• Home
  • Agama
  • Debata Mual ni Habisuhon (1Korint 1: 18-25)
KSP Makmur Mandiri
Sabtu, 16 Februari 2019 06:00:00

Jamita Evangelium, 17 Pebruari 2019, Minggu Septuagesima (70 Ari Andorang so Haheheon)

Debata Mual ni Habisuhon (1Korint 1: 18-25)

BAGIKAN:
Dok Pribadi
Pdt Dr Robinson Butarbutar

Oleh: Pdt. Dr. Robinson Butarbutar, Sian Parsameanta, STT-HKBP Pematangsiantar

Hp/WA: 0812-62472015.

Leleng do Kota Atena di nagori Gorik gabe pusat ni angka na pistar (filsuf) di partingkian andorang so ro Kristus nang dung i.  Dung jongjong kota Korint naimbaru taon 44 Andorang so ro Kristus-dung dilengsehon kota Korint namatua di taon 146 andorang so Kristus -,  pinajongjong ni Kaesar Julius, jala dung maju kota on,  bahat do angka filsuf ro tu kota on-kota ekonomi na tongon hatop maherbang ala ni posisi ni kota on na sangat strategis na menghubungkan perdagangan Timur dohot Barat uju i,  tarlumobi angka filsuf Sophis,  laho patuduhon hamaloan nasida tu angka na mora dohot pargogo di kota i, angka na lomo roha umbege angka filsuf i malo patuduhon angka pingkiran na maol aloon ni na binegesa. Molo denggan diida angka namora i mar-pidato jala paposhon rohanasida, ba dijou ma muse angka filsuf i ro tu bagasnasida laho umbege hamaloon nasida marpidato muse. Molo ndang, ban dang diontang be muse.  

Nian, tingki dibonai pembangunan ni kota na parjolo diingani,  bahatan do penduduk na diparo Kaesar angka hatoban,  niuluhon ni angka uluan ni sordadu Romawi naung marhasil mangurupi Kaesar di parporangan jala pensiun.  Jala di na ro apostel Paulus marbarita na uli tusi, ndang apala bahat di tongatonga nasida na ro sian latar belakang ekonomi nang politik na timbo (1 Korint 1: 26-27). Ala dipangke apostel Paulus do ilmu pidato retoris di kota Atena alai ndang marhasil, ba ndang songon i be apostel Paulus marbarita nauli di Korith na tong ditopot angka filsuf Sophis i. Ai di Atena ndang ndang apala adong na porsea angka filsuf i. Ala ni i di na mangula ibana marbarita nauli di Korint ndang diulakhon ibana be marbarita nauli mardonganhon ilmu pidato.  Alai sederhana, low profile, gariada marhite pamatang na gale (1 Kor 9: 22) do dalanna marbarita na uli. Ndang dipangke ibana dalan marpidato na gok rhetorika jamitana songon filsuf Sophis, alai dipangke ibana do dalan manghatahatai dohot angka na ro pajaithon sipatu dohot tendanasida di lantai sada rumah toko (Ruko) na adong di kota i.  

Disima dibaritahon ibana Jesua Kristua na tarsilang i. Kristus na tarsilang na gabe habisuhon dohot hagogoon ni Debata di angka na porsea di Jesus Kristus i. Hape mangula do Debata marhite ulaonna i, gabe bahat na porsea sian tongatonga ni na metmet,  na gale, na so apala angka na pistar, angka  angka hatoban di kota i, angka na so terpandang, atik pe  alai adong do tong manang piga na denggan ngoluna, isara si Stephanas,  Gaius, Sosthenes songon i nang si Erastus, Bendahara ni kota i na gabe porsea. Nasida i ma na gabe ruas parjolo ni punguan huria ni Kristus disi: Angka hatoban, alai adong do tong angka na merdeka, jala na berpengaruh.

Alai, dung ditadingkon Apostel Paulus kota Korint, ro ma angka parbarita na uli na asing tusi. Sada sian nasida,  i ma si Apollos,  sahalak parbarita nauli na malo mar-pidato songon angka filsuf I,  marrrhetorika. Ala songon i malo ni si Apollos marbarita na uli, gabe toru ma pamereng ni angka ruas na mora disini mamereng apostel Paulus naung dipasupasu Debata ulaonna manogihon nasida tu haporseaon di Kristus na tarsilang i, ala ndang malo diida nasida ibana marhata Retorika. Ndang na so diboto apostel i mar-rhetorika, ai diparsiajari ibana do rhetorika di kota Tarsus, huta hatutubuna i, uju marsikkola ibana disi sahat tu na marumur sahat tu 16 taon. Di kota Tarsus, kota parsiajaran filsafat nomor dua dung Attena, dipaprsiajari ibana doretorika. Ala ni i do ia suratna na parjolo dohot napaduahon tu halak Kristen di Korint i mamangke argumen-argumen rhetorika na denggan situtu do. Alai ala diida ibana na mangasahon hapistaran ni jolma do molo marbarita nauli parbarita na uli i mamangke rhetorika, gabe ndang dipangke ibana i uju marbarita nauli di Korint.

Angka parbarita na uli naasing, i ma na - mangihuthon bahatan peneliti - halak Jahudi na ro sian Jerusalem, ro do tong tu kota Korint marbarita nauli dung borhat apostel Paulus. Marasing sian na pinatupa ni apostel Paulus, ia nasida on manjalo upa do sian halak Kristen di Korint. Apostel Paulus ndang manjalo upa sian halak Kristen Korint i, ai tuk do ibana manarihon na ringkot tu dirina dohot donganna saulaon sian ulaonna manjait tenda i.  Ala marimba binahen nasida i sian na binahen ni apostel Paulus,  gabe didok angka parbaritat nauli na asing i sibonsirina, i ma: Nasida manjalo upa ala ni  hata ni Jesus Kristus na impolana mandok ingkon mangan sian ulaonna do parbarita na uli.  Laos didok angka parbarita na uli na asing i ma hira tumoro  do haapostelon ni apostel Paulus sian haapostelon nasida. Tumoru haapostelon ni apostel Paulus  ala ndang dohot ibana sitindangi parjolo ni ulaon ni Jesus di Palestina.  Ndang dohot ibana marnida ulaon ni Jesus, angka tanda halongangan binahen ni Jesus uju di Palestina. Jala ndang dohot ibana marnida haheheon ni Jesus i songon angka apostel na rap dohot Jesus di Palestina. 

Siala ni na diihuthon halak Kristen na mora di Korint do hasomalan ni na mora disi na sai manjou angka filsuf na malo marpidato retorika na boi pinatuduhon ni si Apollos. Jala ala dipatutoru nasida na ia ulaon ni apostel Paulus na so manjalo upa i hape na asing manjalo upa, jala ala marbarita nauli di bagasan hagaleon do apostel i uju di Korint marhite na gabe karejo mambahen tenda, ndang songon na asing na sai mangargahon hajagoonnasida,  gabe dohot ma nang nasida angka parbarita nauli na ro sian Jerusalem i manghatindangkon angka silehonlehon (Gorik: Charismata)  naung jinalo nasida sian Debata. Ala dihaginjangkon nasida silehonlehon i, gabe pulut do rohanasida patutoruhon silehonlehon jinalo ni na asing na adong di Korint na so dos dohot silehonlehon jinalona i.  Adong mandok na rumingkot do silehonlehon ni tondi marhite na marhata sileban jinalona sian silehonlehon manurirangi.

Siala ni i do dihilala apostel Paulus na ingkon disurathon ibana na mangihut on: Ndang adong sihaginjanghonon ni na porsea i ianggo di jolo ni Debata.

Laho patolhashon i disurathon ibana ma di 1 Kor 1: 18-25 na:
Ndang tarjalo ni halak Jahudi na mangido tanda hagogoon ni Debata ia Kristus na tarsilang i songon habisuhon ni Debata paujungkon parungkilon ni bangsoNa. Ingkon adong do tanda nabalga asa porsea sasahalak. Pargasipon, skandalon do di halak Jahudi na tarsilang ia anak ni Debata i. Ndang dapot rohanasida I (ayat 23). Ndang tarjalo ni halak Gorik na habisuhon ni Debata do silang i. Di nasida haotoon do i. Ndang tarbahen ni angka filsuf  na mangasahon habisuhon ni angka na malo/filsuf mangantusi Kristus na tarsilang i. Haotoon do di nasida Debata na gogo na tarsilang i. "Haotoon do hata na taringot tu silang i di roha ni angka na laho mago; alai hagogoon ni Debata do i di hita na dapotan haluaon" (ayat 18).


Di angka na naporsea i habisuhon ni Debata do ia Kristus na tarsilang i. Hagogoon ni Debata do i tu angka na marhaporseaon di Ibana dohot di ulaonNa paluhaon. Siala ni i do umbahen angka na didok portibion na oto, na gale, na so arga di jolo ni jolma, apala tu nasida do dipasahat Debata haluaon i. Alai tu angka na mangasahon tanda dohot habisuhon ni portibion hailaon do na pinatupa ni Debata.

Boasa ma apala di tingki on na gunurithon ni apostel Paulus i na gabe jamita evangelium nuaeng tu hita angka halak Kristen di portibion, ndang marimba di Indonesia on, di kota-kota besar nang di angka hutahuta pe tahe, i ma pangondolhononna na habisuhon ni Debata do Kristus na tarsilang i, ndang pargasipan dohot haotoon? Opat na mangihut on porlu do rimangrimangonta di ngolunta nuaeng on:

Naparjolo, songon angka na porsea di Kristus na tarsilang i hita, ringkot do hita angka na so diargahon angka na gogo di portibion, mandok mauliate jala mamuji Debata,  ala tu hita dipasahat Debata barita nauli, jala ala masuk bilangan tu angka na porsea di Kristus na tarsilang i do hita. Nunga angka na porsea hita. Tapuji ma Debata. Ala ni i, ndang jadi tahaginjangkon silehonlehon haporseaon pinatubu ni Debata di bagasan dirinta, jala ndang jadi tahaginjangkon angka silehonlehon (Gorik: charismata) partondion dohot na asing na tajalo sian Debata, sude tahe na naung tajalo sian Ibana di ngolu on di bagasan Jesus Kristus Tuhanta i.

Napaduahon,  ringkot tong hot hita angka parbarita nauli i satia manjamitahon silang i di ulaonta. Nuaeng on nunga maila halak mamaritahon Kristus na tarsilang i. Di taon 2011 dung do disoarahon sahalak professor di Universitas Heidelberg soara na mandok ndang apala ampit be baritahonon barita taringot tu Kristus na tarsilang i, ala ndang ampit be sai paboaboaon kekerasan tinaon ni Jesus i.  Lumomoan do nuaeng bahat halak Kristen  manjamitahon hamomonang ni Jesus na tuk patupahon angka tanda halongangan nuaeng, na migor tibu mamaritahon haheheon ni Jesus, ndang sabar mamaritahon Jesus na tarsilang.

Panghorhonna sai holan hamomonang ni ngolu nama dibaritahon, ndang boi be marnida hagaleon ni ngolu on gabe hagogon ni Debata (2 Kor 12: 9). Ndang rade be mamaritahon Jesus na tarsilang. Siala ni i, mansai ringkot do tong tulahonta panghaporseaon di Jesus holan dung jolo diida angka tanda halonganan i di ngoluna. Sibaritahononta do na ndang angka tanda halongangan ojahan ni haporseaon, alai parbue ni haporseaon do ia angka tanda halongangan i.  Ndang hapistaran/habisuhon ni portibion pangkeon mangantusi silang na paluahon i,  alai holan haporseaon i do sipangidoonta tu Debata ai i do na patuk hita mangantusi dohot manjangkon silang i

Patoluhon,  sisulingkitonta do songon dia nuaeng on parbarita nauli mamaritahon barita nauli,  jala songon dia sitangihon jamita i manangihon jamita.

Suraon do nunga madabu parbarita nauli nuaeng on tu na mamangke hamaloon marjamita pola mamangke habisuhon ni portibion ala dihaposi holan i do mambahen olo porsea halak tu hat ani Debata nang hadirion dohot  ulaon ni Debata  jamitanta,  gabe ndang sanga be hita mangido tu Debata asa Ibana patubu haporseaon tu na tumangihin jamitanta? Gumodangan hita mangalului dalan beha denggan manjamitahon sian na mamangke tingki asa dipatubu Debata haporseaon di angka na manangihon jamitanta?

Suraon do angka sitangi jamita nunga mangalului hajagoon ni parjamitaan i sian na patujolohon pangidoan tu Debata asa dipaloas hita manghaporseai hataNa i?  Gabe olo adong ruas na so ro manangihon jamita ni parjamita an dohot parjamita on,  gariada tahe pola adong na laho muse tu parmingguon na asing sian parmingguon ni HKBP dung sidung umbege jamita di HKBP,  ala didok rohana ndang malo parjamita ni huriana jala mauas dope ibana di jamita na jago panjamitahononna?

Paopathon, di tingkinta nuaeng, nunga lam mangasahon hapistaranna bahatan angka na malo ni portibion tarlumobi ala nunga lam timbo parbinotoan di bidang biotechonology dohot medical technology, songon i nang robot technologi pangkeon ni jolma mangalusi angka sungkunsungkun ni jolma taringot tu beha paadongkon sipanganon, beha pamalum sahit, dohot beha mangula jolma i so ingkon godang gogona na mago. Siala ni I ndang be Debata didok roha ni jolma na gabe habisuhon, alai teknologinama. Najolo do habisuhon ni Debata diharingkothon jolma i. Nueang ndang be. Najolo do Kristus na tarsilang i habisuhon ni Debata manaluhon huaso ni dosa na mangihut i jolma i. Alai nuaeng ndang be. Nunga angka na binoto ni jolma nama, termasuk ma i laho mangatasi porang, mangatasi hamatean ni jolma i dohot mangatasi na so sonang roha ni jolma i.

Dipargogoi Debata ma hita mangarimangrimangi hataNa i.(**)

  BeritaTerkait
  • Jamita Evangelium, Minggu I Dung Trinitatis, 3 Juni 2018 Pangungkapon 16: 1-7, "Hagogoon ni Huaso ni Debata di Portibion"

    tahun lalu

    Oleh: Pdt Dr. Robinson ButarbutarDi angka Minggu dung Trinitatis, ia tinuju ni angka hatani Debata na marsaringar disi i ma patoguhon angka sitangihon jamita asa marsihohot manghaporseai Debata. Disos

  • Daompung Nahinan

    2 tahun lalu

    Tardok do jolma nahinan Daompung nahinan. Jolma nahinan ima sundut na mengalami zaman Boladda, Nippon, Sukarno sahat tu masa ni Suharto. Tukkang do Oppung doli. Hira sude do na berbahan hau boi dit

  • Partandang na Bitik

    2 tahun lalu

    Adong do sada boru ni Ama ni Panukkunan, margoar si Lastiar Christina Margareth. Biasa dijou si Lastri. Na burju do Si Lastiar on jala pargaul. Nang pe boru siampudan. Unduk marnatua tua. Uli rupan

  • Jamita Evangelium, Minggu XXII Dung Trinitatis 12 November 2017, Turpuk: Mateus 25: 1-13 "Mangolu di Bagasan Habisuhon dohot Haporseaon"

    2 tahun lalu

    Oleh: Pdt Dr. Robinson Butarbutar, Parsameanta, STT-HKBP1.Panghataion ni Jesus dohot siseanna sandiri dung sidung mangula di bagas joro na di Jerusalem i do turpukta on (24: 1, 3), i maudut ni panurir

  • Jamita Evangelium, Minggu Jubilate, 22 April 2018: Marlas ni Roha di Bagasan Tuhan i (1 Tessalonik 2: 13-20)

    tahun lalu

    Oleh: Pdt Dr. Robinson Butarbutar, Sian Parsameanta, STT-HKBPJubilate = Marolopolop tu Debata Sandok Tanoon1.Molo tajaha surat 1 Tessalonika on sian bona sahat tu ujung, tangkas situtu do digurithon&n

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb