• Home
  • Agama
  • Jamita Evangelium Minggu Epiphanias, 6 Januari 2019" MANGOLU DI BAGASAN LOMO NI ROHA NANG SANGKAP NI DEBATA" (Jakobus 4: 13-17)
KSP Makmur Mandiri
Jumat, 04 Januari 2019 14:39:00

Jamita Evangelium Minggu Epiphanias, 6 Januari 2019" MANGOLU DI BAGASAN LOMO NI ROHA NANG SANGKAP NI DEBATA" (Jakobus 4: 13-17)

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar
Sian Parsameanta, STT-HKBP
HP: 0812-62472015

Di hita halak Kristen Batak, di ujung taon Romawi na buruk dohot di bona ni taon Romawi na imbaru, sai marpungu do ganup keluarga besar laho martangiang, masisesaan dosa na diula di taon na buruk, masipodaan dohot masipaboan sangkap tu jolo, huhut manangiangkonsa. Mangihuthon pengalaman empiris, hira tung margogo do tangiang ni angka na porsea i tu ngolu nasida di bona ni taon na imbaru i. Siala ni i do umbahen na sai tahasiholi patupahon i. 

Sadarion, apala onom ari di bona ni taon 2019, uju ganup hita manangkapi angka rencana ni ngolu nang angka usahanta di taon 2019 on, dipangkulingi Debata hita marhite hataNa asa di na manangkapi dohot manangiangkon angka sangkap na ulinta i, unang tapadao alai tapahombar ma dirinta nang sangkapta  sian sangkap ni Debata na uli tu hajolmaon dohot tu nasa na adong.  Gariada dipangido tu hita asa mangolu jala mangula hita di bagasan sangkap ni Debata na uli tu hajolmaon nang isi ni portibi on. Tarbahen hita do i, ala - songon nidok ni hataNa di Filippi 2: 13,- "Ai diula Debata do di bagasan hamu giot ni roha nang ulaon saut, mangihuthon lomo ni rohaNa."

Mangula do Debata di bagasan jala marhite ngolunta patupahon sangkapNa. Ai marhite na songon i do boi hita rap dohot apostel Paulus (Rom 14: 7-8) mangauhon impola ni hadirionta naung  tinobusNa mansai arga i, "Ai ganup hita ndang mangolu di dirinta, jala laos ganup hita ndang mate di dirinta. Ai ia mangolu pe hita mangolu di Tuhan i do, jala mate hita mate di Tuhan i do. Asa mangolu manang mate pe hita, tong do di Tuhan i hita." Songon i hita mamereng dirinta ala nang panodoionna tu hita halak Kristen Batak gabe AnakNa saurdot tu na hinalomohonNa do (Epesus  1: 5), atik pe pardosa hian do hita, na so  parjambar hian gabe parjambar di Kristus, na dao  hian gabe jonok tu ibana pinajonok ni mudarNa i (Epesus 2: 11-15, 19), asa marulaon na denggan hita (Epesus 2: 10). I ma imbar ni ngolu ni na naung pinarpunahon ni Kristus Jesus sian na so pinarpunahonNa. Ingkon sai  tapahombar do ngolu, sangkap nang ulaonta tu lomo  dohot sangkap ni Debata. 

Ia hataNa i dienet sian surat Jakobus, i ma surat na marisihon marragam poda tu angka na porsea di sandok portibion sian bona ni hatutubu ni Hakristenon sahat tu nuaeng nang tu joloan on. Martua do angka na porsea na manangihon, mangantusi dohot mangulahon angka poda i. Impola ni angka poda i mangondolhon sada hamubaon pangantusion dohot pambahenan partondion ni angka na porsea, ndang be sarombang dohot pamingkirion ni partingkianta (Rom 12:2). Sada perobahan paradigma (Inggris: paradigm change), sada hamubaon pangantusion dohot pambahenan partondion do niondolhonna. 

Adong onom hamubaon pangantusion dohot pambahenan partondion niondolhon ni hat ani Debata di surat Jakobus i. Sada sian na onom i do na di Jakobus 4: 13-17 i.  Masirainrainan do onomsa.  Denggan do molo taida jo dia na lima i. Dung i tapangke ma gumodang tingki tu na paonomhon i na mansai ampit di minggu Epiphanias on, i ma minggu panandaion di hadirion dohot lomo ni roha ni Debata Sitolusada i di pardalanan ni ngolunta marsadasada dohot marsasahuria di portibion, di abad pa-21-hon on.

Naparjolo, somalna sai tapasiding do hadadabunta tu bagasan pangunjunan. Alai hatani Debata  mangajarhon martua do halak na manaon di pangunjunan. I do hataNa, atik pe ndang Debata na mangunjuni hita, alai pangoloion to elaela jala sangkap-sangkap ni roha do na mambahen madabu hita tu pangunjunan (1: 12-14). I do hataNa atik pe sialoon do sibolis, jala sipajonohon do diri tu Debata (4: 7-8).  Nda sada paradigm change i, hataNa na mandok na martua do na manaon di pangunjunan?

Napaduahon, maralo tu hasomalan ni jolma na marnida donganna jolma marguru tu kondisi dohot status sosial ni sasahalak - isara  molo antar mora ibana dumenggan do panabian tusi sian panabian tu na pogos - ia pangajarion ni Debata di surat Jakobus mandok na so jadi hita marnida bohi maradophon donganta jolma (2:1, 2-10). Nda sada paradigm change non i di hita nuaeng di Indonesia on na lam segregasionalis, marnida jolma tu latarbelakang ni sasahalak, na naung sanga tatinggalhon, naung mangondolhon hinauli ni bhinneka tunggal ika, songn i parheheha pola lam togu marhembang diskriminasi politis di 9 propinsi, songon na nidapot ni peneliti LIPI: "Molo ndang saugamo dohot hita ndang sipilliton nasada an."

Napatoluhon, somalna mansai lomo do roha ni jolma manghatai jala tarrimas siala ni bahat sibonsiri, termasuk ala ni stress binahen ni tuntutan ni ngolu.  Bahat do mara na ro tu angka na so mangarajai dilana. Maralo tusi hatani Debata mandok dumenggan do di ngoluon angka na girgir manangihon, bangkol manghatai dohot bangkol tarrimas (1: 19, patudos Parjamita 7: 9). Domu tusi do hata bisuk manjagahon dilanta on: Dirante ma dilana (1: 26). 

Di partingkian digital nuaeng, ndang holan semboyan  na mangihut on na dipangke paingothon angka na so boi mangorom pamanganna, "Pamanganmu do babiatmu," alai dohot do semboyan on tu angka na so mangorom jarijarina di partingkian digital na digohi barita hoax, "Jarijarim do babiatmu", ai boi do gabe tu hurungan dongan molo mangalanggar UU Teknologi Informasi.

Paopathon, tu angka na porsea na humurang patupa pambahenan na denggan di ngolu, diondolhon hata ni Debata do taringot tu hinaringkot ni haporseaon na marpangulaon (2: 17). Siala ni i do diajarhon dua na mangihut on taringot tu ngolu na marhadaulaton. "Ia hadaulaton na ias jala na so marlindang di roha ni Debata i ma mandulo angka na so marama na so marina nang na mabalu di haporsuhonnasida" huhut "mangaramoti diri maralohon portibion" (1: 27).  Pinsang-pinsang do i tu angka ruas ni huria protestan na so manggohi ngoluna dohot ulaon na denggan dalanna mandok mauliate tu Debata na patigor ibana marhite basabasa haporseaon di silang ni Jesus Kristus na manobus angka dosanta.

Napalimahon, tu angka na ganggu martangiang diajarhon do na molo martangiang sasahalak  ingkon di bagasan haporseaon do (1:6), ai margogo situtu do tangiang ni partigor (5:16). Pinsangpinsang do i tu angka na so togu be haporseaonna di gogo ni tangiang dohot di tangiang pinargogoihon ni Tondi i.
Udut ni na palimahon i do hataNa di Yak 4: 13-17 i. Mansai ampit do hataNa i tu hita nuaeng na lam marnida hagogoon ni hajolmaon di Era Revolusi Industri Napaopathon.  Di partingkianta nuaeng nunga gabe hasintongan hata bisuk na mandok hinaringkot ni perencanaan jauh-jauh hari. Digoari angka na so marbisuk do haotoon molo mangula marnida di lapik. Ndang adong pangaradeion. Ndang adong perencanaan na denggan. Ndang jadi ndang adong sada perencanaan na denggan taringot tu aha sidungdungon, dia sipatupaon mandungdung sidungdungon i,  jala songon dia ma dalan  (Jaha: strategi) mandungdungsa. Angka dalan manang strategi na ampit pe nunga ingkon sipastihonon, atik pe ingkon adong do haradeon paampithon strategy na imbarui tu kondisi na imbaru na tubu di pardalanan ni tingki. 

Na tangkas hata bisuk on do dihaporseai jala dipatupa hita jolma nuaeng on: "Molo denggan diparade ho saluhut laho mandungdung sidungdungonmi, ba nunga boi botoonmu hasil na denggan."  Lobi sian i dope tahe, di tingkinta nuaeng nunga lam margurasa pandapot na mandok songon on: "Tarbahen jolma i sandiri do mandungdung sidungdungonna, mangadopi siadopanna, mangatasi angka hamaolon di ngolu ni jolma i marhite hinatimbo ni angka parbinotoan na marragam i, so pola  ingkon manungkun manang na dihalomohon Debata i manang ndang, so pola ingkon mangido pangurupion manang lam ma marsigantung tu huaso di duru ni diri ni jolma i, i ma huaso pangurupion ni Debata. Ndang taharingkothon be campur tangan ni Debata, atik pe adong do Debata. Hajagoon ni jolma boi mangatur. 

Di partingkian ni panurat surat Jakobus nunga tubu tong pamingkirion na songon i. I do na andar di Jakobus 4: 13: "Sadari on manang marsogot laho ma hami tu huta adui, asa disi hami sataon martigatiga jala mangomoomo." Jolma i manangkapi aha siulaonna, dia sidungdungonna, jala songon dia manghalashon naung nidungdungna i. Ndang adong disi huaso nang pangurupion ni Debata. Laos ndang ringkot paampiton sidungdungon i tu sangkap ni Debata di hajolmaon. Ganup ma manangkapi saurdot tu sangkap manang sintasintana sandiri. I ma pamingkirion nialo ni hata ni Debata. Dipauba ma pamingkirion si songon i tu pamingkirion dohot parange haporseaon na sintong, na imbaru, i ma na tarsurat di ayat 15:
"Singkat ni i ma nian dohononmuna: 'Molo na lomo roha ni Tuhan i, mangolu ma hami, jala bahenonnami ma on dohot an" (4: 15). 

Adong dua na hinangkam ni nayat 15 on.

Naparjolo, mandok na ganup manangkapi sada siulaon, ganup mamingkiri dalan na ampit mandungdungsa (Indonesia: strategi), dohot ganup manangkapi dia sidungdungon, laos ganup mamingkirhon songon dia manghalashon naung tartundung sidungdungon i,  ingkon parjolo situtu do pastihononta na saurdot do angka i tu lomo ni roha ni Tuhan i. Ndang jadi lomolomonta manangkapi  siulaon ni ngolu ni angka anak ni Tuhan i. Ndang be sangkapsangkapta sandiri sipatupaonta. Ingkon sangkap ni Debata do. I do imbarta sian sangkap ni na so sioloi Debata Sitolusada naung manobus hita i. 

Molo saurdot tu lomo ni roha ni Debata, dipatupa ma i sadenggandengganna. Molo nunga saurdot i tu lomo ni roha ni Debata ndang jadi ganggu be rohanta mangulahon i dohot mandungdung i. Unang alang rohanta mangulahon i.

Marhitehite goar ni Tuhan Jesus ma nasa na taula, di hata nang pambahenan, sian nasa roha songon na tu Tuhan i, ndang songon na tu jolma (Kolosse 3: 17, 23). Unang ala ndang marsitutu hita mangulahonsa sadenggandengganna gabe Debata tasalahon uju ndang saut tardungdung sidungdungon i. Jala molo nunga tardungdung sidungdungon i, unang ganggu rohanta manghalashon i. Dalan mananda lomo ni roha ni  Debata na uli dohot na sun denggan di ganup partingkian dohot inganan i ma marhite na manguba dohot paimbaruhon pingkiranta (Rom12:2). Ndang otomatis i masa. Mansai ringkot do manangiangkonsa asa digohi pantas ni roha hita mananda lomo ni roha ni Debata, ai ihut tusi do tarbahen hita marparangehon na tama di Tuhan i, marparbuehon nasa ulaon na denggan  (Ida Kolosse 1: 9-10).

Mansai ringkot do hita halak Kristen Batak di taon 2019 on, di na mamonai sude na tasangkapi di ngolunta di ariari na ro  manungkunhon sungkunsungkun on: Nunga saurdot on tu lomo ni roha ni Debata, jala nunga taida di mata ni partondionta na dihalomohon Debata do na tasangkapi on? Dison do mansai porlu ngolu partangianganta, ngolu meditasinta i. Molo ndang dope, ba unang tapatupa i. Talului ma na saurdot tu lomo ni rohaNa. Alai molo nunga saurdot be tu lomoNa, ba tapangido ma gogo sian Ibana patupahon i.

Tapangido ma pandonganionNa. Tapangido ma bisuk sian Ibana. Tapangido ma pangurupionNa. Sai na lehononna do i molo tapangido di bagasan haporseaon.

Mansai ringkot do on ndang holan di angka sundut na omposo na manontuhon dia ma siparsiajaranna dung tamat SMP, SMA di bulan 4 na ro, dung sidung Kuliah, manang uju mangalului karejo na parjolo manang karejo na paduahon manang patoluhon manang paopathon, alai mansai ringkot do i nang di angka sundut na tumua, angka pegawai nang uluan, angka sijalo ulaon nang silehon ulaon, angka partani, partigatiga, pardengke, parpinahan, pengusaha, pamarenta, sijaga keamanan ni rakyat, sipatupa dohot sipanjongjong uhum, na mangula di negara dohot di swasta, na mangula di duru ni jabu dohot di bagasan jabu. Sude ma tahe.
Napaduahon, di na manangkapi siulaonta di bagasan taon on dohot di pardalanan ni ngolunta, taingot ma na sai rade do Tuhanta pardenggan basa i jouonta parsidohot manumpahi dohot pasauthon na tasangkapi i. 

Songon hata ni Buku Endenta No 66:1 i, "Debata Baen Donganmi, laho mangula ulaonmu, baen Ibana haposanmu, sai paserep rohami. Debata baen donganmi, Debata baen donganmi." Unang baliksa, tapangasahon hagogoonta, hapistaranta. Ai ia hita jolma on, tung beha pe timbo ni hapistaranta, sai adong do angka na boi dohonon di duru ni hatauonta. Jala di bagasan hatauonta i sai adong do nang disi hagaleonta. Mansai ringkot do hita manjou, mangaloas Debatanta Sitolusada i mandongani hita. Lam timbo parbinotoanta dohot hatauon hajolmaonta, lam timbo do pangunjunan na ro tu hita ndang manjou Debata di ngolunta. Siala ni i, andorang so mamonai, di na mamonai dohot di na patupa jala dung mangujungi ulaon mangulahon ulaonta i tongtong ma tapangido jala taelekhon marhite tangiangta pandonganionNa pasauthon sude (Epesus 6:  18).

Na dua na di ginjang i ma hamubaon pangantusion partondion nang parange di hita di minggu Epiphanias on, i ma pangantusion na meret sian na mandok boi do lomolomonta angka na porsea i manangkapi na tasangkapi tu pangantusion dohot pamabahenan na mandok na ingkon tasulingkiti do di ulaonta nang di sidungdungonta manang na naung dihalomohon Debata, manang naung saurdot dohot lomo ni roha ni Debata angka sangkap ni ngolunta i. Angka sangkapta tu dirinta dohot angka sangkapta tu donganta jolma ingkon do jolo tasungkunhon sungkunsungkun on: Nunga dihalomohon Debata i manang ndang? Nunga saurdot i tu lomoNa manang ndang dope? Lomo ni roha ni Debata do suhatsuhatta. Laos tatulak ma pangantusion na mandok na tarbahen hita do mandungdung sadenggandengganna na taparsinta dohot na tasangkapi i di ngoluon mangasahon hapistaran dohot hatauon hajolmaonta. Baliksa sai tajou ma Debata tu ulaon nang sidungdungonta i asa Ibana na dohot patauhon hita mandungdungsa.

I ma na denggan. Molo ndang taula na denggan na taboto i di ngolunta, hata ni Tuhanta mandok mardosa do manang ise na umboto na denggan alai ndang mangulahonsa (Jakobus  4: 17).

Dipasupasu Tuhanta ma hita ganup manangkapi ganup sintasinta saurdot tu lomo ni roha ni Tuhanta, jala tajou ma Ibana tongtong patauhon hita mandungdung angka sangkapta na saurdot tu lomo ni rohaNa tu dirinta nang tu hajolmaon. Amen.
  BeritaTerkait
  • Jamita Evangelium, 13 Januari 2019, Minggu I Dung Epiphanias "Debata Manogunogu/Mandongani BangsoNa" (2 Musa 33: 12-17)

    4 hari lalu

    Oleh: Pdt Dr. Robinson Butarbutar, Parsameanta, STT-HKBP. HP/WA 0812-62472015Sada hata na dipangke rakyat Indonesia manggombarhon panghirimon ni rakyat idaonna patupaon ni angka pamarenta di sude tirk

  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

    10 bulan lalu

    Oleh: Pdt Dr. Robinson ButarbutarA. Dihasiholi Debata asa marlas ni roha jolma i.Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, ta

  • Jamita Evangelium, 25 Nopember 2018, Minggu Ujung Taon Parhuriaon, Daniel 7: 9-14: Harajaon ni Debata Na Manongtong

    2 bulan lalu

    Oleh: Pdt Dr Robinson ButarbutarDi bagasan lobi dua taon parpudion sahat do tu ganup hita barita masa na mangihut on: Tongon marusaha do angka bangso na balga jala na gogo manggulut huaso na tumimbo d

  • Jamita Evangelium Minggu XIII Dung Trinitatis Hesekiel 33, 7-9 Dipabangkit Gabe Siparorot

    tahun lalu

    Oleh: Pdt Dr. Robinson Butarbutar, STT HKBP Pematangsiantar1. Sian tingki tu tingki, di sandok inganan, ngolu nang ulaoon ni jolma i, di bagasan huria ni Kristus na ummetmet dohot huria hadomuan, mang

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb