaranNa teologi sukses. Teologi on mandok ganup na porsea ingkon sukses, jala molo ndang sukses ibana na marlapatan do i na so porsea dope ibana. Mansai porlu do on mangadopi tondi kompetisi na lam mansai timbo di ngolu ulaon di partingkianta nuaeng. Di partingkian si songon i na bahatan angka sundut na umposo na menyerah, putus asa, gariada pola rintik, ia so i maningkot, ala manghilala patimbo hu kompetisi ni adopanna, hape ibana ndang tuk kualifikasina.  Panotnoti ma tarsilang i, ai uju tarsilang i Ibana tarbahen Ibana do mangadopisa di bagasan ketenangan dohot hadameon.(*)
  BeritaTerkait
  • Jamita Evangelium, Pesta Parjolo Parningotan ni Haheheon ni Tuhan Jesus 1 April 2018: Gabe Sitindangi Haheheon ni Kristus (Ulaon Apostel 10: 39-43)

    3 bulan lalu

    Oleh: Pdt. Dr. Robinson Butarbutar, Sian Parsameanta, STT-HKBP PematangsiantarBarita nauli taringot tu haheheon ni Jesus Kristus sian hamatean nunga marrumangkun barita klassik di portibion mamungka s

  • Jamita Evangelium Minggu Pentakosta I, 20 Mei 2018 "Nunga Dilehon Debata Tondi Porbadia tu Nasa Bangso" (Ulaon Apostel 10: 44-48)

    satu bulan lalu

    Oleh: Pdt. Dr. Robinson Butarbutar, Parsameanta, STT-HKBP, PematangsiantarPatujoloSomal do di parmingguon parningotan di hasasaor ni Tondi Porbadia di angka huria di portibion nasailaon dienet ba

  • Jamita Evangelium, 26 Nopember 2017 Minggu Parningotan ni Angka Namonding, Turpuk: Mateus 25: 31-46 "Hangoluhon ma ngolu na manontong i."

    7 bulan lalu

    Oleh: Pdt Dr Robinson Butarbutar, STT HKBPSian mamungka mangula Jesus di Palestina sahat tu na tubu jala maherbang huriaNa di abad parjolo, sahat tu tingki on, nunga tung bagas diboto, dihaporseai, di

  • Jamita Evangelium Minggu IV Adven 24 Desember 2017, Lukas 1: 26-38: Debata Ro Mamboan Asi ni Roha"

    6 bulan lalu

    Oleh: Pdt. Dr. Robinson Butarbutar, Sian parsameanta, STT-HKBP PematangsiantarDi minggu Adven paopathon sadarion, marhite barita nauli sinurathon ni parbarita nauli jala teolog Lukas di bindu 1 ayat 2

  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

    3 bulan lalu

    Oleh: Pdt Dr. Robinson ButarbutarA. Dihasiholi Debata asa marlas ni roha jolma i.Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, ta

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet