• Home
  • Agama
  • Jamita Evangelium, 28 Oktober 2018 (90 tahun Sumpah Pemuda) Minggu XXII Dung Trinitatis "Huria Mangulahon Ulaon Parasinirohaon" (Jesaya 58: 4-12)
KSP Makmur Mandiri
Jumat, 26 Oktober 2018 15:50:00

Jamita Evangelium, 28 Oktober 2018 (90 tahun Sumpah Pemuda) Minggu XXII Dung Trinitatis "Huria Mangulahon Ulaon Parasinirohaon" (Jesaya 58: 4-12)

BAGIKAN:
Ist
Pdt Dr Robinson Butarbutar
Sian Parsameanta: Pdt Dr Robinson Butarbutar

Ulaon parasinirohaon solhot do i tu hajolmaon. Molo taida angka donganta jolma mian manang mangolu di bagasan sada kondisi ni ngolu na tung maol situtu, madekdek do ateatenta, ro ilunta, jala migor tubu do di rohanta laho patupahon pangurupion tu nasida. Molo di bagasan sada kondisi ni ngolu na mambahen hita tuk mangurupi nasida do ngolunta, tapatupa do pangurupion tu nasida intap ni na tarbahen hita. Molo ndang tolapta mangurupi, pinomat intap ni tangiang tapatupa. Isarana, molo adong dakdanak na matean Ama manang Ina, hape metmet dope nasida, migor ro be do ilunta mamingkiri dakdanak na metmet i. Olo do hita migor mangalehon tumpak habot ni roha tu nasida sian sangkunta secara spontan. Laos molo tuk do gogonta, laos olo do hita migor manangkapi di rohanta laho mangurupi dakdanak i secara pribadi manang rap dohot angka donganta na asing, asa boi mangan, minum, dohot pasingkolahon pe tahe.  Manang, molo so boi hita mangurupi nasida, taalo do angka pamingkirion na tubu di rohanta laho mambahen ummaol kondisi ni ngolu nasida. Molo so boi urupon dongan jolma, ba pinomat unang ma sinusaan ngolu nasida. 
Atik pe songon i, taboto do tong, sai adong do donganta jolma di portibion sian tingki tu tingki jala di sada inganan manang di inganan na asing na ndang apala ulaon parasinirohaon na diula. Sai adong do jolma na ulaonna mambahen hasusaan tu donganna jolma. I do jolma i. Adong do di bagasan dirina hagogoon na denggan. Alai laos adong do hagogon na so denggan. Adong do jolma i na manangkapi na denggan alai mangulahon na maralo tu na sinangkapan ni rohana i. Alai songon na ginurithon ni apostel Paulus di Roma 7: 14-24, masa i ala dibagasan huaso ni uhum dosa do jolma i di dirina.  
 
Sada halak na marparasinirohaon ringgas do i mangurupi na ingkon siasian. Sada masyarakat na marparasinirohaon, ndang loason ni i adong ruas ni masyarakat i manang ruas masyarakat na asing pe tahe ndang manjalo pangurupion sian nasida uju mangharingkothon pangurupion. Sada negara na marparasinirohaon, sai usahahonon ni negara i do asa sai rade angka pangurupion tu angka na siasian. Ndang apala bahat negara na naung patupahon i. Angka negara na mamangke sistim sosial na denggan, isara di negara-negara Eropah Barat (Jerman, Inggris, Negara-negara skandinavia dna), sai diurupi do ganup rakyat na pogos manang na so apala timbo pandapotanna asa boi mangan uju male, marparbornginan uju so marjabu sandiri, marubat uju marsahit, marsikkola dohot asa adong jaminan sosial di hatutuana. Laho manutupi biaya tusi, dipapungu negara ma sian natorop na denggan pandapotanna dohot bahat artana. Laos songon i do angka huria ni Kristus ni portibion di parpunguan nasida. Molo tung pe ndang tarbahen hita dope apala songon na binahen ni negara-negara na di Eropah Barat ginuaran di ginjang i na boi patupaon nasida, sai dipatupa angka huria do angka ulaon parasinirohaon tu ruasna na mangharingkothon pangurupion.  Molo tar losok roha ni sada huria patupahon ulaon parasinirohaon, atik pe denggan do pandapotan ni manang piga ruas ni huria i, sibonsirina i ma ala ndang marruashon ruas ni huria na  ringgas marparasinirohaon angka ruas ni huria i. Nunga dipungka pamarentanta nuaeng na songon i di Indonesia on marhite program Kartu Sehat, Kartu Pintar, Kartu Sejahtera, dohot BPJS, asa boi ganup rakyatta ndang marimbar na pogos jala na otik pandapotanna mangan, marsikkola, patauhon dirina denggan mulaulaon, dohot marubat uju marsahit.
Laho mamangkulingi hita asa lam manghangoluhon ngolu na marparasinirohaon do hata ni Debata na tarsurat di buku panurirang Jesaya 58: 4-12 i.  Apala tu sada bangso na imbaru mulak sian Babel do dipasahat turpuk on, tu sada bangso na sasintongna mangadopi parngoluan na maol, ai huta Jerusalem jinumpangan nasida pe nunga leleng malengse. Ndang adong be manang aha disi, asing ni angka puing-puing. Tongon naeng mambangun ngolu nasida sian dasor do nasida. Apala tu sada bangso na naeng mambangun sian dasor do hata ni Debata on. Beha do nasida laho mambangun ngolu nasida muse, asa boi mulak denggan, dumenggan sian andorang so tarbuang nasida? I ma sungkunsungkun nasida. 

Tu bangso na songon i diajarhon Jahowa na mamboan nasida mulak sian habuangan i do asa ndang be mangulahon hasalaan ni angka ompu nasida na tarbuang na pitupulu andorang so mulak nasida sian Babel. Dia ma na niula ni angka ompu nasida? On do: Manomba Debata di bagas joro dohot mangulahon ruhut-ruhut parugamoon na dihilala boi mambahen daulat nasida di jolo ni Debata, alai di ngolu nasida siganup ari sai dipatupa nasida angka ulaon hajahaton dohot angka ulaon na so tigor tu dongan nasida jolma. Sai dipapujipuji Debata jala pola patupa parpuasaon na ekstrim nasida, alai dipatupa nasida ulaon hajahaton tu dongan nasida jolma di ngolu nasida siganup ari, di angka usaha-usaha ni ngolu nasida. Angka na mora di tongatonga nasida adong do, alai ndang diurupi nasida angka napogos, na so marsipanganon ganup ari, na so marpahean, dohot na so marjabu. Gariada dipambuati nasida tano ni napogos songon i nang jabu nasida. Dipatupa nasida angka ulaon na mambahen gabe tartaban dongan nasida jolma.  Siala ni i ma gabe ro rimas ni Debata maradophon nasida. Diuhum ma nasida. Tarbuang ma. Taruhum. Lonong. Mintop sinondang nasida songon bangso ni Debata. I do jambar ni bangso na marhadaulaton na so tigor.

Nuaeng, dipangido tu nasida asa, molo naeng denggan do ngolu nasida di Judea dung mulak sian habuangan Babel, ndang jadi be ulakhononnasida niula ni angka ompunasida hian. Ai uju dipatupa nasida i gabe so adong do gunana, ndang dialusi Debata (58: 1-3). Jala apala uju naeng mambangun ngolu nasida nuaeng dung mulak sian habuangan Babel dohot arta na binoan nasida sian habuangan i,  dipangido ma nasida memustkan perhatian ndang mangulahon parpuasaon na semu, alai patupa ulaon parasinirohaon, tarlumobi maradophon angka jolma na dijumpangi nasida di Judea na digohi angka na pogos siala ndang adong pembangunan disi saleleng 70 taon di habuangan bangso i. Unang gabe sala mandasor sega luhutan.  Unang sanga dao didalani, maol muse mulak mamonai. Ala ni i do umbahen di Jesaya 58: 4-12 i mansai tangkas:

Dipangido Debata tu nasida asa unang be patupa parpuasaon songon na pinatupa ni angka ompu nasida i, i ma parpuasaon na palsu (Marpuasa na ekstrim, pola patungki ulu dung i mambahen arung tu uluna, marpahean di hori dohot sirabun), hape di ngolu siganup ari dipatupa nasida parbadaan, parsalisian dohot ulaon mangasahon bostong maradophon dongan jolma (ayat 3, 4-5). Dipatupa nasida ulaon kekerasan tu angka na metmet, na mangula tu nasida apala uju marpuasa i nasida. 
Nang di tingkinta nuaeng boi do adong di tongatonga ni halak Kristen na songon on: Hira na daulat situtu ibana, martangiang so mansohot, marminggu so mansohot, pola marpuaso, pola martangiang dua pulu opat jom, semalaman, hape di ngoluna siganup ari marbadai ibana dohot donganna jolma, mangasahon gostong ibana uju marsalisi dohot donganna jolma. Dipatupa nasida kekerasan di ngolu on. Nasida na songon on didok Debata: Ndang sahat tu banua ginjang tangiang nasida. 
Di bagasan sejarah ni hajolmaon, ndang dao pardalanan ni ngolu sasahalak nang angka pinomparna molo songon i diula nasida. Ndang leleng.

Dipangido Debata tu nasida asa mangulahon parpuasoon na sintong, i ma panjangkonon jala patupahon ulaon parasinirohaon na singkop mangihut on apala tu angka na tartulak, na terpinggirkan, na hurangan, i ma angka na tartaban, na marauga na dokdok, na malean, nang baliksa padaohon nasida sian parsaoran, sian kebebasan, sian hadumaon, sian hadoharon (ayat 7, 9, 10):

Parjolo, paluahon dongan jolma sian penjajahan, sian sandok rumang ni penjajahan dohot penindasan, na klassik dohot na imbaru. Pola opat hata na hira masitumpahan lapatanna laho mangondolhon I dipangke panurirang i: 
Harhari (Heber: pateha) angka ihotihot hajahataon
Palua (Heber: hater) angka tali ni auga
Palua (Heber: shalekh halak na ni rupa
Ropuhi (Heber: hapesyim) nasa auga.

Sadarion tgl 28 Oktober  2018 di tongatonga ni bangsonta, taingot, tarimangrimangi dohot tahamauliatehon  do na pinatupa ni angka ompunta, pemuda di taon 1928, uju patupa sumpah pemuda nasida, 90 taon na salpu mangalo penjajahan na niae ni bangso Indonesia tolu ratus tolu pulu taon, asa gabe bangso na merdeka. Ndang olo angka pemuda ni bangsonta diihoti penjajahan ni Bolanda. Marsada ma nasida satu nusa, satu bangsa, satu bahasa laho mangalo penjajahan. Sian i lam hehe ma gerakan kemerdekaan di tongatonga ni sandok Indonesia. Ido na naung tadapot marhite proklamasi kemerdekaan ni bangsonta i, jala kemerdekaannta i do na mangonjar hita asa manulak nasa penjajahan dohot memperjuangkan kemerdekaan di sandok portibion.
Mansai ringkot do hita songon huria mangarimangrimangi tona ni Debata tu hita marhite panurirang Jesaya i: Asa taalo ganup rumang ni penjajahan di portibion. I do umbahen na nang apostel Paulus manurat tu halak Kristen di kota Korintus na mangolu di bagasan parhatobanan asa molo jumpang nasida kesempatan laho merdeka ingkon buaton nasida do kesempatan i (1 Kor 7: 21b). Asa tapalua ganup donganta jolma nang na tinompa na asing sian angka panjajahan, dohot ma nang di partingkianta nuaeng, di na lam dipangke angka parhuaso dohot parhepeng di portibion nuaeng on angka robot di angka produksi-produksi, na di bagasan tingki na jonok mambuat ulaon sian jolma manusia.

Paduahon, manghobasi angka:
(-) na male (mangalehon sipanganon), 
(-) na dangol dohot panangkarnangkar (patupa parbornginan), dohot 
(-) na so marabit (mangalehon abit). 

Duansa na di ginjang i ma ulaon parasinirohaon na singkop: Pembebasan dohot Panghobasion angka dongan jolma na tartaban, na male, na pogos, na so marabit.
Dibapastihon Debata Jahowa na molo diula sada bangso do parpuasoon na sintong na songon i gabe bangso na denggan jala na togu jala tarbarita ma nasida (ayat 8-12), i ma:
Binsar hatiuron nasida songon buha siang ari (ayat 8, 9);
Hatop martumbur hahisaron nasida (ayat 8)
Mardalan di jolo nasida hatigorannasida (ayat 8)
Di dongani hamuliaon ni Jahowa pardalanan ni ngolu nasida (ayat 8)
Tangiang nasida aluson ni Debata (ayat 9)
Togutoguon ni Jahowa nasida gabe bangso na hipas jala togu, na jagar (ayat 11)
Tarbahen ni pinompar nasida pajongjong ngolu nasida na togu gabe tarbarita songon sada bangso na "Sipauli angka riga, sitotas anga dalan balobung asa hainganan". Laptanna: Gabe sada bangso na berinfrastruktur na mansai togu.

I ma tona ni Debata tu sada bangso na pajongjong sada ngolu parbangsoon na imbaru dung mulak sian habuangan Babel. Ia bangso na naeng balga, togu dohot mardohar ingkon sigop do patupahon ulaon parasinirohaon na singkop, i ma na membebaskan dohot na manarihon/manghobasi ngolu ni na male, na dangol, na pogos, na so marabit.

Ia ulaon panghobasion parasinirohaon ni Tuhanta Jesus uju mangula Ibana di Galilea dohot Judea nang di angka huta na asing ndang apala ulaon parasinirohaon na pejek alai baliksa ulaon parasinirohaon na singkop do na diula Jesus (Lukas 4: 18-19). I do umbahen na dibaritahon Ibana jala dipatudu Ibana di ulaonna barita haroro ni harajaon ni Debata: Kebebasan, hatigoran, pardamean dohot holong. Jala dipatudu ibana do i di ulaonna marhite na paluahon angka na tartaban, angka na digosagosa tondi na hodar, pamalum na marsahit, dohot mangajari asa pistar. Ulaon parasinirohaon na singkop do dipatupa Jesus uju di Galilea dohot di Judea nang di angka huta na asing.  I do na sai dipaihutihut angka huriaNa di sandok portibion sian bona sahat tu nuaeng.  Atik pe songon i, ingkon ongkuonta do na sai adong do angka huria ni Kristus di portibion na mangulahon ulaon parasinirohaon na so apala singkop, na so apala komprehensif. Holan mangulahon ulaon parasinirohaon na karikatif. Sai adong do huria na holan patupa ulaon parasinirohaon na pejek, na sangombas, i ma angka ulaon parasi ni rohaon na holan paluahon ngolu ni sasahalak manang sapunguan holan sangombas i, jotjot ndang apalala sahat tu na patauhon sasahalak, sasabagas, sasapunguan nang marsasahuta jongjong di patna sandiri, gabe tuk mangalului na ringkot di ngolu nasida so ingkon marsigantung be tu pangurupion na ro sian duru ni dirina. Ndang apala sahat dope tu ulaon na mangalo marragam rumang ni penjajahan di portibion nang di tongatonga ni huria i.   Penjajahan na imbaru nuaeng i ma perdagangan manusia (dakdanak nang boruboru) dohot angka rumang na asing.
Tar otik dope angka huriaNa di portibion na ringgas mangulahon ulaon parasinirohaon na umbidang dohot na sumingkop, na digoari ulaon parasinirohaon na liberatif, i ma parasinirohaon na membebaskan, na mangalo ganup rumang ni penjajahan dohot do angka sistim-sistim na mangihoti halak gabe so boi bebas mangula na denggan, bebas manoarahon dohot manurathon hatigoran. 
Ndang holan parasi nirohaon na liberatif tahe ia ulaon parasinirohaon na singkop, alai dohot do ulaon parasi nirohaon na transformatif, i ma ulaon parasinirohaon na tuk manguba ngolu ni jolma, sian na losok gabe na ringgas, sian na so skillful, gabe na skillful, sian na sai marsigantung tu pangurupion ni halak tu na mambahen boi jongjong di pat na sandiri sasahalak; sian hadirion na sai mangulahi aha nidok ni halak, gabe hadirion na kreatif jala na innovatif. Jala, ndang holan ulaon parasinirohaon na liberatif dohot na transformatif ia ulaon parasinirohaon na niula ni Jesus dohot angka huriaNa, alai dohot do ulaon parasinirohaon na reformatif, i ma ulaon parasinirohaon na paimbaruhon angka na masa di ngolu on na so apala denggan be, ndang ampit be tu hajolmaon di tingkion. 

Parpudi, laos dohot do ulaon parasi ni rohaon i parasainirohaon na advokatif, i ma ulaon parasinirohaon na mangondihon angka na gale sian panggosagosion ni sistim na so denggan. Isara manghatai dohot ruas DPRD asa sude pamarenta ndang diskriminatif tu jolma nang angka Dakdanak na mangolu dohot HIV/AIDS. Ulaon advokatif tu dakdanak asa boi nasida marsikkola songon donganna dakdanak na so mangolu dohot HIV dohot AIDS. Bahat dope angka donganta jolma na didiskriminasi di portibion. Ingkon dohot do halak Kristen mangulahon ulaon na palua nasida sian angka pangalaho na diskriminatif, na menstigma nasida.
Uli do tong ia ulaon parasinirohaon na sangombas i. Alai dao ummuli jala mampanghorhon dao dumenggan do ulaon parasi nirohaon na sumingkop i. Isara molo adong donganta jolma na so boi dapotan sipanganonna siganup ari, ia ulaon parasinirohaon sipatupaon tu ibana ndang singkop molo rumangna gabe mangalehon ibana mangan ganup ari, gabe sai marsigantung ibana tu na mangalehon sipanganonna i, alai ingkon sahat do tu na patauhon ibana asa tau mulaulaon, asa boi ibana paadonghon sipanganonna. Molo ndang adong hatauonna mangula di angka ulaon na so dung pinarsiajaranna di ngolu on, jala na boi masa do siala ni marragam sibonsiri isara hapogoson ndang tau sasahalak mangula denggan, ndang skillful, ba dipatau na patupa ulaon parasinirohaon na tu ibana angka na tuk mambahen ibana tau mulaulaon, isara marhite pelatihan. Molo tau ibana mulaulaon, alai ndang adong na mangalehon ulaon tu ibana, ba ingkon patauon ni na patupa ulaon parasinirohaon i ma tu ibana ulaon, asa sian i ibana mangan dohot pajongjong ngoluna. Alai na boi do adong hatauonna mulaulaon, skillful ibana, alai ndang adong ulaon na rade, ba boi do rumang ni ulaon parasinirohaon tu ibana marrumangkon pangurupiion di permodalan, asa boi ibana patupa ulaonna sandiri. ma nang ibana patupa ulaonna sandiri na tuk menghasilkan.
 
Songon i do tong ulaon parasinirohaon na paluahon donganta jolma sian parhatobanon, manang dia pe rumang ni parhatobanon i. Ulaon parasinirohaon paluahon sian parhatobanon na sangombas, i ma paluahon ibana, isarana sian parhatobanon utang, manang dia pe rumang ni utang i marhite na manggarar utangna. Alai molo intap ni i do, na boi do mulak mangutangi muse ibana. Ala ni i, ingkon sahat do ulaon parasinirohaon i tu na patauhon ibana denggan mangatur ngoluna unang paruar hepeng tu na so porlu, gabe paro dohot patimbo utang. Beha ibana asa tahu mamangke hepengna sadenggandengganna, i do na ginoaranna ulaon parasinirohaon na paluahon halak sian parhatobanon. Parpudi on, isarana, ndang holan angka rakyat napogos di angka negara di Afrika (isara di Namibia) diparade huria dohot negara na ginoaranna Basic Income Grant (Bantuan Pandapotan Mandasori), na so pola ingkon paulahon ni rakyat na manjalosa bantuan i, alai dohot do di negara Eropah, isara di Finlandia. Bantuan i dilehon tu rakyat asa boi rakyat i berusaha. Dua taon na ro on masa uji coba dipamasa di Finlandia.
Molo taida umbidang hasisintong ni hata ni Debata na pinasahatNa tu hita marhite panurirang Jesaya i, boi dohonon do na ganup halak, ganup punguan, ganup masyarakat, ganup kota, ganup negara na patupahon ulaon parasinirohaon na tagoari na di ginjang i do na marhangoluan na binsar, na mardohar. I do na taida di angka bangso na maju na patupahon ulaon parasinirohaon na denggan di tongatonga ni bangso i. I do na taida di bangso Jerman isarana. Maju ekonomina. Maju infrastrukturna. Maju pendidikanna. Maju hahipasonna. Maju di sude rumang ni ngolu. Lam marholit sada halak, sada bangso, lam tutup do hamamaju ni bangso i. Dipangan arta nasida i do ngolu nasida.

Molo taida bangsonta na so apala mangharingkothon ulaon parasinirohaon na singkop dope, ba intap ni i dope hamajuon ni bangsonta. Ringkot torus tasoarahon dohot tapatuduhon sian tongatonga ni huria hinaringkot ni bangsonta patupa ulaon parasinirohaon na singkop i, asa boi meret bangsonta sian bangso na berkembang tu bangso na maju, sian bangso na so jotjot be dipapujipuji halak siala ni habibinsar dohot hahihisarta, gabe bangso na dipapujipuji angka negara di portibion. Siala ni i do isarana ingkon parsidohot do hita songon halak Kristen patoguhon sumber daya manusia Indonesia, asa marhite hatauonta mangurus ngolunta on dohot mangurus pasupasu ni Debata na tajalo sian ibana di tano Indonesia Raya on, boi hita gabe bangso na maju.
Tapungka ma jo patuduhon i di tongatonga ni hurianta marsadasada. Nunga ingkon ruminggas hita halak Kristen Batak di jabu nang ulaonta patupahon ulaon parasinirohaon na singkop i, meret sian ulaon parasinirohaon na sompit, na sangombas tu sada ulaon parasinirohaon na singkop, i ma na patupa ulaon na membebaskan angka donganta jolma sian angka ihot-ihot manang parhatobanan na klassik dohot na imbaru, dohot ulaon na boi mambahen gabe dapotan sipanganonna, siinumonna, marjabu, dohot marpahean angka na male, na pogos, dohot na so mardihadiha. 

Molo ndang taula i, gabe boi do hita madabu tu pangunjunan holan mamujimuji Debata di bagas joro, alai di ngolunta siganup ari tapatupa angka ulaon na mangalo lomo ni roha ni Debata, i ma patupa angka na so suman tu donganta jolma. 

Taingot ma bagabaga ni Tuhanta i marhite Jesaya, molo taula ulaon parasinirohaon na singkop i gabe binsar ma mata ni arinta marsadasada, marsasaripe, marsasahuria, gabe saut ma dungdungonta visi ni HKBP: Gabe pasupasu tu portibion. Alai molo ndang taula na songon i songon rumang ni hamauliateonta tu Debata naung paluahon hita sian parhatobanon i, nanggo sada tangiang anggukanggukta ndang na alusanna sian banua ginjang. I do umbahen na diajarhon Pdt Dr Martin Luther tu angka na mangihuthon ajaran reformasi songon on di jolo ni angka uluan ni pamarenta nang huria di sada tingki: "Ia halak Kristen i sahalak na bebas do ibana, ndang unduk tu parhatobanon ni manang ise dohot manang aha. Alai di tingki na dos, naposo ni Debata do ibana patupahon na denggan tu donganna jolma," marojahan tu holong ni Kristus, ndang asa tigor ibana, alai ala naung dipatigor Debata do ibana. (Pematangsiantar, 25 Oktober 2018)
  BeritaTerkait
  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium Minggu XII Dung Trinitatis 19 Agustus 2018 1 Musa 17: 15-27 "Uli ni na Sauduran"

    3 bulan lalu

    Oleh: Pdt Dr. Robinson Butarbutar, Parsameanta, STT-HKBP.Dua ari dung sude hita rakyat Indonesia na mansai marragam rap mapestahon Hari Ulang Tahun Kemerdekaan Republik Indonesia na pa-73-hon di tgl 1

  • Jamita Evangelium, 14 Oktober 2018 Minggu XX Dung Trinitatis: Pir ma Tondim jala Marsihohot (Josua 1:-6-9)

    satu bulan lalu

    Oleh: Pdt Dr Robinson Butarbutar, Na tongon di Sipoholon dope dung mandohoti Sinode Godang HKBP 8-12 Oktober 2018, HP/WA: 0812-62472015Dipangke Debata Pargogo Nasohatudosan i do hita angka jolma, angk

  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

    tahun lalu

    Oleh: Pdt Dr. Robinson Butarbutar, Parsameanta, STT-HKBP1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurir

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb