• Home
  • Agama
  • Jamita Evangelium, 4 Nopember 2018 Minggu XXIII Dung Trinitatis 2 Tim 1: 6-14 "Paratarata ma Silehonlehon ni Debata na Sahat tu Ho"
KSP Makmur Mandiri
Sabtu, 03 November 2018 08:19:00

Jamita Evangelium, 4 Nopember 2018 Minggu XXIII Dung Trinitatis 2 Tim 1: 6-14 "Paratarata ma Silehonlehon ni Debata na Sahat tu Ho"

BAGIKAN:
Ist
Pdt Dr Robinson Butarbutar
Sian Parsameanta, STT-HKBP, Pdt Dr. Robinson Butarbutar

Dung manjonok marumur dua ribu taon pardalanan ni huria ni pinajongjong ni Jesus Kristus di portibion marhite ulaon ni TondiNa Tondi Porbadia di ngolu nang ulaon ni angka sisean nang pangulaNa na pinargogoionNa i, nunga magodang pangantusion di tongatonga ni Hakristenon taringot tu hanaposoon ni Debata: Nuaeng, ndang be holan ulaon ni angka naposo ni Debata di tongatonga ni parsaoran huriaNa na mansai arga di joloNa, alai dohot do tong ulaon hanaposoon ni Debata di duru ni parsaoran huriaNa i arga di Ibana. Dos do arga ni duansa di jolo ni Debata. I do pangajarion na naung dipaojak teolog reformasi, i ma Martin Luther, dohot na naung dipahembang angka halak Kristen na mangihuthon pangajarionna mamungka sian abad pa-16-hon sahat tu nuaeng on. Asa ndang be manghilala angka pangula ni huria na tumimbo hanaposoon ni Debata di ibana sian hanaposoon ni angka ruas ni huria ni Kristus di marragam ulaon hinobasan nasida di portibion manghobasi hajolmaon nang portibion di angka na ringkot di ngolu ni jolma siganup ari, manang dia pe rumang ni ulaonna i. Laos songon i do sabalikna.  

Tutu, sanga do leleng situtu martahan pangantusion na tumimbo arga ni ulaon ni angka pangula ni huria di tongatonga ni huria dohot sian tongatonga ni huria tu portibion sian ulaon ni ruas ni huria i, i ma di tongatonga ni portibion. Pola sian dekade paopathon abad parjolo sahat tu dekade paduahon abad pa-16-hon songon i pangantusion. Boi antusan jala lumrah do i, ala sian bonana tung diida huria ni Kristus na adong di portibion do na mansai ringkot ulaon mamaritahon barita nauli taringot tu Jesus Kristus tu sagodanggodangna penduduk ni portibion, asa godang na malua, godang na gabe parjambar nang dapotan hangoluan ro di saleleng ni lelengna i marhite haporseaon di Jesus Kristus, asa malua sian hamatean na manongtong, asa sahat tu ngolu hatongtongon. I do na gabe pusat perhatian.  

Ianggo ulaon panindangion ni angka ruas ni huria na mangolu dohot na mangula di parngoluan nasida siganup ari -asa tutu situtu dipatuduhon nasida hasiraon dohot hasinondangon ni ngolu nasida, unang sarombang dohot portibion baliksa gabe manguba ngolu ni hajolmaon disi, -atik pe tong do ringkot jala mansai ringkot, ndang apala diida dos argana di jolo ni Debata dohot arga ni ulaon na mamaritahon barita nauli ni Jesus Kristus i secara verbal i.  Songon i sanga pangantusion i atik pe, nang sian mula ni ulaon ni Jesus Kristus dohot angka siihuthon ibana di tongatonga ni huria, dohot do diula ulaon asi ni roha hataridaan ni holong, panghobasion diakonia, nang ulaon patoguhon parsaoran sama halak Kristen nang dohot angka na di duru ni huria, songon i nang ulaon marmahani angka ruas ni huria maralohon angka tondi na hodar dohot angka pangajarion na lipe nab oi mambahen lilu, roras, martihas ngolu ni ruas ni huria ni Kristus i. 

Ala ni i, di na dipanghulingi hata ni Debata na di 2 Timoteus 1: 6-12 i hita nuaeng di dekade pa-2-hon abad pa-21-hon on, di na tarimangrimangi dia tonani Debata na boi tangihononta sian tona na pinasahat ni panurat ni 2 Timoteus on tu sahalak na margoar Timoteus, i ma dongan saulaon ni apostel Paulus sian sundut na umposo, ingkon boi do eahanta panghorhonna di hita ndang holan tu angka naposo ni Debata na mangula di tongatonga ni huria dohot sian tongatonga ni huria di portibion, i ma angka parhalado ni huria partohonan dohot na so partohonan, alai ingkon sahat do tu angka naposo ni Debata na mangula di tongatonga ni portibion ala disi do ibana mangolu, mangula dohot manindangi.

Molo tapamanat sude tona ni Debata na tarsurat di surat tu si Timoteus na parjolo dohot na paduahon, ia impola ni isi ni surat na dua i i ma pasahat tona tu sada sian uluan punguan Hakristenon generasi paduahon na adong di angka huria na adong di Epesus, sada kota na balga di Asia na metmet, sada pusat hakristenon uju i, na di pudian ni ari gabe tarbarita songon huria na manghaholongi ajaran ni Jesus Kristus taringot tu hinaringkot ni angka na porsea i masihaholongan. Marsangajo do apostel Paulus manadingkon ibana di kota i laho mangulahon I (1 Tim 1: 3). Uluan generasi paduahon i, i ma si Timoteus, naung mangula sahat tu tingki panuratan ni duansa surat i songon donganna saulaon  mamungka taon 49/50. Songon i ma ringkot ni ulaon ni Timoteus di ulaon ni apostel  Paulus I mamaritaon barita taringot tu Jesus, mangajari huria I, marmahani nasida dohot manguluhon nasida,  pola 26 hali tarsurat goarna di Padan Naimbaru.  Angka surat 1-3 Johannes nang Pangungkapon Johannes na disurat tu huria Epesus mangondolhon holong.  Ndang tarsirang i sian perkembangan ni ngolu ni huria disi gabe tu na mangondolhon holong sian ulaon ni si Timoteus pasauthon tona jinalon di 1 dohot 2 Timetus. Turgas ni Timoteus laho manorushon ulaon i dipasahat tu ibana ala ndang apala boi be apostel Paulus mangulahon ulaon i. Didok nunga di bagasan na tarrante ibana ala ni Kristus (2 Tim 1: 8). 

Tona na dipasahat tu ibana mansai bidang do, ndang holan manorushon ulaon mamaritahon barita na uli tarlumobi di partingkian hararat ni poda na so lipe (2 Tim 4: 2-5),  alai dohot do ulaon mangalehon poda tu angka ruas ni huria sian horong na marragam (baoa, boruboru, dakdanak, na diuluhon dohot na manguluhon) asa hot di haluaon i, asa unang martihas, unang dipatalu angka poda na lipe (1 Tim 4: 1-6). Bidang hinangkam ni tona i, isara  taringo tu parsaripeon dohot manganhon sipangaon  (1 Tim 4: 4-6). Sangkapna i ma asa boi nasida mangolu songon halak Kristen na daulat di ngolu nasida siganup ari marojahan tu ruhutruhut ngolu Hakristenon (1 Tim 5: 1-6), isara hinaringkot ni manangiangkon tangiang pangondianon tu sude halak (1 Tim 2: 1+4). Asa tarbahen ni Timoteus i, ingkon gabe tiruan ibana  di hata, parange, holong, haporseaon, hatomanon, dame, lambok maminsang (1 Tim 4: 12, 2 Tim 2: 15, 22; 2 Tim 2:22-26 ), ingkon marhadaulaton ibana, ingkon ias (1 Tim 5: 22, 4: 7-8).  Ingkon dohot ibana mangajari dia do Hakristenon i (1 Tim 4: 13, 2 Tim 4: 2). Tona i ingkon pasahatonna ndang holan tu uluan lokal, angka sintua (1 Tim 3: 1-7, 5: 7-21), nang parhobas (1 Tim 3: 8-10, 12-13).  Sahat do tona i taringot tu beha marnida  arta (1 Tim 6: 6-10).  Asa boi dohonon, tona na tu ibana i mansai bidang jala dokdok: Marhite hadirion na daulat, denggan mangulahon ulaon mamaritahon barita nauli, mangajari, mamodai nang manguluhon.

Siala ulaon na mansai dokdok jala bidang hinangkamna do tona ulaon jinalona songon uluan generasi paduahon ni hakristenon di tongatonga ni huria na di Epesus i do umbahen na ditonahon tu ibana tolu na mansai ringkot asa tarbahen ibana mangulahonsa:

Naparjolo, ayat 6, asa mangarataratai silehonlehon naung jinalona sian Debata marhite pangampehonon tangan pinatupa ni apostel Paulus tu ibana (2 Tim 1: 6-7, 1 Tim 1: 18, 4: 14).  Hata mangarataratai hira marlapatan holan paingotingot. Alai dohot do di hata mangaratai (Gorik: anazopureo, sian hata zao dohot puroomai, Inggris: to stir into flame, Indonesia: menyemangati) marlapatan usaho pahirashon asa boi na hinirashonna i mangalehon gogo, energi na imbaru tu ulaonna i. Siparataraton i  ma charisma, silehonlehon na sian Debata tu Timoteus.
Mansai ringkot do angka naposo ni Debata di tongatonga nang di duru ni huria ni Kristus mangarataratai muse silehonlehon ni Debata tu ibana, na mambahen ibana marnida tohonan do ulaon ninulana i di ngolu siganup ari. Ala tohonan do i, panjouon do i tu ibana, tohonan panjouon na badia, manang dia pe ulaonna i.  Marragam do charisma naung pinalumehon ni  Debata tu hita. Laho mangadopi hinadokdok ni ulaon na tatuhuk di tongatonga ni huria nang di duru ni huria i, mansai ringkot tapararatai silehonlehonNa na tu hita ganup.

Paduahon, ayat 7, asa boi tarbahensa patupa ulaon parataratahon i, mansai ringkot tong na tolu on naung pinalumehon ni Debata tu hita, i ma tondi hagogoon (Gorik: pneuma dunamis), tondi holong (pneuma agapen) dohot tondi pangarajaion diri (Gorik: pneuma suphronismos).  Mansai ringkot do tolunsa on taparataratai. Suraon do nunga mintop tondi na marhagogoon di ngolu Hakristenonta, gabe parbiar hita manindangi, patudu holong dohot pahiras parsaoran ni jolma, gabe nunga so hiras be hita mangula di joujounta na marragam i?  Suraon do nunga sumurut tondi holong di hita nuaeng on? Suraon do nunga sumurut tondi pangarajaion diri di hita, gabe sai madabu hita tu bagasan ragam ni pangunjunan? Gabe dohot hita masuk tu hurungan? Gabe diuhum Debata ngolunta nang pinomparta, nang luatta, propinsinta, bangsonta?

Patoluhon, ndang jadi hita maila manghatindangkon Tuhanta i di bagasan tarlumobi di duru ni huria i, di tongatonga ni Kristus, manang dia pe rumang ni panindangionta i, songon apostel Paulus na so maila manghatindangkon ibana pola manaon (ayat 8-12, Patudos Mat 10: 32-33). 
(i)Beha do hita mamaritahon barita taringot tu Jesus Kristus saleleng on, dung 157 taon umur ni HKBP, dung tardidi hita tu bagasan goarnNa, dung manghatindangkon haporseaon hita, dung marhasohotan, dung mulaulaon, uju poso nang dung tumua ngolunta? 

(ii)Beha do hita mamaritahon holongNa i marhite ulaonta na denggan tu donganta jolma, patauhon donganta jolma mangolu denggan, paradehon na ringkot di ngolu ni jolma, manghobasi nasida marhite angka silehonlehon na godang pinalumehonna tu hita?

(iii)Beha do hita marparsaoran na denggan dohot donganta jolma marhite ngolu na mardame, ngolu na patupahon dame na tigor rap dohot donganta jolma di tongatonga ni bangsonta na majemuk, alai tongon dipabolatbolat?
Songon naung tapaandar di bona ni jamita on: Dos no arga ni hanaposoonta halak Kristen na marhobas di tongatonga ni huria dohot di portibion. Alai di tingki on, disosoi hatani Debata hita marhite tona na jinalo ni sada uluan hakristenon di generasi paduahon, i ma Timoteus najolo, tarataratai  silehonlehon, charisma ni Debata tu hita, panjouon ni Debata tu hita, tohonanta na na rap mararga di jolo ni Tuhan i, jala tapatuiduhon i marhite tondi hagogoon, holong dohot pangarajaion diri, unang baliksa gabe maila hita manghatindangkon Jesus Kristus na naung palumehon haluaon nang panjouon i tu hita. 
Beha do dalan parataratehon silehonlehon ni Debata tu hita? Marragam do dalan nab oi tapingkiri. Na mangihut on tatimbangi: 

Parjolo, ringgas marsaor dohot Debata marhite hataNa dohot tangiang na maraturan.
Paduahon, ringgas masisunggulan dohot masipaingotan nang masipatoguandohot masiurupan  sama na porsea manghamauliatehon, mangarataratai, paimbaruhon silehonlehon nang panjouon na marragam i tu hita.
Patoluhon, ringgas manambai parbinotoan dohot hatauonta (skill) mangulahon tohonanta i marhite angka pendidikan dohot pelatihan-pelatihan, ala ganup ari lam timbo do parbinotoan dohot hatauon ni jolma mangatur ngolungolunta di portibion. Di partingkian digital dohot di partingkian kecerdaasan artificial dohot hinahinsa ni angka robot, mansai porlu hita torus pahinsathon parbinotoanta asa tarbahen hita tangkas manindangi di Kristus dohot angka dalan na denggan, angka dalan na so tarbahen ni na tahobasi manulak panghobasionta. 

Dipasupasu Debata ma angka dalan na tapangke laho mangurupi hita pahinsathon pangulahononta di silehonlehon, charisma, dohot panjouonta na marragam i di ngolunta siganup ari. Na boi do sumurut panindangion ni angka siihuthon Jesus di portibinta nuaeng. Alai na boi do i tong maherbang. Saguru di haradeonta parataratahon silehonlehon ni Debata na tu hita halak Kristen i do i. Lam bahat hita na mangarataraisa, lam denggan. Lam otik na rade parataratahonsa, lam buruk. Ingananta pararatahonta boi di jPabu, boi di parsaoranta dohot angka donganta jolma, alai laos boi do di angka ulaonta siganup ari, manang dia pe i, ai disi do hita dijou Debata. Molo holan di huria do hita patupahon i, ba holan dua jom saminggu tamba ni partangiangan dua jom ganup minggu. Alai molo di ulaonta siganup ari do hita patupahon pangaratarataionta i, ba mansai bahat do tingki na rade dilehon Debata tu hita. 
Amen.(*)
  BeritaTerkait
  • Jamita Evangelium, 18 Nopember 2018, Minggu XXV Dung Trinitatis: Taluhon ma Hajahaton Marhite Ulaon na Denggan (Roma 12: 9-21)

    4 hari lalu

    Oleh: Pdt Dr Robinson ButarbutarSada sian pinompar ni Zaman Pencerahan (Inggris: Renaisance; German: Aufklaerung) na umpudi tubu di pangujung ni abad pa-20-hon alai margurasa tong sahat tu nuaeng on,

  • Jamita Evangelium 11 Nopember 2018, Minggu XXXIV Dung Trinitatis : Mika 6: 6-8 Ulahon ma Uhum dohot Holong ni Roha di Habasaon

    satu minggu lalu

    Oleh: Pdt Dr. Robinson Butarbutar, Parsameanta, STT-HKBPDung dipanghulingi Debata Jahowa hita marhite hatana di minggu na salpu, uju i dipangido tu hita asa mangarataratai silehonlehonNa mardonganhon

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    tahun lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  • Jamita Evangelium, 26 Nopember 2017 Minggu Parningotan ni Angka Namonding, Turpuk: Mateus 25: 31-46 "Hangoluhon ma ngolu na manontong i."

    12 bulan lalu

    Oleh: Pdt Dr Robinson Butarbutar, STT HKBPSian mamungka mangula Jesus di Palestina sahat tu na tubu jala maherbang huriaNa di abad parjolo, sahat tu tingki on, nunga tung bagas diboto, dihaporseai, di

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb