KSP Makmur Mandiri
Minggu, 11 Desember 2016 20:53:00

Tangiang Pangondian

Eloi - Eloi... Lama Sabachtani

Oleh : Sampe L. Purba
BAGIKAN:
Ist
Sampe L Purba
Ale Tuhan Jahowa Martua Debata, bona ni hatuaon pangondian nami marsundut sundut, di bagasan bonos dohot lomos namaheu ro do hami tedek mangalu aluhon sorat ni arsaknami tu adopanMu di langgatan habadiaonMi. Ai nunga ro mangarongom jala mangonjar hami  angka na marpahean saksak  dohot bulang bulang tarsongon si goliat, rumang tu antuasu na  pajolo gogo papudi uhum jala manundalhon ugari na uli di  luat negara nami on. 
 
Nunga hira namaisolat hami di  panjaean, partalian nang pandaraman napinarsaulihonMi marhite pasu pasuM. Hape rap panean do hami nian di kemerdekaan na hinangaluthon ni Ompu nami rap dohot hombar balok. Tangkas do angka Ompung nami naparjoloi dohot Amanta Sukarno maruari jala marpadan na so jadi mardingkan tu sude ruas dohot  bangso ni Indonesia on. Dompak marmeme anak, dompak marmeme boru. Si sada lungun si sada tohap,  mangangkat rap tu ginjang manimbuk rap tu toru, siula diimanabe marpadot dohot mangarodoti tu hamajuon i. 
 
Hape ia nuaeng da Ompung Mula Jadi Na bolon, Debata Sori Debata Parlinggoman,  nunga disosak hami jilmit tu rura na rahis i. Nunga ingkon gabe sipata marbuni buni hami mangula maniluhon Parhuriaon, parartaon nang paradaton, disonggak biar dohot hatahutan bolon halimot ni angka tampulak na marpahean saksak  dongan torbang ni sibolis partanduk junggul meangi. 
 
Na ponjot  so na bolon, na sungkot so na timbo, na sala jongjong rehean hundul hamion sai songon na mangirput busisaon tumagam mara dohot jea na sai dipaonggophon parjahati. 
 
Parbinoto do Ho di sude na masaon. Alai boasa ma gabe songon na mauhom angka Partogi ni Bangso nami, angka Ulu balang najogi dohot sitiop dasing hatian pamonaran dipangasupi ni angka Antuasui ? Boasa ndang tumibu diantuk ulu ni ulok ro, unang sanga mangararati tarsongon baro imbulu na siabangon. Boasa ma Jahowa ndang salpuhononmu sawan pangunjunan on. Sai unang ma panghulingi hami diparpiar ni murukMu. Marpamuati ma rohaM di pangalaosion nami. 
 
Na jogi jala na begu di hamusuon do nian angka Ompung nami. Na pir tondi jala  ulu balang. Babiat di adaran,  gompul di alaman. Nunga didia mudar habaranioni. Boasa gabe songon hambing simarunap unap bangsoon. Partahi na jorbut sian luat sileban pe nunga hum mangulon di bariba parik ni golat nami.  
 
Maniak ate ate, malengleng pusu pusu nami. Holan hasilapan otik pe nunga gabe dibahen dalan ni partuktuhan singkam mabarbar. Holan na taroktohon nama hami di pangasupi nasida, angka na mangasahon torop dohot godang ni partubu. 
 
Nunga dipaksa gabe sitarapan/ tersangka sada sian dongan na bonar polin manjaguti tohonan haposani holan ala ni pamola-mola.. Biar rohanami sai dipatubu do gasa jala diasupi nang angka Panguhum. Unang loas tartali na somarpipot, anak jujungan ni huriaMi. Patogu haporseaonna nang rumatanggana dibagasan panghirimon na mangolu. Sai na ampinan jala toguonmu do naposom manalpuhon rura pangunjunan na songei. Ho ma manghasuhuthon bada dohot hoi hoi nasida.  Ndang maraprap nian na so magulang.   Papir roha, pingkiran dohot tondi ni akka panguhum nang panggonggomi, unang talu tu huaso ni haholomon na pasorin dirina tarsongon suruan nabadia, hape na gok hosom, pandoboon dohot pargadombuson. 
 
Huingot hami do ale Jahowa, ndang adong na so tarpatupa Ho. Na boi do marbalik dibahen Ho roha ni si Saulus na mangalelei huriaMi gabe sada sian ApostelMu. Ua songoni ma bahen tu pandobo goliat na sai paro hasusaan tu bangsonami on. Alai molo so mehon do, ua rungganghon ma ibana songon si Ahab manang si Ananias. Asa bulus. 
 
Ajar dohot poda andor sipaihut ihuton nasinuanhon ni angka guru nang situa tua, na ingkon rap partohap do hami dohot sude houm di Indonesia on. Boasa ma mumpat talutuk sega gadu gadu, ai nunga gabe songon na mardua roha marimbar hami dibahen di jolo ni uhum. 
 
Hibul do mardongan tangiang, hupillit jala hupajongjong hami  Amani Gibran na gabe pargomgom siluluhon sandok bangsoon. Sai pargogoi nasida asa hot haposan jala marsahala maniop ordong ordong nang amudi ni negara on. 
 
Unang loas tarilu ilu hami di ari pesta nang namandapothon taon na imbarui. Patudu ma tanda halongangan di tonga ni bangsoon. Asa mardame sonang songon siapari. Marsiargaan, marsipasangapan, marsiamin aminan songon lampak ni gaol, marsitungkol tungkolan songon suhat di robean. 
Pargogoi parsahalai jala parbisuki hami, na mangulon di linggom ni hasiangan portibi na mangilason. 
 
Tarlumobi ma tu Amani Gibran, uluan ni bangsoon. Parsahalai, pargogoi jala paingot nasida di auga situhukonna mangamudihon bangsoon. Songon I ma nang namboru nami nai Gibran ompu Ethes boru, asa sai lambas nasida marroha ina padimun dimun haulion ni hasadaon ni tahii. 
 
Ompung Debata, Jahowa parlulu porasi roha bolon, pa pos roha jala lehon benget nang panghirimon na mangolu.  Sai na marbungaran do hami, na porsea di Ho dohot Anak haholongan ni rohaM, sipalua jala sihongkop hami. 
 
Botima.. Hataon hata tambaan… Amen. (Sampe L. Purba)
  BeritaTerkait
  • Pemko Bongkar Billboard Milik ACC Advertising & Gaharu Advertising

    2 tahun lalu

    Usai libur panjang pekan lalu, Tim Terpadu Penertiban, Penindakan dan Pembongkaran Papan Reklame kembali melanjutkan pembongkaran, Senin (9/5) malam. Kali ini dua papan reklame jenis billboard di Jalan Diponegoro simpang Jalan KH Zainul dibongkar. Kedua p

  • Ayo, Dukung Film ToBa Dreams Jadi yang Terbaik

    2 tahun lalu

    Pihak produser mengajak seluruh warga Indonesia untuk memberikan dukungan lewat pesan singkat. Dukungan bisa diberikan dengan mengetik IMAA F1 dan mengirimkannya ke 95151.

  • Ini Parpol yang Bisa Usung Calon KDH di Pilkada

    2 tahun lalu

    Dalam UU ini diatur antara lain, bahwa Partai Politik yang dapat mendaftarkan pasangan calon Gubernur/Wakil Gubernur, Bupati/Wakil Bupati, dan Walikota/Wakil Walikota merupakan Partai Politik yang sah sesuai dengan ketentuan peraturan perundang-undangan.

  • Inilah Pokok-Pokok UU Pengampunan Pajak yang Disahkan Presiden

    2 tahun lalu

    Dalam UU itu ditegaskan, bahwa Pengampunan Pajak adalah penghapusan pajak yang seharusnya terutang, tidak dikenai sanksi administrasi perpajakan dan sanksi pidana di bidang perpajakan, dengan cara mengungkap Harta dan membayar Uang Tebusan sebagaimana dia

  • 6 Lokasi Wisata Alam di Tanah Batak

    2 tahun lalu

    Sejumlah lokasi wisata terbaik di Tanah Batak, berikut ini bisa menjadi panduan bagi Anda yang ingin bepergian bersama keluarga atau teman-teman di sekitar Tanah Batak.

  •   komentar Pembaca
    Copyright © 2018 Pelita Batak Online. All Rights Reserved. Design by. ariewebnet