• Home
  • Agama
  • Hata i do hangoluan (Poda 4: 18-27)
KSP Makmur Mandiri
Kamis, 07 Maret 2019 18:59:00

Jamita Evangelium, 10 Maret 2019 Minggu Invocavit (Jouonna ma ahu, jadi alusanHu ma ibana)

Hata i do hangoluan (Poda 4: 18-27)

BAGIKAN:
Dok Pribadi
Pdt Dr Robinson Butarbutar
Oleh: Pdt Dr. Robinson Butarbutar 
Parsameanta di STT-HKBP, HP/WA 0812-62472015

Di Minggu Invocavit ditogihon do hita angka ruas ni huria asa lam manghaposi na, molo joujou hita tu Debata, sai alusonNa do hita. Na gabe jamita na dienet di minggu Invokavit somalna sian turpuk na manggurithon taringot tu joujou ni bangsoNa tu Ibana na Suntimbul dohot Sunhinagogo  i do, na mangidohon pandonganion, pangurupion, dohot pamargogoionNa tu hita di pardalanan ni ngolunta.  Di bagasan pardalanan ni ngol ni na porsea I sian najolo sahat tu nuaeng sai tangkas do hinasintong ni tona minggu Invocavit i. 

Alai sipata dienet do tong jamita di minggu Invocavit sian turpuk na mangondolhon panjouonNa tu hita marhite hataNa, asa tinggil sipareonta manangihon hataNa, asa momos tapeop hataNa di bagasan rohanta, asa tajagai rohanta na gabe inganan parmianan ni hataNa i unang masuk na jahat tusi, unang taoloi na maralo tu hata ni Debata, jala asa manulus simalolongta  tigor manuju tu jolo di bagasan na mameop hataNa, ndang mubauba, nang plin-plan, ai sian hataNa i do hangoluonta, ai marhite i do boi tarjagahon hita pamanganta sian angka hata ansiansi, unang gabe parbibir sijubajabi bibirta.  

Molo taoloi joujou ni Debata na opat i, i ma (i) manangihon tinggil, (ii) mameopsa momos di bagasan rohanta, (iii) Tigor simalolongta manuju tu jolo rap dohot hataNa i, hot unang manimbil tu siamun hambirang gabe mangoloi hajahaton, alai mardalan di lapang ni hatigoran jala (iv) Tapadao bibirta sian na mangoloi na maralo tu hataNa i, ba targoar ma hita na bisuk, songon na niondolhon ni Jesus Kristus di ujung ni jamita na di dolok, i ma na tarsurat di Mat 7: 26-27).

Di bagasan pangantusion minggu Invocavit na paduahon i do ia jamita di hita sadarion, i ma sian Poda 4: 18-27. Tutu ndang sian  angka buku uhum manang  angka buku sejarah songon i ndang sian angka buku panurirang dienet gabe jamita di hita, alai na dienet sian buku habisuhon (buku hikmat) na adong di Bibel Padan Narobi i do, i ma sian Buku Habisuhon na tumua, i ma  Poda sian Raja Salomo (na dos sundungna sian buku Psalmen), ndang sian buku habisuhon na ruar umpudi sian buku habisuhon na parjolo I, isara buku ni si Job dohot Parjamita. Alai tardos do ojahan ni buku Habisuhon na tumua sian buku uhum, buku sejarah nang buku panurirang i. Buku uhum mandok angka na so tangi di dohot na so momos maniop angka patik ni Debata, ba hona uhum. Na manangihon dohot na mameop gomos dapotan tua sian Debata. 

Di buku sejarah dipatuduhon marragam contoh songon dia do ngolu ni angka na porsea manang raja na so tangi di manang na so mameop patik ni Debata. Na tangi dapotan pasupasu. Na so tangi dohot mameopsa huhut mangulahonsa taruhum, ndang holan ibana na taruhum alai dohot do bangso na niuluhonna. Di buku ni angka panurirang, joujou sian hata ni Debata tu angka raja asa muba sian hajahatonna. Molo muba ndang jadi hona uhum, gariada dipasupasu Debata manang diorui uhum, manang disundati uhum.  Alai molo ndang muba tung tangkas situtu do uhum i, hatop manang leleng. Ndang adong na tuk mangubasa.  
 
Di buku habisuhon, ndang apala hatangian dohot pameopon di patik ni Debata didok, alai di hata bisuk ni parpsalmen do ianggo na diondolhon, atik pe angka hata habisuhon i marharoroan manang marojahan tu patik i do, lomo ni roha ni Debata, sian/di hataNa do. Isi ni buku habisuhon manjouhon tu ganup na jumahasa asa tangi di jala rade mameop angka hata habisuhon I, asa mangolu, unang mago. 

Boasa ingkon joujou ni parhata habisuhon na di Poda Raja Salomo i dipangke gabe jamita dohot ojahan ni  jamita di minggu Invocavit di tongatonga ni hurianta sadarion?  Boasa ingkon bindu 4: 18-25 di bagasan sada topik na mansai togu na mangondolhon hata i do habisuhon na ingkon sitangihonon, sipeopon dohot togu, tiopon so mubauba, ala i do hangoluan di hita? "Ale anaha, sai parateatehon ma angka hatangki, tarehon ma pinggolmu tumangihon angka hatangki?" (Poda 4: 20).

Ala di bindu 4 ayat 20-22 i do impola, i ma na manjouhon asa tangihonon, peopon jala gabe orientasi ni ngolu ma angka hatana i, hape nunga dibonai di ayat 1-13 dohot bindu 3 taringot tu angka dia ma angka hata ni parhabisuhon on, denggan do taida angka dia ma i, asa angka i na tatangihon, tapeop dohot na gabe orientasi ni ngolu tu hita tu joloan on, i ma:

Parjolo, manangihon pangajaran  nang tona ni natoras (ayat 1-6), alai  

Napaduahon, mangguruhon, manuhori, mamparhamaolhon dohot manghaholongi pangantusion dohot hapistaran (ayat 7-9),  

Napatoluhuon, mardalan di angka lapang hatigoran (ay 11), jala    
Sian bindu 3,  marhaposan tu Jahowa dohot ndang manoishon pangajaran ni Jahowa (Poda 3: 5, 11).

Opatsa  dipangke, ndang holan manangihon ajar ni natoras, alai ingkon dohot do na mangguruhon pangantusion nang parbinotoan, dohot mamangke hata bisuk gabe orientasi ni ngolu, mardalan di angka lapang hatigora, alai dohot do marhaposan tu Jahowa.   

Boasa mansai ringkot on di hita halak Kristen Batak di tingki on?
Suraon do i siala ndang tangi be angka dakdanak, remaja, naposo bulung, nang angka keluarga na umposo di angka ajar ni natorasnasida, gabe tumangian nasida tu na pinarsiajarannasida sian marragam sumber parbinotoan na pinarade ni angka internet, na mambahen gabe mansai bahat pargutugutuan ni natoras dohot angka ianakkonnasida? 

Alai, ala di tingki na dos, diondolhon hinaringkot ni mangguruhon, manuhori, mamparhamaolhon dohot manghaholongi pangantusion dohot hapistaran, suraon  ndang holan ala ndang tangi be angka sundut naumposo tu angka ton ani natorasna, alai suraon do ala nunga humurang natoras mangantusi angka ianakkonna, ala nang natoras i ndang be mangguruhon pangantusion taringot tu songon dia do ngolu ni angka ianakkon nuaeng on? 

Sotung maon sai holan na binoto ni natoras na ginuruhonna sian tingki na naung salpu na so tuk be pangkeon mangantusi jolma sinuaeng on na pinangke ni natoras laho mangantusi ianakkonna, hape nunga tung di portibi parbinotoan na andul asing nuaeng on di angka sundut na umposo, gabe ndang hea be tarbahen ni natoras manghatai dohot ianakkonnanasida dohot hata na boi diantusi angka ianakkonna? 

Siala na so masiantusan be natoras tu ianakkonna, gabe ndang apala dihasiholi angka ianakkon i ma maian di jabu dung sidung marsikkola, gabe marmeam dohot angka donganna satorbang dohot sakoji nama bahatan tingkina dipangke, ndang holan di duru ni jabu, alai jumotjotan nuaeng di bagasan jabu dohot angka donganna di sandok portibion, na tupan dang haru denggan tu hagogodang ni pangantusion ni ianakkon i?

Manang suraon do ala nunga moru hiras ni roha ni angka sundut naumposo marsiajar denggan di tongatonga ni partingkianta na arop di angka sundut na umposo asa ringgas mangguruhon angka parbinotoan dohot pangantusion di tongatonga ni masyarakat intelektual nuaeng, na pola nunga masuk tu era revolusi industri napaopathon na di bagasanna mansai godang angka parbinotoan na ingkon parsiajaran, ndang holan angka parbinotoan teknis, alai dohot do angka habisuhon na ringkot tu ngolu nang ulaon na lam denggan?  

Suraon nunga tartading hita halak Kristen Batak di Indonesia on, manang halak Indonesia di portibion, mangguruhon angka pangantusion na marojanhan tu hata habisuhon di hatani Debata laho parsidohot membangun bangsonta na marragam on? Dia do pangantusion na ingkon siguruhononta dohot situhoronta? Tuk do holan parbinotoan teknis, gabe lupa hita manosoi tu sundut na umpposo asa dohot tong mamarsiajari angka parbinotoan dohot habisuhon laho marusaha, membangun keluarga na hamronis, na masihaholongan, dst?

Boasa diulakhon hita songon ruas ni HKBP asa olo mardalan di angka lapang hatigoran (Heber: tsedeq)? Suraon do ala ndang be tahasiholi patupa hatigoran, gabe patupa angka ulaon na maralo tu hatigoran nataula? 

Sotung siala ndang dipatupa angka ianakkon be hatigoran tu angka natorasna na naung loja pagodanggodanghon nasida, isara na tarida di hinaholit ni angka ianakkon naung denggan ngoluna manarihon angka natorasnasida naung matua jala so margogo?

Sotung ala dipangke angka naung mangguruhon dohot manuhori parbinotoan dohot pangantusion gabe dipatupa angka na so tigor? Angka na malo di ilmu teknologi, patupa na so tigor maradophon angka na metmet, na pogos, nang angka na tinompa na asing?

So tung ala ndang tung ringgas be ruas ni HKBP mangolu di bagasan dohot mamartahanhon hatigoran di tongatonga ni bangsonta nang di tongatonga ni hurianta?

Suraon do siala ndang be marpangusandean tu Debata bahatan ruasta, marhite na manoishon pangajarionNa, manghorhon gabe susa ngolunta?

Ala sian hataNa i do hangoluan, sadarion ingkon tahabaranihon do manungkun beha do hita angka na porsea di Debata Sitolusada i haradeonta:
Manangihon Natuatuanta
Manangihon, mameop, dohot mambahen hata ni Debata gabe orientasinta di ngolu on saleleng on.

Mardalani di lapanga ni hatigoran?

Manjagai pamanganta sian bibir na so diparenta angka hata habisuhon na tolu na di ginjang i? 
Tarimangrimangi ma di bagasan rohanta. Molo taula tolunsa, sian i do ro hangoluan di hita.  Dijou Debata hita nuaeng asa tinggil manangihon, togu mameop di bagasan rohanta angka hata bisuk na di ginjang i, mambahensa gabe orientasi ni ngolunta tu jolo, ai sian i do ro hangoluan tu hita. 

Molo naeng mangolu hita, molo asa martua hita di hangoluan na denggan, denggan do taoloi angka hata bisuk na opat na di ginjang i, sudena marojahan di hata ni Debata.(*)
  BeritaTerkait
  • Jamita Evangelium, 4 Nopember 2018 Minggu XXIII Dung Trinitatis 2 Tim 1: 6-14 "Paratarata ma Silehonlehon ni Debata na Sahat tu Ho"

    5 bulan lalu

    Sian Parsameanta, STT-HKBP, Pdt Dr. Robinson ButarbutarDung manjonok marumur dua ribu taon pardalanan ni huria ni pinajongjong ni Jesus Kristus di portibion marhite ulaon ni TondiNa Tondi Porbadia di

  • Jamita Evangelium Minggu Advent IV 23 Desember 2018 Maimaima Asi ni roha ni Debata Judas 1: 17-21

    3 bulan lalu

    Oleh: Pdt Dr. Robinson ButarbutarSian Parsameanta, STT-HKBP Pematangsiantar.HP/WA 0812-62472015Di Minggu Advent Paopathon on,sadari nari andorang tapatupa borngin parningotan hatutubu ni Siaplua i (24

  • Ini Tujuh Nilai Budaya Batak Toba sebagai Kearifan Lokal Menurut Pastor Dr. Herman Nainggolan, OFMCap

    3 tahun lalu

    Medan (Pelita Batak):   Setiap keluarga sebagai anggota masyarakat kiranya perlu menggali dan menghidup nilai-nilai dalam budaya dalam kaitannya dengan sikap hidup dan etika bisnis Bat

  • Marsisulu

    2 tahun lalu

    Marsisulu - on ma sada hasomalan/ tradisi na jolo di luat nami. Tano ngali na margoar Lumban Silintong Doloksanggul. Nihaliangan do tataring,  gor ma soban dipatuba tuba, laho mangalo ngali ni

  • Pamingkirion tu Parsiranggutan di Ekklesiologi HKBP di Rapot Pandita HKBP Oktober 2017

    2 tahun lalu

    I. Pamuhai Di Sinode Godang HKBP September 2016 na salpu, ruas ni sinode do ahu songon Plt. Direktur Sikkola Pandita. Disi tangkas do soara ni bahat parsinode asa diamandemen sistem pamil

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb