• Home
  • Agama
  • Jamita Evangelium 16 Desember 2018 Minggu Advent III "Jahowa Pamalumhon Angka Namulak tu Ibana (Hosea 14: 2-9)"
KSP Makmur Mandiri
Jumat, 14 Desember 2018 17:30:00

Jamita Evangelium 16 Desember 2018 Minggu Advent III "Jahowa Pamalumhon Angka Namulak tu Ibana (Hosea 14: 2-9)"

BAGIKAN:
Dok Pribadi
Pdt Dr Robinson Butarbutar

Sian Pdt. Dr. Robinson Butarbutar

Dung tabege  di Minggu Adven I  barita nauli taringot tu sangkap ni Debata paro Mesias uju di bona ni pardalanan ni bangsoNa Israel sinoarahonNa marhite Bileam, asa tu Jesus Kristus Mesias Natapaimaima i haroroNa paduahalihon panatapanta, jala di Minggu Adven II-hon di minggu na salpu dipangido tu hita angka migran/paisolat di portibion mangjagahon habadiaonta marhite na so mangoloi hagiot ni daging (Gorik: epitumia) na marporang maradophon tondinta, dohot marhite patupa ulaon na denggan tu manang ise na manghasogohon hita ala taula na denggan, asa marhite i boi nasida mamuji Debata di tingki panopotonNa tu nasida, sadarion di minggu Adven III-hon dipangido tu hita asa patupa hamubaon ni roha manang pasesahon dosanta tu jolo ni Debata ai na rade do Ibana manesa dosanta laos pamalum hita, gariada pabangkithon ngolunta di ariari na ro dung disesa Ibana dosanta.  Dienet jamita i sian hataNa pinatolhas ni panurirang na koras manoarahon hinaringkot ni hamubaon ni roha na sintong unang taruhum alai asa tarpasupasu, i ma panurirang Hosea di bagian parpudi ni buku panurirangionna i, i ma bindu 14: 2-9.

Taboto tangkas, laho manjouhon hamubaon ni roha i, dipangke panurirang Hosea na mangula di taon 745-722 Andorang so Kristus (Hosea 1:1) do sumansuman sian parsaripeon na so satia. Pola do digoari ibana tolu ianakkonna dohot hata na manguhumi bangso i: Yisreel laho manguhum Israel Utara, Lo-ruhama laho mandok ndang haholongonNa be nasida dohot ndang sesaonna be dosa nasida, dohot Lo-ami, ndang bangsoNa be nasida (Hosea 1:4, 6:9), ai dibalos nasida air susu dohot air  tuba (Hosea 11: 1-2, 13:3). Hamubaon ni roha na jinouhon ni panurirang Hosea ndang hamubaon na musiman dohot na terdesak, alai hamubaon ni roha tutu, i ma na diuduti dohot ulaon manadingkon debata ganaganaan. Alai ndang holan i, ingkon udut do ulaon keadilan, hatigoran maradophon angka na metmet, na pogos, na so margogo, na tongon dikorbani (5: 15-6:6, 7: 3-16). Ingkon udut do ulaon pasohon perrampasan hak-hak orang kecil, angka na soppot somarama so marina(6: 7-7:2, 14, 12: 8-9). Ingkon diuduti tong dohot pasohothon ulaon marsigantung tu hagogon ni bangso Assur dohot Misir (7:11-12, 8:9).

Ala ni i do umbahen na songon na taida di pangujungi ni buku panurirang panjou hamubaon ni roha na tutu situtu i, mansai tangkas impola ni hata panurirang Hosea on dipatolhas di bindu 14: 2-9 i ,  i ma na mangihut on: "Di ulaon hamubaon ni roha, ingkon adong do joujou manjouhon i (ayat 1) jala ingkon adong do alus tusi. Mangoloi manang ndang mangoloisa. Ndang boi hot so manganturehon joujou i, unang mago na so manganturrehonsa, ala hot do dalan ni Jahowa na tigor, ndang muba Debata disi, alai mago do parjahat (ayat 9). Na martua do na mangoloisa. Na manulaksa marjea (ayat 9)."

Isi ni joujou i i ma:
Ingkon olo do jolma pardosa i ro tu Debata mangido asa disalpuhon Ibana sude dosana.
Disi ingkon dohononna tu Debata na sangkaponna do manadingkon parsigantungon tu huaso Assur, huaso di duru ni huaso ni Debata.


Disi ingkon dohononna do na sangkaponna pasauthon asi ni roha tu anak na sopot so marama marhitehite goarNa (ayat 2-3). Di na ro Ibana tu Debata ingkon porsea do Ibana di:
Hamumulak ni roha ni Debata maradophon pardosa i, padaohon rimasNa sian pardosa i, hohot tahe pamalumhon ibana dohot manghaholongi ibana so marbatas.

Dung disesa Debata dosana mangula do Debata patauhon ibana dapotan ngolu na dumenggan, ngolu na martumbur, ngolu na uli jala na dihalomohon Debata (ayat 4-8). 

Boasa ingkon soara ni Debata marhite panurirang Hosea na manosoi asa ro tu Debata pardosa i pasesahon dosana huhut pabotohon sangkapna manadingkon debata ganaganaan dohot padupa ulaon hatigoran tu na metmet, dohot lomo ni roha ni Debata patupa na denggan tu ngolu ni angka na songon disoarahon tu hita di minggu Adven patoluhon on?  


Boasa ingkon hamubaon ni roha na tutu situtu sisongon i dohot roha na mamasumasu pardosa naung ro tu Ibana dohot pasahathon sangkap hamubaon i marsaringar tu hita di na mamestahon Adven III-hon di tingkinta nuaeng di Indonesia on, na tongtong berjuang patupahon keadilan sosial bagi seluruh rakyat Indonesia sahat tu tingki on, na tongon berjuang laho mamboan bangso on meret sian bangso na berkembang gabe bangso na maju?

Boasa i marsoara tu hita na mangolu jala mangula di tongatonga ni bangsonta na di sangombas tarbarita bangso na manomba Debata jala di panombaonta i ganup minggu tapatupa ulaon panopotion dosa, alai di sangombas nari di ngolunta siganup ari ndang  tapadao dirinta tu na marsigantung tu debata ganaganaan, jala ndang marsitutu hita patupa hatigoran atas goar ni Debata maradophon angka na pogos? Lapatanna, patupa hamubaon ni roha na semu, na so tutu dope hita, jala siala ni i gabe nanget dope parbangkit ni bangsonta, marsasahalak, marsasaripe, marsasahuta, marsa-kelurahan-kecamatan-kabupaten-propinsi, dope hape hita.
Nian nunga mamungka tarida hababangkit ni bangsonta, alai ndang dope manggombarhon songon na digurithon Hosea di Hosea 14: 5-8: "Pamalumonku ma panundalion nasida, girgir ma Ahu manghaholongi nasida, ai nunga mombun rimasHu maradophon nasida. Sobokhon nambur ma Ahu di Israel, marbunga ma nasida songon bunga pansur, jala manjarar angka uratna, songon Libanon. Marjurampak ma angka tumburna jala songon hau jetun hamuliaonna, jala uap na songon Libanon..marbunga ma nasida songon hau anggur; baritana pe songon anggor ni Libanon."

Nian nunga mulai tarbarita bangsonta parpudi on di Asian Games, di kebangunan ekonomi  na stabil na tuk mangadopi ketidakstabilan ekonomi global panghorhon ni porang dagang binahen ni Presiden Trump maradophon na asing na balga isara China, Uni Eropa dohot Russia. Alai lam godang dohot menyeluruh hamubaon ni roha ni bangsonta di sude inganan, lam taida ma pasupasu ni Debata tu bangsonta dumenggan sian sinuaeng on.

Boasa tu bangsonta na tongon berjuang songon i marsoara hataNa i tu hita halak Kristen di Indonesia on tarlumobi di na sai tasungkun saleleng on boasa sangombas lam martamba torop ni angka siihuthon Jesus di negaranta, alai ndang udut tusi angka ulaon patupa hatigoran tu angka na metmet tapatupa?
Suraon do ala adong manang bahat dope sian tongatonganta na holan patupa hamubaon ni roha na semu, na so tutu di ngolunta siganup ari dohot di ngolu panombaonta tu Debata, na so diuduti dohot panadingkonon debata ganaganaan na marragam nuaeng on (ndang holan na trasisional, alai dohot na modern dohot na postmodern) na mambahen ibana manusai donganna nang lingkungan hidupna (hutan, aek, dna, na manghorhon longsor, banjir), na so diuduti dohot patupa asi ni roha tu na metmet di bagasna, di keluarga besarna, di humaliangna, gabe panghorhonna di ngolunta marsadasada, marsasaripe dohot marsahuria ndang taida lam maduma bahatan hita, gariada lam bahat sian tongatonganta na mangadopi bahat parungkilon ni ngolu siala ni dosana manomba debata ganaganaan dohot patupa ulaon na so tigor maradophon na metmet?

Adong do ulaning di tongatonganta angka keluarga na maduma sasundut, alai di sundut paduahon lam ma patoluhon dohot paopathon ndang martumbur be, ndang marbunga, ndang marparbue na bahat, alai baliksa gabe mangolu di bagasan parungkilon bolon nasida, ngolu na so mardohar be, ngolu na so marlas ni roha be, ai so tarpasupasu be na niulana. 

Molo i do. Mansai ringkot ingkon muba hita. Holan angka na uli do dapotta di ngolunta bahenon ni Tuhanta i molo tapatupa hamubaon ni roha na tutu situtu songon sinoarahon ni panurirang Hosea. Holan angka na so uli do tatapon ni angka na manangihon joujou hamubaon ni roha, alai ndang mangulahonsa. Molo adong di tongatonganta na mangula di angka Lembaga-lembaga negara na turgasna patupa hatigoran tu ganup rakyat tarlumobi tu angka na so margogo, na metmet, na so mardihadiha, alai dijamin hak-hak hidup, ekonomi nang busayana di Undang-undang dasarta, songon i nang di angka undang-undang na asing (isara na mangula di Lembaga legislatif, judikatif dohot eksekutif nang angka pengusaha marragam tirket), denggan ma nasida majouhon dohot patupahon soara hamubaon ni roha i denggan mangasahon gogo dohot bisuk na sian Tuhanta i, asa boi bangsonta di sude tirket pasupasuon ni Tuhanta. Mansai ringkot hita mandopang joujou ni pamarentanta asa patupa perobahan mental sandok rakyatta, tarlumobi angka pemimpin di sude tirket, di tongatonga ni negara, usaha nang di tongatonga ni punguan haporseaon (komunitas beragama) asa boi tumibu tadungdung sintasintanta songon sada bangso umbahen na merdeka hita, i ma tigor jala maduma. Unang baliksa, gabe hita na gabe pangambati di perubahan mental i.

Suraon do siala adong sian tongatonganta halak Kristen Batak na mandok tu dirina na so adong lapatan hamubaon ni roha tu ngolu na dumenggan di ibana nang di angka pinomparna? Molo i do, ingkon manghuling do hataNa na tu bangso pardosa Israel na jolo i. Mansai ringkot nasida unduk tu hata ni Debata. Mansai ringkot nasida manghaposi mulak hataNa. 


Suraon do siala adong sian tongatonganta na manghilala na siala ni bahat ni dosana ndang tarbahensa be ro tu Debata na badia i? Nunga tung maila situtu ibana ro tu jolo ni habangsaNa na badia i alai na gok asi ni roha i? Molo i do, hataNa marhite Hosea i ingkon manghuling tu nasida.  Ndang jadi ibana ragu di hataNa na marhagogoon i.  Parasi roha do Ibana. Boan tu joloNa, sude dosami, goari sude na niingotmu, mulak do rohaNa. Ndang tarrimas be ibana, tarlumobi ala di bagasan Kristus naung mate di silang i, nunga rade tongtong Debata manesa dosanta.

Suraon do adong sian tongatonganta, dakdanak, naposo nang natuatua, ama nang ina na mansai ringgas manomba Debata di marragam rumang (satia manjaha hata ni Debata ganup ari, sigop ro tu partangiangan, ringgas marminggu dohot patujolohon ulaon marminggu, ringgas manumpahi angka na ringkot di ulaon ni huria), alai di na so binoto ni donganna jolma (ndang adong na so diboto Tuhanta i, patar do di Ibana sude), olo manang sai dipatupa ibana manomba debata ganaganaan, disusai ibana ngolu ni ianakkonna, donganta saripe, ruas ni pomparan ni Ompungna, angka na mangula tu dohot rap dohot ibana, angka dongan jejaring kerjana, manusai donganna sebaya)? Molo i do, binsan di minggu Adven on, muba ma nasida.

Margogo ma hita nang angka parjamita mangulahon dohot manjouhon hamubaon ni roha on dohot bagabaga ni Debata pamalumhon ngolunta dohot asi ni rohaNa nang huasoNa i, ndang na semu alai na tutu situtu. Didok reformator Martin Luther, ala songon angka na badia na rentan tu, manang mura madabu tu dosa do hita, mansai ringkot halak Kristen i ganup tingki patupa hamubaon ni roha.(*)

  BeritaTerkait
  • Jamita Evangelium, Advent I 2 Desember 2018, 4 Musa 24: 15-17: Managam Haroro ni Sipalua

    4 bulan lalu

    Oleh: Pdt Dr. Robinson Butarbutar, di Parsameanta, STT-HKBP Pematangsiantar, HP-WA; 0812-62472015. Sada na mansai uli situtu na jumpang hita di angka tona ni Debata di Bibelta i, i ma na mangihut on:

  • Jamita Evangelium, 9 Desember 2018, Minggu Advent II, 1 Petrus 2: 11-12 : Manomunomu Tuhan i Marhite Parange na Denggan

    3 bulan lalu

    Oleh: Dr. Robinson Butarbutar, sian Parsameanta, STT-HKBP Pematangsiantar, 0812-62472015.Nunga sada fakta na ingkon adopan ni angka bangso di portibion nuaeng na siala ni marragam sibonsiri na mansai

  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

    3 bulan lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar.HP/WA 0812-62472015Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium, Minggu Quasimodogeniti 8 April 2018: Parmahani Ma Birubiru ni Debata

    12 bulan lalu

    Oleh: Pdt Robinson Butarbutar, Sian Parsamenta, STT-HKBP.Dung hehe Jesus sian hamatean, andorang so manaek Ibana tu banua ginjang, andorang so ditonai Ibana angka siseanna laho tu sandok portibion mam

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb