• Home
  • Agama
  • Jamita Evangelium 28 April 2019, Minggu Quasigodogeniti Manongtong Mangihuthon Jesus (Johannes 21: 15-19)
KSP Makmur Mandiri
Minggu, 28 April 2019 07:05:00

Jamita Evangelium 28 April 2019, Minggu Quasigodogeniti Manongtong Mangihuthon Jesus (Johannes 21: 15-19)

BAGIKAN:
Ist
Pdt Dr Robinson Butarbutar
Sian Parsameanta di Pematangsiantar
STT-HKBP.
Pdt Dr. Robinson Butarbutar Hp/WA: 0812-62472015

Marasing sian isi ni bagian pangujungi ni Evangelium Markus (disurathon taon 69/70), Lukas (disurathon taon 80) dohot Mateus (disurathon taon 85)- tolunsa manaringoti taringot tu tona ni Jesus dung heheheonNa tu angka siseanNa asa borhat nasida mamaritahon barita nauli asa porsea,muba jala malua  na tumangihonsa, unang mago  (Mrk 16:15; Lukas 24: 7-49; Mat 28: 18-20), i ma na manguduti ulaon naung binonaan nasida sinuru ni Jesus - ia isi bagian pangujungi ni Evangelium Johannes ndang be manaringoti nados, alai taringot tu panjouon ni Jesus tu apostel Petrus asa mangihuthon Ibana Tuhan Jesus naung hehe jala patuduhon diriNa i nang di na manang uju mangadopi parungkilon (ayat 18-19). Panjouon mangihuthon Ibana i dipasahat dung jolo ditonai Ibana apostel I tolu hali asa mangulahon ulaon parmahanion di angka anak ni birubiruNa (Gorik: arnia mou, ayat 15) dohot birubiruNa (Gorik: probata mou, ayat 16-17) songon hataridaan ni holongna tu Jesus.  

Sasintongna di bona ni ulaonNa di Galilea nunga dipangido Jesus angka siseanNa na sampulu dua i asa mangihuthon Ibana. (Sude do evangelium naopat i manurathon i). Jala diihuthon nasida do Ibana sahat tu Getsemane. Alai sude do nasida manadingkon Jesus uju mandalani via dolorosa i Ibana di Jerusalem. Apostel Petrus sandiri, na sai patuduhon hasatiaanNa tu Jesus andorang so manaon Jesus di Jerusalem nunga mansohot mangihuthon Jesus na manaon i, sahat tu na mansoadahon Ibana (Joh 18: 15-27). Nuaeng ingkon diulakhon Jesus muse manjou apostel i mangihuthon Ibana.  

Siala ni i do ia na gabe tema ni jamitanta di bagasan minggu Quasigodogeniti sadarion, sada minggu na di bagasanna manjouhon tu hita asa sai maus di hata  hangoluan na sian Tuhanta i  sadarion songon posoposo na imbaru tubu, atik pe nunga tung marnia lelengna hita mangihuthon Jesus Kristus di ngolunta mamungka sian pandidionta i, i ma "Manongtong Mangihuthon Jesus." Asa songon posoposo na imbaru tubu i hita manjangkon hataNa na manjou hita mangihuton Ibana, asa humipas partumbur ni ngolu haporseaonta di Jesus naung hehe i. 

Panjouon sahalion, na boi dohonon ihut tu panjouonNa tu si Petrus nang angka siseanNa na asing i, adong do pangondolanna. Dia ma i? Ala na dienet jamita panjouon ni Jesus tu Apostel Petrus  nang tu hita i sian ujung ni panghataionNa tu si Petrus na manaringoti taringot tu panurgasion ni Jesus tu ibana/hita asa mangulahon ulaon parmahanion, ndang tarsirang hita joujou mangihuthon Ibana i sian ulaon parmahanion.

LapatanNa, joujou mangihuthon Jesus i marhadomuan do i tu ulaon parmahanion. NidokNa tu apostel Petrus/hita i ma: "Ihuthon ma ahu di manang di na mangulahon ulaon parmahanion i."

Songon dia huroha ulaon parmahanion ni Jesus naung pinatuduhonNa uju mangula di Palestina sahat tu ujung ni ngoluna?  On do: Songon nidokNa tu angka halak Farise di sada tingki (Joh 9: 15, 40; 10), ia Jesus i ndang parmahan siupaan, gajian - i ma na manadingkon birubiruna uju ro uju marnida ro babiat, gabe disoro babiat i birubiru i jala dipanserakhon (Joh 10: 12) -, alai parmahan na denggan do ianggo Jesus i, i ma na maneahon hosana humophon angka birubiruNa, i ma angka naung porsea di Ibana uju di Palestina dope Ibana nang dung i di sandok portibion, sian abad parjolo sahat tu nuaeng, nang di ariary na naeng ro  (Joh 10: 11, 15-16).  I ma barita na mansai uli tu hita angka siihuthon Ibana, angka siseanNa. 

Ala ni i ia joujou ni Jesus tu apostel Petrus dung hehe Ibana sian hamatean, jala nang tu hita nuaeng di abad pa-21-hon on, i ma joujou mangihuthon Jesus Parmahan na denggan i, na maneahon diriNa humophop hita. Mangihuthon Ibana parmahan na denggan i do pinangidoNa tu si Petrus/tu hita di na mangulahon ulaon parmahanion na pinasahatNa tu ibana/tu hita, asa molo taadopi parungkilon di na mangulahon ulaon parmahanion i songon na ingkon adopon ni apostel Petrus di ari hatutuana (i da Joh 21: 18-19 na manurirangkon songon dia siadopan ni apostel Petrus di ari hatutuana) i, ingkon haparmahanion ni Jesus do siihuthononta songon hataridaan ni holongta tu Ibana (Yoh 21:15-17), i ma na so manadingkon angka birubiruNa, alai na maneahon ngoluNa tu nasida.

Dia ma ulaon parmahanion na tinonahon ni Jesus tu aspotel Petrus/tu hita? I ma asa patupahon ulaon parmahanion na hibul, ndang na pejek. I do umbahen na di tonani Jesus tu apostel Petrus/tu hita di Joh 21: 15-17 i songon panonaion na mansai bagas. Dia ma i? 
Nian di Bibel hata Batakta songon i nang di Alkitab, dos do hata tona na pinasahat ni Jesus tu si Petrus/hita, i ma parmahani ma, manang gembalakanlah. Alai di hata Gorik ndang dos hata na dipangke Jesus Parmahan na denggan i di tolu hata panurganison pinasahatna tu apostel Petrus (ayat 15-17). Hata na dipangke Yesus naung hehe i di tona na parjolo i ma lehon mangan (Gorik: boske), i ma na di tona na parjolo (ayat 15) dohot di na patoluhon (ayat 17). Alai hata tona na paduahon parmahani ma (Gorik: poimaine). Mangalehon mangan i ma asa mangolu anak ni birubiru nang birubiru i.

Sipanganon nasida pe ndang holan sipanganon partondion songon na somal diantusi bahat halak Kristen. Alai ingkon sahat do sipanganon pardagingon, i ma ulaon patauhon na porsea i asa boi jongjong di patna sandiri, asa boi mangolu denggan, ndang holan mangalehon sipanganon na torus mameme. I do umbahen na didok Jesus di Joh 10: 10, ia sangkap haroroNa i ma laho mangalehon ngolu na sasingkopsingkopna  (Gorik: Zoen perisson) tu angka birubiruna.  

Ulaon marmahani (poimaine) i pe, i ma manjagahon angka biburbiru i sian angka pangaroroion ni babiat, na manerakhon dohot mangago nasida.  I do umbahen natadok: Ulaon parmahanion na sasingkopsingkopna do ulaon parmahanion pinatupa ni Jesus dohot na ingkon patupaon ni angka parmahan di tongatonga ni punguan ni halak Kristen nang sahat  tu nuaeng. Molo sanga pejek pangantusion dohot pangulahononta di haparmahanion tinurgashon ni Jesus, ba muba ma hita. Ulaon parmahanion na singkop i ingkon do patupaonta.

Jala siparmahanonta pe ndang holan tu angka anak ni birubiru ni Jesus (Gorik: arnia,Inggris: lamb, Joh 21: 15) i, i ma angka na mansai mura roroon jala paserahonon ni babiat i, na so margogo mangadopi angka mara, i ma angka dakdanak nang remaja di tongatonga ni punguan ni na porsea i, alai dohot do tong angka biruburu ni Jesus i sandiri (Gorik: probata, Inggris: sheep), i ma angka birubiru na naung tobang, matoras, naung boi mangalului jampalan na lomak i, alai tong do na so margogo mangadopi babiat panoro i.  Duansa ingkon siparmahanon. Ndang holan na gale, na so mardihadiha, na so marhoho, na rentan maradophon angka mara, alai dohot do angka naung boi jongjong di patna sandiri, alai tong do marhagaleon, na naung sukses di ngolu on, alai tong do na sai adong hagaleonna songon jolma na mura matapar on, na mura diunjuni angka pangunjunan na marragam i saurdot tu konteks ni ngolu ni jolma i, sian zaman batu sahat tu postmodernisme nuaeng, era digital nuaeng, tarlumobi di era revolusi 04 nuaeng, na lam mangasahon angka alat na ummalo jau tumau mangadopi angka ulaon ni jolma i sandiri nang panghilalaan ni jolma i, na so mananda batas-batas ni inganan, ulaon, dohot angka na asing i.

Boasa ma joujou manongtong mangihuthon Jesus parmahan na denggan roha i, asa nang hita patupa parmahanion na hibul jala inklusif, ndang holan tu angka anak ni buribiru ala dohot do tu birubiru i  dijouhon tu hita nuaeng di dekade paduahon abad pa-21-hon on, di na taboto mansai bahat angka hagogoon dohot tondi na hodar na manangkapi mangaroro angka anak ni birubiru dohot birubiru ni Tuhanta i?

1.Suraon do siala sanga pangantusionta dohot pangulahononta di joujou mangihuthon Jesus i holan joujou mangihuthon angka ajar ni Jesus na naung somal taboto, i ma asa mangolu hita di bagasan ngolu na imbaru, asa tapahipas parsaoranta, asa tongtong hita marbarita nauli  taringot tu haluaon di bagasan Jesus Kristus di tingki na une dohot na so une maniru cara ni Jesus, dohot asa patupahon ulaon mangasii na ringkot asian, alai ndang sahat dope tu na mangihuthon Jesus di ulaon parmahanion songon na pinasahatna tu apostel si Petrus dung hehe i Jesus?

Panghorhonna gabe ndang apala marsitut hita patupa patupa ulaon parmahanion songon jinouhonNa i, panghorhonna gabe bahat angka anak birubiru nang birubiru ni Tuhanta Jesus i sanga ndang dapotan sipanganon na mansai ringkot jala sanga diroro babiat i? Ringkot do on tasulingkiti di jolo ni Tuhanta. 

2. Suraon do siala ni i ndang malo be ganup ruas ni huria patupa ulaon parmahanion di ngoluna, di bagasna, di ulaonna, di parsaoranna, baliksa gabe baliksa diula, i ma mangunjuni donganna jolma asa sahat tu parmaraan ni ngolu, gabe manusai ngolu ni donganna jolma, donganna sabagas, donganna saulaon, donganna sahuria?

3. Suraon do ala haparmahanionta saleleng on mansai pejek, i ma holan manjagahon angka anak ni birubiru ni Jesus i manang  holan angka birubiru ni Jesus i? Ndang duansa taparmahani? Manang sada pe ndang be denggan taparmahani?

4. Suraon do ala haparmahanionta nasailaon i ma holan haparmahanion na holan manjagajaga anak ni birubiru ni Jesus nang birubiru i sian mara, ndang sahat tu na mamboan mulak muse angka na sanga tarsulandit, angka na sanga mandao, ndang sahat tu na pajongjong muse nasida naung sanga madabu, paimbaruhon angka naung sanga maila, susa di ngoluna ala ni hasalaanna?

5. Suraon do ala haparmahanionta holan haparmahanion na sai manjagajaga,  ndang be sahat dope tu haparmahanion na mangalehon sipanganon na hibul i tu angka anak ni birubiru nang birubiru ni Tuhanta i, i ma parmahanion na komprehensif, na dohot tu na patauhon angka anak ni birubiru dohot birubiru na gale, na so pistar dope, so margogo, na marsahit, na so mardihadiha, asa boi jongjong di ginjang ni patna, asa pistar, asa malo, asa adong di ibana di ngolu on, ndang holan mangarop pangurupion alai nunga sangat tu na boi patupa angka ulaon na mangurupi na asing? Ringkot do tasulingkiti.

6. Suraon do ala ulaon parmahanion na tapatupa saleleng on nunga songon pangulahonon parmahanion ni angka parmahan gajian, na so songon haparmahanion ni Jesus na maneahon hosana humophop angka birubiruNa?  Molo songon i do hita hape manang songon i dope hita, gariada gabe dohot hita mengorbani angka na taparmahani i, songon na pinatupa angka na manggoari dirina parmahan alai patupa angka ulaon na mamboan mara tu angka dakdanak (ulaon paedopholia), tu angka boruboru, tu angka kaum fiable, nang tu angka ulaon na manusai ngolu ni angka na dipasahat Debata tu hita? Isarana, boasa ma di angka ulaon  parmingguon manang partangiangan ni hurianta ndang apala denggan situtu dope panarihononta di angka ruas ni hurianta na diffable, na marhatauon na marasing sian hatauonta? Tapajongjong angka bagas joro na imbaru na so pola mangalehon inganan nang kesempatan tu angka na marasing hatauonna?

Suraon do ala songon angka natutua, pemimpin, pejabat di angka ulaon na marragam i, ndang be taulahon ulaon haparmahanion tinonahon ni Jesus tu hita, di tongatonga ni huria nang di masyarakat, pamarenta nang usaha na metmet sahat tu na balga, nang politis, pendidik, dna i), ndang be taulahon ulaon parmahanionta?
I do angka sungkunsungkun sialusanta mangalusi panjouon ni Tuhanta i di minggunta sadarion na manjouhon hita asa mangihuthon Ibana, mangihuthon haparmahanionNa, mangihuthon panuruonNa asa tapatupa haparmahanion na singkop.

Asa, denggan do tarataratai pangihuthononta di Jesus Kristus di tingkion, alai tarlumobi ma di minggunta sadarion, pangihuthononta di ulaon haparamahanion i tinurgashon ni Jesus tu Apostel Petrus nang tu ganup angka siihuthon Ibana, di jabu nang di ulaon songon i nang di parsaoranta. Amen
  BeritaTerkait
  • Jamita Evangelium, 21 April 2019 Pesta Parjolo Parningotan Ari Haheheon ni Tuhan Jesus "Haporseai ma Kristus Naung Hehe i" (Johannes 20: 34-31)

    5 bulan lalu

    Oleh: Pdt Dr. Robinson ButarbutarSian Parsameanta, STT-HKBPHP/WA: 0812-62472015.Sian tingki tu tingki, sian tingki na robi di abad parjolo sahat tu abad padua pulu sadahon nuaeng, sada ulaon ni angka

  • Jamita Evangelium, 12 Mei 2019, "Mian di bagasan Jesus Kristus asa Marparbue", Johannes 15: 1-8, Minggu Jubilate

    4 bulan lalu

    Oleh: Pdt Robinson Butarbutar, STT HKBPTingki ndang ndang adong dope media komunikasi ni angka peduduk ni portibion marhitte Internet andorang so taon 1950-an, marungkil do ama dohot ina nang angka da

  • Jamita Evangelium, 26 Nopember 2017 Minggu Parningotan ni Angka Namonding, Turpuk: Mateus 25: 31-46 "Hangoluhon ma ngolu na manontong i."

    2 tahun lalu

    Oleh: Pdt Dr Robinson Butarbutar, STT HKBPSian mamungka mangula Jesus di Palestina sahat tu na tubu jala maherbang huriaNa di abad parjolo, sahat tu tingki on, nunga tung bagas diboto, dihaporseai, di

  • Jamita Evangelium, Pesta Parjolo Parningotan ni Haheheon ni Tuhan Jesus 1 April 2018: Gabe Sitindangi Haheheon ni Kristus (Ulaon Apostel 10: 39-43)

    tahun lalu

    Oleh: Pdt. Dr. Robinson Butarbutar, Sian Parsameanta, STT-HKBP PematangsiantarBarita nauli taringot tu haheheon ni Jesus Kristus sian hamatean nunga marrumangkun barita klassik di portibion mamungka s

  • Jamita Evangelium, Minggu Quasimodogeniti 8 April 2018: Parmahani Ma Birubiru ni Debata

    tahun lalu

    Oleh: Pdt Robinson Butarbutar, Sian Parsamenta, STT-HKBP.Dung hehe Jesus sian hamatean, andorang so manaek Ibana tu banua ginjang, andorang so ditonai Ibana angka siseanna laho tu sandok portibion mam

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb