• Home
  • Agama
  • Jamita Evangelium, 12 Mei 2019, "Mian di bagasan Jesus Kristus asa Marparbue", Johannes 15: 1-8, Minggu Jubilate
KSP Makmur Mandiri
Sabtu, 11 Mei 2019 17:52:00

Jamita Evangelium, 12 Mei 2019, "Mian di bagasan Jesus Kristus asa Marparbue", Johannes 15: 1-8, Minggu Jubilate

BAGIKAN:
Ist
Pdt Dr Robinson Butarbutar
Oleh: Pdt Robinson Butarbutar, STT HKBP

Tingki ndang ndang adong dope media komunikasi ni angka peduduk ni portibion marhitte Internet andorang so taon 1950-an, marungkil do ama dohot ina nang angka dakdanak molo ndang rap  mian di sada huta nasida. Molo marsikkola manang mangula nasida di dua inganan manang huta nang kota na marasing, sai marusaha do nasida saboiboina dohot maraturan tinggal di ganup bornginna i di huta na dos. Molo ndang tarbahensa i, ba pinomat sahali saminggu manang sahali dua minggu manang sahali sabulan, alai laos adong do na sahali onom bulan rap mian di inganan na dos. Angka dakdanak na marsikkola pe sai diusahahon do asa mulak uju libur tu huta ni natorasna, asa boi mian di sada inganan nasida dohot natuatuana.  Molo tung adong pe na ingkon tinggal ndang rap dohot sinondukna di bagasan onom bulan manang sataon manang lobi sian i disurat nasida do barita taringot tu dirina, manang marhite telefon boi do nasida masipangkulingan jarak jauh. Molo ndang dipatupa i, boi do masa na so dihalomohon roha. Molo ndang dipatupa i boi ma tubu angka hamaolon di tongatonga ni saripe i. 

Parsaripeon boi do gabe susa jala sirang siala ndang rap be ama dohot ina manang ndang tarbahen ni toropan halak manongtong berkomunikasi sama nasida. Mansai ringkot do na rap mian i.

Alai dung berkembang internet on tarlumobi di ujung ni abad pa-20 on jala lam hatop di abad pa-21-hon, nunga boi diorui angka ancaman na ro tu pardongan saripeon ni ama dohot ina na so rap tinggal di sada huta.

Marragam dalan boi dipatupa asa boi tongtong berkomunikasi dumenggan jala jumotjot nasida. Boi do nasida martelefon mamangke Video Whats Up, asa boi nasida masiidaan di na manghatai. Boi ma sihol ni roha dipasombu, atik pe ndang ala mansai singkop songon ninasingkop ni na rap mian di sada inganan di tingki na dos. Nunga diparar i. Asa, ndang apala tung dipasiding angka jolma mangalului ulaon dohot mulaulaon di inganan na tung dao sian donganna saripe, molo tung ingkon i nama, ai boi do nasida marhite internet masipanghulingan sian sihadaoan. Haradeon ni pesawat terbang na lam canggih kedepatanna  boi do patauhon nasida pajumpang bohi dohot rap mian satongkin, manang di ujung ni minggu manang marhite mambuat tingki libur. Alai na tangkas, mansai ringkot do na rap mian i. 

Songon i do diida Jesus Kristus Tutanta Sipalua hita i marnida hinaringkot ni na mian hita angka siseanna/angka siihuthon Ibana. Ndang tarbahen hita marparbue (Joh  15: 4), lam ma marparbue na godang (Joh 15: 5 dohot 8), molo ndang taoloi pangidoanNa asa mian hita rap dohot Ibana.  HataNa na manosoi hita asa mian rap dohot Ibana ganup ari dipatolhas Ibana na jolo uju naeng marsirang Ibana di pardagingon sian nasida siala adopanNa ma panaonon di hau pinorsilang, ditanom, hehe jala manangkok tu banua ginjang. I hataNa tu angka siseanna na parjolo i. Laos i do hataNa nuaeng tu hita angka siihuthon Ibana di abad pa-21-hon on di angka inganan ngolu nang ulaonta be. Lao patangkashon hasisintong ni hinaringkot ni na mian i hita dohot Ibana, digombarhon Ibana ma marhite na mandok ia hita on ranting ni hau Anggur do, Iban ahau Anggur i, jala Ama i Tukang Porlak Anggur i na manggotap ranting na so marparbue, jala paiashon ranting na marparbue asa lam ganda parbuena. Molo ndang mian hita rap dohot Ibana, ndang marparbue hita, songon ranting ni hau anggur i na so tuk marparbue ianggo sian dirina, ingkon na sada do ia ranting i tu bona ni hau anggur i. Molo mian hita dohot Jesus Kristus ba marparbue jala marparbue godang ma hita, ai manang aha pe dipangido rohanta gabe jumpangta ma.  

Alai molo ndang mian hita rap dohot Jesus ba so holan ndang marpue hita be, alai gabe digotap ma hita sian hau anggur i. Ndang adong be daista tu Jesus. Ndang holan digotap tahe, alai laos dipalungguk dohot didanggurhon tu api laos gor ma. Ranting ni hau anggur naung gor ba ndang adong be ujung ni I (Joh 15: 6). Tona ni Jesus tu nasida sisean na parjolo i nang tu hita ruas ni huria ni Kristus di portibion i ma: Songon siseanna hita, songon ruas ni huria/pamatang ni Kristus i hita, songon angka naung pinaluaNa dohot naung pinorbadiaanNa hita ingkon marparbue do hita. Asa boi hita marparbue, jala marparbue na godang ingkon mian do hita raphon Ibana. Na ringkot di hita dalanta marparbue lehononna do. 

Gabe marsangap ma Ama i siala ni parbuenta i di jolo ni angka jolma di humaliangta. Alai molo ndang mian hita raphon Ibana, tung so tarbahen hita marparbue. Gariada tahe uhumonNa ma hita marhite na manggotap hita sian Ibana. 

Siala ni i, dung songon i lelengta gabe ruas ni pamatang ni Kristus, gabe ranting ni Kristus Jesus hau anggur i, ringkot do tasungkunhon diri nang rohanta be sungkunsungkun na mangihut on: Nunga marparbue hasiseananta saleleng on, songon hataridaan ni na naung dipatigor Debata hita di joloNa marhite mudar ni Jesus Kristus na durus di hau pinorsilang i? 

Taida jo tu pudi di pardalanan ni ngolunta. Nunga halak Kristen na marparbuehon parbue na denggan hita? Parbue na denggan i boi do marragam rumangna. Isarana: Adong do sada, dua, manang piga, bahat donganta jolma di portibion naung tahobasi denggan, asa dumenggan ngoluna, asa dapotan sipanganon dohot siinumon ibana, asa marpahean ibana, asa adong ingananna mian di ngolu on, asa pistar ibana, asa tau ibana mandungdung sintasintana di ngolu on, asa termotivasi ibana tong patupa na denggan di ngoluna, asa hipas ibana, asa las rohana, asa malua ibana sian parhatobanon, asa gabe halak na mandiri ibana, asa gaba halak na mananda holong ni roha ni Kristus Jesus ibana, asa ditanda Ibana Jesus Kristus, asa dipasangap ibana/nasida Debata, asa mardame parsaripeonna, asa malum sahitna ala tatangianghon dohot taurupi pangubationna, asa denggan marsikkolai angka ianakkonna, asa boi dipromosihon ibana di ulaonna, unang baliksa gabe didemosi, asa denggan parbue ni haumana, asa denggan na tinigatigahonna, asa boi ibana mardekke jala denggan ngoluna sian pardengkeanna i (nelayan), dohot angka rumang na asing na boi patupaonta.  

Ala angka na naung ditobus Jesus, angka ranting na naung pinaiasna do hita, diarop do sian hita parbue na godang, jala dipatau do hita marparbuehon parbue na godang, ala manang aha na tapangido tu Ibana jumpang hita do. Di jabu denggan holong ni rohanta maradophon donganta saripe, maradophon angka ianakkonta, maradophon angka pinompar ni damang dohot dainang ta. Di inganan ulaonta, sian na mansai metmet na manarihon saotik halak sihaholongonta dohot sisarihonona sahat tu na mansai balga na manarihon hadoharon ni ngolu ni bahat halak, isara gabe pejabat publik di negaranta, manang gabe uluan di punguan ni huria ni Kristus sian uluan ni huria marsadasada sahat tu uluan ni huria resort, distrik nang hatopan na manguluhon ulaon ni huria na marragam i, nunga bahat na tasarihon, nunga bahat ngoluna lam uli siala ni ulaonta.

Molo nunga boi tangkas taida naung songon i denggan parbue ni ngolunta songon sisean ni Jesus Kristus Sipalua i, tapuji ma Tuhanta naung mangonjar rohanta marparbue, dohot patauhon hita marparbue, gabe marsangap jala marparbue Tuhanta i. Marjubilate ma hita sadarion, ala nunga songon i ngolunta saleleng on, manang sadia pe umurta, remaja dope, naposo bulung dope, manang naung lansia hita, satongkin nari nama mangihuthon etongetong ni hajolmaon dohot hahipasonta marujung ngolu di portibion? 

Alai molo tahilala na so marparbue dope hita, otik pe ndang marparbue, mansai ringkot sungkunonta, so tung siala ni na so mian do hita rap dohot Jesus Kristus umbahen songon i ngolunta i, ngolu na so marparbue. Ndang hea jala ndang ringgas hita marsaor dohot Jesus Kristus Tuhanta i ganup ari marhite na manjaha dohot mangulahon pangajarionNa na naung andar di angka evangelium nang angka surat ni angka apostel na di Padan Naimbaru i. So tung ala parangenta sai mamparangehon angka parange ni ngolu na robi, hape nunga tardidi hita tu bagasan goar ni Debata Sitolusada i, hape nunga manghatindangkon haporseaon hita na manangiangkon hita asa margogo hita mamparbuehon parbue na denggan, parange na denggan. 

Molo songon i, denggan ma mamungka sadari on, manolsoli dirina, dohot mangido asi ni roha ni Tuhanta asa disesa angka dosanta, dung i di ariary na ro asa tapungka mamparbue. Mansai ringkot i, so tung gabe ro Tuhanta Jesus mandok di bagasan rohaNa dohot pasahathon tonaNa tu partondionta na rantingNa songong hau anggur na naung masak hita, na ingkon dibolongkon, dipalungguk jala didanggurhon tu api jala gor ma, ndang holan di ari haroro ni Jesus Kristus Paduahalihon di ujung ni saluhut, alai nuaeng di ngolunta di portibion dope. Gabe hansit tahilala ngolunta on. Gabe hira jolma na marngolu na so marlapatan songon i ngolunta on, hira songon alogo na mamolos jala ndang adong bogas haroroanna dohot bogas haboborhatna.

Boasa di tingki minggu Jubilate on dipillit jamita taringot tu hinaringkotta mian rap dohot Jesus asa marparbue hita, jala molo so mian ndang marparbue hita? Ala di partingkianta nuaeng di sandok portibion, diharingkothon portibion do angka parbue ni ngolu nang haporseaon ni angka siihuthon Jesus mangurupi hajolmaon mangadopi parungkilon hajolmaon di portibion. Dua do siala ni pamujionta tu Debata nuaeng. Naparjolo i ma ala nunga marparbue dohot marparbue na godang ngolunta nang hasiseanonta songon sisomba dohot siihuthon Jesus. Alai napaduahon i ma ala asi dope roha ni Debata tu hita, olo dope Ibana manalpuhon angka hahuranganta di bagasan Jesus Kristus Tuhanta i:  "Martua do halak na disesa Debata dosana.

Napatoluhon, ala diarop Debata dope sian hita angka parbue haporseaon dohot hasiseananta na ramos dalanNa patuhabon angka na uli tu hajolmaon bahen sangap di goarNa. Margogo ma hita angka sisean ni Jesus Kristus di portibion nuaeng. Marjubilate ma hita ala diparar Debata dope hita angka sisean ni Kristus patupa i sude. Alai ndang tarbahen hita i sude molo so sai mian hita rap dohot Jesus Kristus. 

Tapatupa ma ulaon na manghalashon pamararion ni ngolunta umbahen ro Ibana manjou hita, i ma angka ulaon na mamparbuehon hasiseananta. Unang baliksa, tong ndang tapasolhot tu Jesus Kristus hape nunga taboto ia ujung ni angka na songon i i ma dibolongkon, dipalungguk jala didanggurhon tu api na so ra mintop di haroroNa muse, alai nang nuaeng adopanta ma ngolu na sai susa. Amen.
  BeritaTerkait
  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    2 tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Minggu Letare, 11 Maret 2018, Evangelium Johannes 15: 9-17 (Jesaya 66: 10a), Letare: Marlas Ni Roha Ma Hamu Ala Debata Manghaholongi Jala Mamasumasu Hita

    tahun lalu

    Oleh: Pdt Dr. Robinson ButarbutarA. Dihasiholi Debata asa marlas ni roha jolma i.Songon angka na porsea ni Debata Sitompa, Sipalua, Siparmudumudu ngolunta sian bortian ni dainang sahat tu sadarion, ta

  • Jamita Evangelium 20 Januari 2019, Minggu II Dung Epiphanias: Hagogoon ni Debata na pangoluhon (Markus 1: 21-28)

    4 bulan lalu

    Oleh: Pdt. Dr. Robinson Butarbutar, sian Parsameanta, STT-HKBP. WA/HP: 0812-62472015Di taon 69/70 dung Kristus, di na manurathon Evangeliumna si Markus, i ma sahalak donganta siihuthon Jesus sian gene

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    2 tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium, Minggu Jubilate, 22 April 2018: Marlas ni Roha di Bagasan Tuhan i (1 Tessalonik 2: 13-20)

    tahun lalu

    Oleh: Pdt Dr. Robinson Butarbutar, Sian Parsameanta, STT-HKBPJubilate = Marolopolop tu Debata Sandok Tanoon1.Molo tajaha surat 1 Tessalonika on sian bona sahat tu ujung, tangkas situtu do digurithon&n

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb