• Home
  • Agama
  • Jamita Evangelium 9 Juni 2019, Minggu Parningotan Hasasaor ni Tondi Porbadia I "Tondi Porbadia Napangoluhon" (Rom 8: 9-11)
KSP Makmur Mandiri
Minggu, 09 Juni 2019 07:40:00

Jamita Evangelium 9 Juni 2019, Minggu Parningotan Hasasaor ni Tondi Porbadia I "Tondi Porbadia Napangoluhon" (Rom 8: 9-11)

BAGIKAN:
Edward Tigor Siahaan
Pdt Dr Robinson Butarbutar
Oleh: Pdt Dr. Robinson Butarbutar, sian Parsameanta, STT-HKBP Pematangsiantar. HP/WA: 0812-62472015.

Hamuna angka Dongan Sahaporseaon di bagasan Kristus,
Somal do di pesta Parningotan di Haroro ni Tondi Porbagia dienet jamita sian opat hat ani Debata na mangihut on:

Naparjolo, sian Evangelium Johannes, i ma taringot tu bagabaga haroro ni Tondi Porbadia i, pinorbagabagahon ni Tuhanta Jesus tu angka siseanNa  na parjolo i di panghataion parsiranganNa dohot nasida.  Disi didok taringot tu ulaon ni Tondi i. Dipatolhas Tuhanta i tu nasida na ia ulaon ni Tondi i, i ma mandongani angka siseanNa. Ndang holan mandongani tahe, alai dohot do mangajarhon dohot paingothon tu angka siseanNa nasa naung hinatahon ni Jesus Kristus tu angka siseanNa i. Mansai ringkot do i ndang holan di  partingkian tradisi lisan, alai dohot do di na mamolus partingkian na marragam i sahat tu nuaeng di era revolusi industri napaopathonhon, era digital on: PandonganionNa dohot paingothon hita di angka pangajarion ni Jesus uju mangolu dohot mangulahon ulaonta hita angka siihuthon Jesus. Dungkon ni i, ulaon ni Tondi i dohot do didok Jesus Kristus na mangihut on:  Manghatindangkon taringot tu Jesus Kristus tu angka siseanNa, asa tongtong manatap tu jala marpos ni roha di Jesus Kristus nasida di portibion, manang aha pe na masa, songon dia pe kondisi ni ngolu. Natolu i do na ginurithon ni panurat ni evangelium Johannes di  Joh  14: 16-17, 26, 15: 26, 16:7. 

Molo taida mamungka sian partingkian ni angka sisean na parjolo i di dekade paopathon abad parjolo sahat tu nuaeng di dekade paduahon abad pa-21-hon, nunga digohi bagabaga ni Tuhanta Jesus i taringot tu ulaon ni Tondi Porbadia natolu i: Mangajarhon, paingothon dohot manghatindangkon taringot tu Jesus Kristus. Hita angka halak Kristen Batak nunga marnida i mamungka dibaritahon angka parbarita nauli na ro sian Eropa tu tano, luat nang roha ni halak Batak sahat tu tingki on. Digohi Ibana do i sahat tu tingki on. Tama tapuji goarNa.

Napaduahon, somal do tong dibaritahon di Pesta Parningotan di Hasasaor ni Tondi Porbadia di parmingguonta barita na uli na sian buku Ulaon ni Apostel na manaringoti taringot tu hasasaor ni Tondi i (Ul 2: 1-13).  Nunga saor tondi i di tongatonga ni angka siseanNa na pungu di Jerusalem, jala nunga saor tondiNa i di tongatonga ni ngolu ni angka na porsea di Ibana marsasahalak dohot marsasapunguan. Ndang holan bagabaga be haroro ni Tondi Porbadia i. Alai nunga masa, nunga tongtong masa, jala masa sahat tu sadarion. Saor Ibana di tongatonga ni ngolu ni naporsea tu Jesus Kristus Sipalua i.

Napatoluhon, sian buku Ulaon Apostel taringot tu ulaon ni Tondi i manguluhon ulaon mamaritahon barita nauli pinatupa ni angka siseanNa andorang so ro Jesus Kristus paduahalihon sahat tu tingki on, songon na ginurithon ni panurat Ulaon Apostel i. Ndang jadi holan paimahon boti hita angka na porsea di Jesus Kristus di haroroNa paduahalihon, alai andorang so ro Ibana paduahalihon ndang jadi hita mansohot mangulahon ulaonta ni donganan ni TondiNa, i ma mamaritahon barita nauli taringot tu Jesus Kristus. Naporsea dohot punguan ni naporsea na so mamaritahon barita nauli ndang mangolu jala mangula Tondi Porbadia di ngolu nasida. Las  rohanta ala sahat tu sadarion tongtong do diula huria ni Kristus di sandok portibion ulaon mamaritahon barita na uli taringot tu ngolu nang ulaon songon i nang pangajarion ni Tuhanta Jesus Kristus. Tapuji goarNa.

Napaopathon, somal do tong dienet jamita di minggu parningotan di ari hasasaor ni Tondi Porbadi i sian surat ni apostel Paulus tu huria Rom na manaringoti taringot tu songon dia ma parange ni angka na porsea na mangolu niuluhon dohot tinogutogu ni Tondi porbadia i, i ma ndang ngolu na mangihuthon angka patik-patik songon manang na mangihuthon hagiot, sangkapsangkap, hisaphisap ni daging na talu tu huaso ni dosa di pamatangta i, alai ngolu na mangihuthon dohot mangulahon lomo ni Tondi i do (Roma 8: 1-8 dohot 8: 12-15), ngolu na marparbuehon parbue ni Tondi na marragam i (Gal 5: 22). 

Alai di parningotan ni Hasasaor ni Tondi Porbadia i sadarion di tongatonganta halak Kristen Batak, ndang apala sian na opat na di ginjang i na dienet gabe jamita mamanghulingi hita sadarion, tgl 9 Juni 2019 on,  alai  taringot tu hagogoon ni Tondi Porbadia na mangula di bagasan ngolunta na so manahan manang na mura matapar on jala na ingkon mate ala ni dosa i do, alai na naung pinatigor ni Debata marhite ulaon ni AnakNa i do (dikaiosune). Jamitanta taringot tu Tondi Porbadia Napangoluhon. 

Tar-jarang do on na gabe jamita. Ai pasupasu nasumurung do i di hita, pinalumehon ni Debata Pargogo Nasohatudosan i tu hita angka na porsea.  Dia ma i? 

I ma on:  Molo/Ala maringan Tondi ni Debata di bagasan hita, songon tanda ni na mian Kristus di bagasan hita, masa do jala masa ma dua hamamasa di bagasan ngolunta angka na porsea di Ibana dohot angka na niinganan ni Tondi i. Duansai i, ingkon tapamanat, taauhon, tahalashon, tahamauliathon dohot tabaritahon dohot tahatindangkon tongtong.

Naparjolo, tondinta jolma na porsea on mangolu do ala naung dipatigor Jesus Kristus hita (Gorik: dikaiosune), atik pe mate jala ingkon mate do pamatangta on ala ni dosa (Roma 8: 10). 
Napaduahon, sunggulon ni Debata ma muse pamatangta na mate panghorhon ni dosa on songon panungguliNa di Jesus Kristus sian hamamateNa i.  Ndang marujung di hamamatenta ngolunta na nimianan ni Tondi i. Asa, ibana na di bagasan Kristus inganan ni TondiNa do, jala tondi ni ibana na niinganan ni Tondi i mangolu do marhite ulaon hatigoran na dipatupa Debata tu hita, atik pe pamatangna mate ala ni dosa. Lobi sian i dope tahe, sunggulon ni Debata do muse pamatangta na mate i. 

Impola: Dipangolu Tondi Porbadia do tondinta (Gorik: pneuma) di na mangolu dope hita di portibion, uju mangolu hita di portibion. Jala, dung mate pe pamatangta on, ndang marujung disi pamatangta on, alai sunggulon ni Debata Na marhagogoon situtu i pamatangta na mate i. 

Boasa ma on nuaeng mamangkhulingi hita halak Kristen Batak di sandok portibion, tarlumobi hita ruas ni Huria Kristen Batak di portibion, tarlumobi di ari parningotan di hasasaor ni Tondi Porbadia on di taon 2019 on, saminggu dung parningotan di hatutubu ni Pancasila, Dasar Negara Indonesia?

Naparjolo, suraon do ala ndang apala tahasiholi, taharinggashon, dohot ndang hiras be rohanta mangolu saurdot tu lomo ni roha ni Tondi Porbadia na mangingani hita on, baliksa gabe hagiot, hisaphisap dohot sangkapsangkap ni daging i nama natapatupa? 

Napaduahon,  suraon do ala ndang tatanda hinabalga ni pasupasu naung pinalumehon ni Debata tu hita i ma: "Rap dohot Tondi ni Tuhanta i angka na martondi na mangolu do hita on ganup uju mangolu hita"? 
Molo taboto do i, hiras be ma rohanta mandalani ngolu on, patupahon angka na denggan tu donganta jolma, i ma angka ulaon na denggan di bagasta, tu donganta saripe, tu donganta saulaon, tu donganta saparmeaman, tu donganta sahuta, tu donganta sabangso. Ndang angka na so denggan tu angka donganta jolma i be na taula. Ndang angka na agoan hiras ni roha (semangat) be ngolunta on. 

Mansai ringkot do on tarlumobi di tongatonga ni bangsonta Indonesia na naeng meret sian negara berkembang tu negara na maju. Ndang tarbahen hita mandungdung i molo martondi na mate do hita, martondi na kehilangan semangat juang. Baliksa, gabe martondi na mangolu jala na pangoluhon ma tondinta sandiri.

Napatoluhon, suraon do nunga gabe dohot hita gabe angka jolma na agoan panghirimon na mangolu di ngolunta sogot, na paheheon ni Tuhanta Debata i do ngolunta? Di Hakristenon, tatanda do pangantusion na mangihut on: Ala ni hatontuon na sunggulon ni huaso ni Debata do pamatangta na ingkon mate ala ni dosa i di ari sogot, gabe tubu ma hiras ni roha na timbo di angka na porsea i patupa na denggan di ngolunta sinuaeng. Ndang mabiar hita patupa hatigoran. Ndang mabiar hita bersemangat kepahlawanan di na patupa na denggan i hita. Baliksa, manang beha pe tantangan ni ngolu na taadopi songon dakdanak, remaja, naposo bulung, Ama nang Ina parsada tu tolu hurangan, nang tu angka natuatua na naeng marujung ngolu ala ni umur naung matua nang ala ni sahit, sai dirgak do simajujungta mangadopi tantangan na ro tu ngolu nang ulaonta. 

Secara khusus mansai ringkot do barita na uli sadarion tangihonon dohot auhonon ni angka ianakkon ni halak Kristen Batak, ruas ni HKBP na tongon mangadopi masa transisi di parsikkolaan dohot kuliah nasida. Naung tamat SD mangalului SMP na denggan. Na tamat SMP mangalului SMA na denggan. Na tamat SMA mangalului Universitas negeri na dumenggan di Indonesia on nang di Luar Negeri. 

Ndang apala maol auhonon ni angka na dapotan angka inganan parsikkolaan na denggan dohot angka na denggan kemampuan ekonomi ni natorasna hata ni Tuhanta on. Alai tarummaol do auhonon ni angka na so dapotan inganan parsingkolaan na denggan i.

Jala molo tauduti, ndang apala mura auhonon ni angka na mulaulaon na maol paro na ringkot di ngoluon hat ani Tuhanta i. 

Alai apala tu angka na mangadopi hamaolon mangauhon hata ni Tuhanta sadarion i do ro barita nauli i: Molo mian do Tondi ni Tuhanta di hita, molo, pangoluon ni Tondi i do tondinta, semangatta mangadopi angka tantangan i. Ndang gabe angka generasi muda nang pangula na parbiar hita, alai gabe angka generasi muda dohot pangula na marhiras tondi do ngolunta.

Mansai ringkot do hadirion na martondi na hiras tubu, martumbur, jala lam magodang di tongatonga ni halak Kristen Batak, laho mangalului angka prakarsa, inisiatif dohot pamingkirion na konstruktif parsidohot membangun ngolu ni bangsonta bangso Indonesia na naeng meret tu negara majun a sejahtera, na dame dohot na tigor tu ariari na ro on.  Ndang holan sian hamaloon ni jolma ro angka prakarsa dohot inisiasi i. Alai bahatan jala jotjotan ro sian angka na niinganan dohot tinogutogu ni Tondi Porbadia i do angka na berprakarsa, berinisiasi i. Masa i ndang holan di dunia usaha, alai dohot do i nang di dunia pemerintahan, dohot di dunia ilmu pengetahuan nang penelitian. Tondi Porbadia ni Debata na umboto saluhut i jala na marhagogoon i do na tuk patauhon hita manjumpangi angka pamingkirion na tuk pangoluhon di tongatonga ni hajolmaon di portibion. Alai angka na niinganan ni tondi na hodar, angka na pamatehon hajolmaon do na niula nasida.

Ala ni i, taauhon, tahalashon, tahamauliatehon jala tahangoluhon ma ngolunta na mangusande tu Tondi Porbadia dohot tu hagogoonNa patauhon hita martondi na mangolu, i ma martondi na pangoluhon.
Amen.

  BeritaTerkait
  • Jamita Evangelium Minggu Pentakosta I, 20 Mei 2018 "Nunga Dilehon Debata Tondi Porbadia tu Nasa Bangso" (Ulaon Apostel 10: 44-48)

    tahun lalu

    Oleh: Pdt. Dr. Robinson Butarbutar, Parsameanta, STT-HKBP, PematangsiantarPatujoloSomal do di parmingguon parningotan di hasasaor ni Tondi Porbadia di angka huria di portibion nasailaon dienet ba

  • Jamita Evangelium Minggu IV Adven 24 Desember 2017, Lukas 1: 26-38: Debata Ro Mamboan Asi ni Roha"

    2 tahun lalu

    Oleh: Pdt. Dr. Robinson Butarbutar, Sian parsameanta, STT-HKBP PematangsiantarDi minggu Adven paopathon sadarion, marhite barita nauli sinurathon ni parbarita nauli jala teolog Lukas di bindu 1 ayat 2

  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

    9 bulan lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar.HP/WA 0812-62472015Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24

  • Jamita Evangelium, 21 April 2019 Pesta Parjolo Parningotan Ari Haheheon ni Tuhan Jesus "Haporseai ma Kristus Naung Hehe i" (Johannes 20: 34-31)

    5 bulan lalu

    Oleh: Pdt Dr. Robinson ButarbutarSian Parsameanta, STT-HKBPHP/WA: 0812-62472015.Sian tingki tu tingki, sian tingki na robi di abad parjolo sahat tu abad padua pulu sadahon nuaeng, sada ulaon ni angka

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    2 tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb