• Home
  • Agama
  • Jamita Evangelium, 18 Nopember 2018, Minggu XXV Dung Trinitatis: Taluhon ma Hajahaton Marhite Ulaon na Denggan (Roma 12: 9-21)
KSP Makmur Mandiri
Jumat, 16 November 2018 18:17:00

Jamita Evangelium, 18 Nopember 2018, Minggu XXV Dung Trinitatis: Taluhon ma Hajahaton Marhite Ulaon na Denggan (Roma 12: 9-21)

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar

Sada sian pinompar ni Zaman Pencerahan (Inggris: Renaisance; German: Aufklaerung) na umpudi tubu di pangujung ni abad pa-20-hon alai margurasa tong sahat tu nuaeng on, i ma Filsafat Relatifisme, na mandok ndang boi dohonon ni sasahalak be na hinaporseaonna i do na sumintong sian na hinaporseaon ni na asing, jala siala ni i ndang boi be dohononna na ia ruhutruhut ni parange ngolu hadaulatonna i do na dumenggan sian ruhutruhut ngolu hadaulaton ni na asing.  Ai ganup subjektif do. Ganup kontekstual do. Siala ni i, mangihuthon filsafat Relatifisme on, nang halak Kristen pe ndang boi be mandok na na hinaporseaonna taringot tu songon dia halak boi malua sian dosa nang sian hamatean -i ma holan marhite haporseaon di Jesus Kristus- laos songon i nang ruhutruhut hadaulaton ni ngolu ni halak Kristen pe ndang boi be dohononna sumintong sian haporseaon haluaon nang ruhutruhut hadaulaton ni ngolu ni parugamo na asing dohot so so parugamo pe tahe.
 
Domu tusi, di tongatonga ni masyarakat majemuk, i ma masyarakat na marragam haporseaon ni angka penduduk na mian di sada negara nang di angka negara-negara, unang adong ketegangan sosial di tongatonga ni penduduk na marasing haporseaon dohot ruhutruhut hadaulatonna disosoi ma asa dipadao angka parugamo  ma  ulaon na patutoru haporseaon dohot ruhutruhut hadaulaton ni ngolu ni parugamo na asing sian na tiniop nasida. Ganup ma menghargai haporseaon dohot ruhutruhut hadaulaton ni ngolu ni ganup parugamo asing sian parugamoonna. Na rumingkot ganup ma unduk tu uhum na adong di tongatonga ni negara inganan mangolu nasida. 
Atik pe songon i, ndang diorai sasahalak manghaposi na hinaporseaonna dohot manghangoluhon ruhutruhut hadaulaton (Jaha: Etika) ni ngolu hinaporseaonna  na so maralo tu uhum di negarana. Siala ni i, mansai ringkot do bagas jala toras haporseaon ni sasahalak dohot di ruhutruhut parange ngolu manang hadaulaton ni ngoluna. Mansai ringkot halak Kristen mangantusi songon dia do ajaran ruhutruhut ni ngoluna songon angka naung tinobus ni Kristus di portibion siala ni asi ni rohana, ndang asa tumigor ibana di jolo ni Debata, alai ala naung dipatigor ibana marhite Jesus Kristus uju manang atik pe pardosa do ibana. 

Mansai ringkot tarlumobi ala marhite hinaadong jala hinahatop ni teknologi informasi internet na so adong batasna di era revolusi industry  na paopathon nueang, mansai bahat do diajarhon jolma i di dekade paduahon abad pa-21-hon on angka ruhutruhut hadaulaton ni ngolu marhite internet na tupa ndang saurdot tu ruhutruhut hadaulaton ni ngolu ni Hakristenon. Di masyarakat na songon i mansai ringkot botoonta beha do ajaran ni Hakristenon taringot tu songon dia ma sama halak Kristen marparange sama nasida asa uli parsaoran (Hubungan Intra-Kristen), dohot songon dia ajaran ni Hakristenon taringot tu songon dia marparange hadaulaton maradophon angka donganta jolma na so sapamingkirion dohot hita (hubungan antar umat beragama, gariada maradophon angka donganta jolma na manghasogohon hita dohot na mamusui hita ndang ala taula na so denggan maradophon nasida, alai ala songon i parange hadaulatonna, na marasing tu parange hadaulaton nasida. Na boi do ajaran na tahaposi i marimbar sian ajaran na hinaposan ni angka donganta na so sahaporseaon dohot hita.
Siala ni i, mansai denggan do dienet jamita evangelium di tongatonga ni hurianta di minggu pa-XXV-hon dung Trinitatis sadarion sian surat ni Apostel Paulus taringot tu songon dia ma ruhutruhut parange hadaulaton ni halak Kristen, tarlumobi dung dipanghulingi Tuhanta hita dua minggu padodot asa paratarata silehonlehon ni Debata tu hita so didongani biar jala asa patupahon uhum dohot hatigoran di jolo ni Debata songon rumang na tingkos ni panombaonta tu Debata. 

Naeng marsiajar hita sian sada bagian sian surat ni Apostel Paulus tu huria na di taon 56 tu lobi hurang duaratus halak ruas ni angka huria na marpungu di angka jabu ni ruas ni huria i di kota Rom, jala tu hita ganup nuaeng di ingananta be di sandok portibion, tarlumobi di Indonesia Raya na tahaholongi on.  Dienet jamitanta sian bagian etika ngolu manang ruhutruhut ngolu hadaulaton ni na porsea i dung dipatigor Debata nasida marhite silehonlehon haporseaon di ulaon ni Jesus Kristus di silang i. 
Di na mangalusi sungkunsungkun songon dia ma halak Kristen naung dipatigor Debata marparange maradophon sama donganna Kristen dohot sama donganna jolma na so Kristen, tarlumobi maradophon angka so manghaholongi nasida di ngolu on, songon dia do pangajarion ni hata ni Debata marhite apostelna Paulus? Songon ni ajarhon ni ugama Jahudi dope, i ma marhite na unduk tu uhum ni si Musa naung dipinaandar ni angka pangajari ni Jahudi sahat tu partingkian ni apostel Paulus, manang songon halak Gorik dohot Romawi na marasing sian uhum Jahudia, isara na mangoloi hagiot ni daging, manang songon halak Romawi na sai manaluhon angka bangso naung nirajaanna marhite sinjata sian bosi na mamunu hosa ni angka musunasida? Songon niajarhon ni angka ugamo nang ideologi na tatanda nuaeng di portibion nuaeng na so saurdot dohot ajaran Hakristenon do? 

Apostel Paulus mangajarhon ia ruhutruhut hadaulaton ngolu ni halak Kristen ndang be songon ruhutruhut ni Ugamo Hajahudion, jala ndang songon ruhutruhut ngolu ni  filsafat  Gorik manang ugamo nang pamingkirion Romawi. Ingkon panogunoguon ni Tondi Porbadia i do (Roma 7-8). Songon dia rumang ni panogonoguon ni Tondi Porbadia i di ngolu siganup ari, i ma na pinatorang ni apostel Paulus di bindu 12: 1-15:14. Parjolo ingkon pelehononta do ngolunta  tu Debata. Paduahon ingkon jumolo tapaimbaru pingkiranta asa tarbahen hita umboto dia lomo ni roha ni Debata di parange ni ngolunta.Ndang jadi be nasida sarombang dohot portibion ((12:1-2). 

Songon dia rumang ni i?  Dipatorang ma i di bindu 12: 3-15: 13 na marisihon na mangihut on:
Songon dia halak Kristen marparsaoran dohot dongan sama Kristen di tongatonga ni punguan parsaoran nasida (Jaha: Ekklesiologi) dipatorang di bindu 12: 3-8, i ma unang  adong angka sijalo sada silehonlehon ni Debata i manghilala na sumurung ibana sian donganna na manjala silehonlehon na asing (I ma panurirangion, panghobasion, pangapoion, pangasian dohot manguluhon), ai sama ruas ni Kristus do nasida.

Songon dia halak Kristen marparange maradophon donganna sama Kristen nang maradophon angka dongan jolma na so Kristen gariada na mamusui nasida, dipatorang ma di Rom 12: 9-21 (Jaha: Etika sosial). Diuduti do on di Rom 13: 8-14.
Songon di halak Kristen marparange maradophon pamarenta (Jaha: Etika politik), dipatorang ma di Rom 13: 1-7.
Songon dia halak Kristen na ro sian sada hasomalan di parmanganaon dohot di parminumon dohot na ro sian hasomalan ni ngolu na asing (i ma halak Jahudi dohot halak Kristen na so Jahudi) dipatorang ma i di Roma 14: 1-15: 13). Jaha: etika Relasional antar suku bangsa.

Asa, bagian na paduahon i do na gabe jamita di hita di minggu on, i ma Roma 12: 9-21: Dia do ruhutruhut parange sosial ni halak Kristen maradophon donganna Kristen nang maradophon donganna na so Kristen, tarlumobi na paburuburu nasida dohot na patupahon na jat tu nasida? 
Dibonai ma saluhut ayat 9-21 i dohot sosososo di ayat 9 asa (i) mangulahon holong, (ii) manghagigihon hajahaton dohot (iii) mangharingkothon dohot mangulahon na denggan tu saluhut halak (ayat 17). Rumang ni tolunsa dipatorang ma di dua horong, i ma:

Horong parjolo, dongan sama Kristen. Hubungan Intra-Kristen (ayat 10, 13, 16).  
Horong paduahon i ma angka na manghasogohon halak Kristen, i ma na papuruburu, patupahon na jat tu halak Kristen (ayat 14, 17-21). Hubungan antar ugamo dohot na so marugamo.
Alai asa boi tuk halak Kristen i patupahon na denggan tu duansa adong ma:
 Ruhutruhut partondion siulahonon ni halak Kristen, i ma na dipaandar di ayat 11, 13, 15).
Taida ma sadasada: 

Parjolo, mangulahon na denggan tu sama halak Kristen asa tubu parsaoran na denggan dohot na masihaholongan. Dia ma sipatupaon tu dongan sama Kristen? I ma:
i. Masijolojoloan masipasangapan (ayat 10)
ii. Mangantoi na hasea di angka na badia (ayat 13)
iii. Marsada roha  (ayat 16)
iv. Serep maradophon sama dongan (ay 16).

Paduahon, mangulahon na denggan nang tu angka na paburuburu hita halak Kristen. 

Dia ma sipatupaon tu nasida? I ma:
i. Intap ni na tarbahen hita, maniop dame di jolo ni saluhut halak (ay 18).

ii. Unang mamaloshon (ayat 17) manang marlulu alai pasahathon pamaloson tu Debata (ay 19), gariada 

iii. Mamasumasu nasida (ayat 14) na tumangkas tarida marhite na mangalehon nasida mangan dohot minum uju male manang mauas nasida (ayat 20); 

Patoluhon, partondion na mangoloi Debata, marsihohot, ringgas jala marsolidaritas hajolmaon. Ndang tarbahen ni halak Kristen patupahon duansa i sian gogona sandiri. Asa tarbahen nasida patupahon i, ingkon suan ma di roha nasida ruhut partondion na mangihut on:

i. Mangoloi Tuhan (ayat 11)
ii. Unang sumurut, alai ringgas jala martondi na girgir (ayat 11)
iii. Marlas ni roha manghirim, marbenget ni roha di haporsuhon jala jugul martangiang (ayat 12)
iv. Marlas ni roha dohot na marlas ni roha, tangis dohot na tangis (Jaha: Solidaritas hajolmaon, ayat 15).

Tolunsa na di ginjang i mansai ringkot: Mangulahon holong dohot na denggan tu dongan Kristen nang na so Kristen, jala mangulahonsa di bagasan pangoluion tu Tuhani, mardongan tondi na girgir, na marlas ni roha, na marbenget ni roha dohot na marsolidaritas hajolmaon. Impolana: Mangalo na jat marhite ulaon na denggan.

Di zaman relatifisme dohot di partingkian na lam hehe angka pangajarion parange ni ngolu mangadopi angka ketegangan-ketegangan di tongatonga ni hajolmaon nuaeng on, bahatan siala ni kepentingan ekonomi dijou do hita halak Kristen asa patuduhon na so sarombang hita dohot portibion. Tolunsa na di ginjang i mansai ringkot ingkon tapabagas dohot taparangehon di tongatonga ni bangsonta Indonesia Raya.

Parjolo, beha do parangenta maradophon donganta sama Kristen? Taulahon do na denggan tu nasida?

Paduahon, beha do parangenta maradophon donganta na so manghaholongi hita, gariada na manghasogohon dohot mamusui hita? Tapatupa do dame dohot sude halak tarlumobi dohot na so manghaholongi hita intap ni na tarbahen hita? Taula dope na denggan tu nasida songon angka naung dipatigor Debata ala ni asi ni rohaNa, ndang ala ni hasintonganta? Tapasupasu do na mamusui hita? Talehon do nasida managan dohot minum uju male, jala minum uju mauas?  

Patoluhon, beha do partondionta di na patupahon i sude? Nunga sumurut hita? Martondi na girgir dope hita manang nunga martondi na gale? Hot dope hita angka na manghirim, benget di haporsuhon, jala jugul manangiangkon na taadopi? Angka na marsolidaritas hajomaon na timbo do hita, manang nunga na holan angka na mamingkiri dirinta sandiri hita?

Di tongatonga ni masyarakat na patujolohon manang naung dipengaruhi  filsafat relatifisme i jala na manjalo ajar na marragam sian internet i, na tupa marasing sian ajar parange hadaulaton ni Hakristenon i, ingkon tapatuduhon do dia   hadaulatonta na tahaporseai jala tahaposi maradophon donganta Kristen dohot maradophon na manghasogohon hita. Ndang jadi hita meret sian na tolu i. Ingkon hot do hita. Ai marhite i do hita boi manindangi tu hadirionta songon siihuthon Jesus. Ingkon tapatuduhon ma i di tingki na tenang dohot di tingki na so tenang, isara uju masa angka krisis-krisis ni ngolu ni hajolmaon hinorhon ni angka bencana alam, krisis ekonomi, krisis sosial dohot na asing, ndang holan tu angka na tinggal jonok tu hita, alai intap ni tarbahen hita dohot ma tu angka na dao inganan ngoluna sian inganan ni ngolunta.
Dipasupasu Debata ma hita patupahon saluhutna i.(**)
  BeritaTerkait
  • Jamita Evangelium 11 Nopember 2018, Minggu XXXIV Dung Trinitatis : Mika 6: 6-8 Ulahon ma Uhum dohot Holong ni Roha di Habasaon

    4 minggu lalu

    Oleh: Pdt Dr. Robinson Butarbutar, Parsameanta, STT-HKBPDung dipanghulingi Debata Jahowa hita marhite hatana di minggu na salpu, uju i dipangido tu hita asa mangarataratai silehonlehonNa mardonganhon

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  • Jamita Evangelium, 28 Oktober 2018 (90 tahun Sumpah Pemuda) Minggu XXII Dung Trinitatis "Huria Mangulahon Ulaon Parasinirohaon" (Jesaya 58: 4-12)

    2 bulan lalu

    Sian Parsameanta: Pdt Dr Robinson ButarbutarUlaon parasinirohaon solhot do i tu hajolmaon. Molo taida angka donganta jolma mian manang mangolu di bagasan sada kondisi ni ngolu na tung maol situtu, mad

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    tahun lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    6 bulan lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb