• Home
  • Agama
  • Jamita Evangelium, 30 Juni 2019, Minggu II Dung Trinitatis "Martua Halak Na Pinintoran ni Debata" Psalmen 32: 1-11
KSP Makmur Mandiri
Sabtu, 29 Juni 2019 22:49:00

Jamita Evangelium, 30 Juni 2019, Minggu II Dung Trinitatis "Martua Halak Na Pinintoran ni Debata" Psalmen 32: 1-11

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar
Sian Parsameanta, STT-HKBP Pematangsiantar, 0812-62472015

Udut ni hatani Debata di minggu na salpu na manosoi hita asa manghangoluhon ngolu na badia asa saut hita masuk tu haluaon na manongtong di huta naimbaru, sadarion diuduti do mangajari hita mananda lomo ni roha ni Debata sitolu sada i marhite Psalmen 32: 1-11, na targoar Psalmen Poda. Dua do impola ni Psalmen Poda on:

Naparjolo, manosoi hita na mura madabu tu bagasan dosa i asa olo pabotohon dohot manopoti dosata tu Debata, asa disesa Debata dosana, ai martua do jolma na sinesa ni Debata dosana, baliksa mangadopi hasusaan jala marniahap do ngolu ni na manghasiphon dosana. Digoari do parniahapan i songon on: reung holiholina, didondoni tangan ni Debata, jala marsik mudarna songon di hamamasa logo ni ari (ayat 1-5).

Napaduahon, manosoi asa togu jala marsihohot  angka na lidang marroha, na marhaposan tu Debata,  partigor, dohot angka na marsihohot marroha dohot angka na manghalungunhon Jahowa, ai jagaon jala ondihonon ni Debata do ngoluna sian angka mara, haliangkononNa asi ni roha nang olopolop marlas ni roha, marolopolop dohot marende do nasida siala ni i (6-11). 

I ma hatigoran ni Debata: Ndang holan mambahen martua ngolu ni pardosa na manopoti dosana, alai  patupahon tu ngolu ni angka na daulat marroha ngolu na dao sian mara, digohi las ni roha, olopolop nang ende. I do pangajarion na sai hinaposan jala dihangoluhon parPsalmen.

Ala ni i do umbahen na namangihut on do diajarhon Hakristenon sian najolo sahat tu nuaeng: Atik pe diparade Debata do hasesaan ni dosa tu angka pardosa marhite panaonon ni Jesus Kristus di hau pinorsilang i, ingkon ongkuon ni pardosa i do dosana asa tangkas saut hasesaan ni dosa i tu ibana. Ingkon haporseaonna do na ulaon ni Jesus Kristus di hau pinorsilang i do na manesa dosana.  Atik pe songon i, dua na mangihuton do dihaporseai , diajarhon jala dipatupa Hakristenon:

Di angka dosa ni pardosa na manusai ngolu ni donganna jolma, na mambahen marsingkor, marlea sahat tu na  agoan hosa donganna jolma nang angka na tinompa ni Debata na asing  panghorhon ni dosana i, ndang sae holan mangoku dosa tu Debata di sihabunion ia panopotion dosa i. Alai ingkon dohot do panopotion ni dosana i dipatupa tu donganna na sinusaanna i. Ai torus do mangalualu tu jolo Debata angka na marsingkor siala ni ulaon ni pardosa i, donganta jolma nang donganta na tinompa na asing, ai tinggil do sipareon ni Debata jala tigor do pambahenanNa tu angka na joujou tu Ibana mangido hatigoranNa.

Ndang dung dipasombu Debata joujou boti so maralus angka joujou, angguk-angguk nang tangis ni angka na manaon ulaon na so tigor. I do umbahen na dipalua Debata Israel sian parhatobanon, jala diuhum Ibana na mamparhatobanhon nasida.  Domu tusi do umbahen na disosoi Hakristenon asa olo pardosa i mangido tu donganna jolma na manaon ala ni dosana i asa disesa dosana, i pe asa boi masa pardengganan di nasida di ngolu siganup ari. Ia so i, aluhonon ni korban ni pardosa i do pardosa i ndang holan tu Debata Jahowa di banua ginjang, alai dohot do tu panguhum di banua tonga on, di portibion. 

Na tangkas,  tangkas do diajarhon di Hakristenon na atik pe disesa Debata do dosanta, alai mate do tong jolma i panghorhon ni dosa i. Ala ni i do torus do angka paruhum (i ma polisi, jaksa dohot hakim) mangalului pardosa i nang dung mate asa dipamasa tu nasida uhum. I do umbahen na boi dipatupa uhum nang leleng dung mate angka korban ni pardosa i. Jala i do umbahen na boi do dipaso proses hukum di paruhuman molo masa na masitopotan dosa jala mardame pardosa tu korbanna di duru ni paruhuman. Molo ndang, ba torushonon do proses paruhuman i. I do umbahen na nang dung mate, dipamasa do paruhuman tu sada jolma nang dung mate (Posthomous didok). 

Saleleng ndang dipatupa dope hatigoran tu angka dosa ni pardosa i, ndang tagamon ni ngolu ni sada bangso ngolu na mardohar. Siala ni i do umbahen na, molo masa pelanggaran HAK Azasi Manusia na borat, sai disosoi do nuaeng on asa adong panopotion ni dosa sian angka pardosa i. I pe asa boi masa rekonsiliasi. Sipata adong do ingkon patupaon kompensasi tu korban ni hajahaton. Alai ingkon dipatupa do i asa masa pardengganan. 

Boi do kompensasi i metmet, boi balga, saguru tu rumang dohot borat ni dosa manang hajahaton i. Boi do tong negara sandiri na manggarar na ringkot tu kompensasi i. Alai boi do ndang pola, saguru tu dokdok ni panghorhon ni dosa i do. Dung masa rekonsiliasi, masa ma hadameon. Dung adong pe hadameon asa ro ngolu na digohi pasupasu. 

I do na masa di Afrika Selatan, isarana. Dung pe diongku angka pendukung ni sistim Apartheid angka hajahaton binahen nasida tu angka na berkulit hitam, asa masa rekonsiliasi jala ngolu na denggan di Afrika Selatan. Di tongatonga ni bangsonta, sai torus dope joujou angka korban ni hamamasa G30S PKI, asa dipatupa na songon i. Ala ndang taida dope i masa, sai marutang ma bangsonta. Ndang tarbahen hita dope mangalusi sungkunsungkun, dalan rekonsiliasi dia do sipatupaon ni bangsonta: Rekonsiliasi dung jolo proses uhum do, manang rekonsiliasi so ingkon jolo mamolus proses hukum, tuk ma holan rekonsiliasi politis dohot sosial. Tatangiangkon ma asa dipatuk Tuhanta bangsonta mangatasi na sasada on, ai gabe torus do i mambahen marutang angka generasi na naeng ro molo so tarpaujung hita masalah on.  

Ala ni i do boi taida nang di ngolu parhuriaonta songon on: Na boi do sai ganup minggu hita manopoti dosanta, jala dibagabagahon do hasesaan ni dosa. Alai siala ni dosanta na holan tu Debata tatopoti alai ndang tapaulak hepeng na tatangko, ndang tapatupa panopotion ni dosa tu donganta na mangae ala ni dosanta i, na boi do di sada tingki dao dung hamamasa ni pambahenanta na mambahen marsingkor donganta siala ni dosanta i tataon panghorhon ni dosanta i.  Ala ni i do tung tangkas do diajarhon Tuhanta Jesus hinaringkot ni haradeonta manesa dosa donga ni donganta maradophon hita, asa Debata pe rade manesa dosanta.

Molo tung dihaposi parPsalmen pe na martua do na dihungkupi Debata dosani na manopoti dosana, ndang boi dohononta na so dihasogohon Debata ngolu na di bagasan dosa. Baliksa, dihalomohon Debata do ngolu ni halak na marsihohot mangoloi Debata, padao dirina sian dosa, ai dipalumehon Debata do tu angka na togu marroha angka pasupasuNa. 

Ala ni do, lam tamba torop ni partigor di sada bangso manang negara, jala lam moru ngolu ni parjahat, lam hatop ma marhangoluan na mardohar bangso manang negara i. Laho mangurupi sada negara asa boi lam bahat rakyat na marhangoluan na tigor, na marsihohot mangulahon lomo ni roha ni Debata, diusahahon do di negara i asa dumenggan ngolu ni angka rakyat na tigor mulaulaon, jala diusahahon do asa jongjong jala dipatupa uhum tu angka na patupa hajahaton. 

Ndang holan dibahen angka uhum di sude pargulmiton ni ngolu. Alai dipatogu ma angka penegak hukum, asa diuhum nasida angka na mangulahon hajahaton. Sada bangso na gale penegakan hukumna i ma bangso na so boi marnida partamba ni torop ni rakyat na unduk tu uhum, garida gabe lam tamba ma torop ni rakyat na lomo roha mangulahon hajahaton. I do umbahen na dung partingkian reformasi di Indonesia, tarlumobi di era Jokowi (nuaeng rap dohot Wakil Presiden Mar'uf Amin mamung Oktober 2019 na naeng ro, sai lam dipatogu do ulaon penegakan hukum tu angka koruptor, nang tu angka na patupa hajahaton manggadis obat-obat terlarang (Narkoba) na mamunu marribu halak di bagasan tingki na jempek, na manegai lingkungan hidup, jala sai dipatujolo do mangalului angka pejabat na tigor mulaulaon, jala sai dipromosihon do ngolu nang pambahenan dohot jabatannasida. Ndang songon di tingki Orde Baru rupani, na tigor mangae jala tumatangis, alai na so tigor marsonangsonang jala marolopolop.

Ala ni i, di hita ruas ni Huria Kristen Batak Protestan di portibion, dipangido jamita sadarion do tu hita asa patupa panopotion ni dosa ndang holan tu jolo ni Debata di sihabunion, alai ingkon patupaonta do panopotion ni dosa tu angka na manaon siala ni dosanta i.  Alai dijouhon do nang tu hita asa di na membangun bangsonta bangso Indonesia, ingkon lam tahasiholi ma mandalanhon ngolunta dohot parsihohotan di parange na denggan, parange na so mangalo uhum, ai holan marhite sian i do boi maju sada bangso, sian bangso na pogos gabe bangso na mardohar, sian negara na berkembang, dung berkembang gabe negara maju. Di tongatonga ni sangkap ni bangsonta di periode paduahon ni pamarenta niuluhon ni Presiden Jokowi mansai ringkot do di bangsonta angka rakyat nang pemimpin na manghagigihon dosa jala na manghalomohon, na marsihohot, jala na rade tongtong mangulahon lomo ni rohaNa, nang di tingki na maol, ai disi do idaona haradeon ni Debata mangondihon nasida maralohon angka na jahat, jala manghaliangkon tu ibana asi ni roha, gabe marngolu na gok las ni roha, ende nang olopolop ngoluna. 

Ulaon ni huria ni Kristus do parsidohot manompa angka anak-anak bangsa Indonesia na manghangoluhon ngolu na marhadaulaton, ai i do dalan na dumenggan membangun bangsonta, atik pe ingkon sai soarahononta do joujou asa olo ruas ni bangsonta mangido hasesaan ni dosana tu Debata nang tu donganna jolma.
Amen.(*)
  BeritaTerkait
  • Jamita Evangelium 23 Juni 2019, I Dung Trinitatis: Ngolu na marhabadiaon di jolo ni Debata (Pang 22: 12-17)

    4 minggu lalu

    Oleh: Pdt Dr. Robinson Butarbutar Parsameanta, STT-HKBP (0812-62472015)Hamu angka dongan,Di Minggu Parjolo Dung Trinitatis sadarion, di na tapabagas panandaionta di Hadirion, Ulaon nang Lomo ni Roha n

  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    tahun lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  • Jamita Minggu Evangelium 16 Juni 2019, TRINITATIS, HASITOLUSADAON NI DEBATA: Haporseaon na Manghorhon Paluahon (1 Musa 22:1-19)

    satu bulan lalu

    Oleh: Pdt Dr Robinson Butarbutar, Ketua Rapat Pandita HKBPHamu angka Dongan sahaporseaon,Di Minggu tanggal 26 Juni 2019 na salpu, di Minggu Rogate, sude do hita ruas ni Huria Kristen Batak Protestan m

  • Jamita Evangelium, Minggu XV Dung Trinitatis 24 September 2017: Psalmen 145: 1-8 "Tung So Tardodo do Hatimbulon ni Jahowa"

    2 tahun lalu

    Oleh: Pdt Dr. Robinson Butarbutar, STT HKBPMolo tatatap sian satelit sipitu koma onom milliar jolma na margulmit di portibion, sian angka huta na metmet situtu sahat tu angka kota na balga situtu, di

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    2 tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb