• Home
  • Agama
  • Jamita Evangelium, 21 April 2019 Pesta Parjolo Parningotan Ari Haheheon ni Tuhan Jesus "Haporseai ma Kristus Naung Hehe i" (Johannes 20: 34-31)
KSP Makmur Mandiri
Sabtu, 20 April 2019 15:10:00

Jamita Evangelium, 21 April 2019 Pesta Parjolo Parningotan Ari Haheheon ni Tuhan Jesus "Haporseai ma Kristus Naung Hehe i" (Johannes 20: 34-31)

BAGIKAN:
Ist
Pdt Robinson Butarbutar
Oleh: Pdt Dr. Robinson Butarbutar
Sian Parsameanta, STT-HKBP
HP/WA: 0812-62472015.

Sian tingki tu tingki, sian tingki na robi di abad parjolo sahat tu abad padua pulu sadahon nuaeng, sada ulaon ni angka siihuthon Jesus di portibion i ma manghatindangkon haheheon ni Jesus Kristus sian hamatean, ai haheheon ni Kristus i do ojahan di haporseaonta di Ibana. Ndang holan hamamateNa di hau pinorsilang na manobus dosa ni angka pardosa na porsea di Ibana na gabe isi ni panindangion ni angka siihuthon Jesus, songon i nang angka ulaonNa nagok tanda halongangan i manang angka pangajarionNa i na gabe ojahan ni haporseaon nang parange ni halak Kristen,  alai dohot do haheheonNa na manaluhon hamatean hinorhon ni dosa i, tarlumobi ala haheheonNa i do boha baju ni haheheonta di ari parpudi. Haporseaon di haheheon ni Jesus dohot di haheheonta sogot i do na gabe ojahan di hita mandalanhon ngolunta na satongkin di portibion nuaeng on di bagasan panghirimon na togu dohot di bagasan habadiaon, sai hobas manghobasi hajolmaon marhite angka ulaon na denggan na marragam i, angka ulaon na uli, na innovatif, ulaon na pangoluhon, patupa las ni roha di donganta jolma. 

I do na dihatindangkon angka sisean ni Jesus na parjolo i di angka ulaon mamaritahon barita na uli di tongatonga ni angka bangso mansai hatop dung hehe Ibana, tarlumobi dung songgop Tondi Porbadia i tu nasida mamungka di Jerusalem sahat tu angka kota na adong di Kekaisaran Romawi. I do na pinestahon ni angka siihuthon Ibana di angka partangiangan ni angka na porsea di Jesus sian bonana. I do na sinurathon ni angka surat ginurithon ni apostel Paulus di taon 50-an, dua pulu taon dung hehe Kristus sian hamatean.  Laos i do binaritahon ni angka panurat ni angka Evangelium na opat i, opat pulu taon (Evangelium Markus), lima pulu taon (Evangelium Lukas), lima pulu lima taon (Evangelium Markus) jala onom pulu taon (Evangelium Johannes) dung hamamasa ni haheheonNa i. Laos i do na tongtong dibaritahon parbarita nauli dohot dihaporseai angka na porsera di Ibana di angka abad dung abad na parjolo i, i ma di abad paduahon sahat tu abad padua pulu sadahon nuaeng, di partingkian na so haru modern dohot post-modern dope parbinotoan ni jolma i taringot tu portibion nang angka ngolu disi, dao andorang so jaman pencerahan nang dung i.
Atik pe sian bonana  ndang mura manghatindangkon haheheon ni Kristus i na gabe ojahan dohot bohabaju ni haporseaonta i sian tingki tu tingki, ndang sumurut hita halak Kristen manghatindangkonsa.

Haporseaon di haheheon ni Kristus i do ianggo apala sintuhu ni haasingon ni haporseaon ni Hakristenon i. Alai apala haporseaon di haheheonNa i, i ma na gabe ojahan ni haporseaon di haheheonta sogot, do na mangapuli angka siihuthon Jesus na ditadingkon angka sisolhotna na parjolo monding sian nasida. Haporseaon di haheheonNa i do na patoguhon panghirimonta uju mangadopi angka hamaolon nang tantangan ni ngolu. I do na mangalehon las ni roha di hita nang uju mangadopi angka na so taradopi hita di ngolunta di portibion. Gariada tahe, i do na tuk patubu hiras ni roha di hita mangadopi angka parngoluan na mansai maol adopan. 

Panindangion sisongon i do na pinatupa ni panurat ni Evangelium Johannes on, marhite na manurathon sada pengalaman ni sada sian si sampulu dua sisean ni Jesus na parjolo i sandiri, i ma apostel Tomas, na di bonana ndang porsea umbege barita sian angka donganna sisean na asing taringot tu hamamasa ni haheheon ni Jesus naung patuduhon diriNa tu nasida, alai dung pajumpang dohot Jesus jala marnida bogas ni labang di jarijari dohot di andoraNa gabe porsea. (Mansai scientific do pengalaman ni si Tomas i, ai ndang diida ibana do na naeng idaonna i, i ma bogas ni labang di tangan ni Jesus i, jala aut dioloi ibana panuruon ni Jesus tu ibana, boi do bahenonNa jarijarina tu andora ni Jesus i). Laos dipangke panurat ni evangelium Johannes i ma isi ni hata ni Jesus tu si Tomas gabe barita tu manang ise na umbege barita taringot tu haheheon ni Jesus di partingkian na asing sian hamamasa ni parjumpangan i sahat tu nuaeng, i ma: "Martua angka na porsea, atik pe so diida." Boasa martua? Ala na porsea di Jesus Kristus Anak ni Debata naung pinaheheNa i do na dapotan hangoluan (Yoh 20: 31. Adong do teks na ruar di abad pa-4-hon na manambahon hata 'na manongtong' tu 'hangoluan' i. Asa na porsea di haheheon ni Jesus Anak ni Debata i do na marnampunahon hangoluan na manongtong i). 

Hata ni Jesus Kristus Naung Manaluhon hamatean i tu apostel Tomas do na so pinarateatehon dohot hinaporseaan ni angka na sai tongtong ndang porsea di hamamasa ni haheheon ni Jesus Kristus i sian najolo sahat tu nuaeng, umbahen na barani nasida sai mandok na margabus angka sisean ni Jesus Kristus i di panindangionta taringot tu haheheon ni Jesus i. Hata ni Jesus Kristus tu si Tomas na digoari Silinduat (Gorik: Didumos) i do na dihaporseai halak Batak di bona pasogit nang di parserahan mamungka sian abad pasampulusiahon sahat tu nuaeng umbahen gabe dihaporseai nasida na Jesus Kristus do Anak ni Debata i. Angka na martua do hita, ai porsea hita di Jesus Kristus songon Anak ni Debata, di ulaonNa nang di angka ajarNa, sian partingkian na salpu i sahat tu nuaeng. Angka na martua do hita (Gorik: Makarioi), alai nunga masuk tu bilangan ni angka na manghaporsea i Jesus ndang haheheonNa hita, atik pe ndang dung diida matanta sandiri Ibana songon parnida ni angka sisean na mandongani Ibana tolu taon lelengna di Galilea dohot di Judea di taon 27-30 Dung Kristus. Tahaporseai haheheonNa i atik pe ndang masuk tu bilangan ni angka na marnida Ibana dung hehe sian hamateanNa i hita (1 Korint 15: 5-9, i ma: si Kefas, dung i si sampulu dua, tu lima ratus na porsea, na mangolu dope di taon 57 uju disurat apostel Paulus suratna tu halak Kristen di Korint, tu si Jakobus, dohot tu angka apostel sudena, nang tu apostel Paulus umpudi sian angka na asing i). Gariada  tahe, molo tajaha hata ni Jesus tu si Nikodemus, sahalak sian tongatonga ni angka Farise Sintua ni Jahudi di Johannes 3: 16, ndang mago hita na porsea di Ibana, alai dapotan hangoluan na salelenglelenga. 

Hata ni Jesus Kristus tu si Tomas apostelNa i do na so dijalo bahat halak di sandok portibion sian narobi sahat tu nuaeng umbahen na so dihaporseai nasida Jesus Kristus Anak ni Debata i gabe Sipaluana dohot Tuhanna.  Nasida na so manghaporseai haheheonNa i adong do ro sian tongatonga ni na so manghaporseai na adong Debata (Jaha: atheis), alai laos adong do tong nasida na ro sian angka siihuthon Jesus hian, isara Amanta Bart D. Ehrman di Amerika Serikat, na gabe so porsea be di isi ni panindangion ni Padan Naimbaru taringot tu haheheon ni Jesus i jala saurdot tusi ndang porsea be na adong Debata (Jaha: agnostik), atik pe sanga do ibana ditanda angka donganna halak Kristen sahalak na porsea di Jesus Kristus dohot sada pangajari di angka Sikkola Teologi di bidang Padan Naimbaru na tarbarita. Ro do tong angka situlak haporseaon di haheheon ni Jesus Kristus i sian tongatonga ni angka pande bisuk filsafat nang pande bisuk ilmu pengetahuan alam, na sai mangondolhon holan angka na boi dibuktihon ilmu pengetahuan alam do naboi tiopon gabe hasintongan. Ndang tarjalo nasida angka na binaritahon ni Padan Naimbaru i gabe hasintongan.  

Mangihuthon hata ni Jesus Kristus tu si Tomas na diingot angka sisean na asing na rap marpungu dohot si Tomas di sada bagas di Jerusalem ndang sadia leleng dung hehe Jesus Kristus i, angka na so porsea di  haheheonNa i nang di Jesus Kristus naung hehe i ndang angka na martua. Gariada  tahe, molo tajaha hata ni Jesus tu si Nikodemus, sahalak sian tongatonga ni angka Farise Sintua ni Jahudi di Johannes 3: 18, angka na so porsea di Anak ni Debata i, hona uhum do sogot.
Boasa ma di partingkianta nuaeng dienet gabe jamita di Pesta Parningotan di Heheheon ni Jesus Kristus halongangan haheheon ni Jesus Kristus i gabe jamita tu hita halak Kristen Batak?

Suraon do ala ndang hiras be rohanta songon hiras ni angka sibaritahon barita nauli taringot tu heheheon ni Jesus Kristus i mamaritahon haheheonNa i na patubu panghirimon na mangolu di hita tu tongatonga ni donganta jolma naung dihamonangkon angka parbinotoan modern nang post modern, na mandok ndang dung jala ndang boi jolma naung mate i hehe muse sian hamateanna?

Suraon do ala ndang tahaporseai be na tarbahen Debata na pahehe Jesus Kristus sian hamatean i do nang angka tanda halonganganNa patauhon hita patupa angka ulaon na uli di tongatonga ni hajolmaon, mamungka sian bagasta be sahat tu duru ni bagasta be? Tasulingkiti ma rohanta be. Molo ndang porsea hita di haheheonNa jala ala ni i di Jesus Kristus, ba gabe dohot ma hita tu bilangan ni angka na taruhum, ai holan Jesus Kristus do na tuk palua hita sian uhum tu dosa i, i ma hamatean na manongtong i dohot angka huaso ni dosa di pamatangta i.
Molo positif do alusta tu dua sungkunsungkun na di ginjang i, mansai ringkot do tarataratai muse ndang holan haporseaonta di haheheon ni Jesus Kristus Anak ni Debata i, alai dohot do ulaonta mamaritahon barita taringot tu haheheon ni Jesus Kristus i, nang di partingkianta nuaeng na lam timbo parbinotoan ni jolma na pasidingkon hinaringkot ni na manghaporseai ulaon ni Debata nagok halongangan pahehehon Jesus Kristus nang hita sogot sian hamatean i, asa lam tamba na porsea dohot na dapotan hangoluan na manongtong i, ba lam ma mandongani dohot patauhon hita marhite angka tanda halonganganNa na so songon gogo ni pahehe Jesus sian hamatean i patupahon ulaonNa di portibion, nang di na mangadopi angka na so taradopi hita sian hagogoonta sandiri. Amen.(*)
  BeritaTerkait
  • Jamita Evangelium, Pesta Parjolo Parningotan ni Haheheon ni Tuhan Jesus 1 April 2018: Gabe Sitindangi Haheheon ni Kristus (Ulaon Apostel 10: 39-43)

    tahun lalu

    Oleh: Pdt. Dr. Robinson Butarbutar, Sian Parsameanta, STT-HKBP PematangsiantarBarita nauli taringot tu haheheon ni Jesus Kristus sian hamatean nunga marrumangkun barita klassik di portibion mamungka s

  • Jamita Evangelium 28 April 2019, Minggu Quasigodogeniti Manongtong Mangihuthon Jesus (Johannes 21: 15-19)

    3 minggu lalu

    Sian Parsameanta di PematangsiantarSTT-HKBP.Pdt Dr. Robinson Butarbutar Hp/WA: 0812-62472015Marasing sian isi ni bagian pangujungi ni Evangelium Markus (disurathon taon 69/70), Lukas (disurathon taon

  • Jamita Evangelium, 26 Nopember 2017 Minggu Parningotan ni Angka Namonding, Turpuk: Mateus 25: 31-46 "Hangoluhon ma ngolu na manontong i."

    tahun lalu

    Oleh: Pdt Dr Robinson Butarbutar, STT HKBPSian mamungka mangula Jesus di Palestina sahat tu na tubu jala maherbang huriaNa di abad parjolo, sahat tu tingki on, nunga tung bagas diboto, dihaporseai, di

  • Jamita Evangelium di Ari Jumat, 30 Maret 2018 Parningotan Ari Hamamate ni Tuhan Jesus, EvangeliumJohannes 19: 28-37 "Panotnoti Jala Haposi Na Tarsilang i"

    tahun lalu

    Oleh: Pdt. Dr. Robinson Butarbutar, Parsameanta, STT-HKBP PematangsiantarPatujoloDi taon 2018 on, di tonga-tonga ni Parningotanta di Ari Hamamate ni Tuhan Jesus di hau pinorsilang i hira-hira 2015 tao

  • Jamita Evangelium di Minggu Okuli, 24 Maret 2019: Jesus do Batu Parsuhi (Psalmen 118: 22-29)

    2 bulan lalu

    Oleh: Pdt. Dr. Robinson Butarbutar, Parsameanta STT HKBP (HP/WA 1812-62472015)Di hita ganup ruas ni punguan ni angka na porsea di Jesus Kristus mamungka sian abad na parjolo sahat tu nuaeng di abad pa

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb