• Home
  • Agama
  • Jamita Evangelium, 14 Oktober 2018 Minggu XX Dung Trinitatis: Pir ma Tondim jala Marsihohot (Josua 1:-6-9)
KSP Makmur Mandiri
Sabtu, 13 Oktober 2018 17:32:00

Jamita Evangelium, 14 Oktober 2018 Minggu XX Dung Trinitatis: Pir ma Tondim jala Marsihohot (Josua 1:-6-9)

BAGIKAN:
Ist
Pdt Dr Robinson Butarbutar
Oleh: Pdt Dr Robinson Butarbutar, Na tongon di Sipoholon dope dung mandohoti Sinode Godang HKBP 8-12 Oktober 2018, HP/WA: 0812-62472015

Dipangke Debata Pargogo Nasohatudosan i do hita angka jolma, angka anak dohot boruNa di portibion laho patupahon ulaon na denggan tu hajolmaon dohot tu na tinompaNa na asing, mamungka sian angka ulaon na metmet situtu sahat tu na tung balga situtu, na ringkot jala uli tu hajomaon marsasahalak sahat tu na uli dohot na ringkut tu punguan hajolmaon na balga situtu, isara punguan ni sada bangso nang punguan ni angka bangso, sian na ringkot di sada inganan na metmet, isara na ringkot tu sada jolma di inganganna mangolu dohot na ringkot di sada parsaripeon, di sada huta na metmet sahat tu na ringkot di sada kecamatan, kabupaten, propinsi dohot negara kesatuan. Sai dipangke Debata do jolma i patupahon ulaon na denggan.

Ulaon na pinasahat ni Debata tu na jinouNa i sai angka ulaon na marimpola jala marsintuhu do. Tarida do i di Bibelta on. Tarida do i tong di sejarah ni hajolmaon marsadasada na naung digurithon di angka buku sejarah ulaon ni jolma nang na so digurithon pe tahe.

Isarana, di angka luat pertanian, sian tingki pertanian na mansai tradisional sahat tu na mansai modern nuaeng on, sai adong do taida angka donganta jolma na dipangke Debata mambahen beha asa denggan pertanian i, isara angka natuatua ni huta na manjouhon asa adong dipatupa huta i dalan haroroan ni aek, asa boi tubu denggan eme, asa sude partani dapotan aek na ro tu haumana.
 
Di pertanian modern dohot post modern, na marusaha mambahen boi gumodang produksi pertanian dohot jumotjot, dipangke Debata do angka ahli pertanian patupahon i marhite angka penelitian-penelitian na menemukan benih-benih unggulan jala beha asa angka pupuk na dipangke asa denggan tubu jala marparbue suansuanan i asa unang paro sahit, isara pupuk organik. Siala ni i do umbahen na nunga tarris sipanganon di portibion, atik pe sai adong dope na so boi dapotan sipanganon ala ni hapogoson. Songon do tong di angka ragam na dalan ni ngolungolu ni jolma, gabe ndang pamaolhu be jolma I mangalului sipangononna dohot siinumonna nang pajongjong angka jabuna, sai adong do dipangke Debata lam padengganhon ngolu ni jolma i.

Di bidang pendidikan, sai dipangke Debata do angka guru dohot angka ahli pengajarion laho mangajari angka dakdanak, dohot laho mangalului dalan beha ma asa ummura angka na marsiajar hatop mengantusi pangajarion. Isara pangajarion na mendikte, gabe pangajarion na partisipatif, na marnida parsiajar i ndang holan sijalo parbinotoan, alai dohot do subjek ni parbinotoan.

Di bidang hahipason, dipangke Debata do tong angka peneliti medis laho mangalului dalan ndang umboto dia sibonsiri sahit ni hajolmaon, alai dohot do angka dalan patupa ubat na boi pamalum sahit ni jolma, jala beha asa tardungdung jolma manuhor ubat i, unang paargahu. 

Di bidang politik, isarana, dipangke Debata do sian tongatonga ni bangso na dijajah i angka na manguluhon perjuangan kemerdekaan sian angka penjajahan tradisional, modern dohot post-modern. 
Di bangsonta, dipangke Debata do Ir Sukarno Hatta laho mamboan hita ruar sian penjajahan Bolanda. Dipangke Debata do tong Gusdur (Abdul Rahman Wahid) presidenta na paopathon, mamboan bangsonta sian diskriminasi ras dohot diskriminasi agama. Dipangke Debata do tong Presiden Ir. Joko Widodo laho membangun angka infrastruktur di negaranta dalan mamboan hita ruar sian hapogoson dohot hatartadingon, asa boi bangsonta meret sian bangso na berkembang tu bangso na maju.

Jala di tongatonga ni angka keluarganta halak Kristen Batak pe, sai dijou Debata do sada, manang dua manang lobi ruas ni keluarganta i laho mamboan keluarga i tu ngolu na dumenggan, ndang holan angka ama manang ina i, alai dohot do angka ianakkon nang pahompu pe tahe, marhite angka pendidikan, usaha, nang angka ulaon na adding pinatupa nasida.

Songon i do tong najolo bangso Israel na naung malua sian parhatobanon Misir. Andorang so ditaripari nasida batang aek Jordan, andorang so dipansagihon angka tano di bariba ni Batang Aek Jordan i tu ganup houm nang marga pomparan ni si Jakob, dijou Debata si Josua anak ni si Nun, na naung manghobasi si Musa mamboan nasida ruar sian parhatobanon i dohot di pardalanan di halongonan laho mamboan nasida tu tano di taripar ni aek Jordan. Ulaon na bidang, na balga dohot na dokdok do mamboan sada bangso naung leleng di halongangan, sada bangso na nomaden hian, na sai meret, gabe sada bangso na mian di tanona, na so adong hajongjonganna hian gabe sada bangso na marhajongjongan, i ma marnampunahon tano na naung dibasabasahon Debata tu nasida, alai na tongon diingani angka bangso na asing. Manguluhon sada bangso di sada masa transisi i mansai maol do.
Bahat nari angka contoh na boi patolhasonta dison. Alai na di ginjang i nunga tuk patolhashon tu hita pammmangkeion ni Debata tu hita.

Adong do panjouonna i na so apala dokdok, alai adong do na dokdok, jala dokdok situtu, na boi mambahen na manjalo turgas panjouon  i angka hitir. Dokdok manang ndang, sai dipastihon Debata do beha asa saut panjouonNa i.  Ala diboto Debata Naumboto saluhut i do keterbatasan ni jolma i, jala ala ndang Debata jolma i, sai dipatupa Debata do ulaonNa na mansai togu laho patauhon na jinouNa i, asa boi marhite na jinouNa i saut angka na uli jala na denggan na sinangkapanNa i marhite ulaon ni na jinouNa i.

Ndang tagamon so angka hitir si Josua anak ni si Nun manjalo ulaon panjouon pinasahat ni Debata tu ibana, i ma (i) Mamboan bangso i manaripari batang aek Jordan i (ayat 2-5) dohot (ii) Mambagihon tano sidapothonon nasida I (ayat 6).   Ala ni i ma dipatogu Debata si Josua asa pir tondina, ndang monditondit rohana, unang tahutan, ai donganan ni Debata do Ibana manang tu dia ibana mangalangka.

Nian ndang dipabotohon tu hita di Josua 1:2 songon dia bagas ni Batak aek Jordan i. Adong do angka peneliti na mansura na ndang apala bagas batang aek Jordan i.  Alai ala ndang holan hinadokdok ni na mambagihon tano i sambing hape turgas pinasahat ni Debata tu si Josua (1:2-5), alai dohot do hinadokdok ni mamboan nasida manaripari aek Jordan i (1:6) na mambahen Debata Jahowa mandok tolu hali tu si Josua di ayat 6-9 on asa pir jala marsihohot tondina (ida ayat 6,7,9), jala pola didok asa unang monditnondit rohana, unang tahuton ibana ala Jahowa Debatana na mandongani ibana manang  tu dia mangalangka (ayat 9), ba ndang apala pajolohu hita mansura na bagas do aek i jala ulaon na maol do manariparisa. Ulaon na maol do mambagihon tano i.

I ma Debata Jahowa, Debata ni si Abraham, Ishak, Jakob, Josua, Debata ni Israel i, Debatantan na tatanda di bagasan Jesus Kristus Sipalua i. Sai dipatogu do hita mangulahon panjouonNa i tu hita, di tongatonga ni harajaonNa di portibion, di bagasan dohot sian tongatonga ni huria dohot di portibion, di keluarganta, di ulaonta, di sintasintanta: "Pir ma tondim unang monditondit roham" ai dongananNa do na jinouNa i manang tu dia ibana/nasida borhat. 

(Di tingki manurgashon angka siseanna Jesus di abad parjolo asa laho tu liat portibion mambaritahon barita na uli, dipapos Ibana do roha nasida marhite na mandok na dongananna nasida rasi rasa ro ajal ni hasiangan on, ndang holan intap ni ujung ni ngolu nasida.

Hata ni Debata na tu si Josua i do tong hataNa tu hita halak Kristen Batak di sandok portibion nuaeng on. Songon naung tinotophon Sinode Godang HKBP di bulan Oktober 2014, ia sidungdungonta di bagasan taontaon na ro on songon huria ni Kristus i ma gabe pasupasu tu donganta jolma, marhite angka ulaonta na denggan tu donganta jolma songon hataridaan ni pangoloionta tu patikNa, patik holong I ala nunga dihaholongi Debata hita mansai bagas, rimbo dohot bidang di bagasan Kristus Jesus Tuhanta i. Di ganup pargulmiton ni ngolunta dijou Debata do hita patupahon na denggan tu ganup donganta jolma (Rom 12: 17b, patudos 1 Tes 5: 15, Gal 6: 10, 2 Pet 1:7). 

Pir ma tondim jala marsihohot, ninna Tuhanta tu hita angka ruas ni HKBP di bagasan minggu on, unang tahutan, ai na dongananNa do hita manang tu dia hita mangalangka jala mangulahon angka ulaon na denggan marojahan tu impola ni hataNa, I ma manghaholongi dongan jolma doshon dirinta?  

Boasa ma di partingkianta nuaeng mansai ringkot hita paposhon rohanta tu Debatanta Natumibul i na naung mandok hataNa tu hita asa pir tondinta, ala na sai dongananNa do hita?
Suraon do na tongon angka hitir hita halak Kristen Batak nuaeng on di pardalanan ni ngolu nang ulaonta, marsasahalak nang marsasapunguan? Molo angka halak Kristen Batak di tingkitingki na salpu di Indonesia dohot di sandok portibion sai martondi na pir dohot sai marroha na marsihohot do hita patupahon angka na denggan mamungka na mangaranto nasida tu sandok Indonesia on, i ma membangun Indonesia Raya, di angka luat na suhi sahat tu angka luat na ribur, sai martondi na pir dohot marsihohot, suraon do di tingkinta nuaeng nunga tabonai ndang martondi na pir ala ni bahat dohot dokdok ni tantangan na taadopi di na patupa angka na denggan hita di ulaonta be, manang na songon abdi negara sipil, militer, polisi, hakim, dna, manang na songon pengusaha na parohon ulaon tu donganta jolma, manang songon politisi mandapothon musim pemilihan umum serentak di bulan opat taon na ro laho mambahen uhum na denggan di tongatonga ni bangsonta? Suraon do angka ruasta partani angka hitir siala ni maol ni mangalului na ringkot asa boi pasingkolahon angka ianakkon manang pahompunta mandungdung sintasinta nasida? 

Suraon do, siala ni parmaju ni parbinotoan ni jolma di portibion na pola sahat tu hatauon patupahon alat-alat teknologi na canggih na gabe dao dumenggan mangulahon ulaonna sian hatauon ni jolma i sandiri, i ma na ginoaranna artificial intelligence, manang robotisasi, na mambahen bahat ma angka donganta jolma, ra dohot angka anak dohot borunta muse na ingkon agoan karejo na naung binuat ni  angka masin na pistar i? Tu dia ma annon hita halak Kristen Batak na so timbo parbinotoanna di zaman artifial intelligence dohot robotisasi on?
Suraon do songon halak Kristen hita di Indonesia di ariari na ro gabe boi ndang manghilala hita angka na mangihuthon Jesus songon warga negarai kelas satu, ai nunga sanga margurasa tondi na mambahen pamolatmolatan di tongatonga ni bangsonta mamungka tolu pulu taon na salpu, na mambahen gabe kerja keras nuaeng pamarentanta mangotapi tondi na songon i? Mangihuthon Kapoldasu A. Harianto dina martona ibana tu ruas ni sinode godang HKBP di Sipoholon, Kamis tgl 11.10, umbahen na adong pe angka na naeng mamolatmolat bangsonta ia tujuan nasida i ma laho menguasai sumber daya alama dohot torop ni bangso Indonesia. Beha ma masa depanta songon sada bangso molo marhasil do angka bangso na gogo i laho mambuat angka sumber alamta i?

Suraon do tongon tahilala nuaeng on di angka inganan ngolu nang ulaonta i lam maol patupahon na denggan na marragam i tu donganta jolma ai gabe angka jolma na mangulahon ulaon hajahatan do na gabe sitangihononhon suara nang lomo ni rohana, gabe manginsuhut angka siula na denggan, so marimba halak Kristen Batak?

Suraon do tongon tahilala na lam maol hita ruas ni HKBP dapotan inganan marsikkola, dapotan ulaon, dohot patupahon ulaonta na marragam songon i nang promosi asa boi hita marhite sian i patupahon na denggan di ngolunta, tu donganta sabagas, donganta sahuria, donganta sahuta, donganta jolma di tongatonga ni bangsonta Indonesia on ala siihuthon Kristus hita, ala taula ulaonta denggandenggan, ndang sian dalan na so denggan, korupsi, manangko?

Manang dia pe tahilala nuaeng jala songon dia pe dokdok ni siadopanta nuaeng laho patupahon ulaon na denggan di ngolun songon dalanta mandok mauliate tu Debata siala naung ditobus Ibana hita mansai arga di bagasan Jesus Kristus, sadarion ma hita dipangkulingi Debata unang tahutan, alai asa pir tondinta, marsihohot di haporseaonta nang di ulaon na denggan na taula.

Mansai ringkot do hita songon halak Kristen Batak manorushon tradisi ni halak Kristen Batak na so olo tahutan, baliksa sai martondi na pir dohot marsihohot ia angka halak Kristen Batak i, tung pogos pe ngolunta. Molo adong sanga tubu jala marserak tu tongatonganta tondi hatahuton, ndang tondi na pir dohot roha na marsihohot, denggan ma hita nuaeng mambungka rohanta asa olo panghulingon ni hata ni Debata. 

Molo taida angka bangso na maju di portibion di marragam bidang, di parbinotoan, ekonomi, politik, hahipason, sude na i ndang dapot nasida molo ndang martondi na pir nasida, molo ndang marroha na marsihohot nasida. Bahat do angka na maol na naung diadopi nasida di pardalanan ni ngolu nasida songon sada bangso. Ala pinompar ni halak Kristen Batak na martondi na pir dohot roha na marsihothot do halak Kristen Batak, atik pe sai na adong do na so haru sahat tu partondi na songon i di huta on manang di huta an, di profesi on manang di profesi an, denggan do hita na mangolu di tongatonga ni bangsonta on rap dohot angka donganta sabangso na asing bekerja sama patoguhon tondi na pir dohot roha na marsihohot di negaranta on laho mandungdung sintasinta ni bangsonta: Menjadi negara adil dan makmur, tigor dohot mardohar.

Molo tahilala nan ang di tongatonga ni ruas ni HKBP adong tubu mentalitas na tahutan, nunga tingkina di tongatonga ni parsaoran nang pangarionta, di jabu nang di duru ni jabu, asa tapatupa angka pangajarion nang pelatihan na patoguhon karakter na martondi na pir dohot marroha na marsihohot di na mangalo na so tigor, di na patupahon na denggan. Boi do angka contoh-contoh na adong di tongatonga ni halak Kristen Batak sian najolo sahat tu nuaeng angka halak Kristen na martondi na pir dohot marroha na marsihohot mangulahon na denggan dohot mangalo na jat, boi do angka goar nasida tatariashon tu angka sundut na umposo tarlumobi.  Dipasupasu Tuhanta ma hita manjangkon hataNa tu hita sadarion. Tahaposi ma Ibana na mandongani hita. Amen.
  BeritaTerkait
  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    6 bulan lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  • Jamita Evangelium, 28 Oktober 2018 (90 tahun Sumpah Pemuda) Minggu XXII Dung Trinitatis "Huria Mangulahon Ulaon Parasinirohaon" (Jesaya 58: 4-12)

    4 minggu lalu

    Sian Parsameanta: Pdt Dr Robinson ButarbutarUlaon parasinirohaon solhot do i tu hajolmaon. Molo taida angka donganta jolma mian manang mangolu di bagasan sada kondisi ni ngolu na tung maol situtu, mad

  • Jamita Evangelium, 18 Nopember 2018, Minggu XXV Dung Trinitatis: Taluhon ma Hajahaton Marhite Ulaon na Denggan (Roma 12: 9-21)

    4 hari lalu

    Oleh: Pdt Dr Robinson ButarbutarSada sian pinompar ni Zaman Pencerahan (Inggris: Renaisance; German: Aufklaerung) na umpudi tubu di pangujung ni abad pa-20-hon alai margurasa tong sahat tu nuaeng on,

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb