• Home
  • Agama
  • Jamita Evangelium, 9 Desember 2018, Minggu Advent II, 1 Petrus 2: 11-12 : Manomunomu Tuhan i Marhite Parange na Denggan
KSP Makmur Mandiri
Sabtu, 08 Desember 2018 17:35:00

Jamita Evangelium, 9 Desember 2018, Minggu Advent II, 1 Petrus 2: 11-12 : Manomunomu Tuhan i Marhite Parange na Denggan

BAGIKAN:
Ist
Pdt Dr Robinson Butarbutar
Oleh: Dr. Robinson Butarbutar, sian Parsameanta, STT-HKBP Pematangsiantar, 0812-62472015.

Nunga sada fakta na ingkon adopan ni angka bangso di portibion nuaeng na siala ni marragam sibonsiri na mansai bahat jolma na meret sian inganan hatutubuna tu inganan na asing sian i, sian inganan di negarana sandiri tu inganan na asing disi, dohot sian negarana tu negara na asing. Adong ma i siala ndang adong ulaon na diparsinta di inganan hatutubuna i, alai adong do i nang siala ni porang na mengancam ngolu ni halak. 

Di angka taon parpudi on mansai torop do angka na bungkas sian inganan nang negara sandiri, ndang holan sian angka negara na pogos to angka negara na mora, alai adong do tong sian angka negara na mora tu angka negara napogos laho mangalului ulaon na tumimbo manang na ungkap disi. Alai na mambahen balga panghorhonna di portibion nuaeng i ma hananangkok ni torop ni angka na bungkas, angka migran dohot imigran, tarlumobi internasional imigran siala ni hapogoson dohot porang na masa di angka negara-negara na pogos nang na mangadopi porang na mansai jorbut dohot na mansai leleng, di Timur Tengah nang di Asia songon i nang di  Amerika Latin nang di Afrika. Mangihuthon laporan ni Organisasi Internasional Migrasi  (IOM) di taon 2018 on mansai timbo do hananangkok ni torop ni angka migran di portibion secara global. Di taon 2015 adong do 3,3 persen penduduk portibion na gabe migran, i ma 244 juta halak. Di taon 2000 holan 2,8 persen do, i ma 155 juta halak. Alai di taon 2018 on disura nunga 740 juta halak angka na bungkas sian negara inganan hatutubuna. 

Songon i ma toropna. Siala ni i sude angka negara haroroan ni angka migran i, tarlumobi ma angka negara hasahatan ni angka migran i isara negara-negara Uni Eropa nang Amerika Serikat, ndang marimba bangsonta Indonesia mamangke bahat tingki mamingkirhon dia ma sipatupaon laho mangadopi partingkian na songon i. Ai molo tompu di bagasan sada taon ro migran siala ni na ingkon mengungsi nasida panghorhon ni porang di inganan haroroan nasida, boi do tulahon ni angka negara hasahatan nasida i nasida? Molo tung boi pe, sadia godang jala sadia leleng? 

Parpudion, siala ni torop ni angka pengungsi na ro tu Eropa, gabe tubu do sada panghilalaan manghasogohon dohot mangalo angka pengungsi na ro tu Eropa. Siala ni i di na dipatupa Pemilu disi gabe dipillit rakyat do partai na mandok situlahon do angka pengungsi i. Dipatupa nasida i atik pe di Undang-undang dasar nasida togu do disuanhon penghargaan tu hak-hak ni mengungsi, tarlumobi angka pengungsi siala ni porang.

Panghilalaan na so manghalomohon angka halak na ro tu luat nasida, nang pe siala ni porang- ba lam ma siala ni na naeng mangalului ngolu na dumenggan-lam tubu do ndang holan maradophon angka pengungsi tu sada negara, alai dohot do tong tu angka halak na ro tu sada luat, huta, kecamatan, kabupaten nang propinsi di sada negara. Atik pe saleleng on timbo do tondi masijangkonan di sada bangso, gabe muba do i siala ni i.
Di kondisi na songon i, mansai ampit do jamita di Adven pa-II-hon dienet sian sada surat di Padan Naimbaru na secara khusus disurathon tu angka na porsea na mian ndang di luat hatutubu ni Naumpompar nasida nang di luat hatutubu nasida sandiri, alai di angka luat di duru ni huta tatutubu manang haroro nasida. Songon dia ma tona ni Debata tu nasida na gabe angka pendatang manang migran disi? Songon dia ma angka na porsea jonokkon ni pangujung ni abad parjolo dung ro Kristus na mian ndang di huta nasida di Palestina, alai di angka propinsi nang kota na adong di duru ni Kekaisaran Romawi, i ma di angka inganan na torop pendudukna angka na so mananda dohot manjangkon Jesus Kristus songon Sipalua, gariada tahe na manghasogohon nasida siala marasing hadaulaton ni parange ngolu siganup ari nasida sian angka parange hadaulaton tinanda ni halak Gorik dohot halak Romawi siganup ari. 

Songon dia ma halak Kristen Jahudi na mian di angka parserahan (Gorik: diasporas) di Pontus, Galatia, Kapadokia, Asia nang Bitunia, na digoari di surat 1 Petrus songon angka halak dagang (Gorik: paroikous) dohot Angka Paisolat (Gorik: parepidemois), jempek hata, angka migran/imigran mangolu songon halak Kristen disi. Uju i di angka inganan i, sian taon 40-an sahat tu taon 90-an, ndang targoar ugamo na resmi (Latin: religio licita) dope Hakristenon, alai diida songon ugamo na so resmi (Latin: religio illicita) dope Hakristenon. 

Hata ni Debata na dipasahat tu nasida uju i, laos i do hata ni Debata na mamangkulingi hita angka halak Kristen di portibion, ndang marimbar hita halak Kristen Batak, na mangolu ndang di negara hatutubunta alai di negara na asing, ndang di bonapasogitta, alai di parserahan di Indonesia on, ndang di luat inganan hatutubunta di angka kota nang propinsi di Indonesia on, alai di propinsi na asing, ndang di angka profesi na somal taulahon, alai di angka profesi na asing, ndang di angka luat manang ulaon na somal naung tadalani, alai di angka luat manang ulaon na marasing sian i. 

Dia hatani Debata na tu halak Kristen Jahudi na marstatus imigran di angka kota nang propinsi di parserahan i uju i, na mangihuthon Jesus Kristus, naung manomba Ibana songon Sipalua di punguan partangiangan dohot parsaoran holong nasida di angka jabu ni naporsea i uju i, naung pinalua ni Jesus Kristus sian dosa nang hamatean na manongtong i, naung gabe nampuna ni Kristus, na marngolu na imbaru, dna paimaimahon hasangapon nasida di na ro Kristus di bagasan hasangapon i, alai ndang diongku Kekaisaran dope songon punguan parugamoon na resmi? Laos i do hata ni Debata nang tu hita halak Kristen di portibion nuaeng, ndang marimbar di Indonesia on, na targoar ruas ni sada Ugamo na Resmi, i ma Hakristenon Protestan, alai jotjot parpudion digoari manang piga songon angka halak parugamo sileban, halak kafir, atik pe nunga dijamin UUD 45 di negaranta na sada sian ugamo resmi do Hakristenon Protestan i. 

Beha do hita halak Kristen Batak na nuaeng mian jala mangolu di angka kota nang Kabupaten na patupahon angka perda-perda daerah na so apala martondi manjangkon sadenggandengganna  angka rakyat Indonesia na ro mangolu dohot mangula disi laho mangalului ngolungolu nasida dohot membangun disi na dijamin Undang-undang Dasar 45, alai na parpudi on torop ndang saurdot be tu Undang-undang Dasar i?

Dia ma hata ni Debata tu halak Kristen Jahudi i na gabe migran dohot imigran i na jolo, songon i nang tu hita?

Parjolo, mangorom (Gorik: avechestai ) manang padao diri sian angka hisaphisap ni roha sibuk na maralo dompak partondi on.

On ma na ginoaranna, mangolu di bagasan habadiaon. Ndang mangoloi hisap-hisap (Gorik: epitumia) roha sibuk (Gorik: sarkikon tondinta), alai padao diri sian i, ndang mangoloi i. Mangolu di bagasan habadiaon marhite na so mangoloi angka hagiot ni daging na maralo dompak i do sada sipasomalsomalon ni angka na paimaimahon ari haroro ni Jesus Kristus Sipalua i, unang uju ro Ibana paduahalihon  tardapot hita angka na martihas, angka na rumar.  Di suratna tu halak Kristen di Galatia digoari apostel Paulus do dia angka na mangoloi hisaphisap ni  daging i, i ma: Parmainanon, hahodaron, pargadompuson, hasipelebeguon, hadatuon, pargutugutuon, parsalisian, partahitahion, parmabuhon, bunubunu, haormuson (Gal 5: 19-21; ida angka ayat paralellna ddi Padan Naimbaru). 

Ala di tingki na dos angka na badia jala jolma na mura madabu tu bagasan dosa do hita (Didok si Martin Luther, simul iustus, et peccator), jotjot ala ni na so tasangkapi-alai adong do ala na tasangkapi dohot tahasiholi, mangolu di bagasan rumar ni dosa - taingot ma pangajarion ni reformator Martin Luther na mandok tu hita halak Kristen asa patupa hamubaon ni roha ganup tingki, ganup jom, ganup ari, ganup ro kesempatan muba, di na tatanda dosanta. Ganup taboto jala taoku na naung manadabu hita tu bagasan pangoloion di hisap-hisap ni daging, mansai denggan ma taingot hatop asa ro hita mangido hasesaan ni dosa. Alai taingot ma tongtong tona tu hita uju mandaohoti ulaon na badia, asa unang to uduti mardosa.
Napaduahon, marparange manang patupahon na denggan di tongatonga ni angka na so manomba Jesus Kristus.

Molo di na parjolo na di ginjang i tondina manjagahon dirinta sandiri asa tongtong badia, alai di tona na paduahon on tondina ndang tu dirinta, alai tu duru ni dirinta, tu angka na di humaliangta. Di hata Gorik, nasida na di humaliang ni halak Kristen Jahudi uju panuraton ni surat Petrus on digoari di hata Gorik ethnesin, i ma na so Jahudi. Di bahat tarjemahan ni hata on di bahatan Bibel sahat tu hira tolu pulu taon parpudi on sai diterjemakan do hata i di hata Indonesia songon halak kafir. Di hata Batak didok Sipelebegu. Di tingkion, dumenggan do tagoari nasida songon angka na so porsea di manang na so manomba Jesus Kristus. Ai boi do na so manomba Jesus Kristus i na so marugamo. Boi parugamo na asing.  Molo di ayat 11 dipangido sian hita asa padaohon diri sian hisaphisan ni daging, ianggo nuaeng di ayat 12  patupahon na denggan tu angka na so manomba Jesus, asa molo tung pe dihatahatahon nasida (Gorik:  katalalalousin ) hita songon angka parjahat gabe di tingkina tarpasangap nasida Debata. 

Ari di na pasangap Debata i nasida digoari  ari panuluhan (Gorik: hemera episkopes), i ma ari di na ro Debata manopot jolma boi idaonNa naung pinatupa ni angka na porsea i. Ndang migor diida na di humaliangta I parbue na denggan na taula. Alai di tingki na lehet, idaon nasida do i. Andigan i ndang tuk hita marnidasa. Boi do i patupaon ni Debata.

Disosoi hata ni Debata do hita angka paisolat, migran, imigran,  pendatang, di ingananta mangolu nang mangula nuaeng, angka na ro (halak dagang) dohot paisolat, angka migran-immigrant asa padaohon diri sian ulaon patupa na so denggan tu nasida na so mangihuthon Jesus jala siala ni i gabe ndang manghalomohon hita halak dagang dohot halak paisolat ala porsea di Jesus Kristus i hita. Baliksa, marparange na denggan tu nasida do siulaonta. Atik pe satongkin do hita mangolu di portibion, alai ndang jadi pasidingonta dirinta sian ulaon na denggan alai patupahonsa do.

Siala ni i ringkot do di minggu Adven II-hon on:
Parjolo idaonta ise hita, di dia hajongjonganta. Manghilala halak migran do hita, halak dagang do hita di ingananta I, ndang ala manghirim di huta na hot I do hita dung marujung ngolu hita, alai tutu ala ndang di huta hatutubunta hita, alai nunga di hut ani halak na asing mangolu jala mangula? Molo i do. Beha do saleleng on pambahen ni angka na so sahaporseaon dohot hita maradophon hita? Molo dihasogohon do hita ala Kristen hita, ala tapasiding ngolunta sian na mangoloi hagiot ni dagingta, unang tabahen na so denggan tu nasida, alai baliksa do , i  ma patupahon angka na denggan tu nasida.

Paduahon, tarimangrimangi jolo dia do na naung tapatupa tu angka donganta na di duru ni parsaoran ni halak Kristen i? Sotung maon gabe na so denggan tapatupa tu nasida, gabe mamrlea goar ni Tuhanta Jesus Kristus tabahen. Molo i do, ba muba ma hita. Alai molo ndang, baliksa nunga tapatupa na denggan tu nasida,  otik manang godang, metmet manang balga, na tarida manang na so tarida, na dibaritahon manang ndang, martua ma hita, ai i do tong sada siulaon ni angka na porsre adi Jesus Kristus, na masihol di haroroNa paduahalihon. Taingot ma tongtong, naposo ni Debata do hita disi, ulaulaNa patupa na denggan tu na di humaliang hita.
Patoluhon, sadia ringgas rohanta patupahon na denggan tu angka donganta na di humaliangta i? 

Mangihuthon Martin Luther, manang di dia pe hita mangula jala manang aha pe ulaonta i  boi do disi hita marhireas ni roha patupa ulaon na denggan tu angka na di humaliang hita, tu angka na so manjangkon Jesus Kristus dohot na manghasogohon angka siihuthon Ibana. 

Molo tapatupa duansa na di ginjang i, ra nunga boi moru angka prasangka buruk manang tondi parmusuon na ro sian angka na so mangihuthon Jesus na maherbang nuaeng di partingkian na godang angka pengungsi di portibion, bahat angka migran dohot immigran.  Baliksa gabe ndang dihasiholi alai disolsoli nasida manghasogohon  hita. Gabe haholongonna do hita jala pujionnasida Debata.  SIala ni  i do tasintasintahon HKBP gabe pasupasu tu poribi on. Tuhanta ma tongtong patoguhon hita patupahon na denggan i tu nasida. Amen.(*)
  BeritaTerkait
  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

    5 bulan lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar.HP/WA 0812-62472015Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24

  • Jamita Evangelium, Advent I 2 Desember 2018, 4 Musa 24: 15-17: Managam Haroro ni Sipalua

    6 bulan lalu

    Oleh: Pdt Dr. Robinson Butarbutar, di Parsameanta, STT-HKBP Pematangsiantar, HP-WA; 0812-62472015. Sada na mansai uli situtu na jumpang hita di angka tona ni Debata di Bibelta i, i ma na mangihut on:

  • Jamita Evangelium, Minggu Misericordias Domini 15 April 2018: "Mangolu di bagasan Asi ni roha ni Debata"(Mika 7: 14-20)

    tahun lalu

    Oleh: Pdt. Dr. Robinson Butarbutar, sian Parsameanta, STT-HKBP Pematangsiantar.1.Dung songon i tangkas jala bagas di ari Minggu na salpu di panghulingi hata ni Tuhan Jesus Kristus ganup siseanNa mamun

  • Jamita Evangelium Minggu IV Adven 24 Desember 2017, Lukas 1: 26-38: Debata Ro Mamboan Asi ni Roha"

    tahun lalu

    Oleh: Pdt. Dr. Robinson Butarbutar, Sian parsameanta, STT-HKBP PematangsiantarDi minggu Adven paopathon sadarion, marhite barita nauli sinurathon ni parbarita nauli jala teolog Lukas di bindu 1 ayat 2

  • Jamita Evangelium, 4 Nopember 2018 Minggu XXIII Dung Trinitatis 2 Tim 1: 6-14 "Paratarata ma Silehonlehon ni Debata na Sahat tu Ho"

    7 bulan lalu

    Sian Parsameanta, STT-HKBP, Pdt Dr. Robinson ButarbutarDung manjonok marumur dua ribu taon pardalanan ni huria ni pinajongjong ni Jesus Kristus di portibion marhite ulaon ni TondiNa Tondi Porbadia di

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb