• Home
  • Agama
  • Jamita Evangelium 18 Agustus 2019, Minggu IX Dung Trinitatis: Janghon ma Habisuhon sian Debata
KSP Makmur Mandiri
Sabtu, 17 Agustus 2019 20:49:00

Jamita Evangelium 18 Agustus 2019, Minggu IX Dung Trinitatis: Janghon ma Habisuhon sian Debata

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar, sian Parsameanta, STT-HKBP, HP/WA 0812-62472015

Di ujung ni abad pa-20-hon sahat tu bona ni abad pa-21-hon, adong do sada hata na manggombarhon dia hasurungan manang citi khas ni sada masyarakat, negara nang partingkian di tingki i.  "Knowledge society" ninna hata i, "masyarakat ilmu pengetahuan." Nanidokna i ma parbinotoan do na ringkot di ngolu ni jolma i.  Lam denggan parbinotoan ni sada jolma, masyarakat, negara, lam diharingkothon do di tongatonga ni masyarakat I angka parbinotoan. Parbinotoanna do pangkeon laho patupahon ngolu na denggan. Di marragam bidang do diharingkothon parbinotoan i. 

Asa sahat tusi ingkon denggan ma pendidikan ni bangso i. Alai uju i ndang apala ganup halak boi dapotan kesempatan mandohoti pendidikan.  Mansai arga do pendidikan. I pe ingkon dituhori do parbinotoan i marhite parsikkolaan, ai  holan angka bangso na timbo parbinotoan ni rakyatna do na boi denggan mangatur ngoluna, gabe negara na maju, gabe bangso na mardohar. Parpudi on, di dekade paduahon abad pa-21-hon on, masyarakat pengetahuan i nunga lam boi didungdung  bahat jolma, i ma marhite internetisasi informasi dohot ilmu pengetahuan. Nasa nab oi masuk tu internetisasi boi ma godang botoonna parbinotoon.   Boi do taboto angka parbinotoan sian internet.  

Songon i ma bungbung ni informasi i diparade internitasasi i gabe lam hatop  ma lam pistar jolma i. Jala, ala ni timbo ni hapistaran ni jolma i jala mura ni marnampunahon parbinotoan i, lam marsigantung do jolma i mangatur ngoluna tu parbinotoanna na marragam i, termasuk ma parbinotoan teknologi termasuk parbinotoan mambahen robot laho mangorui halojaon ni jolma i mulaulaon. Ndang apala marsigantung manang diharingkothon jolma i be ulaon ni Debata di ngoluna.  Di sada tingki boi do ummalo robot i sian na mambahen ibana, boi gumodang jala dumenggan patupaonna sian na pinatupa ni jolma i.

Alai songon na porsea di ulaon ni Debata di ngolu ni hasiangan on sai tapangasahon ndang holan parbinotoan ni hajolmaon, alai ingkon dohot do tapangasahon habisuhon (Heber: khokma) sian Debata. Ndang tuk holan parbinotoan ni jolma i mangatur parngoluan na marragam i, tarlumobi di na mangadopi angka siadopan na so tuk adopan mardonganhon parbinotoan ni jolma i sandiri, i ma parbinotoan na somal dohot parbinotoan naimbaru pe tahe, na tradisional dohot na modern, na post modern, dohot di era revolusi Industri napaopathon nuaeng on, dohot ma na teknologis. 

Ringkot do habisuhon na sian Debata i. 
I do na dihatindangkon panurat ni buku pardalanan ni bangso Israel di tingki dung sadia leleng nasida marharajaon. I do na dipatuduhon di ngolu ni raja Salomo na dapotan pasupasu  habisuhon uju mamonai harajaanna. Ala   bangso na marharoroan sian  ragam ni haroroan ni suku, pengalaman, pangantusion, panghirimon dohot parbinotoan na marasing di sada partingkian na digohi anta intrik-intrik, na tongon marbolat-bolat sama nasida, dapotan habisuhon sian Debata. Laho manggombarhon  surung jala timbo ni habisuhon binasabasahon ni Debata Jahowa tu si Salomo laho manguluhon bangso i digoari panuratma habisuhon i, i ma: 

Naparjolo,  hinagodang ni habisuhon, roha panimbangion, parbinotoan tudoshon horsik na di topi ni aek, gumodang sian habisuhon ni angka na di habinsaran dohot na di Misir (ayat 9-10). Napaduahon, umbisuk sian habisuhon ni sandok jolma, nang habisuhon ni angka naung sanga ditanda jolma di partingkian ni si Salomo, i ma halak Etan, halak Esrahi, dohot tolu anak ni si Mahol: Heman, Kalkol dohot Darda (ayat 11). Napatoluhon, hatauonna marumpama (3000), kecakapan bahasa, sastera (poetry) dohot manurathon ende (1005) , seniman/musisi nang mambahen torsa taringot tu angka hau (ilmu botani) na tarbarita di duru ni Israel, i ma hau Ares dohot Yysop di Libanon, taringot tu pahanpahanan (biologi), pidong na martongatonga langit (ornithologi) gulokgulok nang dengke, manang ichthiologi (ayat 12-13). Napaopathon, marroan angka halak nang raja umbege habisuhonna (ayat 13-14).  Di angka i ma rumang ni habisuhon na ditanda jolma di partingkian i. Di habisuhon na tinanda ni jolma uju i dumenggan habisuhon pinamparmunahon ni si Salomo pinangido jala jinangkonna sian Debata Jahowa.

Nueang angka sungkunsungkun on ringkot do pasungkunhononta marnida dia do nidok ni Debata tu hita marhite hataNa i, i ma asa tahasiholi mangido dohot manjangkon habisuhon ni Debata nang nuaeng di partingkianta?

1.Boasa di minggu pasiahon dung Trinitatis, i ma di minggu di na taparsiajari dohot jala ringkot taauhon Hadebataon ni Debata dohot ulaonNa di tongatonga ni hajolmaon tarlumobi di angka na porsea tu Ibana  jala marhite angka na porsea tu Ibana nuaeng, i ma di partingkian na lam timbo parbinotoan teknologis ni jolma? 

2.Boasa di zamanta on di na sai ro angka na pistar di teknologi tu hita na porsea mandok ndang apala sai ingkon mangido pangurupion be jolma i tu Debata, tuk ma holan marsigantung tu parbinotoan ni jolma i na lam timbo nuaeng on patupahon angka na ringkot di ngolu on? 

3.Boasa ingkon i, i ma sada bukti ni habisuhon pinalumehon ni Debata tu raja Salomo na tarbarita sian na robi sahat tu nuaeng, i ma hinagodang dohot hinatimbo ni habisuhonna laho patupahon ulaonna songon raja na sasintongna dao di duru ni hatauonna patupahonsa ala poso situtu dope ibana uju i na ingkon mamanghulingi hita di tingki sinangkin nuaeng? 

4.Boasa ma tu generasi muda di tingki on, i ma sundut milenial na songon raja Salomo uju poso na ingkon mangulahon sada tanggung jawab na balga nuaeng mamanghuling jamita on? Diarop do sian sundut naumposo patimbo habisuhonna laho mangisi kemerdekaan Indoensia naung 74 taon, na bahat dope ingkon sipatupaon dohot sipatureon asa lam jeges ngolu ni ganup rakyat Indonesia, di na nolnol di jolonta angka tantangan na balga tusi. Suraon do ala sundut naumposo nuaeng ndang apala mangharingkothon bisuk ni Debata mandungdung sintasinta nasida, mangula ulaonnasida, marolohon partontangan ni ngolunasida?   Habisuhon na sian Debata mansai ringkot di bangsonta na balga, na mangadopi tugas nab alga mensejahterakan ganup rakyat? Suraon do ala ringkot hita manangiangkon angka uluanta di masyarakat, negara nang huria, asa manghasiholi dohot manjangkon habisuhon na sian Debata?

5. Boasa ma i na marsaringat nuaeng tu tongatonga ni bangsonta Indonesia di periode paduahon ni  Presiden Jokowi na marsangkap naeng membangun Sumber Daya Manusia sundut naumposo ni bangsonta asa boi masuk bangsonta on gabe bangso na maju, na tuk berkompetisi dohot angka bangso na asing naung maju? Suraon do ala di na patauhon sumberdaya manusia ni naumposo i ingkon ondolhononta tu nasida asa mangharingkothon ndang holan parbinotoan teknologis alai dohot do ingkon hasiholan dohot pangidoon dohot janghonon nasida habisuhon sian Debata, asa boi tubu sian nasida angka prakarsa, kreasi,  inovasi di ragam parbinotoan? Habisuhon na sian Debata i diharingkothon asa boi, di na lam moru jala tibu ma suda manang ndang marsigantung tu sumberdaya alamta na lam moru sian tingki tu tingki i be hita, meret hita tu na patoguhon sumber daya manusia na marbisuk di na manjagahon sumber daya alamta unang lam suda boti, ai holan angka na marhabisuhon sian Debata do boi manjagahon sumber daya alamta asa tongtong adong? Habisuhoon ni Debata i diharingothon parnampunahon ni sumber daya manusianta na lam marbisuk, laho membangun bangsonta gabe bangso na maju jala parsidohot patupa pardamean dohot hatigora di portibion? 

6. Boasa ma hataNa na manosoi hita asa manjangkon habisuhon na sian Debata mamanghulingi hita di naung tabege sangkap ni Presiden Jokowi papindahon Ibu Kota Negara ni Republik Indonesia sian Jakarta tu Kalimantan dohot sangkap asa patupahon pemerataan ekonomi? Suraon do asa tapangido habisuhon na sian Debata taringot tu dia ma bahenonta ruas ni HKBP tu jolo, asa parsidohot hita membangun Indonesia sian Ibu kota naimbaru na disangkapi jongjong di periode ni Presiden Jokowi paduahon (2019-2024)? 

Na tangkas i ma ndi on: Ringkot situtu do jolma i patimbohon hatauon ilmu teknologisna laho mangurus ngoluna asa lam denggan, lam dao hapogoson, lam jonok hatigoran dohot hadameon. Alai ringkot do nang angka na porsea i tong mangido, manjangkon, dohot marnampunahon habisuhon na sian Debata na dao dumenggan mangadopi tantangan, dumenggan manuhuk tanggung jawab na balga tu donganta jolma.

Tahasiholi ma habisuhon na sian Debata. Tajangkon ma asa tumimbo sian hatauonta boi tadungdung sinta-sintanta, boi taadopi angka na maol, boi hita gabe bangso na unggul, boi tapatupa bahat angka na denggan di ngolu on tu donganta jolma nang na tinompaNa na asing. Tahasiholi ma habisuhon na sian Ibana i laho patureture keluarganta, usahanta, ulaonta, perusahaan na tauluhon unang talu berkompetisi, dna..dna. Rade do Debata palumehonsa tu hita, asal ma tapangido tu Ibana, songon si Salomo na mangidosa sian Debata rumingkot sian angka na asing i.  Amen
  BeritaTerkait
  • Jamita Minggu Evangelium 16 Juni 2019, TRINITATIS, HASITOLUSADAON NI DEBATA: Haporseaon na Manghorhon Paluahon (1 Musa 22:1-19)

    3 bulan lalu

    Oleh: Pdt Dr Robinson Butarbutar, Ketua Rapat Pandita HKBPHamu angka Dongan sahaporseaon,Di Minggu tanggal 26 Juni 2019 na salpu, di Minggu Rogate, sude do hita ruas ni Huria Kristen Batak Protestan m

  • Jamita Evangelium 4 Agustus 2019, Minggu VII Dung Trinitatis Debata do Hagogoon di ganup Parungkilon (Habakuk 3: 14-19)

    2 bulan lalu

    Oleh: Pdt Dr. Robinson Butarbutar, sian Parsameanta, STT-HKBPAndorang so sahat dope jolma i di portibion tu hapistaran filosofis dohot hapistaran teknologis songon timbo ni sinuaeng di era revolusi in

  • Jamita Evangelium, 8 September 2019, Minggu XII Dung Trinitatis "Naposo ni Debata do Panggomgomi Namarsahala" (Poda 8: 12-21)

    2 minggu lalu

    Sian Parsameanta, STT-HKBP Pematangsiantar, Pdt Dr Robinson Butarbutar (0812-62472015) Songon angka naporsea di haadongon ni hadirion ni Debata di hasiangan on, dohot di ulaonNa na marimpola di tonga

  • Jamita Evangelium, 15 September 2019, Minggu XIII Dung Trinitatis "Mangolu di Bagasan Serep ni Roha" (Lukas 14: 7-11)

    7 hari lalu

    Oleh: Pdt Dr. Robinson Butarbutar, sian Parsameanta, STT-HKBPDi tongatonga ni parsaoran hajolmaon sian narobi sahat tu nuaeng on, sai dipodahon angka natuatua dohot pangajari do hinaringkot ni serep n

  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

    2 tahun lalu

    Oleh: Pdt Dr. Robinson Butarbutar, Parsameanta, STT-HKBP1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurir

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb