• Home
  • Agama
  • Jamita Evangelium 4 Agustus 2019, Minggu VII Dung Trinitatis Debata do Hagogoon di ganup Parungkilon (Habakuk 3: 14-19)
KSP Makmur Mandiri
Sabtu, 03 Agustus 2019 13:00:00

Jamita Evangelium 4 Agustus 2019, Minggu VII Dung Trinitatis Debata do Hagogoon di ganup Parungkilon (Habakuk 3: 14-19)

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar, sian Parsameanta, STT-HKBP

Andorang so sahat dope jolma i di portibion tu hapistaran filosofis dohot hapistaran teknologis songon timbo ni sinuaeng di era revolusi industri na paopathon on sai tu Debata do jolma i ro mangadopi angka parungkilon ni ngolu na masa di portibion, dohot na masa tu marsasahalak, marsasapunguan dohot marsabangso, na tuk antuson ni jolma dohot na so tuk antuson ni pingkiranna. Molo masa isarana lalo, porang, anturaparon, ketidakbahagiaan, sai dipaadop jolma i do tu Debata manghatai dohot Ibana  manungkun boasa ma masa angka parungkilon i, songon dia ma adopan parungkilon i, di dia ma hajongjongan ni Debata di angka na masa i, dohot dia ma na boi bahenon ni Debata marhite hagogoonNa mangurupi jolma i, aha ma tona ni Debata tu hita na manaon siala ni angka parungkilon I dna. Di parbinotoan teologi, digoari ma panungkunion partondion sisongon I theodice. Di angka panghataion partondion dohot Debata nang dohot jolma sisongon i, sai dipatupa na martangiang i do di bonana angka pansuraion na so mangula Debata, na so tigor Debata, dohot na so mangolu Debata. Alai di ujung ni pamarungkilhonon partondion si songon i,angka pamingkirion na mangondihon Debata na tigor i do na dipatujolo. Gariada ruar do di panghataion partondion dohot Debata i pamujion tu Debata, ala ni hatigoranNa mangondihon dohot pamonangkon angka na martahan manghaporseaon tu Ibana, jala manguhum angka na patupa parungkilon i tu na porsea na tigor jala na pinatigor i.

Alai dina lam timbo parbinotoan ni jolma i mangadopi angka parungkilon ni ngoluna, molo masa manang molo diadopi angka parungkilon i marhite angka parbinotoan teknologis, ndang be apala jotjot manang olo jolma naung pistar i paadopadop bohi dohot Debata di partondionna songon na pinatolhas nangkin/di ginjang i, alai nunga tu hatauon ni jolma i sandiri mangadopisa na pinatupa ni jolma na marungkil I nama laho jolma i. 

Ala ni i do didok Fisikawan almarhum Stephen Howkins hea mandok na mangihut on: "Lam timbo parbinotoan teknologis ni jolma i, lam so diharingkothon be padohothon ulaon ni Debata mangurupi jolma i mangadopi parungkilonna. Alai beha asa lam timbo hapistaran teknologis ni jolma i ma dipareahi, ai ingkon jala holan i do na booio dihaposi mangadopi parungkilon i.  Molo diancam bencana ekologis do portibion, planet bumi on, ba dilului ma dalan beha asa boi pinda jolma i tu planet na asing na boi inganan ni jolma i.  I do umbahen na adong sada proyek na mansai arga nuaeng na paborhat jolma I tu planet Mars, alai syaratna ndang boi mulak tu portibion. Isarana:

Parjolo, di na lam tau jolma i mangadopi ancaman porang nang konflik sian tirket na ummetmet sahat tu tirket na tumimbo na disungkunhon ndang be dia ma na tarbahen Debata manghamonangkon manang pasiding porang, alai songon dia ma asa lam malo jolma i pasidingkon konflik manang porang, manang manguba konflik dohot ancaman porang marhite patimbohon parbinotoan diplomacy dohot managemen konflik, manang molo ingkon gabe marporang pe beha asa boi monang marhite patimbo peralatan dohot ilmu porang, mamungka sian porang maardongan sinjata na somal sahat tu sinjata di porang cyber.

Paduahon, di na mangadopi anturaparon , ndang apala dipasungkunhon  be tu Debata boasa masa anturaparon i, jala dia ma naboi patupaon ni Debata paso i, jala dia tonaNa tu jolma i sian anturaparon i. Alai na dipasungkunhon i ma aha ma sipatupaon ni jolma i asa tuk hinaadong ni sipanganon. I ma  marhite na patimbohon parbinotoan biotechnology na mambahen jolma i boi paradehon sipanganonna  na tuk tu 7 milliar jolma di portibion, nang di tano na sompit dohot tano na harsang sahali pe. 

Patoluhon, songon i do tong nang di na mangadopi sahit dohot  epidemi nang ngolu na so hipas na pajempekhon ngolu ni joma i. Ndang apala diparungkilhon be di tangiangna tu Debata boasa ro manang masa sahit I tu dirinta, di dia do hajongjongon ni Debata di sahitta/niba on, Ibana do mambahen i, uhum sian Ibana do i, manang salaniba sandiri do i, jala pangidoan asa dipamalum Debata sahitna. Alai beha asa lam timbo parbinotoan teknologi medis nama dipatupa, ai i do na  boi pamalumohon sahit ni jolma i. Ai i do nab oi paganjanghon ngolu ni jolma i. 

Jala, paopathon, di na mangadopi angka bencana alam na marragam i, na jotjojt ndang tarsura, ndang apala panghataion dohot Debata be na dipatupa, manungkunhon boasa masa angka i, dia ma nidokna,  dohot udutna. Alai  dipatupa ma nasa na boi patimbohon parbinotoan tanggap dohot tanggul bencana nama dipatupa, ndang asa mangotapi bencana i, alai mangorui panghorhonna tu hasusaaan ni jolma ma mangalo dohot tu angka bangunan, asa boi sahatopna diboto tanda bencana i, isara peringatan Tsunami molo adong gempa, songon na dipatupa Badan KMG nantori di na masa gempa di hita on. Dipatupa ma angka alat-alat tusi.

Nang, palimahon, di na mangadopi ketidakbahagiaan dohot ketidaknikmatan ni ngolu, ndang tu Debata laho manungkun boasa ndang marna las roha ni jolma I atik be adong sude di ibana, Alai na dipatupa i ma  marhite teknologi robot, nano teknologi nang hapistaran na binahen ni jolma, artificial intelligence, na ummalo sian jolma i sandiri sian jolma i sandiri mananda dirina, nang ummalo mangula sandiri. I do na masa di partingkian revolusi industri napaopathon nuaeng.  I ma na dipangke sude angka parbinotoan teknologi naung tardungdung ni jolma i laho mambahen ummura jala tumabo jolma i mangolu. Ndang songon lojana nasailaon. Ndang songon maol na nasailaon. 

Di na so sahat dope hita tu era hapistaran ni jolma i dohot hapistaran ni robot pinatupa ni jolma Isisongon I, najolo nang nuaeng di na mangadopi tantangan ni ngolu, i ma di partingkian na sai tu Debata jolma i ro manungkunhon dia do na masa on, di dia hajongjongon ni Debata, jala dia ma na boi patupaon ni hagogoon ni Debata mangurupi jolma i mangadopi parungkilonna,  dua do gondang ni ujung ni pamarungkilhonon ni jolma i. Gondang na parjolo i ma, madabu manang mintop ma haporseaon ni jolma i di haadongon nang hatauon, lam ma hagogoon ni Debata mangurupi natigor  nang manguhum jolma parjahat i. 

Gondang na paduahon i ma lam togu haporseaon ni jolma i tu Debata nang di na mangadopi parungkilon i. Molo ndang tuk ibana ruar sian panghataion partondion dohot Debata di na mangadopi parungkilon i, ba ditadinghon ibana ma haporseaon tu Debata. Alai molo tuk do ibana ruar, ba lam tamba togu do haporseaonna. Alai molo ndang tolapsa ruar sian pamarungkilhonon partondion dohot Debata i denggan, ba disi ma ditadingkon ibana haporseaon di haadong jala ulaon ni Debata di ngolu on, di portibion, tarlumobi di ngoluna. 
Gondang na parjolo i do na masa tu diri ni sahalak Isahalak  Teolog Kristen di negara maju, Amerika Serikat , sahalak Pangajari Padan Naimbaru na tarbarita do haporseaon Hakristenon, sian keluarga Hakristenon Baptis di dekade paduahon abad pa-21 hon on, na margoar Dr. Bart D. Ehrman.  Ala ndang tarbahen ibana manghamonangkon  parungkilon boasa dipasombu Debata masa di portibion hajahaton dohot parungkilon i,   atik pe sai tong do mangajari dope ibana ndang porsea be ibana di hagogoon ni Debata.  Didok ibana songon on. 

"I got to a point where I just didn't believe it any more.. the very heart of the Christian claim that God loves his people, answers their prayers and intervenes when they are in need. I came to think there was no such God, and decided that I had no choice but to abandon my faith and leave the Christian tradition." = "Nunga sahat ahu tu sada tingki nan dang porsea be ahu disi..Unok ni panindangion Kristen na mandok na Debata manghaholongi bangsoNa, mangalusi angka tangiang nasida jala campur tangan uju diharingkothon nasida. Sahat ma ahu tu pamingkirion nan dang adong Debata na songon i, jala huputushon ma na ndang adong pilihan di ahu asing sian na manadingkon haporseaon jala manadingkon tradisi Hakristenon."

 Indonesia: "Saya telah tiba pada satu titik di mana saya tidak percaya tentangnya lagi..jantung dari keyakinan Kristen  adalah bahwa Allah mengasihi umatNya, menjawab doa-doa mereka dan mengadakan intervensi ketika mereka butuh. Saya telah tiba pada pemikiran bahwa tidak ada Allah sedemikian, dan saya memutuskan bahwa saya tidak memiliki pilihan kecuali meninggalkan iman saya dan meninggalkan tradisi Kristen."

Ndang tarjalo ni Bart D. Ehrman I panorangion  partondion pinatupa ni angka na porsea na marusaha patorangkon boasa songon i masa bahat ni parungkilon di portibion, i ma na ginoaranna Theodice (na marlapatan marusaha mamartahanhon haadongon dohot hasintongan nang hatigoran dohot hagogoon  ni Debata atik pe berengon hira so idaon angka i). Dia na pinatorang ni angka na porsea i? I ma molo masa parungkilon tu ngolu niba, ra adong do sangkap ni Debata disi, i ma ra maminsang iba, ra patoguhon haporseaon niba, jala ra patupa na denggan di tingki na rot u ngolunta. 

Bahat do ra angka na porsea i sian najolo sahat tu nuaeng pe tahe naung sahat tu pangalaho songon na pinatupa ni si Bart D. Ehrman i, atik pe ndang diula nasida hajahaton. Gariada diula nasida na denggan tu donganna jolma. Bahat do ra tong na tongon marungkil di haporseaonna di ulaon ni Debata na manghaholongi dohot na mangurupi ibana di parungkilonna. Bahat do ra tong na sai tongtong dope tarunjun masuk tu pamingkirion na so mangula be Debata, nang tu dirina.  

Gondang napaduahon jotjot do dipatuduhon angka na porsea di tongatonga ni bangso ni Debata najolo di Padan Naroboi,, sahat tu tingki on di tongatonga nin halak Kristen di portibion nang sahat tu abad pa-21-hon on, i ma lam dokdok parungkilon siadopon lam togu haporseaonna. Si Sadrak, Mesak dohot Abednego, isarana, di Daniel 3: 18-19 i, di na mangadopi parungkilon na so boi atasanna, ruar do panindangion haporseaonna mansai togu sian nasida na mandok na atik pe ndang diurupi Debata ibana mangadopi parungkilon niadopanna sian Kaisar na manguhum mate ibana ala so olo manomba Debata ganaganaan sian mas binahen ni Kaisar i, ndang olo ibana manomba manang ise ia so sasada Debata Namangolu i. I do na niongku ni panurat surat Heber  di Padan Naimbaru, di bindu 11 i  na paandorhon angka tokoh haporseaon na hot porsea atik pe so diida pangurupion ni Debata di ngoluna. I do nang  nidok ni si Martin Luther di jolo ni angka raja nang uluan ni huria na dipaimbaru Debata marhite haporseaonna uju diancam hukum mate ibana molo so manguba roha nang pingkiranna, didok ibana songon on tu nasida: "Hier stehe ich, ich kann nicht aendern" (Dison jongjong ahu, ndang tarbahen ahu muba. "Di sini saya berdiri, saya tidak dapat berobah).

Atik pe diadopi  ibana/nasida/bangsona angka na so boi taraluson di parungkilon ni ngolu on, termasuk ma i parungkilon na so ro sian dirina/nasida sandiri alai parungkilon na ro sian duru ni dirina sandiri isara bencana alam, hajahaton ni angka na jahat di portibion na so tuk dope diotapi angka pamarenta tung songon dia pe denggan ni pamarenta mangula di bidang keamanan dohot hahipason ni rakyat, ianggo angka naporsea di Bibelta on dohot di sejarah pardalanan Hakristenon, sai hot do nasida/hita manghaporseai hagogoon ni Debata mangurupi na porsea i mangadopi parungkilonna/ta/nasida.

Panindangion haporseaon na songon i do na disoarahon Panurirang Habakuk di tingki na salpu, i ma na gabe ojahan ni jamita di minggunta minggu Trinitatis sadarion:

Parjolo, di bindu parjolo ayat 1-17 taida do na dung dipatolhas ibana hinajorbut ni hajahaton na pinatupa ni sada bangso na balgana martentarahon  na mansai  togu jala jago jala jahat  nang jorbut manaluhon angka musuna , sampe pola naporseai  di parungkilon partondionna  manghilala dohot manghaporseai na dipangke Debata do na pinatupanasida i manguhum bangsoNa, alai  di bindu paduahon tangkas do dihaposi ibana na  uhumon ni Debata do na so tigor marpangalaho maradophon bangsoNa i (Bindu 2: 4-, 5, 6, 7, 8, 9-11, 12-13, 15-16), alai na tigor i mangolu do binahen ni haporseaonna di Debata (2:4).  Gariada tahe tuk do na tigor i, na pinagolu ni haporseaonna i, mamuji Debata marhite na mandok, "Digohi Debata do portiboion dohot hamiuliaonNa (2: 14); "Mian di bagasNa Nabadia i do Debata, ingkon hohom ma jolma i " (2: 20). Nidok ni Habakuk bindu 1-2 i, i ma di na mangadopi angka hajahaton dohot hagaoron ni portibion, tuk do na tigor I, na pinatigor ni haporseraonna di Debata, mamuji Debata.

Napaduahon, di bindu tolu ni Habakuk i, tarlumobi di ayat 14-19 lam dipatogu ma panindangion haporseaon na dipaandar di bindu 2: 4, 14 dohot 20 i), di bagasan tangiang ni panurirang i, i ma:

a. Pangidoan tu Debata asa dipaimbaru dohot dipatubegehon ulaon ni Debata (3: 1). Nidokna, I ma molo diadopan parungkilon bolon, ingkon sosoon do diri paimbaruhon panandaionta di ulaon na balga ni Debata. Ndang baliksa manghalupahonsa.

b. Marningot dohot manungguli Debata asa, di na masa parungkilon na masa, na diida na porsea i hira tardok na tarrimas Debata, tong diingot  Asi ni rohaNa (3: 2b)

c. Mamuji Debata ala ni hadirion dohot ulaonNa nab alga (3: 3-12).

d.Mangongku/manghatindangkon na diondihon Debata do angka natigorNa jala diuhum do na patup na so denggan nang tu naporsea (3: 13-16).

e. Paimaimahon Benget di Debata  mangula manguhum angka na so tigor (ayat 16)

f. Marlas ni roha huhut mamuji Debata tung beha pe hinamaol ni kondisi ni ngolungolu na diadopi (gagal pertnaian, gagal peternakan, gagal sumber ngolu, ayat 17-19).

Beha do hita angka na porsea na mangolu dope di era Revolusi industri na parjolo? Beha do hitat angka ruas ni huria ni HKBP na mangolu di era revolusi industri na paduahon dope? Beha do hita na mangolu di era revolusi patoluhon dope? Beha do hita na mangolu di era revolusi industri napaopathom, na mandok hapistaran teknis ni jolma i nama sipangasahonon di ngolu on? 
Molo taadopi parungkilon ni ngolu, sian naboi  taatasi sandiri sahat tu na so boi tarantusan hita dohot na so taratasi hita pe tahe, dia sialana, dia panghorhonna dohot dia nidokna, boi dope hita songon angka na porsea di Bibel i dohot di sejarah ni pardalanan ni Hakristenon di portibion dohot Hakristenon di halak Batak I ma hot jala lam togu manghaporseai Ibana dohot hagogoonna atik pe ndang taida nuaeng nang sogot pe pangurupionna? Manang tadinghononta ma haporseaon tu hagogoon ni Debata songon pinatupa ni Dr. Bart D. Ehrman i? 

Manang, ala nunga tahilala na nunga tuk parbinotoan teknista di ngolu on, tadok ma ndang apala huharingkothon be pangurupion ni hagogoon ni Debata di ngolunta, di ulaon ni huria i? Manang ihuthononta do naung pinatuduhon ni naporsea i. Baliksa manadingkon haporsreaon tu tu hagogoon ni Debata, boi do hita mamuji Debata, paimahon ulaon ni Debata, jala marlas ni roha nang di na so tahilala dope dohot muse hagogoon ni Debata I mangula di ngolunta? Manang lam togu ma haporseaonta tarlumobi ala nunga lam malo hita mamangke teknologi na taida songon pasupasu ni Debata tu hita di partingkian nuaeng on?
Amen(*)
  BeritaTerkait
  • Jamita Evangelium 23 Juni 2019, I Dung Trinitatis: Ngolu na marhabadiaon di jolo ni Debata (Pang 22: 12-17)

    4 bulan lalu

    Oleh: Pdt Dr. Robinson Butarbutar Parsameanta, STT-HKBP (0812-62472015)Hamu angka dongan,Di Minggu Parjolo Dung Trinitatis sadarion, di na tapabagas panandaionta di Hadirion, Ulaon nang Lomo ni Roha n

  • Jamita Evangelium Minggu XII Dung Trinitatis 19 Agustus 2018 1 Musa 17: 15-27 "Uli ni na Sauduran"

    tahun lalu

    Oleh: Pdt Dr. Robinson Butarbutar, Parsameanta, STT-HKBP.Dua ari dung sude hita rakyat Indonesia na mansai marragam rap mapestahon Hari Ulang Tahun Kemerdekaan Republik Indonesia na pa-73-hon di tgl 1

  • Jamita Evangelium, 13 Januari 2019, Minggu I Dung Epiphanias "Debata Manogunogu/Mandongani BangsoNa" (2 Musa 33: 12-17)

    9 bulan lalu

    Oleh: Pdt Dr. Robinson Butarbutar, Parsameanta, STT-HKBP. HP/WA 0812-62472015Sada hata na dipangke rakyat Indonesia manggombarhon panghirimon ni rakyat idaonna patupaon ni angka pamarenta di sude tirk

  • Jamita Evangelium 28 April 2019, Minggu Quasigodogeniti Manongtong Mangihuthon Jesus (Johannes 21: 15-19)

    6 bulan lalu

    Sian Parsameanta di PematangsiantarSTT-HKBP.Pdt Dr. Robinson Butarbutar Hp/WA: 0812-62472015Marasing sian isi ni bagian pangujungi ni Evangelium Markus (disurathon taon 69/70), Lukas (disurathon taon

  • Jamita Evangelium 18 Agustus 2019, Minggu IX Dung Trinitatis: Janghon ma Habisuhon sian Debata

    2 bulan lalu

    Oleh: Pdt Dr. Robinson Butarbutar, sian Parsameanta, STT-HKBP, HP/WA 0812-62472015Di ujung ni abad pa-20-hon sahat tu bona ni abad pa-21-hon, adong do sada hata na manggombarhon dia hasurungan manang

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb