• Home
  • Agama
  • "Mangolu di bagasan Hatiuron ni Hata ni Debata" (Heber 4: 14-16)
KSP Makmur Mandiri
Jumat, 15 Maret 2019 23:36:00

Jamita Evangelium, 17 Maret 2019, Minggu Reminiscere.

"Mangolu di bagasan Hatiuron ni Hata ni Debata" (Heber 4: 14-16)

BAGIKAN:
Ist
Pdt Dr Robinson Butarbutar
Oleh: Pdt Dr. Robinson Butarbutar
Parsameanta di Pematangsiantar, STT-HKBP. HP/WA: 0812-62472015.


Di Minggu Invokavit di minggu na salpu ditogutogu do hita asa hot manang umpos rohanta di Debata na manangihon joujounta angka na porsea di Ibana. Laos dijouhon do tu hita, asa ndang holan mangarop asa tangi Debata di joujounta tu Ibana hita, asa mangalusi Ibana, alai asa hita pe rade manangihon, mameop dohot mangaloas dirinta marorientasi tu angka hataNa, hata hangoluan i. Di minggu Reminiscere sadarion udut ni minggu Invokavit i do sapabagasonta, i ma asa lam hiras hita angka naporsea tu Tuhanta i di tingkion ro mangido tu habangsa parasiasian ni Debata i, asa diingot Ibana angka denggan ni basaNa tu hita uju ro hita paadop bohi dohot Ibana di tangiangta i. Asa hiras hita ro tu habangsa parasianNa i,  mangidohon ndang holan asa unang be diingotingot Ibana angka pambahenanta na hurang i di ngolu on maradophon Ibana, dirinta, donganta jolma nang angka na tinompaNa na asing di angka pargulmiton ni ngolunta na marragam i-alai dohot do asa disurdukkon Ibana tanganNa nagogo i mangurupi hita tarlumobi uju taida tangkas na so tarbahen hita be manang aha paluahon hita sian angka mara ni ngolu.  Hahirason sisongon i do na dihangoluhon parPsalmen i di Psalmen 25: 6, asa dihamonangkon Debata ibana di angka partongtangan niadopanna. Songon na tarsurat di Psalmen 51, dihabaranihon ibana do tong mangido hasesaan ni dosana tu Debata siala dosana maradophon si Uria (2 Sam 11-12). 

Laho mangurupi hita patoguhon hiras ni rohanta ro tu habangsa parasiasian ni Debata i di partingkianta nuaeng, ampit dienet jamita sian surat Heber. Tadok ampit, ala di surat Heber on diusahahon panurat manosoi panjaha uju panuratan ni surat i nang nuaeng asa unang losok mandohoti angka parpunguan partangiangan ni angka siihuthon Jesus Kristus i, unang loson rot u habangsa parasiasian i, jala unang mulak tu haporseaon naung tatadingkon hian, alai hot ma manghaporsea Jesus Kristus, tung pe bahat tantangan na ingkon adoponnasida di ngolu on.  

(Di tingki panuratan ni surat Heber i di taon 80-an, ndang diida parhuaso Kekaisaran Romawi dope ugamo na resmi parpunguan dohot haporseaon ni halak Kristen i. Tarlumobi ala tongon mangadopi pangunjunan do naporsea i, ala di parngoluan siganup ari ndang masuk be nasida tu ugama Jahudi na resmi diongku pamarenta Romawi. Molo resmi do ugamo i, ndang boi gangguan sian masyarakat tu punguan i. Alai molo ndang resmi dope, ba boi patupaon ni angka ruas ni masyarakat umum angka ulaon paburuburu angka na porsea ni Jesus Kristus i. Kondisi na songon i boi mangunjuni angka na porsea i unang hot di haporseaon tu Jesus Kristus).

Asa umpos roha ni sijaha surat Heber on di haporseaon di Jesus Kristus, unang ditadingkon nasida haporseaon i, unang mualaf nasida (6:4-8), digurithon panurat ni surat Heber on ma bahat  angka hasurungan ni Jesus Kristus i dohot ulaonNa, unang ditiru nasida hasalaan ni bangso Israel uju di halongonan na manulak Debata manomba debata ganaganaan gabe diuhum bahat situtu- na tangkas diuhum Debata (Ida Heber bindu 1-10)-, alai asa ditiru nasida angka naporsea na satia sahat ro di ujung, atik pe ndang diida nasida dope parbue ni na hinaporseaonnasida i (Heber 11).

Sada sian angka hasurungan ni Jesus Kristus i na ingkon siingoton ni angka na porsea i, i ma hadirion ni Jesus Kristus dohot ulaonNa songon Sintua ni Malim Nabolon, naung mamelehon diriNa sandiri pasesahon dosa ni na porsea di Ibana holan sahali, ndang songon angka malim bolon ni bangso Israel sian na robi sahat to taon 70 dung ro Kristus, na sai mulakulak pasahathon pelean hasesaan ni dosa di bagas joro. Ndang songon angka malim bolon i ndang mangantusi hagaleon ni bangso i jala na sai talu tu pangunjunan
Atik pe mansai jempek turpuk na dienet gabe jamita di hita laho manosoi hita asa hiras ro tu habangsa parasian ni Debata i, i ma ayat 14-16, alai di tolu ayat on do apala impola ni sangkap ni panurat manurathon taringot tu hinatimbo ni Hamalimon ni Jesus maradophon angka malim ni ugamo Jahudi, i ma asa momos ditiop naung diparhatopot  manang diongku  i (Gorik:  Kratomen tes homologias) i ma haporseaon di Jesus Kristus Sipalua i. Di ayat 14-16 i dipabotohon: Parjolo, dua taringot tu hadirion ni Sintua ni Malim Nabolon i (ayat 14-15); jala paduahon, dia ma sipatupaon ni naporsea i marojahan tusi.  Mansai ringkot do i botoonta di minggu Reminiscere on, di na tarataratai dohot tapatogu hahirasonta mamasuhi habangsa parasiasianNa i di pargulmiton ni ngolunta marsadasada:

Parjolo, dua hadirion ni hamalimon Sintu ni Malim Nabolon i (Gorik: archierea megan), Jesus Kristus, Anak ni Debata i:

Sada ma i sian panatapan tu ginjang, i ma sian ulaonNa na so tarbahen ni manang ise na asing, sada nari sian panatapan sian toru, sian ruhut-ruhut hajolmaonNa, sian kaca mata hajolmaonta .

(i) Sian panatapan tu naung niulana: "Nunga manorusi angka banua ginjang" (Gorik: dieleluthota tous ouranous). 
Molo taida tu pudi, tu Jesus Sejarah, i ma tu peristiwa sian hatutubuNa sahat tu hananangkokNa tu banua ginjang, ia nidok ni Jesus Anak ni Debata naung dieleluthota tous ouranous i, i ma hananangkokNa tu banua ginjang mamolus marlapis angka langit i (tous ouranous). Na didok ni panurat surat Heber on, ndang songon Sintu ani Malim Bolon ni ugamo Jahudi ia hamalimon ni Jesus Kristus on, na mate jala ditanom di portibion. Ndang. Ibana nunga manaek tu banua ginjang dung hehe sian hamatean. Ndang adong na songon Jesus Kristus Anak ni Debata i di portibion sahat tu nuaeng.  Siala ni i do migor didok panurat tu na manjaha hadirion ni Jesus i: Kratomen tes homologias = Gomos ma tatiop naung taparhatopot i, tes homologias. Tung Sintua ni Malim Nabolon na so tarpasanding tu na asing do ia hasintua malim bolonon ni Anak ni Debata i. Luar biasa!
Beha do hamomomos ni paniopta tu naung taparhatopoti, i ma Jesus Kristus do sasadasa Sipaluanta, Sintu ani Malim Bolonta? Suraon do tar golom riaria dope hita na maniop Jesus Kristus i di partingkianta nuaeng? Suraon do siala na marragam angka na pinasahat ni tingkion rongom ro tu ngolunta, gabe holom  riaria angka ruas ni huria ni Hakristenon Batak di Jesus Kristus i, gabe tarunjun hita naeng meret manang nunga meret be hita sian haporseaon ni halak Kristen Batak i tu Jesus Kristus i?  Denggan do tarimangrimangi i di tingki on.

(ii) Sian pengalamanna uju mangolu songon jolma: Ia hamalimonna ndang hamalimon na so manghilalahon na niadopan ni hajolmaon, alai hamalimon na tarbahen manghilala angka hagaleon ni angka na porsea i. 

Di hata Gorik hata na dipangke tu hata na tarbahen manghilala angka hagaleonta i ima hata sumpathesai, i ma na paboahon naung diula Jesus (Kata kerja Aoris Aktif, sian kata kerja dasar: sumpatheo; Inggris: feel sympathy with), naung manghilalahon, naung ber-sympathi dohot angka hagaleonta. Ala Aorist Aktif dope i dipangke, nidok ni hata sumpathesai i ima nunga dibonai Jesus bersimpathy dohot hagaleonta si tingki na salpu, alai sahat tu nuaeng dipatupa Ibana dope i. Asa, atik pe di ayat 14 didok Hasintua Malimon ni Jesus i ma naung sahat tu banua ginjang, jala hundul di siamun ni Debata Ama i, alai jonok do Ibana rap dohot hita, diantusi, dipanghilalahon, jala gariada bersympati do Ibana tu hagaleonta, ndang manguhumuhumi hagaleonta.  Luar biasa hamalimon bolonNa.

Laho patoguhon i, laos diuduti ma patorangkon hamalimon ni Jesus, i ma ia Hasintua ni Malim Bolonon ni Jesus i ma na naung dung mangadopi pangunjunan di na saluhut do, alai ndang dung Ibana mardosa di pangunjunan i. Hata Gorik na pinangke ni panurat mansai tangkas taringot tu pangunjunan niadopan ni Jesus i, i ma pepeirasmenon (Kata kerja na mamangke waktu naung dung masa, alai ndang masa muse, i ma: Perfek tense passif ni kata kerja dasar peirazo, mangunjuni). Taboto do i di ulaon ni Jesus (ida Mateus 4: 1-11, Markus 1: 12-13, Lukas 4: 1-13). Asa ndang songon malim bolon na asing ia hamalimon ni Jesus i. Ndang adong na songon hamalimonna i. Taboto do i. Ndang dung Ibana mardosa.

Mansai ringkot do duansa hasintuaon ni malom bolon ni Jesus Kristus i, i ma na naung jala na torus bersimpati tu nasa hagaleonta, na so mardosa uju tarunjun.

Paduahon, marhiras ni roha ma mandapothon habangsa parasiasian asa tajalo talup ni roha (Gorik: eleon) dohot asi ni roha (Gorik: charini) dohot jumpang hita pangurupion di tingki halehetonna (Gorik:  eukairon boetheian). 

Ala nunga tung tangkas hasintua ni malim na bolon ni Jesus Kristus Anak ni Debata i, disosoi ma hita angka siihuthon Jesus i asa di ngolunta on  marhiras ni roha (Gorik: parresias) masuk tu habangsa parasiasian i asa dapotan talup ni roha dohot asi ni roha jala jumpangan pangurupion hita sian Ibana. Marhite na tolu hata na dipangke i, holan tua do dapot hita di na tamasuhi habangsa parasiasian naung bungbung dibungka Halim Bolon Jesus Kristus i tu hita, i ma eleon, charin dohot eukairon boetheian (talup ni roha, asi ni roha, dohot pangurupion di tingki na ampit, Inggris: mercy, grace dohot help in the right timing), singkop na taharingkothon i di ngolu ni naporsea palumehonon ni Debata tu hita, ndang holan hasesaan ni dosa, alai sude tahe, marragam rumang ni asi ni roha ni Debata, tarlumobi di na taharingkothon pangurupion na so tarlehon ni manang ise tu hita di tingki halehetonna.

Ala ni i, di hita halak Kristen Batak na mangadopi tantangan partondion dohot tantangan parngoluon siganup ari di tingki on, ndang holan niadopan ni angka ruasta na dohot di Pemilu asa gabe anggota Dewan di Pilpres dohot Pileg tgl 17 April na ro, nang di angka ianakkonta na tongon dohot na naeng mangadopi angka ujian nasida na martirkettirket i, manang di angka usaha nasida patupa dalandalan ni ngolu sian usaha na ummetmet, nametmet, menengah sahat tu na balga dohot na umbalga pe tahe, nang di angka usaha mandungdung angka sinta-sinta ni marsasahalak dohot marsaripe, marsasapunguan, marsasektor partangiangan, dohot saparmingguon, ingkon unang ganggu hita di ulaon ni Kristus na mangondihon hita i, lam momos ma tatiop, jala asa tarbahen hita maniop momos ingkon lam hiras ma rohanta di tangiangta na maraturan i masuk tu habangsa parasiasian ni Debatanta i, asa dapotan talup ni roha, asi ni roha dohot pangurupion di tingki na ampit hita. Tangkas ma taingot jala taulaon hata ni Debatanta sian Heber 4: 14-16 i. Molo moru hiras ni rohanta saleleng on, jala siala ni i ndang dapotta na tolu i, muba ma. Molo nunga hiras rohanta saleleng on humirasma, asa tongtong tadai denggan basa ni Debata na dapot hita marhite na maniop momos Jesus Kristus i di ngolu nang ulaonta, jala hiras ro tu habangsa parasiasianNa i. Amen.(*)
  BeritaTerkait
  • Jamita Evangelium, 28 Oktober 2018 (90 tahun Sumpah Pemuda) Minggu XXII Dung Trinitatis "Huria Mangulahon Ulaon Parasinirohaon" (Jesaya 58: 4-12)

    5 bulan lalu

    Sian Parsameanta: Pdt Dr Robinson ButarbutarUlaon parasinirohaon solhot do i tu hajolmaon. Molo taida angka donganta jolma mian manang mangolu di bagasan sada kondisi ni ngolu na tung maol situtu, mad

  • Pamingkirion tu Parsiranggutan di Ekklesiologi HKBP di Rapot Pandita HKBP Oktober 2017

    2 tahun lalu

    I. Pamuhai Di Sinode Godang HKBP September 2016 na salpu, ruas ni sinode do ahu songon Plt. Direktur Sikkola Pandita. Disi tangkas do soara ni bahat parsinode asa diamandemen sistem pamil

  • Jamita Evangelium Minggu XVI Dung Trinitatis 1 Oktober 2017, Mateus 21: 23-32 : "Mananda dohot Mangulahon Lomo ni Roha ni Debata"

    tahun lalu

    Di sejarah ni hajolmaon na mar-Debata i, sai adong do sian tonga-tonga nasida na dipillit, dipatujolo, dipasangap jala diturgashon gabe angka pangajari, natua-tua tiruan, uluan, nang  angka malim

  • Jamita Evangelium Minggu XVII Dung Trinitatis 8 Oktober 2017, Jesaya 5: 1-7 "Parbuehon ma na denggan."

    tahun lalu

    Oleh: Pdt Dr. Robinson Butarbutar, Dosen STT-HKBP, 081262472015.1. Adong do opat panurirang na di panurirangonnasida na manggombarhon bangso ni Debata i , Juda, songon hau anggur na, ala so marparbueh

  • Jamita Evangelium Minggu XXI Dung Trinitatis 5 Nopember 2017: Mika 3: 5-12 Pasombu Jahowa Paturehon Ngolum

    tahun lalu

    Oleh: Pdt Dr Robinson Butarbutar, Ketua Rapat Pendeta HKBPMansai urgen do jamita na dienet sian buku ni Panurirang Mika di tonga-tonga ni hajolmaon di tingki on, ndang marimbar di tonga-tonga ni huria

  •   komentar Pembaca
    Copyright © 2019 Pelita Batak Online. All Rights Reserved. Design by. heriweb