• Home
  • Agama
  • Jamita Evangelium 11 Nopember 2018, Minggu XXXIV Dung Trinitatis : Mika 6: 6-8 Ulahon ma Uhum dohot Holong ni Roha di Habasaon
KSP Makmur Mandiri
Minggu, 11 November 2018 07:27:00

Jamita Evangelium 11 Nopember 2018, Minggu XXXIV Dung Trinitatis : Mika 6: 6-8 Ulahon ma Uhum dohot Holong ni Roha di Habasaon

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar, Parsameanta, STT-HKBP

Dung dipanghulingi Debata Jahowa hita marhite hatana di minggu na salpu, uju i dipangido tu hita asa mangarataratai silehonlehonNa mardonganhon tondi hagogoon, holong dohot pangarajaion diri, nuaeng di Minggu XXXIV Dung Trinitatis sadarion diuduti Ibana manonai hita  asa taulahon uhum  dohot holong ni roha di habasaon, nang marserep ni roha di jolo ni Debata songon hataridaan manang parbue ni na tasomba Ibana di ngolunta. 

Asa unang songon angka  induk ni bangso Judea dohot Samaria uju mamarenta di Judea tolu raja (Jotam, Ahas, Hiskia Mika 1: 1) ulaonta nuaeng. Dia niula nasida? I ma patupahon ulaon pasahathon pelean situtungon na mansai arga (anak lombu marumur sataon, hambing tunggal marriburibu, miak marloksaloksa nang anak boha baju, Mika 6: 6-7) tu Ibana di bagas joroNa di Jerusalem, hape di ngolu siganup ari patupahon hajahaton na dihagigihon Debata, isara manomba debata ganaganaan (Mika 1: 5, 7), manutupi hageduhon dohot sipatupa hajahaton (2:1), mangarampas hauma ni halak (2: 2), mangarampas ulos  dohot baju ni pamolus (2: 8), paruarhon/menggusur angka ina sian bagas hasoloan nasida (2: 9), angka induk pabiasbiashon uhum dohot papeol nasa hatigoran (3: 9), pauliuli ibu kota marhite hageduhon (3: 10), manjalo sisip di na mandabu uhum, laos angka malim manjalo upa uju mangajari (3: 11), angka panurirang manjalo perak laho pamora diri (3: 5, 11). 

Songon i ma dos a ni angka uluan nasida i, sampe pola didok Debata Jahowa songon on: "Nunga tung siap jolma na daulat sian tano on, jala ndang adong halak na tigor nanggo sada di tongatonga ni jolma. Tung saluhut nasida mangarop di mudar, sai masitaonan sambal do nasida be tu donganna. Girgir do tangan nasida mangulahon na roa. Tole pangarajai mangigil silehonlehon, jala panguhum manjalo sisip, jala halak na bolon guru roaharohana do manghuling, gabe marpiupiu hajahataonn dibahen nasida"(Mika 6: 2-3).   Sude uluan nasida, i ma raja, malim, panurirang, patupahon panombaon tu Debata na lipe, na palsu, i ma: Pasahat pelean na arga tu Debata laho manghuphupi dosa angka hajahaton nasida i. 
Dipanghulingi Debata hita asa mangulahon uhum nang holong ni roha di habasaon dodhot marserep ni roha di joloNa di tingki nuaeng on di dekade paduahon abad pa-21-hon on. Boasa?  Adong dua na ringkot pamanatonta songon siala boasa dipanghulingi Debata hita nuaeng dohot hataNa. Dia ma i?

Naparjolo, ala nang di tingkinta nuaeng on, dung songon i lelengna  dipatupa angka bangso demokrasi na lam denggan, na so holan demokrasi na formal be, alai demokrasi na lam subtansial asa ganup natorop, ndang holan saotik jolma, boi denggan mangolu dohot mardohar, ai so boi be marlomolomo angka uluan papeol uhum, tong do taida martubuan angka uluan na marlomolomo patupa songon na pinatupa ni bangso Samaria dohot Judea songon na andar di ginjang i.  Jala na mambahen hita lomos  i ma, lam bahat rakyat na manghalomohon uluan na songon i, na mandopang nasida, na mamillit nasida gabe uluan, gabe presiden. 

Boi do taida i di hadirion ni Presiden Amerika Serikat, Donald Trump. Diboto rakyat do dia na niulana andorang so gabe presiden ibana, i ma patupahon na so jadi tu manang piga boruboru dohot patupa ulaon papeol uhum marhitet na mandok rugi perusahaanna jala ingkon pailit, asa unang manggarar pajak ibana tu negara, alai tarpillit do ibana di Pemilihan Presiden dua taon na salpu. Tuani ma hatop rakyat Amerika umboto hadirion dohot pamingkirion nang ulaonna na sasintongna saleleng dua taon ibana mamarenta,  gabe di pemilihan Tingki Parsitongaan di tgl 6 Nopember na salpu bahat situtu rakyat Amerika rot u angka kotak suara laho manulak kebijakan-kebijakan ni Presiden Trump.   

Ndang dipillit rakyat be gabe Anggota Kongres sian partai ni Presiden Donal Trump. Nuaeng nunga gabe gumodang torop ni Anggota Kongres Amerika na so sauduran dohot ibana. Marhite i boi ma nasida mangotapi angka sangkap ni Presiden Trum na so denggan na so boi patupaonna ia so diloas Kongres Amerika. Sada na so denggan na naeng patupaonna i ma manutup bantuan kesehatan tu angka napogos, i ma na naung dipajongjong Presiden Barack Obama andorang so gabe presiden Donald Trump. Bantuan kesehatan tu marjuta rakyat Amerika na pogos digoari Obama Health Care. Marhite i do dipatuduhon negara dohot rakyat Amerika ulaon holong ni roha marhite habasaon tu angka na pogos. Alai saleleng dua taon mamarenta nunga sanga disegai Presiden Trump angka nilai-nilai demokrasi naung disuanhon bangso Amerika na martujuan laho manulak manang ise parhuaso manang uluan papeol uhum dohot patupa na so tigor di ngolu on, nang mangasahon gogo nang hepengna laho manusai ngolu ni na pogos. 

Aut umbahat rakyat Amerika di taon 2016 ro tu kotak suara pemilihan umum manulak ibana gabe presiden, ra ndang sanga dipatupa ibana angka na maralo tu prinsip-prinsip demokrasi.  Ndang holan di Amerika masa na songon i, i ma diloas rakyat tarpillit angka sipapeol uhum dohot sialo hatigoran, alai dohot do di angka bangso secara global dohot secara nasional nang lokal. Loas taida do na bahat sian angka na mamillit sipapeol uhum dohot sialo hatigoran i ro sian angka na manggoari dirina parugamo na daulat. Angka na ringgas marminggu. Angka na ringgas pasahat peleanna di angka ulaon parugamoon nasida. Gabe hira marisuang angka perjuangan demokrasi naung dipatupa angka bangso dung porang portibi na paduahon, na mangalo sipapeol uhum dohot sialo hatigoran.

Napaduahon, ala di tingkinta nuaeng, atik pe lam doras parnangkok ni hagogoon ni humanisme di portibion, i ma pamingkirion na mandok ndang pola be sai marsigantung tu Debata jolma i jala ndang pola be sai tangihonon ni jolma i angka hat ani Debata na tarsurat di Bibel i ala ndang ampit be i songon poda tu hajolmaon di partingkian postmodernismeon, sae ma tapangasahon hagogoon nang hapistaran ni jolma,  taida do di sandok partibion haheheon ni parugamoon. Kebangkitan agama-agama. Lam marjongjongan do angka bagas na dipangke jolma manomba Debata. Lam dipatuduhon parugamo do ise ibana sian paheanna, angka na daulat nasida ninna. Lam ringgas do jolma patupa pilgrimage (= manopot dohot martangiang di pusat-pusat parugamoon), ndang holan tu pusat-pusat utama isara Jerusalem, Mekah, Roma, nang tu China dohot India, alai dohot do tu angka pusat-pusat agama lokal, ndang holan na pinatupa ni angka turis, i ma angka na ringgas  mananda manang aha pe i na khusus di angka inganan nang negara na asing sian ngoluna na somal di luatna, alai dohot do nang pinatupa ni angka penduduk lokal. 

Ugamo Parmalim pe, ugamo ni halak Batak andorang so ro jala tubu Hakristenon di tongatonga nasida, hehe do nuaeng. Di hita di Indonesia sai gok  do angka gareja di ari Minggu I, songon I nang angka inganan panombaon ni angka parugamo asing sian Hakristenon. Alai na mambahen hita lomos  i ma, lam hehe parugamoon di bahat bangso dohot negara di portibion, ba lam nangkok jala nalnal do ulaon papeol uhum dohot hageduhon songon i nang ketidakadilan dipatupa angka na dohot di kebangkitan agama-agama i. Ndang apala taida na lam jongjong uhum. 

Ndang apala taida bahat parugamo na pajongjong uhum dohot patupa hatigoran. Ndang apala taida lam denggan sistim panarihonon tu angka napogos di angka negara-negara di dia jebu kebangkitan agama-agama i, alai lam so disarihon angka namora parugamo i do angka napogos. Lam ditindos angka penguasa ni perusahaan-perusahaan nab alga nang na metmet do angka parkarejo. Usaha ni angka parkarejo mendesak angka pengusaha asa menghargai  angka hak-hak ni parkarejona asa boi denggan mangan dohot angolu unang holan lojana di nasida, dialo nasida marhite na manggarar halak na karejo ndang sahat tu pensiun, alai manggarar nasida dohot sistim kontrakan na jempek. Loas taida do na  ndang lam dipadenggan sistim sosial di bahatan negara. 

Lapatanna, lam holit do angka parugamo na sukses di angka usahana patupahon na denggan tu angka napogos. Baliksa disusai nasida do angka na pogos. Dirampas nasida do hak-hak ni parkarejo na pogos. 
Sihalashononta do di tongatonga ni bangsonta na pinatupa ni pamarenta padengganhon sistim sosial di negaranta.  Atik pe ndang dope songon na pinamasa ni angka negara-negara Eropa na mamangke sistim ekonomi na bebas alai tong na sari di angka na pogos, na talu, na gale, na so marama so marina  (isara na pinatupa ni negara-negara Eropah Barakat isara Jerman, Bolanda, Prancis, dohot negara-negara skandinavia), tamba ni angka ulaon na pinatupa ni Departemen Sosial tu angka na marsahit sosial songon sisaleleng on nunga dipungka pamarentanta manarihon angka na pogos dohot angka na metmet marhite program

 (i) Kartu Pintar asa boi marsikkola anak ni na pogos, (ii)  Kartu Sehat asa boi marubat rakyat napogos, dohot (iii) Kartu Sejahtera asa boi tarurupi angka keluarga na so tuk jongjong dohot mardalan ala ni hapogoson, laos dipatogu sistim Jaringan Kesehatan Nasional (BPJS) asa boi rakyat marubat, jala di ujungna gabe boi togu ketenaga Kerjaan ni bangso Indonesia, masa hatigoran. Jala angka rakyat pe nunga diurupi asa boi marusaha marhite na pamurahon mangurus Sertifikat Tano nasida. Angka rakyat di angka huta dohot di kelurahan pe nunga diurupi negara laho patupahon kegiatan ekonomi rakyat na kreatif marhite Dana Desa dohot Dana Keluarahan. Angka sipapeol uhum pe, i ma angka koruptor nunga lam bahat na diboan tu uhum. Bahat angka uluan (Bupati) nang angka sibahen uhum (Anggota Dewan) nang angka sipajongjong uhum (angka hakim) na diboan tu uhum ala parsidohot di ulaon papeol uhum, tindak ketidakadilan.

Saleleng on halak Kristen di Indonesia patupahon ulaon habasaon na metmet do di angka huria nasida. Ringgas hita marminggu, alai sai taurupi do angka ruas ni huria na metmet dohot na dangol di tongatonganta. Jala nunga lam miduk torop ni ruas ni hurianta na so patupahon angka ulaon na so tigor songon pinatupa ni angka uluan ni bangso Samaria dohot Judea di tingki panuratan ni buku panurirang Mika i.  Tauduti ma i.  Alai di tingki na dos ingkon dohot ma hita patogu ulaon patupa uhum dohot ulaon holong ni roha di habasaon pinatupa ni negaranta. 

Ndang adong lapatan ni bangsonta Indonesia nang halak Batak Kristen targoar bangso parugamo na seremonial dohot na mamboan pelean tu Debata sian na otik sahat tu na godang, molo di tingki na dos tapatupa ulaon papeol uhum dohot tapasombo angka napogos ndang dapotan ulaon habasaon sian hita. Ndang adong lapatan ni panombaonta tu Debata di parmingguon dohot di partangiangan na marragam i jala marisuang do pelean na marragam i na tapasahat tu Debata ganup minggu molo di tingki na dos  tapapeol uhum dohot tapatupa ulaon na so tigor di jabunta, di ulaonta na marragam i, nang maradophon angka donganta jolma na pajumpang dohot hita di ngolu on. Ndang lomo roha ni Debata mida hita. 

Gariada ro ma Debata manguhum hita nang angka pinomparta di ngolu on dohot angka dalan-dalan ni Debata na so tatagam. Najolo tu bangso Samaria dohot Judea i dipamasa Debata uhum tu nasida. Didok Debata tu nasida songon on, jala saut do i masa tu ngolu nasida dung panurirangon ni si Mika:
"Jadi ida ma, ruar do Jahowa sian ingananNa, jala tuat Ibana jala mardalan di atas buntulbuntul ni tano on. Jadi malala ma angka dolok di toruNa, jala mabola angka rura, songon pantis maradophon api, songon aek tangkuju na mabaor sian robean, ala ni pangalaosion ni si Jakob do saluhutna I, jala ala dos ani pinompar ni Israel"(Mika 1: 3-5). 

"Tung tarbahen ahu ma marsombusombu mida hatian hajahaton dohot mida batu timbangan ni pangansion di bagasan puro? Ala gok hadoboon halak na mora di bagasan huta i, jala pangisina i manghatahon gabus, jala sipaotooto do dila nasida di bagasan pamangan nasida. Ahu pe antong matemate ne ho bunuanHu, jala tarulang ho bahenonku ala ni dosam" (Mika 6: 11-13).
Laos dohot do rumang ni uhum ni Debata na jorbut on pamasaonNa tu na mamele tu Debata alai papeol uhum dohot mambahen na so tigor tu donganna jolma tarlumobi tu angka na metmet, na so tuk mangondihon dirina na mangihut on: 

"Mangan pe ho, hape ndang butong, jala haraparonmu maringan di bagasan butuham, jala na niulahonmu laos so marlua, jala na pinaluam pasahatonKu do tu podang. Manabur pe ho hape ndang adong gotilonmu; mardege parbue ni jetun pe ho, hape ndang jadi miahanmu ho dohot miak nang mangilang parbue ni anggur ho, ndang jadi inumonmu anggur I" (Mika 6: 14-15).

Ala ni i, ndang adong pilihan na asing  dihita dung manangihon tona ni Tuhanta tu halak Kristen Batak sadarion asing ni patupa na tinonahonNa i sadarion, i ma Patupa Uhum, ndang baliksa Papeol Uhum; Patupa hatigoran/keadilan, ndang baliksa mambahen na so tigor tu donganna jolma; jala dung tapatupa pamaresoon diri marnida angka parangenta saleleng dung tubu hita tu portibion sahat tu sadarion,  jala saleleng dung tardidi hita tu bagasan goar ni Debata Sitoludasa i sahat tu nuaeng, tapaserep ma rohanta di jolo ni Debata. Tapangido ma tu Ibana asa asi rohaNa di hita, asa disalpuhon Ibana angka dosanta maradophon Ibana dohot maradophon donganta jola. Tadok ma tu Ibana songon na sinurathon ni panurirang Mika: 
"Tung ise ma Debata songon ho, na marpamuati di dosa jala na umbolus pangalaosion ni parlaianNa na teba i?" (Mika 7: 18). 
Laos tapapos ma rohanta mandok tu dirinta molo tangkas taboto jala taauhon hasdosaonta di ulaon papeol uhum dohot patupa ulaon na so tigor: 
"Ndang tongtong Ibana marsigomos marro ni rimas, ai manghalomohon asi ni roha do Ibana. Sai marpangulahi do rohaNa, jala popoanNa do angka hajahatonta; jala reonghononNa do sude dosanasida I tu laut apala na umbagas" (Mika 7: 18-19).

Alai ndang aluson ni Debata tangiangta mangido hasesaan ni dosanta i molo ndang  tutu situtu tapatupa ulaon pamaresoon diri di bagasan parmingguonta sadarion sahat tu ujung ni minggu na ro on (tanggal 17 Nopember 2018) jala dung i. Ulaon pamaresoon diri i ingkon do patupaon ni halak Kristen marsadasada, tarlumobi angka uluan di tongatonganta, di bagasan huria nang di duru ni huria. Ai molo ndang muba angka uluan (angka raja, malim, panurirang) taruhum ma sude, ndang holan angka uluan alai dohot do angka na niuluhon nasida. Ingkon dohot do tong ulaon pamaresoon diri i patupaon ni sude, uluan nang na diuluhon. Alai tahe, ingkon dohot do punguan i patupa pamaresoon diri. 

Molo ndang tapatupa ulaon pamaresoon diri i dohot parsitutuon, unang tarsonggot hita molo taida tompu di ngolunta marsadasada nang ngolu ni punguan i, huria manang bangso di tirket na marragam i uhumon ni Debata. Marjema ma angka na madabu tu tangan ni panguhumon ni Debata. Alai martua do angka na disesa Debata dosana ala olo patupa panolsoion diri, jala marsitutu ndang mangulahi mardosa maradophon Debata dohot donganNa jolma.  

Tapungka ma mandalani ariarinta tu joloan on patupa uhum, patupa angka ulaon holong di habasaon. Basa ma hita maradophon donganta jolma sian nasa na boi tarbahen hita. Unang ginjang rohanta di jolo ni Debata mandok sintong do na taula. Alai tapaserep ma rohanta di joloNa, asa bungka hasesaan ni dosanta sian asi ni rohaNa, jala tarbahen hita tu joloan on patupa angka ulaon habasaon di jabunta, di humaliangta, nang marhite ulaonta na marragam i.  Amen.
  BeritaTerkait
  • Jamita Evangelium, 18 Nopember 2018, Minggu XXV Dung Trinitatis: Taluhon ma Hajahaton Marhite Ulaon na Denggan (Roma 12: 9-21)

    4 minggu lalu

    Oleh: Pdt Dr Robinson ButarbutarSada sian pinompar ni Zaman Pencerahan (Inggris: Renaisance; German: Aufklaerung) na umpudi tubu di pangujung ni abad pa-20-hon alai margurasa tong sahat tu nuaeng on,

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    tahun lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  • Jamita Evangelium, Minggu Misericordias Domini 15 April 2018: "Mangolu di bagasan Asi ni roha ni Debata"(Mika 7: 14-20)

    8 bulan lalu

    Oleh: Pdt. Dr. Robinson Butarbutar, sian Parsameanta, STT-HKBP Pematangsiantar.1.Dung songon i tangkas jala bagas di ari Minggu na salpu di panghulingi hata ni Tuhan Jesus Kristus ganup siseanNa mamun

  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    6 bulan lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  • Jamita Minggu V dung Trinitatis, 1 Juli 2018 Evangelium: Markus 16: 14-20 "Mamaritahon Barita Nauli tu nasa Natinompa"

    5 bulan lalu

    Ndang mansohot turgas mamaritahon barita na uliSian di bonana i sahat tu nuaeng, sian abad parjolo dung hehe Jesus Kristus sian hamatean sahat tu na naung hundul Ibana di siamun ni Debata Ama i di ban

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb