• Home
  • Agama
  • Jamita Evangelium, Advent I 2 Desember 2018, 4 Musa 24: 15-17: Managam Haroro ni Sipalua
KSP Makmur Mandiri
Sabtu, 01 Desember 2018 09:18:00

Jamita Evangelium, Advent I 2 Desember 2018, 4 Musa 24: 15-17: Managam Haroro ni Sipalua

BAGIKAN:
Ist
Pdt Dr Robinson Butarbutar

Oleh: Pdt Dr. Robinson Butarbutar, di Parsameanta, STT-HKBP Pematangsiantar, HP-WA; 0812-62472015.

Sada na mansai uli situtu na jumpang hita di angka tona ni Debata di Bibelta i, i ma na mangihut on: Ndang dibatasi  angka batas-batas hajolmaon Tuhan Debata di na patolhashon lomo ni rohaNa nang sangkapna nabalga situtu maradophon bangsoNa nang hajolmaon na tongon mangadopi hamaolon. Dipangke Debata do nang angka bangso na so mananda/manomba Ibana pasauthon sangkapNa. I do na piatupaNa, isarana, marhite sahalak boruboru margoar si Rahab na mangurupi mata-mata ni bangso Israel niuluhon ni si Josua laho manaluhon huta Jeriko. Dipangke Debata do raja Cyrus laho mamboan bangsoNa bangso Juda mulak sian habuangan.  I ma dua contoh sian mansai bahat contoh di Bibelta i nang di ngolunta siganup ari.

Laos dipangke Debata do nang na so sian tongatonga ni bangsoNa Israel na pinaluaNa sian Misir i laho patolhashon sangkapNa na uli. Dipangke Debata sahalak na margoar si Bileam, anak ni si Beor, sahalak panurirang na so sian bangsoNa Israel. Atik pe targoar sahalak panurirang na di ujungna olo talu tu pangunjunan ni raja Balak raja Moab asa disurirangkon ibana bura tu bangso Israel-i ma marhite na mangurupi asa mangulahon ulaon parmainanon dohot panombaan tu Baal bangso Israel i jala marhite i gabe diuhum Debata ma 24 ribu halak Israel-asa dapotan hepeng ibana sian raja i, ianggo taringot tu panurirangonna ndang olo ibana  manang ndang tarbahensa manurirangkon bura tu bangso i songon na pinagido ni raja i tu ibana di dolok Bamoth Baal, Pisgal, dohot Peor (Ida 4 Musa 22: 41, 23:1-5, 23:14-25, 29, 24: 11, 17). 

Siala ni i do, atik pe dioloi ibana pangidoon ni raja i asa disurirangkon ibana bura maradophon Israel, alai tong do didok ibana tu raja i na ia sinurirangkononna i ndang lomoNa, alai lomo ni manang holan nidok ni Debata ni Israel do. Di duru ni huasona do manontuhon asa sisurirangkonona. Dipatupa Debata I, atik pe digoari do ibana di Padan Naimbaru panurirang na geduk (2 Petrus 2: 15, Judas 1: 11, Pangungkapon 2: 14). Tarbahen Debata do manangkapi  dohot patolhashon sangkap na uli nang patubuhon panagamion di haroro ni Sipalua i sian tongatonga ni bangso Israel apala sian pamangan ni si Bileam i sipasahatonna tu raja Balak halak Moab na sai mangido asa buraanna bangso Israel.  Isi ni panurirangion paopathon na ruar sian pamanganna do ia na gabe jamita di Minggu Taon Baru Parhuriaon on, i ma di minggu Adven na parjolo sadarion.

Mansai ringkot do i rimangrimangonta uju masuk hita tu taon parhuriaon na imbaru, mamungka sian Adven I, ala di taon parhuriaon ombason dipatogu do panghirimonta taringot tu haroro ni Sipalua Napaduahalihon i, na naung leleng pinaimaima ni na porsea i mamungka abad parjolo sahat tu abad paduapulusadahon nuaeng.   
Asa tung togu panagamon di panghiriman taringot tu haroro ni Sipalua i dipatolhas Debata ma marhite si Bileam na mangihut on:

Naparjolo, hinasintong ni hata panurirangon di haroro ni Sipalua i (ayat 15). Didok, ia hata i ruar:
Sian pamangan ni sada jolma na tangkas hadirionna, i ma si Bileam anak ni si Beor.
Ndang sian sahalak na awam di panurirangon, alai sian sahalak na toggor matana. Ndang holan i tahe, alai lam dipatangkas ma hasisintong ni hata panurirangion i dohot tolu hata taringot tu kualitas hata i dohot tolu kualitas ni haroroan ni hata i di ayat 15-16.

Kualitas ni hata i didok ro sian sada halak na naung somal patupahon opat ulaon (kata kerja), asa ndang adong be kemungkinan sala na pinatolhasna i, i ma umbege, umboto, marnida, jala tungkap laho marnida marhite matana. Marhite hata na opat i tangkas parbinotoan na pasti. Hata na na parpudi, "naung tungkap" jala "tarbungka matana" dipangke tu angka naung boi marnida parmataon ni Nasunhinagogo i. Nanidokna, ia hata i ro sian sahalak na i do ulaonna. Ndang sian sahalak na amatir-amatiran, alai sian ahli di bidangina do.
Dia na nidok na, i ma: angka hata, parbinotoan, dohot parmataon. On pe tolu tahap na bertingkat: Hata, Parbinotoan dohot Parmataon. Sian na mandasor, hata, tu parbinotoan (di pingkiran) dohot tu na empiris, na boi diida mata, dibuktihon simalolong.

Haroroan ni hata i, ima: Debata, Nasuntimbul, dohot Nasunhinagogo. On pe martingkat, sian na mandasor, i ma Debata, tu na tumimbo sian saluhut, Natumimbul, jala na gumogo sian  saluhut, Nasunhinagogo. Marhite i, ndang tarbahen manang ise so manghaposi hasisintong ni sipatolhason ni Debata marhite si Bileam i.

Hata panghirimon di haroro ni Sipalua i disurathon si Bileam naung somal umbege angka hata ni Debata, somal umboto parbinotoan di Nasuntimbul i, dohot somal marnida nang tungkap laho marnida dohot matana parmataon ni Nasunhinagogo i. 

Napaduahon, isi sipasahatonna i ndang dope masa di tingki ni si Bileam i sandiri (ayat 17a), uju ndang masuk dope bangso Israel tu tano niuarihon ni Debata tu angka ompu nasida.  Hurang lobi tolu ribu dua ratus lima pulu taon na salpu nunga disangkapi Debata sangkap i. Nunga tangkas uju i, alai ndang boi dope diida simalolong: "Sai naeng idaonna ala ndang dope di tingkina, na sai naeng tataponna alai ndang dope angka tung jonok." Di tingki ni Bileam ndang boi dope diida dohot ditatap ibana.  Alai sihasiholon do na naeng masa I, ala sangkap na uli do pinatupa ni Debata i. Ndang sipasidingon. Alai nunga binsar bintang ni Jesus jala nunga martungkot harajaon Ibana mamungka tubu Ibana di Palestina.

Patoluhon, sian dia na naeng ro i jala dia ma na naeng ulahononna?
Aha na naeng masa? Binsar (Heber: derekh) bintang (Heber: kokav) dohot hehe (wekam) tungkot harajaon (Heber: syeveth) sian Jakob/Israel.


Dia ulaonna? Papatuon (Heber: mahats) angka luat ni Moab jala patundukkon (Heber: qarqar) sandok pinompar ni Seth (ayat 17b), i ma anak patoluhon ni jolma na parjolo i, na manggontihon si Abel naung binunu ni si Kain. Angka pinompar ni Seth dipatorang do di 1 Musa  4: 25-5: 32.

Na nidokna i ma ia na naeng ro i ndang holan patundukhon pinompar ni bangso Moab na ni rajaan ni raja Balak uju i, alai dohot do pinompar ni hajolmaon pomparan ni si Seth ompu ni hajolmaon i. Na naeng binsar i dohot sitiop tungkot harajaon i patundukhon sandok hajolmaon. Molo taida dao tu panindangion ni hata ni Debata di Padan Naimbaru, ia Jesus Kristus naung tubu, mangula, mate jala mulak mangolu sian hamatean i, jala manaeng tu banua ginjang di siamun ni Debata Ama i  unduk do tu Ibana sude hajolmaon dohot nasa na adong di hasiangan on, na di banua ginjang, na di banua tonga dohot na di banua toru.
Siala ni i do disosoi isi ni hata ni Debata pinatolhas ni si Bileam i do hita angka naporsea di Jesus Kristus Sipalua i na tapaima haroroNa na paduahalihon i di tingki on asa:
Manongtong hita manghirim, ai nunga disurirangkon si Bileam anak ni si Beor i hurang lobi tolu ribu dua ratus lima pulu taon na salpu na ingkon ro Ibana manaluhon saluhut di ari parpudi.  Haroro ni Jesus Kristus Paduahalihon pe ingkon masa do i.

Lam porsea ma hita di ganup bagabaga ni Debata di ngolunta, di bagabaga ni Jesus Kristus tu ganup na mangulahon turgas pinasahatNa tu ganup na porsea di Ibana na donganna do hita sahat ro di ujungna. Ai ndang mulak hata bagabaga ni Debata tu ganup hita. Marparbue do.

Lam porsea ma hita di Jesus Kristus Mesias i, ai Bintang naung binsar do Ibana patuduhon dalan ngolu tu hita, manorangi dalan nang langkalangkanta. Lam porsea ma hita di tungkot harajaon hagogoonNa i laho patauhon hita mandungdung sangkap ni ngolunta di portibion atik pe sipata maol tadungdung, i ma patupahon lomo ni roha nang sangkapNa na uli maradophon donganta jolma di bagasan dohot di duru ni huria i di portibion, manang dia pe ulaon na tapillit pasauthon panjouon ni Debata tu hita be di ngolunta ganup.  Nang uju masa na maol situtu di ngolunta, unang lupa hita manghatindangkon na diparade Debata do hamonangan di hita, hatop manang leleng, di bonana, di tongatonga ni pardalanan ni ngolu nang ulaonta, di ujungna nang ro di saleleng ni lelengna.

Laos tapangido ma asi ni roha ni Debata tongtong patauhon hita marnida Jesus Kristus i tongtong di pardalanan ni ngolunta on, ai i do na patauhon hita tumogu manghaporseai Ibana, nang di partingkianta nuaeng di era revolusi industri napaopathon na lam marusaha paposhon roha ni jolma na so pola be ingkon marsigantung tu Debata jolma i mangadopi angka tantangan ni ngoluna ai nunga lam pistar jolma i. Ibana ma nang na tapangasahon mangadopi partingkian na lam timbo parbinotoan ni angka masin pinatupa ni jolma i, pola umpistaran angka masin i, dumenggan na pinatupana sian na pinatupa ni jolma i, i ma era  artificial intelligence sinuaeng. Ibana ma tong tapangasahon nang di inganan nang rumang ni ngolunta na tradisional dope, na so nidungdung ni angka hamajuon ni ngolu i dope, nang di angka perjuanganta na marragam i, di jabu nang di ulaonta be.

Laos marsiajar sian ulaon ni Debata na mamereng dao tu jolo di na manangkapi  dohot patolhashon marhite si Bileam sangkap na uli parohon Sipalua i, bintang dohot tungkot harajaon i tu raja Balak halak Moab, denggan do tong molo hita angka na porsea  di Debata Natumimbul dohot Nasunhinagogo i manongtong manatap dao tu jolo di na mangarangrangi ngolunta, jala uju taadopi angka parungkilon ni ngolu nuaeng. Gariada tahe, tapangido ma asi ni roha ni Tuhan i asa dipatau Ibana hita marnida tantangan na tongon taadopi nuaeng songon kesempatan na nilehon ni Debata lam paturehon ngolunta nang ngolu ni hajolmaon di portibion marhite na dao manatap tu jolo. 

Ndang oloanta be gabe angka na porsea na jempek mamereng tu jolo hita halak Kristen Batak on, gabe olo hita holan mamingkiri na ringkot di dirinta sambing, alai sai tabereng ma dao tu jolo asa dohot nang hita mamingkiri nang na ringkot di donganta jolma di luatta, inganan ulaonta, nang di humaliangta. Tapadao ma na marnida di lapik. Sai angka na denggan mambahen rencana na denggan ma hita.  I do na ringkot tapagomos di Minggu Taon Parhuriaon Naimbaru on, di Adven parjolo on, asa lam tapatogu hasomalan ni ngolu na dao marnida tu jolo, ai nunga dipatupa Debata hamomonangta di jolo. (*)

  BeritaTerkait
  • Jamita Evangelium, 9 Desember 2018, Minggu Advent II, 1 Petrus 2: 11-12 : Manomunomu Tuhan i Marhite Parange na Denggan

    3 hari lalu

    Oleh: Dr. Robinson Butarbutar, sian Parsameanta, STT-HKBP Pematangsiantar, 0812-62472015.Nunga sada fakta na ingkon adopan ni angka bangso di portibion nuaeng na siala ni marragam sibonsiri na mansai

  • Jamita Evangelium, 25 Nopember 2018, Minggu Ujung Taon Parhuriaon, Daniel 7: 9-14: Harajaon ni Debata Na Manongtong

    2 minggu lalu

    Oleh: Pdt Dr Robinson ButarbutarDi bagasan lobi dua taon parpudion sahat do tu ganup hita barita masa na mangihut on: Tongon marusaha do angka bangso na balga jala na gogo manggulut huaso na tumimbo d

  • Jamita Evangelium di Ari Jumat, 30 Maret 2018 Parningotan Ari Hamamate ni Tuhan Jesus, EvangeliumJohannes 19: 28-37 "Panotnoti Jala Haposi Na Tarsilang i"

    9 bulan lalu

    Oleh: Pdt. Dr. Robinson Butarbutar, Parsameanta, STT-HKBP PematangsiantarPatujoloDi taon 2018 on, di tonga-tonga ni Parningotanta di Ari Hamamate ni Tuhan Jesus di hau pinorsilang i hira-hira 2015 tao

  • Jamita Evangelium, Minggu Jubilate, 22 April 2018: Marlas ni Roha di Bagasan Tuhan i (1 Tessalonik 2: 13-20)

    8 bulan lalu

    Oleh: Pdt Dr. Robinson Butarbutar, Sian Parsameanta, STT-HKBPJubilate = Marolopolop tu Debata Sandok Tanoon1.Molo tajaha surat 1 Tessalonika on sian bona sahat tu ujung, tangkas situtu do digurithon&n

  • Jamita Evangelium, Minggu Rogate, 6 Mei 2018 2 Musa 32: 7-14 "Debata Manghaholongi jala mamasumasu hita"

    7 bulan lalu

    Oleh: Pdt. Dr. Robinson Butarbutar, Parsameanta, STT-HKBP Pematangsiantar1.Hamu angka dongan, di minggu Rogate on, di sada minggu di na ditogutogu hata ni Debata hita asa lam marpos ni roha di latapan

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb