• Home
  • Agama
  • Jamita Evangelium, 25 Desember 2018, Pesta I Paringotan Hatutubu ni Tuhan Jesus: "Immanuel: Donganta do Debata" (Mateus 1: 18-25)
KSP Makmur Mandiri
Senin, 24 Desember 2018 19:08:00

Jamita Evangelium, 25 Desember 2018, Pesta I Paringotan Hatutubu ni Tuhan Jesus: "Immanuel: Donganta do Debata" (Mateus 1: 18-25)

BAGIKAN:
Ist
Pdt Dr Robinson Butarbutar
Oleh: Pdt. Dr. Robinson Butarbutar
Sian Parsameanta, STT-HKBP Pematangsiantar
HP/WA: 0812-62472015

Selamat ari Natal ma di hita saluhutna.

Ganup sahat hita tu ari parningotan di hatutubu ni Tuhanta Jesus Kristus di ari 25 Desember, sai las do rohanta jala mariaia tondinta ala di ari i ma tapestahon hasasaut ni sangkap ni Debata manghaholongi hajolmaon. Denggan do hita masijalangan mandok tu sama hita selamat ari Natal.

Laho manggohi rohanta marsaringar do tu hita hata ni Debata na tarsurat di Evangelium
Mateus bindu 1: 18-25 on na patorangkon tu hita tolu na mansai ringkot botoonta taringot tu Jesus Kristus Sipaluanta i.

Naparjolo, gabegabean sian Tondi Porbadia do ia si Maria, ndang siala naung masipajonohan (Gorik: sunelthein autousheurethe) manang masitandaan (Gorik: ginosko; Indonesia: berhubungan seksual) si Josep dohot si Maria andorang so tubu Jesus. Anak siangkangan, ala na tubu sian Tondi Porbadia do dankdanak i. I ma sada hahomion dohot halongangan na pinamasa ni Debata pasauthon holongNa tu hita.

Napaduahon, ala adong sangkap ni si Josep na bonar i laho manirangkon si Maria sipsip, asa
unang tarurak si Maria, ro do Debata marhite surusuruanNa di bagasan nipi patorangkon tu si
Josep songon dia parjadina umbahen na denggan pamatang ni si Maria oroanna i (ayat 18
dohot 25), i ma marhite Tondi Porbadia, jala siala ni i unang alang rohana mangalap si Maria
gabe donganna saripe (ayat 20). Diundukkon si Josep do pangidoan i atik pe dokdok (ayat 24).  Ulaon Tondi Porbadia do halongangan i.

Patoluhon, dipatorang Debata ma dia do impola ni hatutubu ni Jesus marhite mangalehon goar
ni dakdanak na marharoroan sian Tondi Porbadia i. Domu tuson do didok goar ni Jesus, i ma
(a) Immanuel (ayat 23), i ma nilehon ni surusuran na ro tu si Josep, dohot
(b) Jesus (Heber: Yeshua) nilehon ni si Josep sandiri, ai ibana do na naeng paluahon bangsoNa
sian angka dosa nasida be (ayat 21), ai i do lapatan ni goar Jesus (Yehua) i.

Atik pe adong tolu na dibaritahon evangelium Mateus songon na di ginjang i, alai goarna, Immanuel: Donganta do Debata, i do na dipillit gabe tema manang ondolan ni jamita tu hita di
ari pesta Natal on. Laho mangondolhon i, porlu do taida tona ni goar ni Jesus i tu dua
partingkian.

Parjolo, di partingkian panuratan ni si Mateus. Boasa apala Immanuel i na gabe dipajolo gabe
jamita tu angka halak Jahudi Kristen di taon 85, i ma sijaha Evangelium Mateus on di bonana tar lima taon dung disurathon evangelium Lukas (i ma na naung patujolohon hamuliaon ni Debata dohot dame di portibion di barita na uli sinuratna taringot tu hatutubu ni Jesus), manang 15
taon dung disurathon evangelium Markus (i ma na mangondolhon ia Jesus na mangula di Galilea sahat tu Jerusalem i Anak ni Debata na manaon na hansit do Ibana).

Tingki i ndang adong be bagas joro na di Jerusalem. Nunga dilengsehon Romawi niuluhon ni
Jenderal Titus. Di tingki i, tontu di halak Jahudi nang halak Jahudi Kristen na tong manopot
bagas joro dung manaek Jesus tu banua ginjang jala andorang so paisolat nasida paluahon diri
sian porang na manghalelengsehon bagas joro i haruar sian Jerusalem, tubu ma sungkun￾sungkun na mansai bagas taringot tu di dia ma sombaon Debata? Rap do Debata dohot hita atik pe nunga malengse bagas joro?
Molo taida na tarsurat di ayat 23 ia goar nilehon ni surusuruan ni Debata tu si Josep bahenonna
gabe goar ni pesepese na naeng tubu i, i ma IMMANUEL, Debata rap dohot hita, laho patuduhon na marhite Jesus Kristus rap do Debata dohot jolma i. Siala ni i do tong di bindu 18: 20 disurathon hata ni Jesus tu angka siseanna: "Ai anggo pungu dua manang tolu pe marhitehite goarhu, sai dongananku do nasida." Lapatanna, atik pe ndang di bagas joro na di Jerusalem na naung malengse i nasida marpungu, sai Debata do dongannasida. Jala di bagasan
diri ni Kristus tangkas ma pandonganion ni Debata di nasida. Asa, tu angka halak Kristen Jahudi na tongon marsanding dohot angka halak Jahudi na so mangihuthon Jesus alai na mangihuthon angka ajar ni angka Rabbi na naung mamparsiajari patik ni Debata di sada huta di tepi pantai di Jabneh, na jonok tu huta ni halak Kristen Jahudi di Antiochia Syria, ringkot do botoon nasida na Dongannasida do Debata. Ndang ala mangihuthon Jesus Kristus Tuhan gabe dao Debata sian nasida. Baliksa, ala naung di bagasan Kristus do nasida, gabe rap dohot nasida do Debata, atik pe ndang di bagas joro na di Jerusalem i nasida.Gabe dongannasida do Debata.

Paduahon, di hita halak Kristen di sandok portibion nuaeng, uju mamestahon ari hatutubu ni
Jesus i hita di tingkion, manang beha pe pargulmiton ni ngolunta ingkon botoonta do jala
ingkon haposanta do na ia sangkap ni Debata mambahen denggan pamatang ni si Maria
marhite hagogoon ni TondiNa jala ia sangkap ni hatutubu ni dakdanak na tapestahon
hatutubuna sadarion i ma laho patuduhon sangkapna na uli: Na donganta do Debata, jala na
donganon ni Debata do hita ganup ari di portibion. Ndang musuNa hita. Ndang dipadao diriNa sian hita. Dipasaut Ibana ma i marhite haroroNa di bagasan Jesus Kristus, dohot ulaonNa paluahon hita marhite Jesus (Yeschua) sipalua i.

- Mansai ringkot do on botoonta songon ruas ni pamatang ni Kristus di portibion nuaeng,
di na mangulahon ulaon sinuruhon ni Jesus Kristus di portibion, i ma mamaritahon
barita nauli, mangajarhon sude na naung niajarhon ni Jesus, mangulahon ulaon holong
di bagasan huria dohot tu sude na di duru ni huria dope. Donganta do Debata.

- Ganup ruas ni pamatang ni Kristus na marusaha patupahon angka na denggan marhite
ragam ni ulaon/profesi na naung tapillit tu donganna jolma nang tu angka na tinompa ni
Debata na asing sadenggan dengganna, ai nunga dipalua Kristus hita jala siala ni di bagasan holongNa do hita manghobasi sude jolma, di bagasta, di maysarakat nang di
portibion. Donganta do Debata.

- Ganup ruas na tongon mangadopi tantangan laho mandungdung sintasintana na
denggan di ngolu nang di ulaonna siganup ari: Ari Hatutubu ni Jesus mamastihon tu hita
na di dongani Debata do hita. Donganta do Debata.

- Ganup ruas siihuthon Jesus asa manghaposi dohot mangasahon Debata songon donganna, ndang na asing na so tarbahen manongtong mandongani hita.

- Manjouhon tu ganup asa manghamauliatehon sude pandonganion ni Debata tu diri,
ngolu nang ulaonna saleleng on.

- Manjouhon tu ganup barita na mansai uli, i ma ndang alo alai dongan ni jolma ia Debata
I, dang ditadingkon alai rap dohot hita do Debata.

Dipargogoi Debata ma hita manghalashon di ari parningotan ni hatutubu ni Jesus marningot
tongtong imbaru angka ulaon ni Debata di tingki-tingki na salpu di na tangkas taida di ngolunta
angka pandonganion ni Debata tu hita di ngolu nang panghobasionta be. Debata na sun timbul i do na ingkon tongtong pangasahononta. Nang tu joloan on, i ma tong taingot: Donganta do Debata. Pos ni roha na songon on nunga masuk tu buku Ende ni HKBP No. 66:1-3: Debata baen donganmi, lao mangula ulaonmu. Baen Ibana haposanmu, sai paserep rohami.

Debata baen donganmi. Debata baen donganmi (1)Debata baen donganmi, molo Debata donganmu, ndang tarbahen ho be lilu, sai ture do langkami. Debata baen donganmi, Debata baen donganmi (2) Debata baen dongami, sai na saut do ulaonmu. Sai na tulus do sangkapmu jala sonang
rohami. Debata baen donganmi, Debata baen donganmi (3).**

  BeritaTerkait
  • Jamita Evangelium Minggu IV Adven 24 Desember 2017, Lukas 1: 26-38: Debata Ro Mamboan Asi ni Roha"

    tahun lalu

    Oleh: Pdt. Dr. Robinson Butarbutar, Sian parsameanta, STT-HKBP PematangsiantarDi minggu Adven paopathon sadarion, marhite barita nauli sinurathon ni parbarita nauli jala teolog Lukas di bindu 1 ayat 2

  • Jamita Evangelium, 9 Desember 2018, Minggu Advent II, 1 Petrus 2: 11-12 : Manomunomu Tuhan i Marhite Parange na Denggan

    3 bulan lalu

    Oleh: Dr. Robinson Butarbutar, sian Parsameanta, STT-HKBP Pematangsiantar, 0812-62472015.Nunga sada fakta na ingkon adopan ni angka bangso di portibion nuaeng na siala ni marragam sibonsiri na mansai

  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

    3 bulan lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar.HP/WA 0812-62472015Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24

  • Jamita Borngin Parningotan ni Hatutubu ni Jesus Kristus 24 Desember 2017, Pukul 19.30 "Jangkon ma hapataron ni hahomion ni Debata."

    tahun lalu

    Oleh: Pdt Dr Robinson Butarbutar, STT HKBP Pematangsiantar1. Ndang tarbahen sude naporsea ra marpungu dohot angka donganna na porsea di bagasan borngin on tanggal 24 Desember 2017, laho mamuji Debata

  • Jamita Evangelium, Pesta Parjolo Parningotan ni Haheheon ni Tuhan Jesus 1 April 2018: Gabe Sitindangi Haheheon ni Kristus (Ulaon Apostel 10: 39-43)

    12 bulan lalu

    Oleh: Pdt. Dr. Robinson Butarbutar, Sian Parsameanta, STT-HKBP PematangsiantarBarita nauli taringot tu haheheon ni Jesus Kristus sian hamatean nunga marrumangkun barita klassik di portibion mamungka s

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb