• Home
  • Agama
  • Jamita Evangelium Minggu Exaudi, 2 Juni 2019 "Pandonganion ni Jahowa di Ngolu ni Angka na Satia" (Daniel 3: 21-29)
KSP Makmur Mandiri
Sabtu, 01 Juni 2019 19:48:00

Jamita Evangelium Minggu Exaudi, 2 Juni 2019 "Pandonganion ni Jahowa di Ngolu ni Angka na Satia" (Daniel 3: 21-29)

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar, Sian Parsameanta, STT-HKBP Pematangsiantar. WA/HP: 0812-62472015

Hamu angka dongan sahaporseaon, nantoari, tanggal 1 Juni 2019, 74 taon ma dung tubu Pancasila di tanggal 1 Juni 1945 i. Di tingki i di Pidatona na bersejarah di jolo ni angka ruas ni Badan Penyelidik Usaha Persiapan Kemerdekaan ni bangsonta dipatolhas Ir Soekarno do Pancasila, lima ojahan tu hatutubu ni sada bangso na naeng jala ingkon malua sian parhatobanon ni Bolanda sada satonga bulan dung i, 17 Agustus 1945. Sada sian ojahan pinatolhas ni Ir Soekarno i, i ma Ketuhanan yang Maha Esa. Di pidatona i, dipatorang ibana do lapatan ni ojahan ni Ketuhanan yang Maha Esa i, i ma na ia bangso na naeng malua sian parhatobanon na mansai leleng i ingkon gabe sada bangso na mar-Tuhan do. Ala sahat tu ombas i diboto Ir. Soekarno do na na marragam rumang ni haporseaon nang ugamo ni penduduk di seantero Nusantara i, dipatorang ibana do na na so jadi masipatoruan alai masiargaan ma angka penduduk Indonesia taringot tu haporseaon ni ganup. Ganup ugamo marhak do tubu di negara na naeng tubu i. Ganup penduduk marhak do patupahon angka ulaon parugamoon saordot tu na nihaporseaonna di tongatonga ni Indonesia Raya i. Na so jadi manang ise mamaksahon isi ni haporseaonna tu na asing. 

Di taon na dos di portibion jongjong do Persekutuan Bangsa-bangsa, jala tolu taon dung i, i ma di ari 10 Desember 1948 diparuar PBB ma na ginoaranna Piagam Hak-hak Azasi Manusia na mandok tu diri ni ganup jolma manisia lohot do hak-hak azasi na so boi gugaon manang butbuton ni manang ise. Sada sian hak-hak azasi ni jolma i, i ma hak marugamo manang marhaporseaon.  Ala ni i boi dohonon, dijoloani  bangsonta Indonesia do PBB manghasiholi dohot manghangoluhon hak azasi marugamo manang marhaporseaon manang dia pe.  Ala ni i do di Undang-undang Dasar 1945 Pasal pa-29-hon ayat paduahon didok do taringot tu tanggung jawab ni negara manjagahon hak azasi ni rakyat Indonesia marugamo: "Negara menjamin kemerdekaan tiap-tiap penduduk untuk memeluk agamanya masing-masing dan untuk beribadat menurut agamanya dan kepercayaannya itu."  Dipatogu ma i di TAP MPR No II/MPR/1978 taringot tu Ekaprasetia Pancakarsa. Mamungka taon na salpu diulakhon negara manghangoluhon i, marhite pajongjong dohot patoguhon ulaon ni BPIP.

Asa, dung taon 1945 sahat tu tingkion ndang tarjalo ni punguan ni angka bangso ni portibion be molo adong manang ise na manggugai dohot mambutbut hak ni hajolmaon marugamo. Atik pe songon i, ingkon torus do perjuanghonon ni jolma i hak azasi on, ai patar manang ndang sai adong dope jolma marsasahalak dohot marsasapunguan na so marsitutu mangargahon i.  Ala ni i do di tanggal 25 November 1981 diparuar PBB do sada Deklarasi Mansoadongkon nasa rumang ni Intoleransi dohot Diskriminasi marojahan tu ugamo manang Haporsreaon ni sasahalak (Declaration on the Elimination of All Forms of Intolerance and of Discrimination Based on Religion or Belief).  Laho patangkashon dalan mansoadonghonsa dipatorang do di deklarasi i 8 Artikel.  Bangsonta bangso Indonesia pe torus dope sahat tu tingki on mangalului angka dalan naummuli laho pasauthon i di parngoluon siganup ari di sandok luat di Negara Kesatuan Republik Indonesia on, ai sai adong dope di tongatonganta na so haru tangkas unduk tu hak azasi i di parngoluon siganup ari. 

Na dipatorang Ir Soekarno di jolo ni Badan Penyelidik Usaha Persiapan Kemerdekaan jala na naung tarsurat di UUD 1945 Pasal 28b i, ndang ditanda Nebukadnezar Raja ni Harajaon Babilonia na manggomgomi di taon 605 - hira-hira 562 andorang so Kristus, naung manaluhon bangso Juda dohot mangalengsehon kota Jerusalem di taon 586 andorang so Kristus.  

Dipaksa ibana sude natorop nirajaanna manomba debatana, i ma sada ganaganaan sian sere, timbona 60 elak (i ma 18.288 meter) jala bidangna  6 elak (i ma 1,82 meter), ndang marimbar halak Jehuda na mian di Babilonia, na mangihuthon haporseaonnasida ndang jadi nasida manomba debata ganaganaan. Manang ise na so mangoloi parenta ni raja i ingkon uhumonna, i ma didabuhon tu Liang Pamurunan na marnalanala (Daniel 3: 6, 22, 26): Tutungonna. Adong tolu sian halak Jehuda na tarbuang i na so olo unduk tu parrenta ni raja i, i ma si Sadrakh, Mesak dohot si Abednego.

Umbahen na unduk pe nasida ndang ala dihaporseainasida na paluaon ni Debata do nasida sian tangan n agogo ni Nebukadnezar i. Alai ala di nasida ndang jadi paksaon manang ise manomba debata/Debata ni manang ise. On ma didok nasida: "Molo lomo roha ni Debatanami, na huoloi hami, sai paluaonna do hami sian liang pamurunan na marnalanala i, dohot sian tanganmu, ale rajanami. Alai nang so lomo rohana, ingkon botoonmu do, ale rajanami, na so olo hami mamele tu angka debatamu manang marsomba tu ganaganaan sere, naung pinajongjongmi" (Daniel 3: 17-18).  Dung diida raja Nabukadnezar na didongani Debata do tolunsa si Sadrakh, Mesak dohot si Abednego sian api pamurunan i (Daniel 3: 24-28), gabe diboto ibana ma na so jadi patupaonna be songon i. 

Mangula do Debata mampartahanhon hak azasi marugamo ni si Sadrakh, Mesak dohot Abednego dohot hak azasi manulak pamaksaon ni Nebukadnezar mambutbut hak azasi nasida: na so jadi paksaon sasahalak manomba debata manang dia pe tahe. Mangula Debata paluahon na satia manomba holan Ibana. Diida raja i na adong sahalak asing ni na tolu i na dihaporseai ibana naung sinuru ni Debata ni natolu i, i ma Debata Jahowa, paluahon nasida (Dan 3: 28). Laos sian pamangan ni raja i do ruar hata on taringot tu panulahion ni tolunsa tu pamaksaan manomba debata sileban sian sere na pinatupa ni raja i: "Pinuji ma Debata ni si Sadrak, si Mesak dohot si Abednego, naung marsuru suruanna asa paluahon naposoNa, angka na marhaposan tu ibana, gabe ndang dioloi patik ni harajaon, tung diseahon do daging nasida, asal unang mangoloi manang marsomba tu debata sileban, dungkon nit u Debatana" (3: 28). Ala nunga diboto raja i lomo ni roha ni Debata Jahowa, i ma na so jadi paksaonna manang ise manomba debata sian sere pinajongjongna, jala na dipalua Debata do na so olo manomba debatana i, di ujungna gabe diparuar ibana ma sada uhum na mangorai manang ise manginsahi Debata ni si Sadrak, Mesak dohot Abednego, ai borat do uhum tu na manginsaihisa, i ma "Tanggoan, jala bagasna gabe bagas partangkalan."  Gabe diondihon raja i ma hak ni tolunsa manomba Debatanasida. Gabe dialo ibana ma na manginsahi Debata ni tolunsa, uhumon ma manang ise na manginsahi Debata Jahowa. 

Asa, tangkas do sian pengalaman ni raja Nebukadnezar dohot tolu na satia tu Debata Jahowa marhite na manulak manomba ganaganaan i, dua na mangihut on: Na parjolo, diondihon Debata do na satia tu Ibana.

Napaduahon, dialo Debata do nasa na mambutbut hak azasi ni sasahalak manomba Ibana.       Ala ni i, ala penduduk ni portibion nunga manjangkon Piagam Hak-hak azasi manusia manomba na hinaporseaonna jala nunga adong Deklarasi Mansoadongkon (eliminasi ni) nasa rumang ni intoleransi dohot diskriminasi ala ni parugamoon manang haporseaon ni PBB (1981) songon halak Kristen di portibion dohot di NKRI na mar-Pancasila, dohot mar-UUD 1945 na mandok tanggung jawab ni negara do "menjamin kemerdekaan tiap-tiap penduduk untuk memeluk agamanya masing-masing dan untuk beribadat menurut agamanya dan kepercayaannya itu" taulahon ma na mangihut on:

Ndang jadi hita mambutbut kebebasan ni manang ise donganta jolma laho manomba na nihaporseaonna. Negara songon tangan ni Debata mangalo hita molo tapatupa i.

Ndang jadi hita, patupa pangaleaion tu na hinaporseaan ni donganta jolma. Negara songon tangan ni Debata mangalo hita molo tapatupa i.

Ndang jadi hita mangaloas adong manang aha dohot manang ise mambutbut kebebasanta manomba na tahaporseai, i ma Tuhanta Sitolusada i.  Negara songon tangan ni Debata mangurupi hita molo tapatupa i.
Ndang jadi hita mabiar, alai satia ma hita manomba Debata Sitolusada i, ai satia do Ibana mandongani dohot paluahon hita sian rumang ni nasa pangoraion ni  panombaannta tu Ibana. Debata palua hita sian angka i. Negara songon tangan ni Debata mangondihon hita patupa kebebasanta manomba Ibana.

Tauduti ma rap dohot angka donganta anak-anak bangsa manosoi negaranta asa satia patupahon Undang-undang Dasarta pasal 29 ayat 2 i. Songon tanggung jawabta tu negara, ingkon uruponta negara mangalo manang ise na naeng mambutbut kebebasanta marTuhan.
Hiras ma rohanta maniru si Sadrak, Mesak dohot Abednego na satia manomba Debata. Debata do donganta disi. Satia do Ibana palua hita sian nasa mara na mullop disi.

Di pardalanan ni huria di portibion andorang so 1945 nang dung i, ndang holan angka parugamo na asing, alai dohot do angka huria patupa na dos songon na binahen ni si Nebukadnezar na mamaksa na asing manomba debata/Debata nasida marhite marragam dalan. Gok sejarah ni huria na patupa na songon i. Isarana, Galileo Galilei di abad pa-17-hon na diuhum huria ala patolhashon pamingkirion/haporseaon na maralo tu pamingkirion/haporseaon ni huria. Bahat do tong diuhum huria angka naporsea na so sapamingkirion dohot huria i taringot tu ajaran ni huria. Ala ni i, hiras ma nang rohanta padao dirinta sian dohot mangalo hasalaan pinatupa ni angka jolma nang halak Kristen di portibion naung manjoloani hita, i ma na patupahon angka ulaon na mamaksa jolma manomba Debata Sitolusada i. Satia do Debata mandongani hita manomba Ibana. Laos satia do Ibana mandongani hita manulak angka ulaon pinatupa ni manang ise na mambutbut kebebasan beragama ni manang ise. Amen(*)
  BeritaTerkait
  • Jamita Evangelium, 25 Nopember 2018, Minggu Ujung Taon Parhuriaon, Daniel 7: 9-14: Harajaon ni Debata Na Manongtong

    9 bulan lalu

    Oleh: Pdt Dr Robinson ButarbutarDi bagasan lobi dua taon parpudion sahat do tu ganup hita barita masa na mangihut on: Tongon marusaha do angka bangso na balga jala na gogo manggulut huaso na tumimbo d

  • Jamita Evangelium, 13 Januari 2019, Minggu I Dung Epiphanias "Debata Manogunogu/Mandongani BangsoNa" (2 Musa 33: 12-17)

    7 bulan lalu

    Oleh: Pdt Dr. Robinson Butarbutar, Parsameanta, STT-HKBP. HP/WA 0812-62472015Sada hata na dipangke rakyat Indonesia manggombarhon panghirimon ni rakyat idaonna patupaon ni angka pamarenta di sude tirk

  • Jamita Minggu Evangelium 16 Juni 2019, TRINITATIS, HASITOLUSADAON NI DEBATA: Haporseaon na Manghorhon Paluahon (1 Musa 22:1-19)

    2 bulan lalu

    Oleh: Pdt Dr Robinson Butarbutar, Ketua Rapat Pandita HKBPHamu angka Dongan sahaporseaon,Di Minggu tanggal 26 Juni 2019 na salpu, di Minggu Rogate, sude do hita ruas ni Huria Kristen Batak Protestan m

  • Jamita Evangelium 23 Juni 2019, I Dung Trinitatis: Ngolu na marhabadiaon di jolo ni Debata (Pang 22: 12-17)

    2 bulan lalu

    Oleh: Pdt Dr. Robinson Butarbutar Parsameanta, STT-HKBP (0812-62472015)Hamu angka dongan,Di Minggu Parjolo Dung Trinitatis sadarion, di na tapabagas panandaionta di Hadirion, Ulaon nang Lomo ni Roha n

  • Jamita Evangelium, 30 Juni 2019, Minggu II Dung Trinitatis "Martua Halak Na Pinintoran ni Debata" Psalmen 32: 1-11

    2 bulan lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar, 0812-62472015Udut ni hatani Debata di minggu na salpu na manosoi hita asa manghangoluhon ngolu na badia asa saut hita masuk

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb