• Home
  • Agama
  • Jamita Evangelium, Minggu Rogate, 6 Mei 2018 2 Musa 32: 7-14 "Debata Manghaholongi jala mamasumasu hita"
KSP Makmur Mandiri
Jumat, 04 Mei 2018 21:02:00

Jamita Evangelium, Minggu Rogate, 6 Mei 2018 2 Musa 32: 7-14 "Debata Manghaholongi jala mamasumasu hita"

BAGIKAN:
Ist
Pdt Dr Robinson Butarbutar
Oleh: Pdt. Dr. Robinson Butarbutar, Parsameanta, STT-HKBP Pematangsiantar

1.Hamu angka dongan, di minggu Rogate on, di sada minggu di na ditogutogu hata ni Debata hita asa lam marpos ni roha di latapan, panghorhon, dohot gogo ni tangiang di ngolunta songon angka na porsea di parsidohoton ni Debata di pardalanan ni ngolu ni ganup na porsea i, dipanghulingi Debata hita asa marsiajar sian tangiang pangondianon na pinatupa ni sahalak na porsea tu Ibana di pardalanan ni ngolu ni sada bangso na marsiajar dope mananda Debata Jahowa, i ma tangiang ni si Musa.  

Sian barita di 2 Musa 32: 7-14 on dipabotohon tu hita hinaringkot dohot hinatonggi ni parbue ni tangiang pangondianon patupaon ni angka na porsea tu Debata na mangolu i. Marhite pengalaman tangiang pangondianon na pinatupa ni si Musa, na tuk mambahen Debata marpamuati rohaNa mida bangsoNa, boi do nang hita lam barani masuk tu habangsa parasian ni Debata pasahathon tangiang pangondianonta sandiri di ariari na naeng ro di ngolu partondionta.

2. Mansai uli do pansagihonon ni panurat ni turpuk 2 Musa 32: 7-14 on tu tangiang pangondianon: 
Tolu ayat patolhason taringot tu dosa na balga na pinatupa ni bangso Israel (7-9). Dison dipangke Jahowa opat hali tingki ni hata kerja "nunga", tolu hali ma i taringot taringot tu na binahen ni bangso i (i ma mambahen lombu tuangan, marsomba jala mamele tusi, mandok i gabe debata nasida), sahali ma i taringot tu kesimpulan ni Debata: "Nunga mananda rohangku di bangso on, jala ida ma tung na tangkang do roha ni bangso on."
Sada ayat ma patolhashon na naung marsigorgor rimas ni Debata jala na naeng ripashononNa ma nasida, gontina gabe sian si Musa ma naeng bahenonna sada bangso nab alga (ayat 10). 

Tolu ayat patolhashon isi ni tangiang pangondianon ni si Musa (ayat 11-13) asa marpamuati roha ni Debata di rimasNa, di jea na naeng pasonggoponNa tu nasida: Impolana manungkun boasa marsigorgor rimasNa hape Ibana do na naung manogihon nasida ruar sian tano Misir marhite hagogoon godang dohot tangan na marhuaso, tontu ndang asa ripashononNa di halongonan, ndang  asa dohonon ni halak Misir muse na umbahen na ditogihon Jahowa pe nasida tu halongonan asa ripashononna do, alai huhut mangido Jahowa asa marningot bagabagaNa tu si Abraham, Ishak dohot Jakkob. 

Sada ayat alus ni Debata tu isi ni tangiang pangondianon ni si Musa i (ayat 14): I ma na olo marpamuati do roha ni Debata: "Marpamuati ma rohaNa tu hinamago naung nilumbahonna tu bangsoNa."

3. Di mata ni haporseaonku, umbahen na disurathon bangso i barita taringot tu tangiang pangondianon ni si Musa on, jala umbahen na dipillit bahat huria di portibion gabe jamita tu hita pengalaman ni tangiang pangondianon ni si Musa on di minggunta Minggu Rogate sadarion, i ma:

- Ndang apala holan laho patorangkon hinajorbut ni dosa ni bangsoNa i, atik pe sintong do i;
- Jala ndang apala holan laho mangondolhon haputusan ni Debata na domu tusi , i ma manangkapi patupahon jea tu nasida siala ni rimasNa mida nasida, laho mandok ndang ditolerir Debata dosanasida, atik pe i pe mansai ringkot do; 
- Jala ndang apala holan laho patolhashon taringot tu hadirion ni si Musa na manulak patujolohon dirina sandiri, alai patujolohon kepentingan ni bangsoNa i, marhite na patupahon panghataion dohot partangiangan tu Ibana, i ma sada tangiang pangondianon na mansai bagas, i ma membela goar, hadirion dohot sangkap ni Debata, atik pe i pe mansai ringkot do, mansai ringkot do tangiang pangondianon ni angka na porsea i.  

4. Alai  ianggo na mansai menyentuh mata ni haporseaonku  i ma dohot mangondolhon na mangihut on: "Umbahen na disurathon barita taringot tu peristiwa tangiang pangondianon ni si Musa on, umbahen na on dipillit gabe jamita di hita sadarion i ma laho mangondolhon bagas tu manang ise na manjahasa  dohot na umbegesa na mansai ringkot on: Haputusan parpudi ni Debata Jahowa, i ma:
"Jadi marpamuati ma roha ni Jahowa taringot tu hinamago nilumbahonNa naeng bahenonNa tu bangsoNa"(ayat 14). 

5. I ma Debata na mangolu i. I ma Debata na tatanda di bagasan Jesus Kristus i. Tangi do Ibana di tangiang ni angka na porsea di Ibana. Tangi do Ibana di tangiang pangondianon ni angka na joujou tu Ibana mangido asi ni rohaNa.  Asi do rohaNa di angka pardosa.  Na olo marpamuati, na olo menyesal do Ibana di sangkap jea na naeng patupaonNa tu jolma i, tu bangsoNa, tu hita.  Ndang Debata na dikontrol rimas Ibana.  Debata na manghaholongi dohot na mamasumasu hita do Ibana.

Tutu ndang tarpasombu Debata dosa maralohon Ibana. Alai tong do tutu na mangihut on: Ndang tarpasombu Ibana gabe roa goarNa marhite namangarimpashon bangsoNa. Lumomoan do rohaNa molo ditanda, diingot, jala disomba jolma i Ibana songon Debata na marpamuati roha di sangkapNa patupahon jea tu bangsoNa. Haputusan ni Debata na songon i do na dipatuduhon Jesus marhite umpamaNa taringot tu anak na mago i: "Atik pe naung pardosa anak na mago i, holan diida sian sihadaoan haroro ni anakNa na manolsoli i migor dilojong Ibana do naghaol dohot mangummasa. 

6. Di bagasan ni i do mansai ringkot tangiang pangondianon i patupaon ni ganup na porsea di partingkianta nuaeng:
Sasintongna, nunga tung mansai jorbut na pinatupa ni jolma i tu planet bumi on, i ma na manegaisa holan asa boi marsonangsonang satongkin sabagian sian jolma i na holan mamingkirhon dirina. Disegai jolma i na tinompaNa, jala marhite i dilea jolma i Debata na manompa angka i.

Sasintongna, nunga tung jahat jolma i di bagasan pardalanan ni hajolmaon: Angka na gale sian tongatonga ni jolma dohot angka na gale sian tongatonga ni angka na tinompa ni Debata na asing nunga bahat naung mago boti so marbogas. Ndang dipillit jolma i patujolohon holong to donganna jolma dohot donganna na tinompaNa. Nunga mangalanggar impola ni patik ni Debata na paduahon i jolma i.
Sasintongna, nunga tung bahat di tongatonga ni angka bangso di portibion nuaeng angka bangso na mambahen na so Debata Na Mangolu i gabe debata nasida, jala parpudi on, ndang holan angka na diprodusir jolma sian angka na tinompa ni Debata i na naung dipardebata jolma i, alai nuaeng on nunga jolma i dipardebata jolma i. 

7. Sasintongna nunga ingkon ripashonon ni Debata sitompa nasa hasiangan on angka jolma na naung mardosa i. Alai ndang i dipatupa Debata, ndang apala ala bahat dope sian tongatonga ni jolma i na manangiangkon tangiang pangondianon  tu Ibana -atik pe sangombas sintong do i - alai sasintong ni sintongna ala ganup tingki do marpamuati rohaNa di sangkap jea manang hinamago na sinangkapanNa ala ni rimasNa mida angka jolma i.  
Sasintongna, nunga tung bahat di tongatonga ni hura ni Kristus na adong di portibion na so satia manghangoluhon ngolu na imbaru, baliksa gabe sai madabu tu ngolu na robi, di tongatonga ni angka ruas nang parhalado ni huria I pe. Boi do tagoari angka i. Alai ndang apala mansai ringkot goaron i di jamita on. Ganup ma hita mamareso dirinta be.

Alai ganup ari sai marpamuati do rohaNa mida hita angka ruas ni pamatang ni Kristus na sai tarunjun mangolu sarombang dohot portibion, jala parpudi on di portibi digital nuaeng on lam nalnal di tongatonganta dohot di tongatong ni portibion on angka I-na na jolo saotik do umbotosa, alai nuaeng bahat situtu di bagasan tingki na mansai hatop diboto sude , isara na pinatupa ni natuatua na dtanda Kristen na di Toba na patupahon kekerasan seksual tu ianakkonnasida, pola sahat tu na patupahon ulaon incest, na mambahen tung maila situtu halak Kristen Batak di portibion.

Sasintongna, molo jujur hita manulingkiti tu hadirionta marsadasada, tu ganup dirinta, tu ganup keluarganta, tu ganup parsaoranta, tu ganup gulmit ni ngolunta, ndang tagamon so tarrimas Debata mida hita, jala siala ni nunga tibu disangkapi Ibana jea manang hinamago tu hita. Alai, ndang songon i dipatupa Ibana tu hita.

8. Boasa songon i, Debata maradophon hita angka ruas ni pamatang ni Kristus i? Dapotta do alus on sian Heber 4: 14-16. I ma na sai ditangiangkon Jesus Kristus do hita di tangiang pangondianonna ganup tingki: 
"On pe, dibahen naung adong di hita sintua ni malim na bolon, naung manorusi angka banua ginjang i, i ma Jesus, Anak ni Debata, gomos ma tatiop naung taparhatopot i! Ai naung adong do di hita sintua ni malim na tarbahen dongan manghilala di angka hagaleonta; tung na tarunjun do Ibana di na saluhut songon hita, alai ndang mardosa. Antong, marhiras ni roha ma hita mandapothon habangsa parasian, asa tajalo talup ni roha, jala asa dapot asi ni roha hita bahen pangurupion, di tingki halehetanna."

9. Sai lam tatanda ma Debatanta on di minggu Rogate on: Tarbahen Ibana do marpamuat roha. Siala ni i, mansai ringkot do manongtong hita patupahon tangiang pangondianon maradophon portibion, maradophon huria i, maradophon donganta saripe, ianakkonta, sisolhotta, dohot maradophon bangsonta, ndang holan maradophon angka na manghaholongi hita, alai dohot do maradophon angka na manghasogohon hita, angka na so sangpingkiran dohot saroha dohot hita. Na pinatupa ni si Abraham maradophon Sodom dohot Gomorra, na pinatupa ni si Musa maradophon bangsona, dohot na pinatupa ni Jesus Kristus di banua ginjang maradophon hita, songon i nang angka na pinatupa ni angka na porsea na solhot marsaor dohot Debata di tongatonganta hajolmaon, dohot nang di tongatonga ni hurianta huria Kristen Batak sian na mamungka adong sahat tu tingki on, i ma na gabe tiruan tu hita di na manangiangkon tangiang pangondianon i, ai Debata na manghangolongi dohot mamasumasu hita do Ibana, Debata na rade mamutushon manundati uhumNa tu hita siala ni angka tangiang pangondianta be.(*)
  BeritaTerkait
  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

    4 bulan lalu

    Oleh: Pdt Dr. Robinson ButarbutarA. Dihasiholi Debata asa marlas ni roha jolma i.Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, ta

  • Jamita Evangelium, Minggu Misericordias Domini 15 April 2018: "Mangolu di bagasan Asi ni roha ni Debata"(Mika 7: 14-20)

    3 bulan lalu

    Oleh: Pdt. Dr. Robinson Butarbutar, sian Parsameanta, STT-HKBP Pematangsiantar.1.Dung songon i tangkas jala bagas di ari Minggu na salpu di panghulingi hata ni Tuhan Jesus Kristus ganup siseanNa mamun

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    11 bulan lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium, Minggu Quasimodogeniti 8 April 2018: Parmahani Ma Birubiru ni Debata

    3 bulan lalu

    Oleh: Pdt Robinson Butarbutar, Sian Parsamenta, STT-HKBP.Dung hehe Jesus sian hamatean, andorang so manaek Ibana tu banua ginjang, andorang so ditonai Ibana angka siseanna laho tu sandok portibion mam

  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    2 bulan lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet