• Home
  • Agama
  • Jamita Evangelium, 25 Nopember 2018, Minggu Ujung Taon Parhuriaon, Daniel 7: 9-14: Harajaon ni Debata Na Manongtong
KSP Makmur Mandiri
Sabtu, 24 November 2018 12:53:00

Jamita Evangelium, 25 Nopember 2018, Minggu Ujung Taon Parhuriaon, Daniel 7: 9-14: Harajaon ni Debata Na Manongtong

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar

Di bagasan lobi dua taon parpudion sahat do tu ganup hita barita masa na mangihut on: Tongon marusaha do angka bangso na balga jala na gogo manggulut huaso na tumimbo di portibion mampartahanhon harajaonna be asa torus marhuaso di portibion. Berkompetisi nasida. Angka bangso i i ma bangso Amerika Serikat, Russia, China nang Punguan ni Angka bangso di Eropah (Uni Eropah). Berkompetisi nasida siala hagogoon ekonomi, parsinjataan dohot pengaruh nasida. Manang ise na tumimbo pengaruhna ba i ma na menguasai perekonomian di portibion. Atik pe ndang marporang bodil sama nasida, alai tongon marporang do nasida di perdagangan, laho manggulut huaso ekonomi. Sasintongna sai berkompetisi do nasida saleleng on. Alai nuaeng masa perang dagang siala ni sangkap ni uluan ni bangso Amerika, i ma Presiden Trump, laho pamajuhon satimbotimbona bangsona sandiri na didok rohana saleleng on holan na mangalehon tu angka bangso na asing, hape dirina ndang dapotan.  Di tongatonga ni porang dagang i, bahat do angka bangso na so apala gogo di perekonomian dohot di parsinjataon na manghilala panghorhon ni porang dagang I tu nasida. Adong na gabe mangadopi krisis ekonomi siala ni inflasi, alai laos adong do martahan, gariada tong martumbur ekonomina. Bangsonta sandiri, Indonesia, taida marusaha unang susa siala ni porang dagang i, alai atik pe tung maol boi do tong martahan, boi manguduti pembangunan. Godang angka usaha ni pamarentanta na dipatupa laho mangadopisa  unang mangarugii hita porang dagang i.

Di angka na masa si songon i, di minggunta sadarion, apala di minggu Ujung Taon Parhuriaon, di na tapatupa parningotan di angka donganta sahaporseaon naung parjolo marujung ngolu di bagasan sataon parhuriaon on, di na taingot jala tahatindangkon tongtong na mangolu do na porsea di Jesus Kristus Sipalua i atik pe nunga jala naeng marujung ngoluna di portibion, dipangkulingi Debata hita marhite hataNa na mansai uli sadarion.  Impolana ni hata ni Debata mangondolhon na mangihut on: 
"Ia angka harajaon di portibion, ndang marimbar angka harajaon nagogo situtu ndang manongtong. Holan Harajaon ni Debata do na manongtong. Ia angka raja na adong di portibion, ndang marimba angka raja manang uluan ni angka bangso na tung gogo situtu, angka raja na so demokratis dohot angka raja na demokratis pe ndang manongtong. Holan Debata na mangarajai saluhut i do na manongtong.  

Siala ni i, ala nunga angka naung gabe ruas ni harajaon ni Debata na manongtong i binahen ni ulaon ni Jesus Kristus na hundul di siamun ni habangsa ni Raja ni sandok raja i hita, ingkon margogo ma hita manghatindangkon harajaonNa na manongtong i. Panindangion na songon i ma sitioponta di na taida jala taadopi angka raja na adong di portibion, na so manongtong i. Ala ni i ndang jadi hita mabiar maradophon angka raja na so manongtong i. Raja ni harajaon ni Debata na manongtong i do sihabiaronta. Ibana do sisombaonta. Molo tung taadopi pe angka raja manang  uluan na so mangulahon lomo ni roha ni Debata maradophon hita angka na porsea di Debata Raja na manongtong i, ba martahan ma hita manongtong. Ndang jadi sombaonta angka raja na ingkon salpu i. 

Panindangion di hatongtongon ni harajaon ni Debata na songon i do na disoarahon buku panurirang Daniel to tongatonga ni bangsona nang tu manang ise na porsea di portibion na tongon mangadopi parungkilon bolon. Bangona uju i, i ma halak Jahudi tongon digomgomi raja Gorik, i ma raja Antiochus IV Epiphanes (175-164  Andorang so ro Kristus) na tarbarita mansai jahat, ai  dipatutoru ibana Debata Na Mangolu i, jala dipaksahon ibana asa debata ganaganaanna na dipadiri di bagas joro na di Jerusalem. Ala ndang olo bangso Jahudi patupahon i, gabe dipersekusi ma bangso i. Bahat situtu na mate dibunu raja on. Panindangion i tung bagas situtu do.

Ia isi ni buku Daniel i dua do impola ni tonana tu ganup na manjahasa. 
Na parjolo i ma na mangihuton:  " Ndang jadi mabiar angka na porsea i di ngoluna di borat di portibion. Disarihon Debata Natumimbul i do angka na marhaposan tu Ibana sambing.
Di angka situasi na sasintongna di duru ni hatauon ni jolma mangadopisa, ro do Debata paluahon angka na tongtong satia tu ibana.  On ma na taida di bindu 1-6 buku Daniel i. Disi taida songon dia tangan ni Debata Na Gogo situtu mangalehon habisuhon dohot hapistaran tu opat halak Jahudi na marhaposan tu Debata di habuangan Babel nang di harajaon Persia. Marhite habisuhon dohot hapistaran na jinalo nasida sian Debata gabe tarbahen nasida mangalapati angka nipi ni raja. Jala marhite i gabe sahat tu nasida huaso di toru ni raja nasida nang di habuangan. Gariada tahe, dipalua Debata do nasida sian api dohot angka singa na pinatupa ni harajaon portibion laho mamunu nasida. Dipalua Debata nasida sian uhum binahen ni tangan ni raja, na piningkiranna sandiri dohot ala disangkapi angka nabisuk ni Raja. Siala ni ulaon ni Debata na gok halongangan na paluahon angka na satia maradophon Ibana, gabe boi angka raja i mananda hagogoon ni Debata i. Isara: 

i.Raja Nebukadnezar na mandok songon on dung dilapati si Daniel nipina: "Tongon do tahe Debatamuna do Debata ni angka raja jala Tuhan ni angka raja, jala sipapatar angka hahomion ala dapot ho papataronmu hahomion on" (Daniel 2: 47).

ii.Dung dipalua Debata tolunsa aleale ni si Daniel, i ma Sadrak, Mesak dohot Abed Nego, sian api na marnalanala, didok si Nebukadnesar ma songon on: "Pinuji ma Debata ni si Sadrak, si Mesak dohot si Abed Nego naung marsuru surusuruanNa asa paluahon naposoNa angka na marhaposan tu ibana.." (Dan 3: 28)

iii.Dung dipalua Debata si Daniel sian angka singa, didok raja Darius ma songon on: "Ibana do sipalua dohot sipangurupi jala Ibana mambahen tanda dohot halonganan di banua ginjang dohot di atas tano on. Ibana do paluahon si Daniel sian huaso ni singa i" (Dan 6: 28).

Napaduahon, "uju mangadopi parungkilon sian angka parhuaso, na pola sahat tu na agoan hosa, hot ma satia maniop Debata na marhagogoon jala na marharajaon na manongtong i. "  Na boi do taadopi songon halak Kristen songon niadopan ni bangso Jahudi uju marharajaon Raja Antiochus IV  Epiphanes. Laho patoguhon hita mangadopi i, ndang  tuk holan mangido asa dipatupa Debata halongangan bolonNa paluahon hita, songon na pinatupana tu si Daniel dohot angka donganna di bindu 1-6 i. Alai ingkon tuk do na porsea i marnida dao tu jolo tu tingki hamomonang ni Debata na mangolu i maradophon angka na jahat. Songon panurirang Daniel na pabotohon marhite bahasa pangungkapon hamomonang ni Debata, hahohot ni harajaonna dohot hamomonang ni na satia i di ariari na ro sahat tu ari panguhuman i. Marhite hata pangungkapon na dao marnida tu jolo di partondionna, diapuli panurirang bangsona tongon mangadopi pangaleleion nang pamunuon ni raja Antionchus IV I Epiphanes. 

Di sastera pangungkapon i, i ma na dipangke angka tokoh laho manongos tona na bagas tu angka na marungkil so ingkon diboto raja na jahat i lapatanna, disurathon do tona na subversif. Tona na subversif mandok ndang na hot ianggo huaso ni harajaon na tongon manusai ngolu ni bangsoNa i, alai marujung do. Paujungon ni Debata do harajaon nasida. 

Dietong do jom ni haujungonna. Jala, lobi sian i, ia ngolu ni angka na naung dipusa raja na jahat i ndang marujung boti. Manongtong do ngolu nasida songon manongtong ni harajaon ni Debata I manghobasi Ibana di ari panguhuman i sogot.

I do na dipatolhas di bindu 7 sahat tu bindu 12. 
Di bindu 7 ayat 1 tu 8, isarana, tangkas do disi disurathon taringot tu ujung ni angka harajaon na balga na naung manusai ngolu ni bangsonNa, i ma harajaon Babel, harajaon Persia, harajaon Gorik na pinungka ni Raja Alexander Nabolon, sahat tu angka raja na manguduti harajaonna niuluhon ni angka jenderalna  (i ma dinasti Seleucid dohot di Ptolomeus), sahat tu raja na ro sian dinasti Seleucid i ma Antiochus IV Epiphanes na di ayat 8 digoari sada binatang  na paopathon na martanduk sampulu jala tubu sada tanduk sian angka I (ayat 7-8). Dung dipatorang hinajorbut ni na opat songon binatang i (ayat 8), dipatolhas ma di ayat 9-14 taringot tu na mangihut on:

Parjolo,  hagogoon  ni Debata sihobason ni marribu dohot marloksaloksa jolma (ayat 9-10), dohot  hatongtongon ni harajaon  ni Debata na (ayat 13-14), alai, Paduahon, ujung ni angka harajaon na jat na tingkina nunga dietong (ayat 11-12).

Di na patorangkon i si Daniel, ndang apala didok ibana i marhite hata  narrasi manang sarita, alai marhata pangungkapon do ibana. Ingkon marhata pangungkapon do ibana, ala subversive do mandok adong do na gumogo sian raja Antiochus IV Epiphanes i uju i. Jala subversif do tong mandok na nunga dietong ari pangujungina (ayat 12). Tu Aintiochus subversif do i, alai tu angka na manaon patoguhon do i. Alai ni i ma digombarhon ibana Debata na marhagogoon situtu  na harajaonna manongtong i dohot dua hadirion. 

Hadirion naparjolo, i ma" Ibana na so suda arina" na tongon hundul di atas ni angka habangsa na marjillamjillam api  na marroda na marnalanala, na marpahean na saksak songon itak jala marobuk songon hapas na binusur (ayat 9). Hagogon dohot habadiaon ni debata digombarhon marhite i. Di Padan Narobi dipangke do api patorangkon hadirion ni Debata jahowa na mandok nagogo situtu do Ibana (Ida 1 musa 15: 17, 2 Musa 3:2, 19:18, 13: 21, 1 Raja 18).  Di jolona ruar sada sunge api, jala mabaor sian adopanNa na manghobasi ibana, jala marloksalokas jongjong diadopanna (ayat 10). Disi ma ari panguhuman ditontuhon jala angka bukku dibungka. 

Tona ni Daniel maralohon raja Antiochus IV Epiphanes i ma mansai tangkas: Atik pe bahat dibunu ibana, jala dipalea ibana Debata Jahowa, alai ndang tarotapisa panombaon tu Debata na agogo situtu i. Jala tu angka na satia tu Debata alai manaon dibahen raja i, tangkas do ujung na denggan di nasida, i ma tuk do nasida manghobasi Debata atik pe ro sunge api na mansai mohop situtu binahen ni raja i maradophon nasida. Gariada tahe di na di bungka angka buku, ndang diuhum nasida. 
Hadirion na paduahon, i ma "Sahalak na songon anak ni jolma" na diida ibana di bagasan pangungkapon borngin na ro marhite ombun di langit. Ala diida Daniel tong na tarboan ibana tu jolo ni "Ibana na so suda arina " i (ayat 13), gariada tahe dibasabasahon tu ibana pamarentaon na manontong na so tupa munsat sian ibana dohot hamuliaon nang harajaon sinomba ni saluhut bangso na marpanghuling marragam. Na boi do idaonta sian on alo ni na naeng tibu masa tu angka binatang i, i ma na laho salpu (ayat 11-12). On ma sada panghirimon na mangolu pinatolhas ni Debata marhite Daniel laho mamargogoihon bangsoNa na tongon digosagosa si Antiochus IV Epiphanes i. 
Ndang manontong raja on, marujung do, alai ro ma na manongtong na songon anak ni jolma.  I ma panghirimon mesianis na pinatubu ni Debata tu bangsoNa. Jala taboto tangkas, leleng do dipaima bangso Jahudi haroro ni Na songon anak ni jolma i (Heber: bar'enas). Taboto tangkas na, songon sinurathon ni evangelium Markus na patorangkon Jesus Anak ni Debata na ingkon manaon, dua ratus taon hurang lobi dung panurirangon pangungkapon ni Daniel on Jesus sandiri na dihatindangkon apostel Petrus Mesias Anak ni Debata  i do na mandok Ibana do "Na songon anak ni jolma na ro marhite angka ombun i" (Markus 2: 10, 28, 8:31, 38, 9: 9, 12, 31, 10: 33, 45, 13: 26, 14: 21. 41. 62). Na asing na mamangke hata i (Joh 12: 34, Ulaon 7:56, Pang 1: 13, 14:14) mamangkesa manudu tu Jesus Kristus. Ala ni i, atik pe ndang apala diboto Daniel tangkas ise na songon anak ni jolma i, jala ala anak ni Debata do Jesus Kristus i, jala dung hehe Ibana sian hamatean nunga dipatimbo Ibana satimbotimbona jala disomba angka na porsea di Ibana rap dohot Debata Ama nang Tondina. Dohot jempek hata, sada do Ibana dohot Debata na tumimbul gogo i, na digombarhon songon "ibana na so suda arina i," ndang pajolohu hita mandok na manudu tu Debata na marharajaon na manongtong i do tangkas di ujungna na sinurirangkon ni panurirang Daniel on uju mangadopi parungkilon bolon bangso ni Debata i. Tu raja Antiochus IV Epiphanias nunga barita na mansai koras barita pinatolhas ni Daniel on tu ibana: Ro ma ujungna hatop, dietong jom, alai ro ma na marharajaon na manongtong i.  Alai nunga  tongon ro na songon anak ni jolma i marhite ombun na manongtong harajaonna, sisombaon ni sandok bangso.

Siala ni i, di Minggu Ujung Taon Parhuriaon on, mansai ringkot sahali nari tarimangrimangi hagogoon ni Debata dohot hatongtongon ni harajaonNa. 

Sai hot ma tatiop i. Laos mansai ringkot do tong taida hatongtongonta angka na satia tu Ibana tong di harajaonNa na manongtong i. Na so jadi hita marsigantung tu angka raja na ro sian hajolmaon na so manongtong, tarlumobi angka na jahat. Ndang jadi hita umbiaran mida nasida sian mida Debata na marhagogoon na tumimbul i, na badia i. Bahen ma Ibana Rajanta na manontong i. Ai Debata Raja na satia do Ibana nang di na taadopi partingkian na maol di portibion. Ai disarihon Ibana do hita di portibion nang sahat ro di ro ajal ni hasiangan on.

Laos boi do tapangke tingki mangarimangrimangi songon dia hita mamereng dirinta sandiri. Molo dipasahat Debata tu hita sada tanggung jawab na balga manguluhon donganta jolma di portibion nang manguluhon parsaoran, misi nang ulaon holong ni angka na porsea i di tongatonga ni dohot marhite sian huriani Kristus  i, jamot hita: Unang tarajumi dirinta raja na marharajaon na manongtong i. Unang. Sotung songon raja Antiochus IV Epiphanias hita na dietong jom ariari ni harajaonNa ala dileai Ibana Debata, jala dipasingkorsingkor ibana ngolu ni angka na porsea i.
Molo adong sian hita na tongon marungkil ala ni haporseaonna, tatap ma tu jolo: Mansai pasti do ujung nauli ni angka na porsea na martahan di na marungkil i: I ma masuk bilangan ni angka na  manghobasi Debata ibana, atik pe ro sunge api di antara ni ibana dohot habangsa ni Debata na marjillamjillam i tarbahensa do manghobasi Ibana, jala di ari panguhuman i, tarsurat do goarna di buku hangoluan i.

Mansai ringkot do on rimangrimangonta di partingkianta nuaeng na mamereng mansai bahat angka donganta sahaporsreaon na so sa dogma dohot HKBP na sai mangondolhon na so daion ni angka na porsea di Jesus Kristus be dalan-dalan ni ngolu na maol jala   na gok tantangan, alai ganup na porsea I marhangoluon na mardohar do jala na so dais be ngoluna sian parungkilon. Mangihuthon hata ni Debata na di Daniel 7: 9-14 i, dihamonangkon  Debata do ngolu ni na manaon ala ni goarNa, ala ni na martahan manomba Ibana nuaeng nang di ari panguhuman sogot atik pe marungkil. Ganup naung jumolo borhat sian tongatonganta rap dohot Kristus na manongtong i, manongtong do ngoluNa di harajaonNa na manongtong i. Amen(*)
  BeritaTerkait
  • Jamita Evangelium, 26 Nopember 2017 Minggu Parningotan ni Angka Namonding, Turpuk: Mateus 25: 31-46 "Hangoluhon ma ngolu na manontong i."

    tahun lalu

    Oleh: Pdt Dr Robinson Butarbutar, STT HKBPSian mamungka mangula Jesus di Palestina sahat tu na tubu jala maherbang huriaNa di abad parjolo, sahat tu tingki on, nunga tung bagas diboto, dihaporseai, di

  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

    9 bulan lalu

    Oleh: Pdt Dr. Robinson ButarbutarA. Dihasiholi Debata asa marlas ni roha jolma i.Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, ta

  • Jamita Minggu V dung Trinitatis, 1 Juli 2018 Evangelium: Markus 16: 14-20 "Mamaritahon Barita Nauli tu nasa Natinompa"

    5 bulan lalu

    Ndang mansohot turgas mamaritahon barita na uliSian di bonana i sahat tu nuaeng, sian abad parjolo dung hehe Jesus Kristus sian hamatean sahat tu na naung hundul Ibana di siamun ni Debata Ama i di ban

  • Jamita Evangelium, Advent I 2 Desember 2018, 4 Musa 24: 15-17: Managam Haroro ni Sipalua

    satu minggu lalu

    Oleh: Pdt Dr. Robinson Butarbutar, di Parsameanta, STT-HKBP Pematangsiantar, HP-WA; 0812-62472015. Sada na mansai uli situtu na jumpang hita di angka tona ni Debata di Bibelta i, i ma na mangihut on:

  • Jamita Evangelium, Minggu Quasimodogeniti 8 April 2018: Parmahani Ma Birubiru ni Debata

    8 bulan lalu

    Oleh: Pdt Robinson Butarbutar, Sian Parsamenta, STT-HKBP.Dung hehe Jesus sian hamatean, andorang so manaek Ibana tu banua ginjang, andorang so ditonai Ibana angka siseanna laho tu sandok portibion mam

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb