• Home
  • Agama
  • "Mangulahon Hasintongan dohot Hatiuron"
KSP Makmur Mandiri
Jumat, 21 September 2018 06:45:00

Jamita Minggu XVII Dung Trinitatis 23 September 2018

"Mangulahon Hasintongan dohot Hatiuron"

BAGIKAN:
Ist
Pdt Dr Robinson Butarbutar
Oleh: Pdt. Dr. Robinson Butarbutar, Sian Parsameanta, STT-HKBP Pematangsiantar

Di partingkianta nuaeng mansai hatop do masa perubahan, ndang holan di parbinotoan ni jolma taringot tu ilmu-ilmu pengetahuan alam songon i nang ilmu-ilmu teknologi canggih, alai dohot do tong pangantusion ni jolma taringot tu nilai-nilai moral, na manontuhon songon dia sasahalak manang sasapunguan nang sada bangso pe tahu marparange di ngoluna sandiri, dohot di parsaoranna dohot donganna jolma. Siala ni i, di angka jolma na so haru togu harohaonna boi do muraura diela tu hambirang manang tu siamun. 

Angka siihuthon Jesus Kristus pe boi olo dielaela, asa meret sian pangantantusionna na sailaon taringot tu nilai-nilai moral naung dihangoluhon ibana na sai laon, na naung diparsiajari ibana mamungka sihaetehonna, di Sikkola Minggu nang di Parsiajaran Parguruan Malua, songon i nang sian na Patanakhon Hat ani Debata, sian jamita ni angka Naposo ni Tuhan i (Pandita, Gr Huria, Bibelvrow nang Diakones, Evangelis dohot Sintua) di tongatonga ni huria i.  Di partingkianta nuaeng marragam do dalan ni angka huria ni Kristus di portibion mangadopi angka hamubaon ni zaman na hatophatop i. 

Adong na paimbaruhon ajaran moralna asa boi mangalusi angka hamubaon zaman i marojahan tu ajaran moral na naung dihangoluhon. Adong na hot di ajaran moralna, so parduli di hamubaon ni pangantusion nang parange moral ni hajolmaon na mubauba i. Di angka huria na paimbaruhon ajaran moralna i, adong do huria na holan marojahan tu hata ni Debata na tarsurat di Padan Naimbaru dohot di Padan Narobi sambing. Alai laos adong do huria na marpanungkun tu parbinotoan ni hajolmaon sian marragam disiplin ilmu, asa boi ampit tu hamubaon ni jolma i pangajarion ni huria i ajaran moralna i. Songon i do na pinatupa ni Huria Kristen Batak Protestan marhite Rapot Panditanta na diturgashon HKBP merumuskan doga/ajaran nang ruhut-ruhut parmahanion moral di tongatonga ni HKBP.

Sada sian ojahan ni angka huria di portibion na adong di Bibelta i i ma na tarsurat di Epesus 5: 1-10 on, na disurathon di abad parjolo dung Kristus, laho manogunogu angka ruas ni angka huria di Kota Epesus mangantusi songon dia ma nasida marparange di tongatonga ni ngolu nasida di masyarakat nasida uju i, dung tardidi nasida tu bagasan goar ni Jesus Kristus Sipalua i, dung disesa Jesus Kristus dosanasida marhitet panghophoponNa na mansai arga i di jolo ni Debata, dung gabe ruas ni Harajaon ni Debata nasida, dung gabe angka anak na hinaholongan ni Debata nasida, dung gabe angka na badia nasida siala pinarbadiaon ni Debata, dung gabe angka panean di hangoluan na manongtong i nasida siala asi ni roha ni Debata pinalumehonNa tu nasida di bagasan Kristus. 

Sudena i sahat tu nasida dung ditadingkon nasida haporseaon na robi nasida jala ajaran moral na hea dihangoluhon nasida.  Songon dia ma angka na hinaholongan ni Jesus Kristus i marparange di tongatonga ni ngolu nasida songon halak Kristen, i do nialusan ni Epesus 5: 1-10 i. Laos i do na gabe jamita tu hita angka ruas ni Huria Kristen Batak Protestan nang nuaeng on di abad padua pulu sadahon on, di partingkian na hatop mubauba i. Alai na tarsurat di Epesus 5: 1-10 i do tong na pinangke ni Huria Kristen Batak Protestan mangojahi pangajarion parange di tongatonga ni ganup ruasna, mansai ringkot do tangihonon ni ganup na tarsurat disi.

Naparjolo na ingkon tangkas botoonta i ma, mansai ringkot do botoonta ise hita mangihuthon hat ani Debata di Epesus 5: 1-10 on.  Ise do ahu? Ise do hita? Ise do hamu? Mangihuthon hata ni Debata di Epesus 5: 1, 3 ia ahu i ma: Anak Haholongan ni Debata, ai pola dilehon Debata Ama i anakNa Jesus Kristus manghophop hita. Ndang baliksa, anak dihosomon ni Debata. Laos siala ni i ia ahu/hita/hamu na badia do, na naung tinobusna jala na naung dipasiding ibana sian portibion gabe na di Ibana. Mansai ringkot do on botoon, halashonon, pestahonon ni ganup angka na manggoari dirina siihuthon Jesus. Panghophopion ni Kristus tu hita na gabe pelean na maruap na hushus tu Debata do dalanna tusi.  Molo adong di tongatonganta ruas ni Huria Kristen Batak Protestan na so manghilala ibana songon anak haholongan ni Debata dohot siala ni i na badia, nunga ringkot patingkosonna panghilalaanna i. 

Bahat do pestani jolma di portibion. Jala marragam do sibonsiri ni pesta. Sian sudena i, so tung lupa hita marpesta mamujimuji Debata siala ni na naung gabe anak ni Debata hita. Di pamujionta tu Ibana di tangiangta marsadasada, so tung lupa hita mandok mauliate tu Ibana ala naung gabe anak na hinaholonganNa marhite panghophopion ni Kristus hita jala siala ni i gabe na badia, na tiur.  Pandidionta i i do tanda na tangkas na boi pangkeonta manghalashon hadirionta i. Taingot be ma andigan ari pandidionta. 5 Maret 1961, i ma ari di na tardidi ahu di HKBP Bah Jambi, Distrik Sumatera Timur. Nunga 57 taon ahu gabe anak na hinaholongan ni Debata. Na naung pinarbadiaon ni Debata. 57 taon. Ingotonku ma di taon 2019 na ro, tgl 5 Maret ari na mansai arga di ngolungku. Andorang so tardidi ahu anak haholongan ni Among dohot Inongku na manubuhon ahu tu portibion do ahu. Alai dung tardidi ahu, gabe anak ni Damang Sitompu Saluhut i do ahu. Anak ni Pargogo Nasohatudosan i do ahu. Anak Sitean hangoluan na manongtong i do ahu. Anak Harajaon ni Debata do ahu. Pinuji ma goarNa ni na Tumimbul i.

Napaduahon, ala anak ni Debata na Timimbul i ahu, dipangido ma tu ahu asa di bagasan ngolungku ganup ari, ganup tingki na tolu on ma na ingkon patupaonku siala naung gabe anak ni Debata i, ahu. Dia ma i? Impolana i ma sai usahahononku ma mangalului dia lomo ni rohaNa ganup tingki jala patupahon lomo ni rohaNa. Dia so lomo ni rohaNa ingkon pasidingonku do. Dia lomo ni rohaNa ingkon ulaonku do.  Dia ma na gabe lomo ni rohaNa?
Mamparangehon parange haholongon dalanta maniru Kristus i na naung manghaholongi hita. Ndang manghatahon, alai mamparengehon (Gorik: Peripateite). Mandalanhon ngolungki ngolu na manghaholongi manang di dia pe ahu marhosa, mangolu, mangalangka, maringan, manggulmit, berinovasi, berprakarsa. 

Marparangehon parange anak hatiuron. Dia dia ma tarida i di ngolunta? I ma di angka parange habasaon/kebaikan (Gorik: Agathosune), dohot parange na marhatigoran (Gorik: Dikaiosune), nang hasintongan (Gorik: Aletheia).  Na maralo tu na tolu i, na mangalo Debata, na mambahen tarrimas Debata mida na mangulahonsa (suhar ni Debata manghaholongi hita) i ma: Parmainanon, ragam ni harorangon, pangahution, nasa sihailahononhon, hata barangsi, hata na rumar (Gorik: Kenois logois, hata na so marguna). 

Marpanungkun torus dia lomo ni roha ni Debatai (Epesus 5: 10, patuddos Roma 12:2). Molo ndang lomo ni roha ni Debata tatulak.

Nunga beha hita saleleng dung tardidi hita? Molo tabahen suhatsuhatta sandiri, songon anak haholongan ni Debata, songon parhatiuron hita, songon tudu ni na naung marparbuehon hatiuron hita, beha do hita saleleng on? Beha do ahu saleleng 57 taon na salpu i?

Nunga marparangehon parange haholongon ahu? Piga persen ma ngolungkon hupangke patupahon parange haholongon di bagashu, tu ianakkonku, tu donganku saripe, tu donganku saulaon, tu dongan hombar jabungku, nang tu diringku, songon i nang tu na manghasogohon ahu?  10% dope? 20% dope? Nunga 50%? Nunga 75 %? Nunga 100%? Manang baliksa do? Ndang satia ahu tu donganku. Sai marmaini do ahu? Nunga gumodang tingkingku hupangke patupahon alo ni i, gabe bahat na huarsahi, bahat na hubahen marsahit, bahat hubahen marpogos, bahat hubahen marungkil? 

Nunga marparangehon parange habasaon, kebaikan ahu? Piga persen? Manang baliksa, alo ni i do na hupatupa?
Nunga marparange na tigor, na adil ahu di ngolungku saleleng on? Manang baliksa do, ketidak adilan do na hupatupa? I ma martondi pangahution do ahu, parroha na ahut, manang dia pe dalanna?

Nunga marparange marhasintongan ahu, manang baliksa do na hula, hatangku rorang, sai marhata barangsi, marhata gaitgait na so patut, marhata na rumar, na kosong, memfitnah, menyebar hoax?
Nunga sai husungkun jala hupatupa dia na hinalomohon ni roha ni Debata?

Dipartingkian perobahan nilai-nilai moral di tingkinta sinuaeng, adong do dasar-dasar nilai moral na diajarhon hat ani Debata tu hita di tingkinta nah atop mubauba i, i ma marparange, ndang holan marhata, alai marparange na mamparengehon haholongon, na mamparangehon parange habasaon, na mararangehon parange hasintongan/keadilan, na mamparangehon parange haintongan, dohot impolana mamparangehon parange na saurdot tu lomo ni roha ni Debata. I ma tapangke tongontong. Molo mian hita tongtong disi, targoar ma hita angka anak haholongon ni Debata, na badia, anak hatiuron.

Sian 7 milliar hurang lobi penduduk ni jolma di portibion, adong do 2,6 mmilliar angka naung tardidi tu bagasan goar ni Debata Sitolusada i. Manang piga sian i, i ma hita ruas ni HKBP di sandok portibion. Suraon do hita hot mamparangehon parange haholongon, parange habasaon, parange hasintongan, parange na dihalomohon Debata, manang baliksa? Ndang pasti? Mardua roha?

Sai dipargogoi Debata ma hita mangantusi hataNa, mangulahon hataNa na di ginjang i di tingki na hatop mubauba on. Saleleng hot hita disi dumenggan ma ngolu ni hajolmaon di tongatonga ni angka na porsea di Jesus Kristus nang di humaliang nasida, ai adong 2,6 miliar na tongon jala ai rade marhite ulaon na metmet sahat tu nab alga patupahon (i) parange haholongon, (ii) parange habasaon, (iii)  parange hatigoran, (iv) parange hasintongan songon parbue ni hadirionta songon anak hinaholongan ni Debata, angka na badia, anak hatiuron, ndang be anak haholomon na mangulahon angka ulaon alo ni na opat i.  Molo ndang denggan dope ngolu ni hajolmaon saleleng on di humaliangta, suraon do ala ndang apala ringgas si 2,6 milliar i patupahon angka i?

Denggan ma tatorushon mardonganhon Debata molo nunga taula i saleleng on, asa lam denggan ngolu ni jolma di humaliangta. Molo tahilala otik situtu dope, hiras ma rohanta. Molo baliksa do hape na taula, muba ma, unang ro rimas ni Debata tu hita be.(*)
  BeritaTerkait
  • Mangolu di Bagasan Hasintongan ni Kristus

    3 bulan lalu

    Oleh: Pdt Dr. Robinson Butarbutar, di Parsameanta.Sian   tingki uju mangula Jesus Kristus di Palestina sahat tu nuaeng, sai adong do na manggoari dirina parbarita na uli na patupahon ulaonna

  • Jamita Minggu XXI Dung Trinitatis,21 Oktober 2018: "Hadaulaton na Rimpas" (Rom 12: 1-3)

    2 bulan lalu

    Oleh: Pdt Dr Robinson ButarbutarTardok mangolu di partingkian, manang zaman na hatop mubauba do ganup halak Kristen di portibion nuaeng, manang di dia pe nasida maringan dohot mangula ndang marimbar h

  • Jamita Evangelium, 28 Oktober 2018 (90 tahun Sumpah Pemuda) Minggu XXII Dung Trinitatis "Huria Mangulahon Ulaon Parasinirohaon" (Jesaya 58: 4-12)

    2 bulan lalu

    Sian Parsameanta: Pdt Dr Robinson ButarbutarUlaon parasinirohaon solhot do i tu hajolmaon. Molo taida angka donganta jolma mian manang mangolu di bagasan sada kondisi ni ngolu na tung maol situtu, mad

  • Pamingkirion tu Parsiranggutan di Ekklesiologi HKBP di Rapot Pandita HKBP Oktober 2017

    2 tahun lalu

    I. Pamuhai Di Sinode Godang HKBP September 2016 na salpu, ruas ni sinode do ahu songon Plt. Direktur Sikkola Pandita. Disi tangkas do soara ni bahat parsinode asa diamandemen sistem pamil

  • Jamita Evangelium: Roma 12: 9-21, Minggu XII Dung Trinitatis 3 September 2017: Parbuehon Haporseaon Ganup Ari

    tahun lalu

    Oleh: Pdt Dr. Robinson Butarbutar, STT-HKBP, 0812-62472015I. Pamuhai1. Di bona ni ngolu ni Hakristenon di Bonapasogitta, ganup tardidi sasahalak tu bagasan goar ni Debata Sitolusada i, i ma angka na m

  •   komentar Pembaca
    Copyright © 2018 Pelita Batak Online. All Rights Reserved. Design by. heriweb