• Home
  • Agama
  • Jamita Evangelium 23 Juni 2019, I Dung Trinitatis: Ngolu na marhabadiaon di jolo ni Debata (Pang 22: 12-17)
KSP Makmur Mandiri
Sabtu, 22 Juni 2019 08:51:00

Jamita Evangelium 23 Juni 2019, I Dung Trinitatis: Ngolu na marhabadiaon di jolo ni Debata (Pang 22: 12-17)

BAGIKAN:
Edward Tigor Siahaan
Pdt Dr Robinson Butarbutar
Oleh: Pdt Dr. Robinson Butarbutar Parsameanta, STT-HKBP (0812-62472015)

Hamu angka dongan,

Di Minggu Parjolo Dung Trinitatis sadarion, di na tapabagas panandaionta di Hadirion, Ulaon nang Lomo ni Roha ni Debata di ngolunta, ndang dienet jamita sian bagian bona ni Surat Pangungkapon ni si Johannes na tinongosna tu angka huria di Kota Epesus di Asia na metmet uju mangadopi paarungkilon bolon panghorhon ni pangalaho ni Kaisar Domitianus na mamaksa angka siihuthon Jesus asa mansoadahon Jesus, asa mansohot manomba Ibana molo naeng peopon nasida ngolunasida. Jala ndang na sian bagian tonga dohot andorang so ujung ni suratna i. Alai sian bagian parpudi si Surat Pangungkapon i do. 

Ia di bagian bona disosoi Yesus Kristus Birubiru ni Debata naung monang i do angka ruas ni huriaNa i asa muba sian angka hahuranganna be (ida Pangungkapon bindu 2-3) asa unang ro Ibana manguhum nasida, baliksa asa martua. 

Ia na di bagian tonga, marhite marragam - isara patorangkon dia tongon jala na naeng masa di banua ginjang, banua tonga on dohot banua toru - disosoi angka huriaNa i asa martahan ro di ujung tung beha pe dokdok ni parungkilon tinaonnasida/na taadopi di portibion ala ni Kristus (ida Pangungkapon 4-16), ai monang do Debata, talu Sibolis, jala pamonangonna angka na martahan ro di ujung (Pang 4-16). Jala di bagian andorang so bagian ujung ni Surat Pangungkapon on dipabotohon do na tibu ma ro hadadabu ni harajaon ni na palindaklindak nasida, pola didok di bagasan hitungan jom (ida Pangungkapon 17-18). 

Tangkas do hamomonang ni Anak ni Birubiru i dohot hamomonang ni na togu hasatiaonna tu Jesus Kristus. Tangkas hatatalu ni Sibolis i (Ida bindu 19-20). Di bagian andorang so pangujung ni surat i dipabotohon hasasalpu ni portibion on, dohot haroro ni Tano dohot Huta Naimbaru sian banua ginjang (Ida Pang 21: 1-22: 5). 

Alai apala di bagian parpudi situtu digurithon panurat ma Tona parpudi ni Tuhan Jesus Kristus tu angka HuriaNa i, ndang holan tu angka huria na adong di Asia na metmet di abad parjolo, alai dohot do tu angka huria di portibion nang dung i, sahat tu nuaeng on. I ma na adong di ayat 6-21. Sabagian sian isi ni Pangungkapon 22: 6-21 i ma ayat 12-17 dipillit gabe turpuk jamita tu hita angka ruas ni HuriaNa di abad pa-21-hon. 

Dia ma impola ni ayat 12-17 i? Na mangihut on ma:

i. Barita taringot tu ise Jesus Kristus i (Ayat 13 dohot 16). Mansai ringkot do on, ai i do ojahan ni hagogoon ni tonaNa.

ii. Barita taringot tu Ton ani Jesus Kristus tu angka huria (12, 12-15 dohot 17).

Duansa mansai ringkot di hita angka siihuthon Ibana di partingkianta nuaeng on, di hinahatop ni parmuba ni parngoluon di era Revolusi Industri napaopathon on na  mambahen bahat situtu hamubaon di ngolu, na boi mambahen manghilala hita angka siihuthon Jesus na so tarbahen hita mangadopisa. Sada-sada ma taida:

Naparjolo (ayat 13, 16), ise do Jesus Kristus i? Di ayat 13 tolu hali didok taringot tu ise Ibana dohot hata na dos lapatanna. Dia ma i? Ibana do Mulana dohot Punsuna (Gorik: to alpha dohot to Omega: τὸ ἄλφα καὶ τὸ ὦ), Naparjolo jala Naparpudi (Gorik: ho protos dohot ho eschatos, ὁ πρῶτος καὶ ὁ ἔσχατος, Bonana jala Ujungna (Gorik: he arche dohot to telos, ἡ ἀρχὴ καὶ τὸ τέλος). Di hata Gorik sai dipangke do artikel ni kata benda laho patuduhon horong dia do kata benda i, i ma to (τὸ) tu horong Netral, ho (ὁ) tu horong Maskulin (baoa), jala he (ἡ) tu horong Feminim (borua).   Di ayat 13 on, tu hata Ibana do "Mulana nang Punsuna" dipangke panurat do horong Netral, tu hata "Naparjolo dohot Naparpudi" dipangke horong Maskulin (baoa). Alai tu hata "Bonana dohot Ujungna" dipangke horong Borua dohot Netral. Patuduhon kesempurnaan dohot inklusivitas ni Jesus Kristus i do Ibana. I do Jesus Kristus Tuhanta i. 

Dung I, di ayat 16 ditambahon dope pabotohon ise Yesus Kristus i, i ma urat dohot marga ni si Daud nang bintang sipaias na marsinondang. Ibana do raja sian pomparan ni Daud. Jala ibana do Bintang na paias angka na ramun. Ibana do naung manesa dosa ni angka na porsea di Ibana.

Napaduahon, tona ni Jesus Kristus naung dipatorang haiseonNa i, i ma "Bona dohot Ujung", mansai tangkas do digurithon di ayat 12 dohot 14-15. Adong tolu tonaNa, i ma
Mamboan upa di haroroNa na tibu (ayat 12). 

DiharoroNa i boanonNa ma rap dohot Ibana upa (Gorik: mistos, μισθός) tu ganup hombar tu na niulana (Gorik: ergon autou).  
Di ayat 14-15 dipatorang ma dia upa i. 

1. Dua do upa i, i ma:  Hatuaon dapotan huaso parjambar di hau hangoluan jala masuk tu bagasan huta Naimbaru Siboanon ni Debata tuat sian banua ginjang i. 

2.Patorangkon tu ise i dipasahat? I ma tu angka na paias abitna (Gorik: stola); alai ndang diloas masuk, di ruar halak angka na so badia. 

Digombarhon dohot onom hata do angka na di ruar i, i ma: (i) angka biang, (ii) siulahon rasun, (iii) sipatupa parmainan, (iv) pamunu, (v) sioloi na so Debata,  dohot (vi) sipanghaholongi jala sipatupa gabus (Gorik: hoi kunes, hoi pharmakoi, hoi pornoi, hoi phonies, hoi eidololatrai,dohot pas philon kai poion pseudas). 

3.Joujou asa masuk tu huta na tuat sian banua ginjang i. Joujou masuk on ndang holan disoarahon Jesus Namonang jala na naeng ro mamboan upa io ndang holan tu  panurat ni Surat Pangungkapon on, alai tong do disoarahon panurat Johannes tu angka na manjaha joujou i, i ma angka siihuthon Jesus di marragam inganan mamungka ujung ni abad naparjolo i.

Sangkapna i ma: "Asa maus nasida di basabasa aek hangoluan, jala marhagiot tusi."
Boasa ma nuaeng mansai ringkot hita mananda Jesus Kristus na mandok na tibu ma Ibana ro mamboan upa tu angka na martua, i ma angka na paiashon paheanna, na so mangulahon angka ulaon na onom i, i ma angka na badia?

Boasa ma nuaeng dijouhon Ibana tu hita asa marhite na paiashon paheanta masuk ma hita tu huta siparoon ni Debata sian banua ginjang tu angka na satia tu Ibana?

1. Suraon do ala timbo pangunjunan di hita manadingkon Jesus?

2.Suraon do ala lam dokdok nuaeng taadopi elaela ni portibion laho manait hita tu ngolu na so marhabadiaon, gabe ndang ias paheanta?

3.Suraon do ala ndang aktif hita mangalaho angka elaela ngolu na boi mambahen hita di duru/di balian ni huta na manongtong i uju ro Ibana muse?

4.Suraon do ringkot tong dijouhon tu hita asa ro ma hita, masuk ma hita tu Ibana dohot tu huta na naeng paradeonna di angka na porsea i di haroroNa paduahalihon?

5. Suraon do ala ndang ringgas be hita jala ndang hiras rohanta manjouhon asa olo halak ro tu Tuhanta Jesus i, asa unang gabe di duru harajaon ni Tuhanta na manongtong i nasida?

Manang beha pe pangarimangrimangonta tu limansa sungkun-sungkun i, mansai ringkot do ingkon lam tatanda Tuhanta i, Bona dohot ujung, asa ringgas hita angka naung pinaluaNa i nang di tingki on mangolu di bagasan habadiaon, marpahean na ias, asa unang nuang nang di ujungna gabe angka na di duru hita. Baliksa ingkon na dijou jala na mangalusi denggan joujouNa tu hita asa ro ma hita tu Ibana.(*)
  BeritaTerkait
  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    tahun lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  • Jamita Minggu Evangelium 16 Juni 2019, TRINITATIS, HASITOLUSADAON NI DEBATA: Haporseaon na Manghorhon Paluahon (1 Musa 22:1-19)

    satu bulan lalu

    Oleh: Pdt Dr Robinson Butarbutar, Ketua Rapat Pandita HKBPHamu angka Dongan sahaporseaon,Di Minggu tanggal 26 Juni 2019 na salpu, di Minggu Rogate, sude do hita ruas ni Huria Kristen Batak Protestan m

  • Jamita Evangelium, 30 Juni 2019, Minggu II Dung Trinitatis "Martua Halak Na Pinintoran ni Debata" Psalmen 32: 1-11

    3 minggu lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar, 0812-62472015Udut ni hatani Debata di minggu na salpu na manosoi hita asa manghangoluhon ngolu na badia asa saut hita masuk

  • Asa Sada Nasida Saluhutna"

    11 bulan lalu

    "Oleh: Pdt Dr. Robinson Butarbutar, KRP HKBPMarsiajar sian isi ni Johannes 17, mansai tarapul do roha di na mangolu, mangula dohot mandungdung sintasinta songon i nang patupahon na denggan molo binoto

  • Jamita Evangelium Minggu Exaudi, 2 Juni 2019 "Pandonganion ni Jahowa di Ngolu ni Angka na Satia" (Daniel 3: 21-29)

    2 bulan lalu

    Oleh: Pdt Dr Robinson Butarbutar, Sian Parsameanta, STT-HKBP Pematangsiantar. WA/HP: 0812-62472015Hamu angka dongan sahaporseaon, nantoari, tanggal 1 Juni 2019, 74 taon ma dung tubu Pancasila di tangg

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb