• Home
  • Agama
  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21
KSP Makmur Mandiri
Minggu, 23 Desember 2018 03:37:00

Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar
Sian Parsameanta, STT-HKBP Pematangsiantar.
HP/WA 0812-62472015

Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24 Desember), jala dua ari nari andorang so tapestahon dua hali ari hatutubuNa i (25-26 Desember), dienet jamita sian sada surat na adong di Padan Naimbaru na mansai tangkas situtu mamodai angka siihuthon Jesus asa manjamothon dirina sian angka parpoda na lipe na mangajarhon angka ajar na maralo tu angka naung diajarhon ni angka apostel na parjolo i taringot tu Jesus Kristus jala songon dia ma angka na porsea i mangolu songon halak Kristen di portibion manomunomu manang paimaimahon ari haroroNa napaduahalihon. Digoari do nasida parpoda na lipe i angka na manisipi (1: 4) dohot angka sipanginsahi, i ma angka na mangoloi hagiot ni dagingna (1:18): 

Dienet jamita sian Surat Judas na koras paingothon angka siihuthon Jesus unang unduk tu angka parpoda na lipe i. Poda na koras i disoarahon marhite na paandarhon angka contoh-contoh songon dia Debata manguhumi angka na mangalo lomo ni rohaNa, isara(i)  na pinatupaNa tu bangsoNa Israel na pinaluana alai dung i niuhumsa muse ala so porsea, (ii) NapinatupaNa tu surusuruan na so manggomgomi pangaramotionna; (iii) UhumNa tu Sodom dohot Gomorra nang huta di humaliangna na digohi halak na marharorangon; (uhumNa tu sibolis nang  angka na mandalani dalan ni si Kain. Pola tahe dipangke si Henok na pabotohon uhum ni Debata tu saluhut parjahat. Ida 1: 5-16).

Ndang apala sian angka contoh-contoh uhum tu angka i na dienet gabe jamita tu hita di Minggu Adven IV on. Alai dienet jamita sian poda na adong di surat Judas i na marusaha mangajari hita angka na porsea na mangolu di partingkianta nuaeng beha ma angka na paimaimahon Jesus Kristus i mandalanhon ngolu naung tinobus dohot pinarbadiaanNa i. Mansai porlu i nuaeng ala tongon taadopi dope nuaeng  tondi hedonisme na diurupi tondi lomo roha di hepeng na manuhori angka arta na marragam i, ndang parduli dia panghorhonna tu dirina nang tu angka jolma na asing. Siala manggohi hagiothagiot ni dagingna i, dipatupa jolma i ma dehumanisasi, i ma ulaon patutoru hajolmaon i isara manggadis donganna jolma, mamamngke dongan na jolma tu ulaon mambuat untuk , songon i nang ekploitasi angka na adong di portibion. Siala ni i do umbahen, asing ni manaba hutan dohot na domu tusi, tapangambolongkon do angka sampah plastik tu aek godang dohot tu laut, sampe pola mate angka dengke.    Songon i nang bahat angka binatang naung mago boti.   
                                                                                                
Ndang dienet jamita tu hita sian angka bagian di surat Judas i na manguhumuhumi angka na na manisipnisip dohot angka na mangulahon hagiot ni daging I (1: 1-16), jala ndang dibuat sian bagian paduahon ni poda beha mangadopi nasida, i ma asa mangurupi angka na ganggu roha (ayat 22-23). Alai dienet jamitanta sian bagian ni surat Judas na mangajarhon tu hita dia ma sipatupaon ni angka siihuthon Jesus i molo margurasa di tongatonga nasida angka poda dohot parpoda na manosoi jolma i mangulahon angka ulaon na maralo tu angka ajar ni angka apostel ni Jesus Kristus. Oloonta do hagiot ni daging i di na manomunomu Tuhanta Jesus? Dia ma sipatupaon ni angka na naung tinobus ni Jesus Kristus uju ro tu tongatonga ni parngoluon nasida marsadasada nang saparsaoran angka na manisip na mangajarhon ajaran parange ngolu na so saurdot tu angka ajar ni angka apostel (1: 17-23).

Di ayat 20-21 tangkas impolana i ma manjagahon dirinta sandiri (ayat 20-21). Ringkot do on ala jotjot malo angka hita marusaha mangurupi angka  na ganggu roha di tongatonganta (ayat 22-23), alai dirinta sandiri jotjot talu. Jotjot hita mamodai halak, alai dirinta sandiri ndang tapodai.
Tu naparjolo, manjagahon dirinta sandiri, dua na mangihut on ma sipatupaon/siulahononta di ngolunta: Pauliulihon (Gorik: ep-oikodomountes) manongtong dohot Mangaramoti (Gorik: teresate, sian kata kerja tereo) dirinta. Di bagasan ni i adong dua dalan pauliluhihon (ayat 20), jala dua dalan mangaramoti dirinta (ayat 21). 

Dua dalan PAULIULIHON dirinta i ma: 
Parjolo, pauliuli (membangun hadirion) di atas haporseaon na badia situtu. Beha dalan pauliuli diri, ndang apala dipaandar. Alai ojahan ni na pauliuli diri i do na dipaandar, i  ma  haporseaon na badia situtu. Boasa diondolhon haporseaon na badia situtu. Suraon do gabe adong haporseaon na lipe, na so badia? Boi! Ndang boi marlaok haporseaon i dohot angka dalan-dalan manjaga diri na pinatupa ni portibion, isara patupa angka patik dohot pantangpantang.  Alai ingkon haporseaon na pinalumehon ni Debata do. Ndang haporseaon na marrumangkon ulaon ni jolma na marlaok dosa i. Ndang haporseaon na asing, alai haporseaon Holan haporseaon di ulaon ni Jesus Kristus di hau pinorsilang i patigorhon hita di jolo ni Debata marhite mudarna na durus disi . Ndang haporseaon di hagogoonta, alai di hagogoon ni Debata do. Ndang haporseaon na patujolohon hatauon ni jolma i paluahon diriNa, alai haporseaon di asi ni roha ni Debata do.

Paduahon, martangiang di bagasan tondi. Boasa ndang tuk holan pauliulihon di atas haporseaon i? Ala ringkot do haporseaon i dipatogu, digohi, dohot dipargogoi tangiang na maraturan, tangiang na tigor, tangiang na diojahi haporseaon di bagabaga ni Debata na alusanna do tangiang ni na joujou tu Ibana, tangiang na diojahi haporseaon di campur tangan ni Debata di ngolu ni hajolmaon, asi ni roha ni Debata di angka na jinouNa dohot na pinillitNa. 

Boasa ingkon ditambahon tusi ulaon mangaramoti dirinta marhite na martangiang? Ala ndang hagogoonta na tapangasahon di na pauliulihon di atas ni haporseaon i. Ingkon na dipargogoihon tangiang do. Jala tangiang i pe  ingkon na di bagasan tondi do. Ndang apala didok dison ulaon na martangiang i di bagasan Pondi Porbadia. Na boi do hata "di bagasan tondi" i manudu tu Tondi Porbadia, ai na martangiang di bagasan Tondi Porbadia do na mangurupi partangiang i umboto lomo ni roha ni Debata di tangiangna i, jala diajari Tondi Porbadia do angka sipartangiang songon na dipaandar apostel Paulus di surat Roma bindu 8 i. 
Alai na boi do tong diondolhon partangiangan na so ingkon patudutuduhononhon marhite hata  sambing, tarlumobi na ingkon botoon ni angka na dihumaliang hita, alai paratangiangan na di bagasan tondinta, na tuk pajumpanghon tondinta dohot  Tondi ni Debata. 

Mansai ringkot do tangiang di bagasan tondi di partingkian na naung mangondolhon angka na boi idaon ni mata dohot na mandondolhon panghilalaan pardagingon. Dijouhon do hita asa lam martangiang di bagasan tondinta.

Tu na paduahon, MANGARAMOTI  (Gorik: Teresate ) dirinta, adong tong dua dalan patupahonsa, i ma:
Naparjolo, di bagasan Holong ni roha (Gorik: Agape) ni Debata, dohot napaduahon, paimaimahon asi ni roha ni Jesus Kristus sahat tu hangoluan na manongtong.  
Boasa mangaramoti dirinta asa manongtong di bagasan holong ni roha (Gorik: Agape) ni Debata boi mangurupi hita paimaimahon haroro ni Tuhanta i? Alus tu si i ma: Asa tongtong hita marningot holong ni rohaNa na tu hita i. Holong ni roha ni Debata i do sipangsahonon ni ganup angka siihuthon Jesus.  I do ondolan ni haporseaon Hakristenon. Debata na manghaholongi hita. Alai angka naung hinaholonganNa ingkon do mangulahon ulaon holong tu Debata nang tu angka dongan jolma dohot dongan na tinompa sadenggandengganna songon dalanna mandok mauliate tu Debata na manghaholongi Ibana mansai arga, so ingkon marnida hajegesonta. Di na mangolu di bagasan dos dope hita nunga dihaholongi Ibana di bagasan Jesus Kristus na mamorsan angka dosanta. Mangulahon holong tu Debata dohot tu dongan jolma do pamusatan ni patik dohot soara ni panurirang. I do dalanta manongtong di bagasan holong ni Debata, i ma manghaholongi donganta sadenggandengganna. 

Boasa MANSAI ringkot manongtong paimaimahon ASINIROHA ni Jesus Kristus sahat tu hangoluan na manongtong i? Ala sian gogonta sandiri ndang tuk hita palua dirinta. Holan asi ni roha ni Kristus do na tuk paluahon hita dohot manogunogu ngolunta. Sipata ndang tarbahen hita so mangundukhon pangajarion ni reformator Martin Luther taringot tu ise halak Kristen i di ngoluna di portibion paimaimahon haroro ni Tuhanta Jesus Kristus i, i ma ajaranna na tarbarita i na mandok ia sahalak Kristen i di tingki na padodot (simultan) na badia pinarbadiaan ni Debata dohot pardosa do ala mura do ibana madabu tu bagasan dosa. Di na madabu ibana tu bagasan dosa, ingkon pasesaonna do dosaNa tu tangan asi ni roha ni Debata.  Marojahan tu ajaran ni Martin Luther on do hea sahalak uluan ni sandok huria protestan di Jerman  di taon 2012 (Evangelische Kirche in Deutschland) i ma Prof Dr. Margot Kaesemann na manginum anggor lobi sian na patut andorang so mangusung mobil, jala marhite i mardosa dung mangalanggar paraturan lalulintas di Jerman, i ma mangalanggar paraturan lampu merah di dalan. 

Siala ni i mengundurkan diri ma ibana, jala uju disungkun wartawan songon dia ibana mangadopi i, dialusi ibana ma marhite na mandok: "Ndang adong na ummuli sian na madabu tu tangan asi ni rohaon ni Debata." Lapatanna tarpangasahon ni angka na paimaimahon haroro ni Tuhan Jesus Kristus i do asi ni roha ni Jesus Kristus uju tarsulandit manang madabu ibana tu bagasan dosa, tarlumobi angka na so sian rohana. Laos tarpangasahon ni angka na paimaima haroro ni Jesus paduahalihon i do asi ni roha ni Jesus Kristus di angka usaha ngoluna, angka sintasintana, di na mangadopi tantangan ni ngolu, dohot di na mangalului bisuk di angka perjuangan-perjuanganna patupa na denggan tu donganna jolma di marragam ulaonna i, nang di na mangadopi angka partongtangan di ngolu on.

Duansa ulaon i, PAULUIULIHON dohot MANGARAMOTI I mansai ringkot jangkononta songon poda tu hita angka halak Kristen Batak di Adven IV-hon on. Boasa?
Suraon do nunga tung gale hita angka halak Kristen Batak na mangolu di partingkian na lam dikuasai hapistaron ni jolma i di era artifial intelligence on, ndang be pauliulihon ngolunta di atas haporseaon na badia situtu? Nunga marlaok haporseaonta dohot angka budaya ni portibion nuaeng? Isarana, haporseaonta di gogo ni Debata,  nunga marlaok dohot haporseaonta di hagogoonta sandiri  dohot di hagogoon ni na so Debata be? Suraon do haporseaonta di asi ni roha ni Debata na patigorhon hita di bagasan Jesus Kristus nunga marlaok dohot na mangasahon ulaonta marhite angka pantangpantang?

Suraon do di na paimaimahon asi ni roha ni Tuhanta Jesus i hita sahat tu ngolu na manongtong i ndang be maraturan martangiang di bagasan tondi be hita, alai nunga martangiang di bagasan pingkiranta sambing, ndang be di bagasan na manghatai dohot Tondi ni Tuhanta i be tangiangta, gariada nunga martangiang di bagasan angka tangiang na pinatupa ni halak tu hita? Suraon do nunga holan mangasahon angka gogonta be hita, ndang be tajou Debata di bagasan ngolu nang angka usaha-usaha ni ngolunta, ala tahilala nunga tuk hita sandiri, manang ndang tahaporseai be na mangula do Debata sahat tu nuaeng di ngolu ni angka na porsea tu Ibana?

Suraon do nunga ndang be taramoti dirinta asa tongtong mananda, manjangkon, mian dohot manghangoluhon ngolu na di bagasan holong ni roha ni Debata dohot di asi ni roha ni Jesus Kristus i? 

Denggan ma tarimangrimangi angka i. Martua ma angka na tongtong saleleng on pauliulihon dirina di bagasan haporseaon na badia situtu dohot martangiang na martondi, nang angka na mangaramoti dirina marhite na mangolu di bagasan holong ni Debata dohot mangasahon asi ni roha ni Kristus songon dalanna paimaimahon haroro ni Jesus Kristus. Alai muba ma angka na so mangulahon i be saleleng on. Ai marhite i do tarbahen hita mangalo angka parpoda na lipe uju paimaimahon haroro ni Kristus padua halihon i hita.(*)
  BeritaTerkait
  • Jamita Evangelium, Advent I 2 Desember 2018, 4 Musa 24: 15-17: Managam Haroro ni Sipalua

    2 bulan lalu

    Oleh: Pdt Dr. Robinson Butarbutar, di Parsameanta, STT-HKBP Pematangsiantar, HP-WA; 0812-62472015. Sada na mansai uli situtu na jumpang hita di angka tona ni Debata di Bibelta i, i ma na mangihut on:

  • Jamita Evangelium, 9 Desember 2018, Minggu Advent II, 1 Petrus 2: 11-12 : Manomunomu Tuhan i Marhite Parange na Denggan

    satu bulan lalu

    Oleh: Dr. Robinson Butarbutar, sian Parsameanta, STT-HKBP Pematangsiantar, 0812-62472015.Nunga sada fakta na ingkon adopan ni angka bangso di portibion nuaeng na siala ni marragam sibonsiri na mansai

  • Jamita Evangelium 16 Desember 2018 Minggu Advent III "Jahowa Pamalumhon Angka Namulak tu Ibana (Hosea 14: 2-9)"

    satu bulan lalu

    Sian Pdt. Dr. Robinson Butarbutar Dung tabege  di Minggu Adven I  barita nauli taringot tu sangkap ni Debata paro Mesias uju di bona ni pardalanan ni bangsoNa Israel sinoarahonNa marhite Bi

  • Jamita Evangelium Minggu Pentakosta I, 20 Mei 2018 "Nunga Dilehon Debata Tondi Porbadia tu Nasa Bangso" (Ulaon Apostel 10: 44-48)

    8 bulan lalu

    Oleh: Pdt. Dr. Robinson Butarbutar, Parsameanta, STT-HKBP, PematangsiantarPatujoloSomal do di parmingguon parningotan di hasasaor ni Tondi Porbadia di angka huria di portibion nasailaon dienet ba

  • Jamita Evangelium Minggu IV Adven 24 Desember 2017, Lukas 1: 26-38: Debata Ro Mamboan Asi ni Roha"

    tahun lalu

    Oleh: Pdt. Dr. Robinson Butarbutar, Sian parsameanta, STT-HKBP PematangsiantarDi minggu Adven paopathon sadarion, marhite barita nauli sinurathon ni parbarita nauli jala teolog Lukas di bindu 1 ayat 2

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb